Markus 2
2
Yesus nafngamone mangamluktwar sa
2:1-12
(Mat. 9:1-8; Luk. 5:17-26)
1Lama ni lerar fir a ne rsak, Yesus nbali I far kote Kapernaum. Mpe tomwatar na iane rdengar ibar feti Yesus nbali I far Ni das lo. 2Ne tomwatar yadin rma ma rafburat sir na Ni das a ne, ma rasesekan sir ti nait fofolat souny terik ma to ain. Ne Yesus naftutu Ratu Ni ngribatnir ber sir. 3Noak ma lolone natanuk e, tomwatar fat rabare mangamlukut na mpeluk ma rose ma ror i ber Yesus. 4Nempa tomwatar yadin mpa to bise ma rti dalam ma ror i ber Yesus. Iane nwayat ma ror i ma rfangat far bubungan, ma rbanril daftar#2:4 Tomwat Israelar ni dasar e to nir bubungan ma rata motak. Ma na das a ne burit e sir rose fnite far bubungan das. Sir rabali ompak ror jerami ma rose fen daftar. Ma mangtan bubungan a ne rlole balkar a na bab, rlonran katutun tenir na das, betno ral daftar a ne la rtaup. ma ntulu Yesus a ne, betno rtolar mangamlukut ne nor ni mpeluk na sounlury. 5Noak ma Yesus nsalan ma rose farane, I nafai feti sir ralele desar I ma bise ma nafngamone mangamlukut a ne. Mpa nfalak ber mangamlukut ne, “Amo, klwure nim salar lo.” 6Mangaftutu Musa ni faretar ketnir ramtoran iane nbal. Noak ma rdengar ma Yesus nfalak farane, sir raenrat na dalmir, 7“Tomwate ye to namtaut ma natanuk desar! I nfalak farane iane feleles farlan ma nafbwere Ratu lo. To tomwate fen lese ma bise ma nlure tomwatar nir salar, lan Ratu.” 8Nempa Yesus nafai desar nir andanwar a ne. Mpa nfalak, kmi mdyaun farane e to nangafel. 9Nof a kmi e impe ma merawe: kfwalak, “Klwure nim salar lo, nre kfwalak feti Mpwote ko ma mwal nim mpeluk ma mpwan?” 10Nempa lere ye kuftutu ber a kmi nema mifai feti, na saryamprene ye Yakw, Tomwate Anaky, Ningw kuase ma klwure tomwatar nir salar. Ne I nfalak ber mangamlukut a ne, 11“Mpwote ko, mwal nim mpeluk a ne ma mbwali ko!” 12Ne tomwate ne npote desar i, ma nal ni mpeluk ma nti burit. Tomwatar monuk ma rsalan farane, rampriang desar ma rdangin Ratu ma rfalak, “To lain sa ma tsalan ngrie farye fuky!”
Yesus ntar Lewi ma nlarat I
2:13-17
(Mat. 9:9-13; Luk. 5:27-32)
13Mpene Yesus nti twemul Galilea seriny a nbal. Ma tomwatar yadin dedesar rma ma rakmat I, ma naftutu sir na iane. 14Noak ma Yesus nmpan nof a ne, I nsalan Lewi Alfeus anaky ma namtoran ain ma rtak ulbati na. Ne Yesus nfalak ber i, “Mlwarat Yakw.” Mpe Lewi namdir ma nlarat I. 15Lama Yesus nfalak farane I nor Ni manglartar rti Lewi ni das ma rtame. Noak ma rtame e, tomwatar yadin rma ma rtame ror sir a nbal fali rlarat Yesus. Sir a ne mangtak ulbatyar ma tomwatar ma rfalak sir feti tomwat salar a ne. 16Mangaftutu Musa ni faretar ketnir ma rlarat Farisyar nir anftutwar a ne ramin iane nbal. Noak ma rsalan ma Yesus ntame nor mangtak ulbatyar, ma tomwatar ma rfalak sir feti tomwat salar a ne, sir rfalak ber Ni manglartar, “Safema mir tuangguru ne ntame nor mangtak ulbatyar ma tomwat salar ye?” 17Noak ma Yesus ndengar farane nfalak ber sir, “Tomwatar ma to rafanas to ranriak dokter, lan mangafansar; Yakw kmwa e to ktwar tomwatar ma rase feti to nir sal, nempa Yakw kmwa ber tomwat salar nema rtate nir salar a ne.”
Yesus Ni anftutwar to naordeng nor Yahudyar nir yayatrwar
2:18-22
(Mat. 9:14-17; Luk. 5:33-39)
18Na ler sa e Yohanes mangadiris ni manglartar ma tomwat Farisyar rpuase. Ne tomwatar ketnir rma ma rakmat Yesus ma rfalak, “Yohanes ni manglartar ma tomwat Farisyar e rpuase ma safema Nim manglartar e tate?” 19Mpa Yesus nfalak tnyanuk pupule ber sir farye, “Yakw ye farlan merwan mangafsaw beberyar sa. Ma Ningw manglartar farlan merwan mangafsawe ne tbwarnir. Noak ma ni festa nika e, tbwarnir a ne to rtame e? La rtame nre! Fali i lolone nor sir. 20Nempa keta nait ni tewat ma tomwatar ral merwan mangafsaw beberi ne nof sir. Na lere ne betno to rtame.” 21Ma Yesus nal tnyanuk pupule nbal ber sir farye: Tomwatar to ral maloly beberi ris la raban nir rabit wangim. Fali farlan rtefe rabit a ne, keta maloly beberi ris a ne nalulun, nwayat ma rabit ma raban a ne ntafal ma ntarbis silai. 22Feleles farlan anggur. Tomwatar to rbui anggur beberi na lufw kulit wangim. Fali noak ma anggur ne ni lalabusar rmadas e keta nafyatak lufu ne, nwayat ma lufu ne ntarbis ma anggur ne ntarbui. Mpa anggur beberi e ka tbui na lufu beberi nbal.
Anftutwar na Yahudyar nir ler Sanari
2:23-28
(Mat. 12:1-8; Luk. 6:1-5)
23Na ler sa na tomwat Yahudyar nir ler Sanari, Yesus nor Ni manglartar rmpan ralyole let gandum. Ne Ni manglartar rusir gandum ne ma rane. 24Ne tomwat Farisyar ketnir rfalak ber Yesus, “Mswalan Nim manglartar a ne! Safema sir rlangas tetetkar ma Ratu nal ber Musa ne ma rkarya na ler Sanari?” 25-26Ne Yesus nfalak, “Ali, kmi to mbyaca safe ma rai Daud nose luryain a ne noak ma Abyatar neluk Mangsomp Silai e? Noak a ne rai Daud nor ni tomwatar ramlafar ma to sasaf ma sir rane. Mpa i nti Ratu Ni befak dalam ma nal rotyar ma rsompe ne lo ma nane, betno i nal ber ni tomwatar a nbal. Safo nof tetetak agame e, lan mangsompar ma bise rane rotyar a ne. Nempa to tomwate fen lese ma nfalak feti safe ma rai Daud nose ne sale.” 27Ne Yesus nfalak, “Ratu ntetak lerar sa ma neluk ler Sanari ber tomwatar fen nir ngamone. Ma to ntetak ma tomwatar rose ler Sanari la nose suse sir. 28Mpa Yakw, Tomwate Anaky, Ningw kuase ma ktwetak safe ma tomwatar rose nre to bise ma rose na ler Sanari.”
Markert nå:
Markus 2: YMD
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
