Markus 15
15
Tomwatar ror Yesus ber Pilatus
15:1-15
(Mat. 27:1-2; 27:11-26; Luk. 23:1-5; 23:13-25; Yoh. 18:28; 19:16)
1Ni bobolisin desar e mangsomp ulnir, mangfaret Yahudyar, mangaftutu Musa ni faretar, ma mangtetak agamar monuk rafburat sir ma rfat ma lese ma ral tetetak mamate ber Yesus. Ne rluan tomwatar ma rkete Yesus, betno ror I ber Pilatus. 2Ne Pilatus nenrat Yesus, “Ko ye Yahudyar nir Rai e?” Ne Yesus nfalak, “Au, koko ko ma mfwalak farane.” 3Ne mangsomp ulnir rfalak kabanir yadin la rfasale Yesus. 4Ne Pilatus nfalak a nbal ber Yesus, “Mdwengar, sir rfalak kabanir yadin na Ko la rfasale Ko ma safema to mufdiat Ko?” 5Nempa Yesus namlin motak, nwayat ma Pilatus nampriang.
6Na tomwat Yahudyar nir ler silai Paskah mpane e, Pilatus biase nalin tomwatar sa nof sel nlarat tomwatar yadin nir mpempeang. 7Na noak a ne tomwatar sa ngarany Barabas. Barabas ye ma rnau i a na sel numur tomwat walyetar ketnir fali sir rbangal mangfaret Roma ma rose mimiri. Ma noak ma rose mimiri ne sir rfen tomwatar a nbal. 8Mpa tomwat ngayadin rma rakmat Pilatus ma rtak i ma ntate tomwatar sa nof sel farlan biase ma nose. 9Ne Pilatus nenrat sir, “Kmi mpyeang ma kwalin tomwat Yahudyar nir Ray ye ber a kmi e?” 10Pilatus nafai feti mangsomp ulnir ranrenre Yesus ber i fali dalmir maninik I. 11Nempa mangsomp ulnir a ne rfule tomwatar yadin ma rtak Pilatus nema nalin Barabas ber sir. 12Ne Pilatus nfalak ber sir a nbal, “Farlan farane e kmi mpyeang ma kose safe ber tomwate ma mfyalak feti Yahudyar nir Rai I ye?” 13Ne sir rafwayak, “Mswangwalu I!” 14Ne Pilatus nenrat sir a nbal, “Ali Ni sal safe?” Nempa sir rtafal ma rafwayak, “Mswangwalu I!” 15Pilatus nmpeang ma nafsenange tomwat ngayadin a ne dalmir mpa nalin Barabas ber sir. Mpe nanrenre Yesus ber suldadwar ma rsil a rbabal I ma rsangwalu I.
Suldadwar rkosy a rmalip Yesus
15:16-20
(Mat. 27:27-31; Yoh. 19:2-3)
16Mpe suldadwar ror Yesus far Pilatus ni istana ni ain sa ma biase e rafburat sir a na. Betno rtar monuk suldadw walyetar ma rafburat sir na iane. 17Ne ral rabit melawas weympuse daran la rfonak I. Ma sir ral katutun matdyemnir a ne sangnir ma rwanim makot matdyemin ma rnau na Yesus uluny. 18Lama suldadwar a ne rose farane rwayat I ma rfalak, “Ngamone ber tomwat Yahudyar nir Rai Ko!” 19Ma sir rayoli sir ma ral tetekan la rbabal uluny ma rdikat I. Ne rsangitil na Yesus sounlury nempa rose lole motak ma rsatngur ber I. 20Lama rawayat monuk I e, suldadwar a ne ralin rabit melawas weympuse daran a ne rof I, betno ral a rbali Ni rabit la rfonak I.
Tomwatar rsangwalu Yesus
15:21-41
(Mat. 27:32-44; Luk. 23:26-43; Yoh. 19:17-27)
Mpe ror I far kote burit ma rsangwalu I. 21Na dalamtene let e sir rtungan tomwat sa ngarany Simon. Simon ye nof kote Kirene. Ma angkir ber Aleksander radu Rufus. Na noak a ne I nose ma nti kote dalam. Ne suldadwar a ne romat i betno ribut i ma nabare Yesus Ni sangwalu. 22Ne sir ror Yesus far anir sa ngarany Golgota. Golgota ye isiny feti, “Ulbati Ain.” 23Ne sir ral anggur ma rabali ror mur#15:23 Mur ye katutun sa ma neluk obat. Ma biase tomwatar renum obat a ne e nir mngalar to maninik silai lo. betno ral ber Yesus ma nenum, nempa I namsoal. 24Ne sir rpaku Yesus na katutun sangwalu. Ma rose undi la rasaman Ni rabtyar.
25Noak ma rsangwalu I e, iane bobolisin fafa jam sembilan. 26Na Yesus Ni katutun sangwalu unrun e rarengi farye: “I ye tomwat Yahudyar nir Rai.” Sir rfalak farane ma neluk lole ber sir la rfasale Yesus nema rukun I.
27Sir rsangwalu I ror mangamnangar du, sa namin balisya fian ma sa e namin balisya bayal.
28[Sir rsangwalu I farane la rafdiat safe ma rarengi na Kitap Lelerap dalam: “Keta rose I a nbal farlan tomwat yatkar.”]
29Tomwatar ma rlanre ain a ne rarikan I ma rawawan ulnir a ma rfalak, “Hei, Ko ye ma mfwalak feti bise ma msose Ratu Ni Das Silai ma keta lerar tel e mufdiri mbwali. 30Farlan farane e no mtwompur mof sangwalu ne, ma mfwair a mbwali Ko!” 31Ma mangsomp ulnir ma mangaftutu Musa ni faretar ma ramin iane rarikan I a nbal. Sir rfalak, “Tomwat walyetar e nfair sir, nempa koko I e to bise ma nfair a nbali I! 32Farlan botuan feti Ray Silai I ma tomwat Israelar nir Rai ber I e, no tsalan feti ntompur nof sangwalu ne e nema talele I.” Ma tomwatar du ma rsangwalu sir ror I a ne rarikan I a nbal.
Yesus nmat
15:33-41
(Mat. 27:45-56; Luk. 23:44-49; Yoh. 19:28-30)
33Noak a ne lere nfat langit lo, nempa nuse ni kateman makrokap terik jam tiga. 34Ma na jam tiga ne Yesus nafwayak, “Eloi, Eloi, lama sabakhtani?” Isiny feti, O Ratu, Ko ye Ningw Ratu, safema mtwi a mtwate Yakw? 35Ne tomwatar ketnir ma ramin iane, rdengar ma Yesus nafwayak mpa rafalak ber sir, “No mdyengar, I ntar Elia.” 36Mpene tomwat sa nma e nonry kabanir sa ma nbalak spon, ma nsob na anggur manilu ma ntabak na katutun tubun betno nau na Yesus sukany nema nwokut. Ne nfalak, “La tdaf ma tsalan feti Elia nma ma ntolar I nre tate.” 37Ne Yesus nfalak nor liriny silai betno ntetak Ni sanawe. 38Noak a ne nbal maloly melabar ma ntikloi neluk sasake na Ratu Ni Das Silai dalam ne, ntarbis a nmpan du. 39Noak a ne suldadwar nir ulun namdir a na katutun sangwalu lebaban ma nsalan Yesus terik ma nmat. Ne nfalak, “Botuan, I ye Ratu Anaky!”
40Na iane nbal batar ketnir ma rsalan ngrie ne rof dodo motak. Sir a ne Maria Magdalena, Salome, ma Maria. Maria ye ma angkir ber Yakobus ma Yoses. 41Sir a ne ma rlarat Yesus ma rlangun I noak ma namin Galilea. Ma na iane bat walyetar yadin ror sir a nbal. Sir a ne ma rlarat Yesus nof Galilea ma rma Yerusalem.
Tomwatar rafonak Yesus
15:42-47
(Mat. 27:57-61; Luk. 23:50-56; Yoh. 19:38-42)
42Noak ma Yesus nmat a ne, iane lere ma tomwat Yahudyar rasusan sir la rdaf nir ler Sanari. Ma noak ne lere nfufw lo. 43Iane nwayat ma Yusuf ma nof kote Arimatea ne nafkoran dalamy, ma nti nakmat Pilatus. I nti ma ntak Yesus tenany, ma nafonak I. Yusuf ye mangtetak agamar sa i ma tomwatar ralang resi i. I ye nbal ma ndaf Ratu neluk Rai ma nfarete saryamprene. 44Noak ma Pilatus ndengar feti Yesus nmat e i nampriang desar. Mpa ntar suldadu ulun ma nenrat feti Yesus nmat botuan lo e? 45Lama i ndengar ibar nof suldadu ulun a ne, i ninrang Yusuf ma nal Yesus tenany. 46Mpe Yusuf nti nselir maloly buri ma kotkyan. Betno nti ntolar Yesus tenany nof katutun sangwalu, ma nal maloly buri ne la nbebe I. Nof a ne nti nfele Yesus na bangar sa. Bange ne namin lenir sa ma nfen ber baty silayar. Tomwatar rkal baty silayar sa ma neluk bange ne betno rsampir baty silayar sa nbal ma neluk epat. Ne Yusuf nlawe bati ne la nteri bange ne. 47Noak a ne Maria Magdalena ma Maria Yoses enany, rsalan ma rfele Yesus na ain a ne.
Markert nå:
Markus 15: YMD
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
