Markus 12
12
Tnyanuk pupule na tomwatar ma rkarya na let anggur
12:1-12
(Mat. 21:33-46; Luk. 20:9-19)
1Ne Yesus nasaur tnyanuk pupule ye ber mangsomp ulnir, mangaftutu Musa ni faretar ma mangfaret Yahudyar. Ne I nfalak, “Ler sa e tomwatar sa ntanam anggur na ni lete ma nose fakar a nbebar. Ne nkal lobang ma nose ain ma keta rferas anggur a na, ma nafdiri menara nbal. Lama nose monuk kabanir a ne nsewe tomwatar ketnir ma rajake lete ne betno i nti nus walyete. 2Nait ni tewat ma rtikar anggur bunir e, lete nruany ne nluan ni mangkaryayar sa ma nti nakmat tomwatar ma nsewe sir ma rajake ni lete ne nema ral ni wayat. 3Nempa sir romat mangkaryae ne ma rbabal i, betno rluan ma nbali i ma to nonry sasaf. 4Ne nluan ni mangkaryayar sa nbal ma nti nakmat sir. Nempa tomwatar a ne rbabal uluny ma namngal betno rafmweat i. 5Ne nluan ni mangkaryayar sa nbal ma nti nakmat sir, nempa rfen i. Mpe dedesar ma rose farane ber mangkarya walyetar a nbal, ketnir e rbabal sir ma ketnir e rfen sir. 6Ne lete nruany ne ndaun feti, ‘Keta klwuan ise ma nti a nbal?’ To kekes lo ma bait lan anakw mesan ma kwamis resi i ye. Mpe famudi e lete nruany a ne nluan anaky ma nti nakmat sir, fali ndaun feti keta ralang i! 7Nempa noak ma tomwatar a ne rsalan anaky ma nma e rafalak ber sir, ‘Kanak ye lo ma keta nonri monuk lete ye. Mpa mya ma tfen i, nema tonri monuk ni lete ye.’ 8Mpe romat i ma rfen i, betno ryebas i far kakyelap.”
9Lama Yesus nasaur monuk tnyanuk pupule ne I nfalak ber sir, “Noak ma lete nruany ne nbali i e, keta nose farpe tomwatar a ne? Botuan feti keta nma e nfen sir, betno nal lete ne ber tomwat walyetar.” 10Yesus nfalak ber sir a nbal, “Kmi mbyaca ayat ye na Kitap Lelerap dalam lo feti:
‘Bati ma tuknar a ryebas i,
lere ye neluk baty fakoran lo,’
11Safe-safe ma diat a ne, iane Ratu ninr Mangnrure nose.
Ma safe ma tsalan a ne nangafel desar.”
12Mangfaret Yahudyar rafai feti tnyanuk pupule ma Yesus nasaur a ne snyain sir. Iane nwayat ma rareke ma romat I, nempa sir ramtaut tomwat ngayadin a ne, mpa rti a rtate I.
Yesus naftutu tomwatar ma rbayar ulnir batin
12:13-17
(Mat. 22:15-22; Luk. 20:20-26)
13Mpe mangfaret Yahudyar rluan tomwatar Farisyar ketnir ma tomwatar ketnir ma rlarat Herodes ma rma ma rakmat Yesus. Sir rma ma rateman I ror ngengentar, nema farlan natanuk sale e bise ma romat I. 14Mpa rfalak ber Yesus, “Tuangguru, kam mafai feti Ko ye tomwatar sa ma mumlonry. Noak ma mfwatutu Ratu Ni dalamtene e to mumudim sasaf. Ma to mumtaut tomwate fen lese nbal fali to musalan sou. Mpa no mfwalak ber kam, nof kit ninr agame ni yayatrwar e, bise ma tbayar ulbatyar ber Kaisar nre tate?” 15Nempa Yesus nafai feti rose lole ma renrat I motak. Mpa nfalak, “Ali miteman Yakw e? No myal doit dinar sa ma kswalan.” 16Ne ral doit dinar sa ber Yesus. Ne I nenrat sir, “Ise walun ma ngarany na doit ye?” Ne rfalak “Kaisar!” 17Mpa Yesus nfalak ber sir, “Farane e, myal ber Kaisar safe ma Kaisar nie, ma myal ber Ratu safe ma Ratu nie.” Mpe sir rampriang ma rdengar safe ma I nfalak a ne.
Yesus naftutu na mangmwate ma nmorip a nbali
12:18-27
(Mat. 22:23-33; Luk. 20:27-40)
18Tomwatar ketnir rof faburat Saduki rma ma rakmat Yesus. Sir ye ma to ralele feti mangmwatar bise ma rmorip a rbali. Ne renrat Yesus, 19“Tuangguru, Musa narengi tetetkar ye ber kit lo feti: farlan merwanar sa nmat ma to anaky, ka merwane ne wainy nafsau nor sawany a ne nema nal anaky ber wainy ma nmat a ne lo. 20Na ler sa e, tomwatar itw ye awayar sir. Keyai nafsau nor batar sa, ne to anak a fuky e merwane ne nmat lo. 21Ne merwan kedua nafsau nor bate ne. Nempa to anak a fuky e merwane ne nmat a nbal. Ma merwan ketiga e feleles a nbal. 22Sir raitw a ne rafsau ror bate ne, nempa rmat monuk ma to angkir. Famudi e bate ne nmat a nbal. 23Nait ma Ratu nafmorip a nbali mangmwatar e, keta ise sawany ber bate ne? Fali raitw a ne rafsau ror i lo.”
24Ne Yesus nfalak, “Kmi mdyaun farane iane sale desar, fali kmi to mkyaul myal Kitap lelerap dalam, ma to mifai Ratu Ni kuase. 25Fali noak ma mangmwatar ma rmorip a rbali, keta tomwatar to rafsau lo. Nempa keta rmorip farlan malaektar na surga. 26Ali kmi to mbyaca na Musa ni kitap dalam a fuky e? Ma mpe myenrat feti keta mangmwatar a rmorip a rbali nre tate? Na Musa ni kitap dalam a ne kit tbaca feti Ratu natanuk nor Musa nof skiki-kakari ma nfolur a ne. Noak a ne I nfalak, ‘Yakw ye kweluk Ratu ber Abraham, Ishak ma Yakub ma rsatngur ber I a ne.’ 27Noak ma Ratu nfalak farane e, Abraham, Ishak ma Yakub a rmat lo, nempa sir rmorip rbali ma rmorip ror Ratu. Iane feti I to neluk Ratu ber mangmwatar nempa neluk Ratu ber mangmorpyar! Mpa safe ma mdyaun a ne sale desar.”
Yesus naftutu tomwatar na farete ma ubany desar
12:28-34
(Mat. 22:34-40; Luk. 10:25-28)
28Noak a ne mangaftutu Musa ni faretar sa namin iane nbal ma ndengar tomwat Sadukyar a ne rabali ngengentar ror Yesus. I ndengar ma Yesus nbali nir ngengentar a ne nangafel desar mpa nenrat I, “Nof Ratu Ni faretar monuk e faret mpe ye ma ubany desar?”
29Ne Yesus nfalak, “Farete ma ubany desar e farye: ‘Hei tomwat Israelar a kmi mdyengar fen ngamone! Ratu ma tsatngur ber I a ne lan lese.’ 30Ka mkyamis mir Ratu ma neluk mir Mangnrure ne myor dalmir kateman. Ma noak ma myose safe-safe motak ma mdyaun safe-safe motak e ka mfyatutu feti mkyamis I. Ma ka mkyamis I myor mir fakoran monuk.” 31Ma faret sa nbal farye: “Ka mkyamis tomwat walyetar feleles farlan ma mkyamis kmi a nbal. Mpa nof faretar monuk a ne lan faretar du ye ma ubany desar.”
32Ne mangaftutu Musa ni faretar a ne nfalak, “Tuangguru, botuan desar. Safe ma mfwalak a ne diat. Ni botuan e Ratu lan lese ma to ratw walyet. 33Botuan feti ka tkamis Ratu tor dalminrar kateman. Ma noak ma tose safe-safe motak ma tdaun safe-safe motak e, ka tfatutu feti tkamis I. Ma ka tkamis I tor ninr fakoran monuk. Ma ka tkamis tomwat walyetar farlan ma tkamis kit a nbal. Ma farlan tose tlarat faretar a ne, iane ma ubany desar nlengan nof snyompar monuk ma tapu ma tloik ber Ratu, ma nlengan nof snyomp walyetar a nbal.”
34Yesus nsalan mangaftutu Musa ni faretar ne ni andaun nangamon. Mpa nfalak ber i, “To dodo a nbal e ko mweluk Ratu Ni tomwate na Ni ain farete.” Lama nfalak farane to tomwate fen lese ma nbaran ma nenrat safe-safe nof Yesus a nbal.
Yesus silai I nlengan nof rai Daud
12:35-37
(Mat. 22:41-46; Luk. 20:41-44)
35Na ler sa e, Yesus naftutu tomwat ngayadin na Ratu Ni Das Silai. Ne I nenrat sir, “Safema mangaftutu Musa ni faretar rfalak feti Ray Silai ne nof dasdalam Daud?” 36Safo noak ma Ratu Smwangtany nkuase Daud, koko i a nfalak,
“Ratu nfalak ber ningw Mangnrur Silai:
Mumtoran na seringw fian ye,
terik ma kose ma Nim muswar monuk rsatngur ber Ko.”
37Mpa farlan Daud nfalak feti ni Mangnrure ber Ray Silai, nof mpe ma rfalak feti Ray Silai ye nof dasdalam Daud? Tomwatar yadin ma ramin iane rsenang resi ma rdengar Yesus Ni anftutwar.
Ka kete mlyarat mangaftutu Musa ni faretar nir langtwar
12:38-40
(Mat. 23:5-7; Luk. 20:45-47)
38Noak ma Yesus naftutu tomwat ngayadin e, I nfalak, “Ka mijake kmi myof mangaftutu Musa ni faretar. Sir rmpan e rmpeang lan ma rfonak rabit melaswar. Ma rmpeang ma tomwatar ralang sir a na nus ngayadin. 39Farlan rti das sampayang nre rti festayar e rmpeang lan ma ramtoran lury. 40Sir rfule bat somar ma ral nir dasebabe. Ma rsampayang e dodo rut la rteri nir adat yatkar. Mpa keta Ratu nukun sir maberat desar!”
Snyompe nof bat some ma nawatan
12:41-44
(Luk. 21:1-4)
41Na ler sa e Yesus namin Ratu Ni Das Silai dalam ma namtoran e nlosir babatak snyompe. Ne I nsalan tomwatar rnau nir dotyar na babatak snyompe dalam. Ma nsalan mangoskayar yadin ma rnau nir dotyar yadin a nbal. 42Ne I nsalan bat somar sa ma nawatan ma nma nbal. I nau ni doit gobngar du a na babatak snyompe ne dalam. Doit a ne lan rufuky. 43Ne Yesus ntar Ni manglartar ma nfalak, “Mdyengar fen ngamone: bat some ma nawatan ye nau doit yadin a nlengan nof tomwatar monuk ma rnau nir dotyar a na babatak a ne. 44Fali mangoskayar a ne ral nir dotyar rof nir kabanir ma nres. Ma bat some ne boloka nawatan, nempa i nal monuk ni dotyar ma npaki la nmorip.”
Markert nå:
Markus 12: YMD
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
