Yuanis 7
7
Si Yisus om kosusulodan Niyo ri
1Nopupus iri, miano yo si Yisus so Galilia musimpanou. Dai Iyo moingin musimpanou so Yudia so' pokipopotoyan Iyo nu wowaidon nu lobuw Yaudi ri. 2Iya iiri, oduruk-o puromi-romian nu lobuw Yaudi, nu Rami-Rami Mubosalag.#7:2: Rami-Rami Mubosalag: Siowan Kamus Kitab.#Ot 23:34; Pom 16:13 3Tongaro yo sono Iyo nu kosusulodan Niyo ri nu, “Owarong po mian Ko so Yudia, su' kosiou-a pudi lobuw dii nu koiran-iran waalon Mu no. 4Dai musuat ong posusut lobuw nu onu-onu waalon niyo ong moingin iyo obantug. Bang momaal Ko nu koiran-iran, subai niposiou Mu ya so lobuw suang,” koo. 5(Insan kosusulodan-a Niyo ri, dai ya nopoimaid so Iyo.)
6Sumombuto yo si Yisus nu, “Dai po nologa' iya pululi'an Ku dii, nga bang kou sombiya-biya ya. 7Dai ya rumoraayan so kou lobuw dai poimaid so Aku no, nga bang Aku, rumoraayan nosiro so' kiat so pontudukan Ku no, noilaan-o sono nosiro nu oraai gogoma'on nosiro no. 8Ian kou ya so rami-rami oono. Dai ya ong Aku mian#7:8: Dai ya ong Aku mian; so tinu-tinu solinan silaid, Dai Aku po mian. so' dai po nologa' pululi'an Ku dii,” koo si Yisus. 9Notangar-o po Niyo soko iri, mogolo yo Iyo so Galilia.
Minian si Yisus so Rami-Rami Mubosalag
10Nokoungkayas-o po kosusulodan Niyo ri mian so rami-rami ri, sumusuuto yo si Yisus ido-ido su' dai oimpa'an nu lobuw suang. 11Laid nu rami-rami iiri, diumo yo Iyo nu wowaidon nu lobuw Yaudi ri om mududuato yo nu, “Siombo gaam Iyo,” koo.
12Osuang sono lobuw muburung-burung suat so Iyo. Kuwai mutangar nu, “Lobuw owarong-a Iyo,” koo, nga kuwai ya mutangar nu, “Dai! Iyo yo po moongaakal,” koo. 13Nga d'ado ido kooku' poimbosang mutangar suat so Iyo, so' lumaa' nosiro nu wowaidon nu lobuw Yaudi ri.
14Mintonga' yo rami-rami ri, mosuwo yo si Yisus so natad nu Waloi Maayo nu Kinoringan montuduk. 15Noiranan sono wowaidon nu lobuw Yaudi ri om mutongaro yo nu, “Siombo gaam kinoguru'an nu lobuw iitu no nu ono? Dai ya boto insan notudukan Iyo nu tinongaran nu Kinoringan,” koo.
16Sumombuto yo Iyo nu, “Nituduk Ku yo po iitu okon ko pontudukan Ku kondiri, nga kiat so Kinoringan, ono minonuu' so Aku no. 17Isai momaal nu koinginan nu Kinoringan, iyo yo su koilo nu pontudukan Ku iitu nu kiat so Kinoringan intawa kiat so Aku kondiri. 18Isai montuduk kiat so pomikiran niyo, mokibontugon-a, nga isai yo po mokibontugon nu minonuu' so iyo, opongoorapan om dai mongaakal. 19Tinudukan kou yo ni Musa nu Ukum, nga d'ado ido so kou mongowaid nu ono so' pokipopotoyan muyu Aku,” koo.
20Sumombuto yo ongo lobuw-i nu, “Mulou Ko! Isai ka su mokipopomatoi so Ikau?” koo.
21Sumombuto yo Iyo nu, “Ido-ido ya koiran-iran winaal Ku nu Runat Pongintoronan om noiranan kou yo sono nu iri. 22Sinuu' kou ni Musa musunat, om insan Runat Pongintoronan-a, monunat kou ya. Sobana yo, sunat oono okon-a ko kiat so si Musa, nga odu aki muyu gulu ri su minongowaal nu soko ono.#Pgn 17:10; Ot 12:3 23Bang monunat kou nu lolaing so Runat Pongintoronan tayon ong kopongowaid nu Ukum ni Musa suat so sunat, nokuro su mungot kou nu momali' Aku so Runat Pongintoronan?#Yns 5:9 24Ikod kou yo ponginsala' nu lobuw ong dai muyu oudio po laid onu su obana om dai obana,” koo si Yisus.
Si Yisus-o Raja Nijanji nu Kinoringan?
25Nopupus iri, kuwai sono lobuw wokon so Yirusalim minutangar nu, “Okon ka ko si Yisus-o padu nosiro potoyon-i? 26Siowi muyu bo nga mundii-dii Iyo mutangar so lobuw suang om d'ado ya poingkoyod so Iyo. Kalu noilaan-o nosiro nu Iyo yo su Raja Nijanji nu Kinoringan. 27Nga bang kologa' yo Raja Nijanji nu Kinoringan, d'ado ido koilo ong siombo inungkiaton Niyo, nga Lobuw iitu, noilaan toko ya inungkiaton Niyo,” koo.
28Laid ni Yisus montuduk so Waloi Maayo nu Kinoringan, linumuap-a Iyo mongoduat so nosiro nu, “Bana ka nu otondu'an muyu ong isai Aku, om oilaan muyu ong siombo inungkiaton Ku? Okon-a ko konia Ku lumoga', nga konia nu minonuu' so Aku no om opongoorapan Iyo, nga dai muyu Iyo otondu'an. 29Aku yo su kotondu' so Iyo, so' Iyo yo su minonuu' so Aku om nai yo so Iyo inungkiaton Ku,” koo.
30Pinokiookoman sono Iyo nu wowaidon nu lobuw Yaudi ri, nga d'ado ido kooku' so nosiro mongkuyut so Iyo so' okon po ko lila' nu Kinoringan. 31Osuang so nosiro poimaid sono so Iyo, om mutangar nu, “Bang kologa' Raja Nijanji nu Kinoringan, kaalib ka koiran-iran waalon Niyo ko' koiran-iran winaal nu lobuw iitu?” koo.
Pinokiookoman si Yisus
32Norongou-a nu lobuw Parisi ri pinuburung-burungan nu lobuw suang-i suat so si Yisus. Indadi, monuuo yo nosiro om wowaidon nu imam-i tinu-tinu moongipat so Waloi Maayo nu Kinoringan mongaakom so Iyo. 33Nga mutongaro yo si Yisus nu, “Sontagal Aku po itu mido-ido so kou. Opupus ono muli' Aku yo so Kinoringan, iri minonuu' so Aku ri. 34Modium kou ya so Aku, nga dai muyu Aku osambat, so' dai kou kologa' so pinolakan Ku no,” koo.
35Mutongar-tongaro yo sono wowaidon nu lobuw Yaudi ri nu, “Siombo gaam ianan Niyo su dai toko Iyo osambat? Mian ka Iyo so bandar wokon pinolakan nu lobuw okon ko Yaudi montuduk so nosiro? 36Onu ka orati nu tangar Niyo nu, diumon toko pona Iyo nga dai toko ya osambat, om dai toko ologa' pinolakan Niyo no?” koo.
Sungoi koponaak nu kowiawan
37Runat kopupusan om oogot so rami-rami iiri, mundiio yo si Yisus om lumuapo yo nu, “Isai lugangon, lumoga' ya tuui so Aku monginum.#Ot 23:36 38Soko itu yo tinangar so Buuk nu Kinoringan suat so Aku nu, ‘Isai poimaid so Aku, kuwai sono lumuyu' sungoi koponaak nu kowiawan kiat so inawo niyo no,’ koo ri,” koo si Yisus.#Yis 47:1; Ja 14:8 39Orati nu tinangar Niyo iiri, suat so Atod nu Kinoringan otorima' nu lobuw poimaid so Iyo no. Iya oono, dai po nokotaak Atod nu Kinoringan, so' dai po nokopululi' si Yisus so surga.
40Osuang lobuw nokorongou nu pinutangar ni Yisus iiri, om kuwai so nosiro mutangar nu, “Bana ya nu Iyo yo su poo'abar nu Kinoringan,” koo.
41Wokon-i mutangar nu, “Iyo yo su Raja Nijanji nu Kinoringan,” koo.
Nga kuwai ya mutangar nu, “Okon-a ko ungkiat so Galilia Raja Nijanji nu Kinoringan,#7:41: Raja Nijanji nu Kinoringan, kolompukan mutangar, Masias. 42so' nokosurat-o so Buuk nu Kinoringan nu, Raja Nijanji nu Kinoringan oono, solusuk ni Raja Daud, om puonakon so Baitlahim so polak ni Daud gulu ri,” koo.#2 Som 7:12; Mi 5:2 43Indadi, tumugulo sono lobuw-i musosagka' suat so si Yisus. 44Kuwai mokipopongaakom so Iyo, nga d'ado nokooku' mongkuyut so Iyo.
Dai poimaid so si Yisus wowaidon
nu lobuw Yaudi
45Nokopululi' yo po ongo moongipat nu Waloi Maayo nu Kinoringan, iri sinuu' popongaakom so si Yisus, duato yo nosiro nu wowaidon nu imam om lobuw Parisi ri nu, “Nokuro su dai muyu inowit Iyo tuui?” koo.
46Sumombuto yo nosiro nu, “Atuuk! Moilo sobana Iyo. D'ado ido koinong nu koo'ilo Niyo montuduk,” koo.
47Sumombuto yo lobuw Parisi ri nu, “Kou pona bo gaam nga nopalid-a Niyo. 48D'ado po ido wowaidon toko intawa toko lobuw Parisi poimaid so Iyo. 49Nga lobuw suang iitu nopoimaid so Iyo dai koilo nu Ukum ni Musa, indadi ukumon nosiro nu Kinoringan,” koo.
50Mutongaro yo si Nikudimus, lobuw Parisi baya' sinumambat so si Yisus nu,#Yns 3:1-2 51“Mongowaid nu Ukum toko, dai kowasa mongukum nu lobuw ong dai po oudio nu kisala' ko' d'ado ya,” koo.
52Sumombuto yo nosiro nu, “Tumapan ko bo gaam so Iyo inong mu lobuw Galilia. Bosaa ya so Buuk nu Kinoringan ong kuwai ka poo'abar nu Kinoringan lumoga' kiat so Galilia ko' d'ado,” koo.
Woinoi nosunsungan lumapa'
[ 53Indadi dai ya sono inakom nosiro si Yisus, om mulio yo nosiro ido soido,
Markert nå:
Yuanis 7: TomPWPgLgPn
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2023 (Active), Wycliffe Bible Translators, Inc. All rights reserved.
