Mataayo 6
6
Ameeyigisyo inguru ya okusakira abhataka
1“Mwiyangarire! Mwasiga okukora ebhikorwa bhya ekisi korereki abhaanu bhabharore. Araabha mukakora kutyo, mutariramira echiyaanwa choonechoone okusooka kw‑Isomwana unu ari mu‑rwire.
2“Mbe, ukasakira abhataka, waasiga okuraasisya abhaanu chinu owukora. Abheerimaanya nibho abhakora kutyo mu‑nju ja ameekofyanyo ga Abhayawudi na ku‑njira, korereki abhaanu bhabhakumangye. 3Ni chimari enibhabhwira ati, bhaamarire okuramira omuyeero gwebhwe gwone. Nawe ukasoosya echiyaanwa, okubhoko kwawo kwa ebhumoosi kwasiga okumenya chinu okubhoko kwawo kwa ebhuryo okusoosya, 4korereki obhusakisi bhwawo, bhubhega bhwa mbisike. Mukakora kutyo, Esomwana unu kaarora mu‑mbisike, arikuyaana echiyaanwa.
Ameeyigisyo inguru ya okusabhwa Nyamuwanga
(Ruuka 11:2‑4)
5“Omwanya gunu omusabhwa Nyamuwanga, mwasiga okubha rwa abheerimaanya. Abheene abheendaga okusabhwa bheemereeguuyu mu‑nju ja ameekofyanyo ga Abhayawudi na ku‑sonde ja ku‑njira korereki abhaanu abhandi bhabharore. Ni chimari enibhabhwira ati, bhaamarire okuramira omuyeero gwebhwe gwone. 6Tari omwanya gwa okusabhwa, ingira mu‑chisago chaawo, na wigare orwigi. Niwo usabhwe Esomwana unu ari mu‑mbisike. Niwo Esomwana unu kaarora jinu ejikorekena mu‑mbisike, arikuyaana echiyaanwa.
7“Omwanya gunu omusabhwa, mwasiga okusubhiirira subhiirira emisango ja kutyo era rwa kutyo abhanyamanga abhakora. Abheene abheetogera ati, bharitegeresibhwa ku‑bhwafu bhwa emisango jeebhwe. 8Mwasiga okusabhwa rwa kutyo abho abhakora, kwa okubha Esomwana unu ari mu‑rwire amenyere jinu omwenda, noorwo omwanya gunu omubha muchaari okumusabhwa. 9Kurwa ejo, emwe musabhwega Nyamuwanga nimwayika ati,
‘Raata weeswe unu uri mu‑rwire,
risiina ryawo rikusibhwe.
Obhukama bhwawo bhuuje.
10Okwenda kwawo kukorekane mu‑chaaro munu,
rwa kutyo okukorekana mu‑rwire eyo.
11Uchiyaane bhuri rusuku ebhiryo bhyeswe.
12Uchifwire echigongo ebhibhiibhi bhyeswe,
rwa kutyo eswe wone echifwira echigongo bhanu abhachikayira.
13Waasiga okuchiingisya mu‑maregeejo,
nawe uchichungure okusooka ku‑Mubhiibhi urya,
[kwa okubha obhukama, amanaga na rikusyo,
ni bhyawo akajaanende koone!
Jibhe kutyo!]’”
14Yeesu ˆnaagenderera okubhabhwira ati, “Araabha mukafwira echigongo abhaanu ebhikayo bhyebhwe, Esomwana unu ari mu‑rwire wone aribhafwira echigongo ebhibhiibhi bhyemwe. 15Nawe araabha mutakufwira echigongo abhaanu ebhikayo bhyebhwe, kutyokutyo Esomwana unu ari mu‑rwire ataribhafwira echigongo ebhibhiibhi bhyemwe.
Ameeyigisyo inguru ya okwiyima ebhiryo
16“Omwanya gunu omwiyima ebhiryo, obhusu bhwemwe bhwasiga okweresya obhusurumbaaye rwa kutyo abheerimaanya abhakora. Abheene abhasurumbara korereki abhaanu abhandi bhabharore ati, bheeyimire ebhiryo. Ni chimari enibhabhwira ati, bhaamarire okuramira omuyeero gwebhwe gwone. 17Nawe ukeeyima ebhiryo, iyosya obhusu bhwawo na okubhambaga amafuta ku‑mutwe gwawo, 18korereki abhaanu bhaasiga okumenya ati, wiyimire ebhiryo. Esomwana unu ari mu‑mbisike, niwe amenye era. Niwo Esomwana oyooyo unu kaarora jinu ejikorekena mu‑mbisike, arikuyaana echiyaanwa.
Ameeyigisyo inguru ya obhuniibhi
(Ruuka 12:33‑34, 11:34‑36, 16:13)
19“Mwasiga okwibhiikira ebhibhiikwa ku‑chaaro kunu, anu amayeenje na obhutaretare ebhinyamura na abheefi abhafumura orwigi korereki bheebhe. 20Tari mwibhiikire ebhibhiikwa mu‑rwire anu amayeenje na obhutaretare bhitakunyamura na abheefi bhatakufumura korereki bheebhe. 21Okubha anu mwibhiikiiye ebhibhiikwa bhyemwe, awo niwo emyoyo jeemwe wone jiribha.
22“Ameeso gari rwa idara ku‑mubhiri. Araabha ameeso gaawo agarora kisi, omubhiri gwawo gwone ogubha na obhweru. 23Nawe, araabha ameeso gaawo ni marwaye, omubhiri gwawo gwone ogubha na echisuute. Mbe, araabha obhweru bhunu bhuri mu‑mwoyo gwawo bhukayinduka okubha echisuute, echibha echisuute chaafu muno!
24“Atari‑wo omukosi unu kaatura okukorera abhaami bhabhiri ku‑mwanya gumwi. Aakakora kutyo, kaatura okusoka omwami umwi na okwenda owundi, amwi okuyaana echibharo owumwi na okugaya owundi. Kurwa ejo, mutakutura okukorera Nyamuwanga na obhuniibhi ku‑mwanya gumwi!
Ameeyigisyo inguru ya okuyaya
(Ruuka 12:22‑31)
25“Mbe enibhabhwira ati, mwasiga okuyaya inguru ya obhurame bhwemwe ati, murirya ki, murinywa ki, amwi murifwara ki. Angu, murabhiiywe ati, obhurame bhuri na indiyo okukira ebhiryo, na omubhiri guri na indiyo okukira emyenda? 26Muringire jinyonyi. Jitakuyamba, jitakugesa na jitakwibhiikira ebhiryo mu‑chitara. Noorwo kutyo, Esomwana unu ari mu‑rwire, kaajiriisya. Mbe, mukeenganyirisibhwa na jinyonyi, emwe muri na indiyo muno okukira jinyonyi. 27Niga mw‑imwe unu kwa okwinyaakirira omwene kaatura okwiyongesya‑ko noorwo esaa rimwi ku‑bhurame bhwaye?
28“Niki chinu echikora nimunyaaka inguru ya emyenda? Muringire obhwaso kutyo obhumera. Bhutakukora emirimu noorwo bhutakwibhariirira emyenda. 29Enibhabhwira ati, noorwo omukama Seremaani mw‑ikusyo ryaye ryone, ꞉ataafwaye kisi rwa obhwaso obhwo! 30Mbe, araabha Nyamuwanga kaafwafya amanyaasi ga mw‑ibhara ganu gari‑wo reero, na mutondo nigeeswa mu‑muriro, angu, Nyamuwanga oyo ataribhafwafya, emwe abha eriikirisya ritooto?
31“Kurwa ejo, mwasiga okuyaya nimwibhuusyaga ati, ‘Echija okurya ki?’ Amwi ati, ‘Echija okunywa ki?’ Amwi ati, ‘Echija okufwara ki?’ 32Ebhiinu ebhyo bhyone, nibhyo abhanyamanga abhanyaakirira. Nawe emwe, Esomwana unu ari mu‑rwire, amenyere kisi ati, omukena ebhiinu ebhyo bhyone. 33Woori emwe, muyenje okwamba obhukama bhwa Nyamuwanga#6:33 Obhukama bhwa Nyamuwanga. Ku‑meeresyo amaafu, ringira mu‑Meeresyo inguru ya Emisango Emikomeeye. na obhurengeresi bhwaye, na ebhindi ebhyo bhyone Nyamuwanga kaja okubhoongesisya. 34Kurwa ejo, mwasiga okuyaya inguru ya mutondo, kwa okubha mutondo iri na jinyaako jaayo. Bhuri rusuku, ruri na jinyaako jarwo jinu jirwiyire.
Markert nå:
Mataayo 6: jit
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2023, Wycliffe Bible Translators, Inc. All rights reserved.
