Jenesis 46
46
Jekop bu kë tafa tëglelëmebë enëneme Isip lifewa tlemume
1Jekop bubë iniwa wesibi sle totome na bu nonino name nëbale name Isip life elë tlemume. Bu Berseba lifewa fwa tulelëme na Jekop bubë bolijayabë Aisakbë Gotome, sipsip kleli ahujume temu totometle, Goto sinikibo hëhë nalëgleme. 2Na kwe klabë, Goto Jekopme nimitelë mëta fata tletle. Na we tlole, “Jekop, Jekop.”
Na Jekop tafu tëtatle, “Wa, bo mana ekë tafa nelë.”
3Na Goto gali tle, “Bo Goto. Bo jubë blijayabë Goto. Ju Isip lifewa egujume uli asa ele. Tokwafe bo melë nogotomëme, bo jume nëgaitëme na bo jubë bisemlenime feilawa onehome fata nogotomëme. 4Isip lifewa bona weife nëgiyume. Na jubë bisemlenime ebë lifewa bo ita sei nëgelëfamëme. Tokwafe ju gli eglena, Josep jume bu gwa lëgëtamëme matëmatë mëta.”
5Na Jekopbë iko nëbale, Jekopme kalë loha wesibi mëta gwa mototokwakla. Na bubë one na nëbale name mata gogwa motokwaka. Isip life mago eso ho Fero, bu kë kalë loha wesibi tlëme, bu këna muguja namëglame. Na kwe Jekop bu Berseba life kile totle. 6Na bu bulmakau kleli mëtleluma. Na Kenan life mago kë glo mëtlabë wesibi na iniwa mëtehouja. Na Jekop bubë nëbalena bolijafujunina, Isip lifewa iniwa mutuja. 7Bu memutuja lamëtla. Bubë bowenenino na bokonino na bolijafujunino buna iniwa mutuja.
8Ebë Jekopbë nëbalebë weniji buna Isip lifewa kë mutujabë. Bubë iko nëbabë weniji, abwa nëbabë weniji, Ruben. 9Na Ruben boweneninobë weniji melë, Hanok na Palu na Hesron na Karmi. 10Na Simeon boweneninobë weniji melë, Jemuel na Jamin na Ohat na Jakin na Sohar na Saul. Saulbë bota bu Kenan life mago mëse. 11Na Livai boweneninobë weniji melë, Gerson na Kohat na Melali. 12Na Juda boweneninobë weniji melë, Er na Onan na Sela na Peres na Sera. Kwe Er na Onan bu ëtani Kenan life mëta wagigli mëtelo. Na Peres boweneninobë weniji melë, Hesron na Hamul. 13Na Isakar boweneninobë weniji melë, Tola na Puva na Iop na Simron. 14Na Sebulan boweneninobë weniji melë, Seret na Elon na Jalel. 15Ruben na Simeon na Livai na Juda na Isakar na Sebulun, na bu Leabë nëbale Jekopbë mëse. Lea bu nemosa nëba mata fata tëta, bubë weniji Daina. Na Leabë nëbale na bolijawani bu këniji fata mëtla 33.
16Na Gat boweneninobë weniji melë, Sifion na Hagi na Suni na Esbon na Eri na Arodi na Areli. 17Na Aser boweneninobë weniji melë, Imna na Isva na Isvi na Beria. Na bubë mësenëbabë weniji ebë Sera. Na Beria boweneninobë weniji melë, Heber na Malkiel. 18Jekop Silpana kë nëbaneni mëtëgelobë nëbale na bolijafujuni këniji fata mëtla 16. Silpa ebë Leame wegeme egaitamëbë mëse. Bume manawa wege eletë. Ëtani Laban bu Silpa Leame tlë. Laban ebë Leabë bolijaya.
19Na Jekopbë mëse Resel, bu iko nëbale tlemalë, bubë weniji Josep na Benjamin. 20Na Josep, Isip life mëta tafa tëglena, Asenatme mana sei tle. Asenat bu Potiferabë boko. Potifera bu Heliopolis life magobë fëso hi wesibi ahujume ahujume lëglekëfebë ho. Asenat bu iko nëbale tlemalë fata totometle. Bubë weniji, Manase na Efraim. 21Na Benjamin boweneninobë weniji melë, Bela na Beker na Asbel na Gera na Naman na Ehi na Ros na Mupim na Hupim na Art. 22Jekop Reselna kë nëbaneni mëtëgelobë nëbale na bolijafujuni këniji fata mëtla 14.
23Danbë bowene jowa. Bubë weniji, Husim. 24Na Naptali boweneninobë weniji melë, Jasel na Guni na Jeser na Silem. 25Jekop Bilhana kë nëbaneni mëtëgelobë nëbale na bolijafujuni këniji fata mëtla 7. Bilha ebë Leame wegeme egaitamëbë mëse. Bume manawa wege eletë. Ëbame Laban bu Bilhame Reselme tlë. Laban ebë Reselbë bolijaya.
26Na Jekopbë nëbale na bolijafujuni buna Isip lifewa kë mutujabë, bu këniji 66. Kwe bu Jekopbë boweneninobë oneme tabëi hana mëtla. 27Na Josep no bu tlemalë iko nëbale fata totome, Isip life mëta. Na kë tlemalë nëbale na Jekopbë nëbale na bolijafujuni Isip life mëta këniji mëtabëya 70.
Jekop na bubë nëbalena bolijafujunina Isip life mëta tafa mëtla
28-29Jekop Judame afina jine tlële, bu Josepme no lëlëleme Isip lifate mago na buna misijome bolijayame Gosen life mëta esune nalëglëleme. Na Jekop na nëbale na bu Gosen lifewa fwa mutulana, Josep bubë wege home gali tlome, “Sobo bobë kalë loha wesibi sagli elëtëname.” Bo ayame këna hwi nanujuwelëlëme. Bu këna Gosen lifewa tuju, bolijayame hwi nalogloleme. Na Josep bolijayame yafe hwi tlole na bume hwë tlële na ye tlelële. Meye tëglelëlebëë, na tokwafemu kuju tëbe. 30Na kwe Jekop Josepme gali tlole, “Jume wafi hwi noglëme nëgeme na bo melowene nanelë, ju mana tafa ele. Bo lalowa gli nëgelëme.”
31Na kwe Josep bolijahanime na bolijayabë ilawa mago onehome gali tlome, “Bo Isip life magobë eso home, megali nugujuwelëlëme, ‘Bobë afani na ayabë ilawa mago oneho, bu Kenan life kile mutula na bu bo belë fata mëkakija. 32Kë ho bu sipsip kleli mëlëkefëma. Na bubë sipsip kleli na bulmakau kleli mata melesuma. Na bubë iniwa wesibi mata mehweija.’ 33Na tokwafe eso ho some we loglëyona na takune loglëyona, ‘Sobo fëye wege fa etokweflone.’ 34Sobo megali eglolome, ‘O eso ho, sebo sipsip kleli na bulmakau kleli nëglëmabë enëne. Sebo tokwetokwëmume nëgena, kë wege mana fa tëtagila. Sebobë afunino mata sipsip kleli memëtlëwagima.’ Sobo eso home kë galime gali eglolona kwe bu some hana hehë lëgletëyome na megali lëglëyome, ‘Sobo Gosen life mëta lalowa tafa ekekome.’ Isip life mago ho bu sipsip kleli mëglëmabë home tole hana mëletëma. Këme gali tlome, ‘Sobo Gosen life mëta fwa lalowa tafa ekekome.’ ”
Markert nå:
Jenesis 46: NCE
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2023 (Active), Wycliffe Bible Translators, Inc. All rights reserved.
