Jenesis 39
39
Josep bu Potifarbë lo mëta tafa tle
1Na Ismael enëne Josepme Isip lifewa mëtlelula, na Potifarme yo motlola, baliti sëneme. Baliti këna glo namëglame, Josep bubë wege manawa fa nalëgëtatleme. Na Potifar bu eso ho Ferobë wege fa tëtakefëtle. Na Potifar bu eso ho Ferobë plismanëbë eso ho tafa tletëme. Na bu iniwa, eso ho Ferobë lo mëta sei mëtlëkefla, wame ho lime. Fero bu Isip life mago eso ho tafa tletëme. 2Goto Josepme lataitale, këme nëgeme Josepbë wege lalowamu, këme lëbetle. Na Josep Potifarbë lo mëta tafa tle. 3Potifar bubë wege hwi tlotle na bu melowene tle, “Bubë iniwa wege lalemu lëbetlefe. Goto lëgaitaleme nëgeme.” 4Na bu Josepme fleflesu tletle na gali tlole, “Bobë iniwa wesibi tafa elelëmetënë.” 5Josep Potifarna weife tafa mëtelo na këme nëgeme Goto Potifarbë ilawa mago home ululu sle tëtagume, na bubë iniwa wesibi mata na bubë nuju mago wesibi mata ululu sle tëtagumetle. 6-7Na Potifar gali tlole, “Bobë iniwa wesibibë eso home tafa eletenë.” Na Potifar bubë iniwa wesibi hana tutune tletëme. Bu hi wesibime fwa lowene tle.
Na Josep bu tokwëfo tafawa kofene tle na Potifarbë no mana kë memaune tlële. Bu kalëlego homu na bu lale klisomu nëgeme. Na gali tlole, “Ju mana esi, bona ni nanëgebome.”
8Kwe Josep tole hana tletëmu na gali tolë, “Bome bihe kë wesibime nane gali tlonë. Weye. Matëbe. Bome wagali tlonë, bubë wesibibë esoho tafa nëgelëbëme. Na bubë lo mago wesibi hana tutune lëletëme. 9Bo ebë lobë bolijaya ho ha nëtabë. Bu bome iniwa wesibime hehë hana lëletenë. Jume fwamu hehë lëletenë. Sebo melë fëyeme nëgelomene. Matëbe. Kwe bo melë nëgelëna, bo Gotome tëbo nogotlëme.”
10Na itaita mëse awi, gali tlokwefle, buna ni namëgebome.
Kwe Josep gali tle, “Matëbe.” Na loliwa hana tujutë.
11Tokwafe li olëna, Josep lowa tëkaklu, bubë wege fa nalogotleme. Na fli wege ho hana tafa mëtla. Buwa tafa telule. 12Na Potifar no bu belë tisi tle na ëho mëta fa tetokwakile na gali tlole, “Esimo. Bona ni nanëgebo.” Kwe ëho bubë toba mëta lakilewa tletë na latlëbukakuwa. 13Na mëse melowene tletle, “Josep walëlëboukakufe, na ëho tobana mana tehwatle.” 14Na home we tlome na mitisitëya na bu gali tlome, “Sobo aholokwane elo. Bobë ho Hibru mago home sebobë lo eli kë tëglesulebë seme tëbo lalëtana. Bome lisëme yafe tou lëtanë, kwe bo mana kë jakle nelë. 15Bo afëflei nëgelëme nëgeme bu mana kë lëlëboukaku. Na bu ëhowa bobë toba mëta kile lële.”
16Na Potifar no ëho mana gwa tëtakefëtle na bohe lowa mana tisi. 17Na boheme të tëtatle, “Hibru mago home, ju kë tëglesulebë bome lisëme yafe tou lëtanë. 18Kwe bo feilawa jiyakle noglolëme nëgeme, këme lëlëboukaku. Na bu ëhowa bobë toba mëta ekë kile lële.”
19Na no kë gali të tëtatle na Josepbë eso ho enisusu tletle. 20Na Potifarbë wege enëne Josepme fa mototla na kalabusu lowa tuku mëtla. Eso ho Ferobë kalabusu enëne këme kë tafa mëglekefëyabë lowa mëtlelula. 21Kwe Goto Josepme lataitale. Këme nëgeme bubë wege lalemu tëbetle. Kalabusu enenebë eso ho fleflesu tletle. 22Na Josepme këme gali tlole, “Ju iniwa kalabusu hobë eso home tafa eletëme.” Na Josep bu kalabusu hobë wege hwi tlotëme. 23Na Goto Josepna mëtëtabo na bubë wege taitatle. Na këme nëgeme kalabusu lo bolijaya bu wesibi tutune hana tletëme. Josepbë wege lalemu nëgeme.
Markert nå:
Jenesis 39: NCE
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2023 (Active), Wycliffe Bible Translators, Inc. All rights reserved.
