Mateo 4
4
Ãña pyahããshu Jesús
1Haivi Espiritu Santo raha Jesús yvy ikoambaipi, haipe Ãña pyahããshu verã. 2Hasa 40#4:2 40 ñandeva ĩñeepe: “Urũndy opa iarãmova”. ara mbaimba houva, haivi ñandu ñymbahykue. 3Haipe Ãña ñymbojahe Jesús pyahãã verãrã heishu: Nde hai Tũpa tayrã, ereshu kova ita tikoshi pãhã. 4Tẽvã Jesús heishu: Mbyparahavape hei: “Ha'ẽã pãhãrei iko verã kuareta; koñeĩ opaite ñee õhẽva Tũpa juruivi”. 5Haivi Ãña rahashu tenta Tũpa ña'ãpova tenta kyamba'ẽvãpe, hupishu tũpao japytere, 6hãrã heishu: Ãñete nde hai Tũpa tayrã, epo yvype; shara mbyparahavape hei: “Tũpa mboupo jokuevare ñyngareko ndyrehe verã. Ndypysypo reta potaã ita ndepy ryrokuaherã”. 7Jesús heishu: Mbyparaha rãnga jyve: “Avy pyahããshu Ñandeja, nu Tũpa”. 8Koñemahea Ãña rahashu yvyturusu japytere, haipe mbyheshaka opaite tenta yvy ĩãrẽ'õre, hareka haire hĩmbipekue. 9Hãma heishu: Opaitevapo ameẽndekui kovare, rĩñesu shynonde hareka shemombairã. 10Jesús heijyshu: Satanás, ekuashe koivi, Mbyparahavape rãnga hei: “Ñandeja nu Tũpa hỹnondepo rĩñesu, hareka ha'ẽĩpo rẽmombai vasu”. 11Hãrã Ãña syryshi Jesús, haipe Tũpa jokuevare jyveru ñyngarekohe verãre.
Jesús õñepỹrõ mbeu Tũpa ĩñee kavi
12Jesús henduma Juan mbyperesoarã, ohojy Galileape. 13Tynonde oho tenta Nazaretpe, haivi oho pyta Capernaumpe, pente tenta ẽvã yyvasu hỹmbeype, Zabulón hareka Neftalí ñymoña hãndi vekuare iko jyreaipi. 14Hokava jehu iko verã hekope kavi Tũpa ĩñee mbeu'ia Isaías jykuatiape mbypararã vekua: 15“Tenta Zabulón, hareka Neftalí jy yvype, pytava yyvasu kyty yysyryva Jordán hyvache, tenta Galilea haimba Judiovare ikovape. 16Kuaretare ikova pỹntuape, hesha tivisha sapeva; hendyva sapeshu manova rãĩmi ikovare”. 17Haivivaĩ Jesús õñepỹrõ ñimiñeerã, hei: “Peijy Tũpa jykoty, shara huvisha vasu vate arapy'õ ryheva kõõĩma'ẽ”.
Jesús hẽno urũndy pira nohẽ'iare
18Jesús vata oho yyvasu Galilea hỹmbeipirã, hesha Simón, Pedro he'iashua hareka tyvy Andrés. Hai reta rãnga pira nohẽ'iare, yype mombo ñynoĩ jypysare. 19Jesús heishu reta: “Pei shimi'ĩrũ, ajapopo pyndyhevi kuaretare nohẽ'i verã”. 20Haipevãĩ opa heja jypysare, hareka oho hãndi. 21Jesús oho poshyjyrã heshajy pente'ovare Jacobo hareka Juan, Zebedeo tayre. Haire tuu hãndi jakatu ñynoĩ jypysare kanoape. Jesús hẽnoshu reta, 22hãrã haipevãi heja reta kanoa hareka tuu, haivi jyraha hãndi.
Jesús mynguera hetavape
23Jesús opa vatahupi Galileape, Judiore ñymbatyseape pyrỹmboihe Ñee kaviva mbeu Mburuvisha vasurã vate araivi ouva ryheva, kuareta ñymbairasy vekuare opa mynguera. 24Jesús kuaaha opa Siriaipi. Hãrã veruashu opaite marãrãgãtu ñymbairasy vekuare, mbaiposhy ĩmereare, kuakuamba'ia hareka vatamba vekuare. Jesús opaite mynguerashu reta. 25Heta'ẽ kuaretare Galileaivi, Decápolis, Jerusalén, Judea hareka Jordán juri'õre ohova Jesús haykue.
Markert nå:
Mateo 4: TPJ
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
©2023 LETRA Paraguay
