Mateo 10
10
Jesús hekapy 12 mboi verã
1Jesús hẽno 12 mboireare, meẽshu mbaikatu, mohẽ verã mbaiposhyre, hareka mynguera verãre mbairasy marãrãngatu vekua. 2Kova hai 12 apostol reta hee: Tynonde'ẽ Simón mbyheajyva Pedro, hareka tyvy Andres; Santiago, hãndi tyvy Juan, Zebedeo tayre; 3Felipe, Bartolome, Tomas, Mateo kyrypoti mbatyse'iare Roma pevarã, Jacobo Alfeo tay; hareka Tadeo; 4ĩme'ẽjy Simón cananita ryheva, hareka Judas Iscariote, Jesús pysykashu vekua.
Jesús mondo 12 mboireare oparupi mbeu verãre ñee kaviva
5Jesús mondo kova 12 õre opama mbeu kavishu retarã: Avy pekuakui haimba Judiore hentaipi, hareka tenta Samariaipi. 6Pekua pyheka avishare opa kañy vekua, Israelre henta retaipi. 7Pekua, hãrã pymbeu: “Huvisha vasu vate arapy'õ vãhẽserima ou”. 8Pymynguera ñymbairasyvare, pymbyhykovejy manovare, pijoheshu kuru porãmba'iare hareka mbaiposhyre pymohẽ. Pee rãnga mẽ'ẽhareiipe kova mbaikatu, hãrã piporyrã avy pekora ĩãrẽkui. 9Avy pyraha pindijehe ita verava ijuva, ita vera tĩĩva hareka kobre, 10hareka vosape pehupi peu verã ryheve, pymondevare pimbivohy verã, hareka pyndypasare, avy pyraha yvyra pirãtãsehea; shara mba'apo'ia karuñoĩpo. 11Pyvãhẽ tenta, hareka tentamire õĩpirã, pyheka haipe kuareta heko kaviva hareka pypyta hentape pehẽjypeve haivi. 12Hãma pichemarã pymarãndupo: “Pyavapy tõĩ kova oope”. 13Haipe'õ kuaretare hentape pynymyvãhẽ kavirã, pyhejashu reta ko ñymymarãndu pyavapy, haire mba'ẽãshurã timejype. 14Hãrã pymyvãhẽseã, hareka pynyrẽndusearã, pẽhẽshi hoka oo, hareka tentamire'õĩvi, hãrã pepy pymytymoshi yvytimbokue.#10:14 Mbai heshaha verã tentare pevarã a'ãmo rojambare Tũpa ĩñee. 15Ãñete hai pee: Ñimbivache arape, ñunũpa haire pevarã teitevepo hoka tenta Sodoma hareka Gomorrape vekuaivi.
Jesús mboireare hasa'asypo
16Pikuapo, avisha rãĩmi she apyrỹmondo avara vasure mbytepe. Hãrã piko kuaapo mboi rãĩmi, hareka pykasure rãĩmi heko poshymbaa. 17Pingareko pijehe, shara kuaretare piniñonopo mburuvishare ipope, punũpaha verã Judiore ñymbatyseape. 18Pyndyrahapo mburuvishare mbory'õre hỹnonde, hãrã pee pijetapo shyrehe, hareka opaite jyrojamba retape 19Tẽvã pynymẽ'ẽhama mburuvisha ipoperã, avy pejepy'apyhe perepi verãre maĩrã pere verã rãĩmi, shara Tũpa meẽpope ñee pere verã rãĩmi. 20Shara peeãpo pijeta, Tũpa Espiritu Santo rupiipo pijeta. 21Ĩmepo'ẽ tyvyre meẽva jukaha verã; terure meẽva tayre jukaha verã; tyrayre pũãpohe tuure juka verã. 22Kuaretare pyndyreshatããpo shimimboiperã, tẽvã ara japyapeve tãnta jyroja shyreheva, ohojepepokui. 23Hãrã kuaretare pynymoña pente tentaivirã, ynga tentape pekuajy. Ãñete hai pee, kuareta Tay oujypo ndeiteri opa kavi pyvata tenta Israelperã. 24Mba'ety pente mbo'eharea vateve'ẽshia pyrỹmboi'õ, hareka mba'ety jokuehareirea vateve'ẽshia pyrokue'õ. 25Mbo'eharea vy'apo pyrỹmboi'õ rãĩmi'irã hareka jokuehareirea pyrokue'õ rãĩmi ikorã. Hãrã oo ija he'iahe Beelzeburã, mãrãrapo kyrãã he'ia jyveshu henta ĩrũre?
Mbavaivirapo jakyje
26Hãrã avy pykyjeshi kuaretare, mba'ety ñemiãpe'õ kuaahamba verã, hareka mba'ety ñemĩva heshahambaa verã. 27Ko she haipeva pỹntuape, pymbeushu kuaretare ara kõĩvape; she papysapeĩ haipeva, oo ĩãrãvive pysapuke pymbeu. 28Avy pykyjeshi pyndyreteĩ juka verã, shara katuãpo juka pyndyrykove; koñeĩpo pykyjeshi Tũpa, katu jukava pyndyrykove hareka pyndyrete tata vasupe. 29Ovendehããra mõkue vyra kyrypoti mbovyĩ'ia repy? Tẽvã penteãpo mano Teru he'ĩãrã. 30Tũpa opa kuaa pepetẽi pãnkahaa, papavape. 31Avypo pykyje, shara pee mbai vasuveshi vyramire hetava.
Tũpa ñomimbavare
32Ĩmerãẽva mbeuva kuaretare hỹnonde shyrehe jyrojava, ambeupo jyveshu Sheru vate arapy'õ hỹnonde. 33Ĩmẽrãẽa kuaretare hỹnonde “Shiñomi'ia”, ãñomipo jyvekui Sheru vate arapy'õ hỹnonde.
Jesús rehe veru ñimbijao
34Avy pimoã she ai ko yvy'ĩãrẽ aruva pyavapy, aiã aru verã pyakavi, koñeĩ ñimbivavyva ryheva jyve hareka jyhasa'asy. 35She ai, tyray ikokaviveama hãndi verã tuu, kuñatãi ishy hãndi, hareka tyreko ĩme ishy hãndi. 36Hãrã pynyrẽnta'ĩrũ retaipo opa pyndyreshatãã.
37Tuu hareka ishy haihuve shyheviva, katuãpo ikoshi sha'ãporã. Ĩme'ẽ haihuve shyheviva tay hareka tajy, katuãpo ikoshi sha'ãporava. 38Hãma jukurusu hupimbaa hareka shĩmi'ĩrũrã, katuãpo sha'ãporãva. 39Hãrã hykove haihuva, hekyhaposhi, Shyrehe jyrojava hareka hykove haihumbava, hipitypo tykove opamba.
Japoava mbyhepyajypya ryheva
40Ĩme'ẽ pynymyvãhẽva, she shymyvãhẽ jyve; hãrã shymyvãhẽva, myvãhẽ jyveshu shymbouva. 41Ĩme'ẽ mỹvãhẽva ko Tũpa ĩñee mbeu'ia hairã, Tũpa mbyhekoviañoĩposhu Tũpa ĩñee mbeu'ia mbyhekoviashuva rãĩmi. Ĩme'ẽ myvãhẽva kuimbai heko kavivarã, Tũpa mbyhekoviajyposhu ko kuimbai heko kaviva Tũpa heiva japo'ia rãĩmi. 42Ĩme'ẽ meẽva yy rỹ'ỹsami amboi'areaperã, ãñete hai pee Tũpa myngoviañõĩposhu.
Markert nå:
Mateo 10: TPJ
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
©2023 LETRA Paraguay
