मत्ती 5
5
लदोक्तु ॱस्येप्पे केच्च्य ५:१–७:२९
ॱसोदी च्येम्म घयेत् १-१२
1येशुगी रोरङ् झ्यीस्से ॱसने दीदु मी छेत्मीत् यो़प्प थोङ्नी, खोङ्गी ॱलोप्टुक् दीबरङ् ठीक्न लदोक् च्यीक्ल जेन देप्प बेत्। ॱनी ॱलोप्टुक् दीब खोङ्गी लोनल देप्प बेत्। 2हुनी ॱलोप्टुक् दीबल खोङ्गी हीन्दुक् सीन्न ॱलोप्स ज्यब बेत्।
3ॱसीम्ल तोङ्डी़ ज्यक्केन् घयेत् ॱसोदी च्येम्मल ॱनेगेन् बेगो। घन्ड हीन् सीन्न हुब तेङ् यी़गी ज्यागक्की मीस्सीर् हीम्बल युङ्गेन् बेत्। 4ॱसीम्ल दुक्पे च्योय यो़प्प घयेत् ॱसोदी च्येम्मल ॱनेगेन् बेगो। घन्ड हीन् सीन्न हुबल को़न्ज्योक्की ॱसीम्स तोङ्गेन् बेत्। 5मी ॱनोम्ज्युङ् च्येम्म घयेत् ॱसोदी च्येम्मल ॱनेगेन् बेगो। घन्ड हीन् सीन्न हुबल जम्बुलीङ् दीरङ् हुबे फक्ल टो़क्केन् बेत्। 6ढङ्बी़ छ्योल तोब धङ् कोम्ब यो़प्प च्येम्म घयेत् ॱसोदी च्येम्मल ॱनेगेन् बेगो। घन्ड हीन् सीन्न हुब डङ दी को़न्ज्योक् च्यानी युङ्गेन् बेत्। 7ॱङीङ्ज्यी च्येम्म घयेत् ॱसोदी च्येम्मल ॱनेगेन् बेगो। घन्ड हीन् सीन्न हुबल को़न्ज्योक्की ॱङीङ्ज्यी जेक्केन् बेत्। 8ॱसीम् चङ्म च्येम्म घयेत् ॱसोदी च्येम्मल ॱनेगेन् बेगो। घन्ड हीन् सीन्न हुबल को़न्ज्योक् ज्याज्ये ॱनोङ्गेन् बेत्। 9डीक्च्याब च्येम्म घयेत् ॱसोदी च्येम्मल ॱनेगेन् बेगो। घन्ड हीन् सीन्न हुब को़न्ज्योक्की भीज बेत् सीरे मीङ् युङ्गेन् बेत्। 10ढङ्बी़ लेगी ढीक्ल दुक्प अयेक्प नोङ्गेन् घयेत् ॱसोदी च्येम्मल ॱनेगेन् बेगो। घन्ड हीन् सीन्न हुब तेङ् यी़गी ज्यागक्की मीस्सीर् हीम्बल युङ्गेन् बेत्। 11ङे ढीक्ल खीत्रङ्ल मी ॱयोङ्मागी ॱमो़म्बी़त् धङ् दुक्प अयेक्प तङ्न खीत्रङ्ल ॱएलमे तम् अयेक्प लप्न युङल खीत्रङ् ॱसोदी च्येम्मल ॱनेगेन् बेगो। 12हीगी ढीक्ल खीत्रङ् गव झ्यीन गेस गन्दीक्म झ्यीज्यीत्। घन्ड हीन् सीन्न हीगो गुरे ढीक्ल खीत्रङ्ल तेङ् यी़दु ॱल छ्यीम्मु थोप्केन् बेत्। कलुङ् ॱस्यो़क्केन् घयेत्ल अक् मी घयेक्की धङ्बुनीरङ् नुक् दीरङ् झ्यीन दुक्प अयेक्प तङ्न युङ बेत्।
छ धङ् मेङ्ग ॱङीगी पी १३-१६
13जम्बुलीङ्दु खीत्रङ् छ डस्सी युङ्गेन् बेत्। छे ढुव दी येन खुर्न ॱनी, हुगो यङ् घन्दुक् झ्यीन छगुवल सोगेन् ॱनी? हुगो घो ॱमीत् छ्यो़त्ल टप्नर बेत्। हुल कङ्लीप् दोलीप् झ्यी तङ्न आक्, डीक् डोगेन् बेत्।
14ॱनी च्यीक्नी खीत्रङ् जम्बुलीङ्गी मी घयेत्ल मेङ्ग युङ्गेन् बेत्। लदोक्ल यो़प्पे सार् घन्दुक् झ्यीन कक् छुगेन्? 15बत्ती पर्नी हुनी हुगो ॱनो़च्च्ये घबुक् ज्यप्न स्योक्को़प्प बेक्कक् ॱनी? खीम्गी मीजङ् कुरीक्ल मेङ्ग युङ्ज्ये यो़प्पल बत्ती केन स्योक्सल स्योक्केन् हीन्डो न ॱनी। 16हुगो डस्सी खीत्रङ्गी मेङ्ग दी इक् मी घयेक्की घुङ्दु बर्च्ये यो़प्प झ्यीज्यीत्। हुनी खीत्रङ्गी गये ले घयेत् दी मी कुरीक्की थोङ्नी, हुबे हस्सो़त् तेङ् यी़न स्युगेन् खीत्रङ्गी यप्ल तो़प्प पुगेन् बेत्।
छ्यो़डीम्गी ढीक्ल ॱलोप्स १७-२०
17छ्यो़डीम् धङ् कलुङ् ॱस्यो़क्केन् घयेक्की ॱसुङ्रप् मीप्पल तोङ्दु ङ युङ हीन्डो ॱनो़ब खीत्रङ्गी ॱमत् ॱसम्। ङ हुगो क डुप्तु सीन्न युङ हीन्। 18ङे खीत्रङ्ल गन्दीय ॱस्येत् योङ्। तेङ् यी़ धङ् ॱस जम्बुलीङ् हीगो यो़स्स्यीङ् भोर्ल, छ्यो़डीम् हुगो जेङ् ता ता थुक्ल हुगी इक्टु छक् च्युङेत्मु च्यीक् इक् मीत् येब दो़क्केन् बेत्। 19हीगो झ्यीनी छ्यो़डीम्गी क च्युङेत्मु च्यीक्ल ॱसी़ ॱमीत् चीयेक्क, ॱनी मी ॱयोङ्माल आक् ॱमत् ची सीन्न ॱलोप्स ज्यक्कुक्क हुगो तेङ् यी़गी ज्यागक्तु च्युङ्स्योल ॱनेगेन् बेत्। ॱनी यङ् छ्यो़डीम्गी क घयेत्ल ॱसी़ चीन युङ्गुक्क, ॱनी मी ॱयोङ्माल आक् ची गोगेन् बेत् सीन्न ॱलोप्स ज्यक्कुक्क हुगो तेङ् यी़गी ज्यागक्तु छ्यीयाल ॱनेगेन् बेत्। 20ङे खीत्रङ्ल ॱस्येत् योङ्। छ्यो़डीम्गी चयेलम धङ् फरीसी घयेत्ले खीत्रङ्गी तेम्बा को़न्ज्योक्की क धङ् धम्ल चीन युङ्न मेन्द, तेङ् यी़गी ज्यागक्ल स्युक् ॱमीत् छुगेन् बेत्।
ॱसीम् ॱसो़स्स मीप्पे ॱलोप्स २१-२४
21धङ्बु पुबु ॱमुमु घयेत्ल ॱनङे कल हीन्दुक् सीर थो़ङ्गेन् बेत्।
मी ॱमत् ॱसो़च्च्यीत्। (थो़म्ब २०:१३)
ॱनी ॱसी़ मी ॱसो़क्कुक्क हुगोल मीप्सो़क्की छ्येप्प फोक्केन् बेत् सीर खीत्रङ्गी ॱह घोन यो़क्केन् बेत्। 22ॱनी ङे ॱसुम्ब खीत्रङ्ल हीगो सीक्केन्। मी ॱसी़ रोरङ्गी पी़न्ज्या नङ्गी पी़न् च्यीक्ल खोङ्डोक् झ्यीगुक्क हुगोल ठीम् च्येत्न छ्येप्प को़बल ओ़ब युङ्गेन् बेगो। हुनी यङ् मी ॱसी़ रोरङ्गी पी़न्ज्याल व रङ् घुलोक्प बेत् सीन्न सीगुक्क हुगोल यहुदीगी छ्यो़गी छोक्तेन् छ्यीम्मुदु ठीम् च्येत्न छ्येप्प को़बल ओ़ब युङ्गेन् बेगो। हुनी यङ् मी ॱसी़ व रङ् घुर्च्यक् ॱस्येगु बेत् सीन्न सीगुक्क हुगोल मी बर्से ॱनलल तङ्न छ्येप्प फोक्पल ओ़ब युङ्गेन् बेगो।
23हीगो झ्यीनी को़न्ज्योक्ल रङ्गी छ्यक् छ्यो़प्प पुबे यङ्ल पी़न्ज्या रङ्ल ॱसीम्ब नन यो़प्प रङ्गी ॱसीम्ल ढेन्सो़ झ्युङ्न ॱनी, 24रङ्गी हुगी छ्यो़प्प पुज्येम दी हुदु छ्यो़प्प पुस दीगी लोदु स्यक्नी हुनी रङ् हुगी पी़न्ज्या दी च्याल डीक्च्या झ्यीत्तु ज्युक्। हुनी युङ्नी क, छ्यो़प्प दी पु।
25रङ्ल खम्ज्यु ज्यक्केन्दङ् ठीम्सल डोये यङ्ल लम्गी कीप्पदु रङ् हुगोदङ् डीक् छुब झ्यीज्यीत्। स्येन् हुगी रङ् ठीम् च्यो़स्सल च्यो़गेन् बेत्। हुनी हुगी ठीम्बो़न् दीगी रङ्ल ठीम् च्येत्न गोराबे लक्ल ची टेत्न हुनी रङ् चो़ल्ल ॱलुक्केन् बेत्। 26ङे खीत्रङ्ल गन्दीय ॱस्येत् योङ्। रङ्ल फोक्पे छ्येप्प दी पयीसक् च्यीप्टे च्यीक् इक् मीप्प, जप् छर्नी मेन्द, रङ् हुनी थो़न् ॱमीत् छुगेन् बेत् सीन्न ॱसुङ बेत्।
ॱयोङ्दङ् ङीगेङ्गी ढीक्ल २७-३२
27ॱनी ॱयोङ्दङ् मत् ङीज्यीत् सीरे क हीगो खीत्रङ्ल ॱस्यो़च्च्ये यो़क्केन् बेत्। (थो़म्ब २०:१४)
28ॱनी ङे ॱसुम्ब खीत्रङ्ल हीगो ॱस्येत् योङ्। भुमुल मी ॱसी़ छ्ये ज्युक्च्ये ॱनो़बे सुर्मीक् तगुक्क हुगी ले हुगो ॱसीम् दीगी हुगोदङ् ङी छर हीम्बल डोगेन् बेत्। 29हुन्दुक् झ्यीन रङ्गी ॱमीक् ॱयेबे झ्यीत् झ्यीक्की रङ् ङे लम्नी छ्यी़दु ची़क्को़त्न, हुगो तो़ल्ल पुर्लोङ्। सी़बु छङ्म ॱनलल छरले त बोर हुन्दुक् झ्यीबे सी़बी़ यल्लक् च्यीक् घल मीत्न मीत्। 30ॱनी यङ् रङ्गी लक्प ॱयेबे झ्यीत् झ्यीक्की रङ् ङे लम्नी छ्यी़दु ची़क्को़त्न, हुगो दुम्ल पुर्लोङ्। रङ्गी सी़बु छङ्म ॱनलल छरले त बोर सी़बी़ यल्लक् च्यीक् घल मीत्न मीत्।
31ॱनी यङ् हीन्दुक् सीरे क च्यीक् ॱनङ्न यो़क्केन् बेत्।
छ्योगो़ रोरङ्गी छ्युङ्म ॱलो़ तोङ्ज्ये ॱनो़न छो पत्तर ढीन भुमु दील बीन्न ॱनी, हुनी घी छुगेन् बेत्। (ठीम्लु २४:१)
32हीगी ढीक्ल ङे खीत्रङ्ल हीगो ॱस्येत् योङ्। मी ॱसी़ रोरङ्गी छ्युङ्म ॱयोङ्दङ् ङीबे ढीक्ल मेम्ब, धो़न् ॱयोङ्गी ढीक्ल ॱलो़ तङ्न ॱनी, हुगी रोरङ्गी छ्युङ्म दी ॱयोङ्दङ् ङीब झ्यीब हीम्बल सोगेन् बेत्। ॱनी हुगो छ्योगो ॱसी़ ॱनमल ठीक्को़दङ् हुगी ले हुगो ॱयोङ्गी ॱनम ठीक्प हीम्बे दीक्पल डोगेन् बेत्।
ॱन झ्यीच्च्ये मीत् युङे ढीक्ल ३३-३७
33ॱनी यङ् धङ्बु पुबु ॱमुमु घयेत्ल ॱनङे कल हीन्दुक् सीर थो़ङ्गेन् बेत्।
रङ्गी ॱनगम् झ्यीब दी ॱएलमल ॱमत् तोङ्ज्यीत्। चोव ज्यीन्दक्तङ् ॱनगम् झ्यीबे केच्च्य दी डुप् गोगेन् बेत् सीर खीत्रङ्ल ॱस्यो़च्च्ये यो़क्केन् बेत्। (लेवी १९:१२)
34हीगी ढीक्ल ङे खीत्रङ्ल हीगो ॱस्येत् योङ्। खीत्रङ्गी यो़च्चो़त् डेन् ज्यप्न ॱन ॱस्युली मत् झ्यीज्यीत्। तेङ् यी़ डेन् ज्यप्न ॱन मत् झ्यीज्यीत्। हुगो को़न्ज्योक्की ॱवङ् च्येम्मे स्युडी बेत्। 35जम्बुलीङ् डेन् ज्यप्न ॱन मत् झ्यीज्यीत्। हीगो को़न्ज्योक्की स्यप् पो़स्स बेत्। यरुशलेम् डेन् ज्यप्न ॱन मत् झ्यीज्यीत्। हुगो ज्याबु छ्यीम्मी़ सार् बेत्। 36खीत्रङ् ॱसोस्सोरङ्गी गो डेन्न ॱन मत् झ्यीज्यीत्। घन्ड हीन् सीन्न रङ्गी गो़ टत्तोक् च्यीक् कप्पुल तोङ् ओङ् ॱमीत् छुगेन् बेत्। नक्पुल तोङ् ओङ् ॱमीत् छुगेन् बेत्। 37खीत्रङ्गी तम् दी हीन्न ॱनी, हुल हीन् दीरङ् झ्यी। मेन्न ॱनी, हुल मेन् दीरङ् झ्यी। हीले ॱल्हक्मु सीन्न ॱनी, हुगो दी़त्ङेन् हुगो ङो़गी हीम्बल डोगेन् बेत्।
ङेल्लेन् च्यो़ज्ये मीत् युङे ढीक्ल ३८-४२
38ॱनी यङ् हीन्दुक् सीरे क च्यीक् यो़क्केन् बेत्।
ॱमीक् च्यरे लेल्ल ॱमीक् दीरङ् च्यर् गोगेन् बेत्। ॱसो च्यक्पे लेल्ल ॱसो दीरङ् च्योक् गोगेन् बेत् सीर खीत्रङ्ल ॱस्यो़च्च्ये यो़क्केन् बेत्। (थो़म्ब २१:२४)
39हीगी ढीक्ल ङे खीत्रङ्ल हीगो ॱस्येत् योङ्। मी ङेम्बल खीत्रङ्गी ङेल्लेन् ॱमत् च्यो़ज्यीत्। रङ्गी डम्ब ॱयेबल डम्ज्यक् बेन्ज्युङ्न ॱनी, ॱयेम्म दी इक् जीच्च्यीत्। 40ॱनी यङ् मी ॱसी़ रङ्गी ली़गी नङ् घो़ दी ठोक्च्ये ॱनो़न खम्ज्यु ज्यक्कुक्क हुगोल रङ्गी ली़गी छ्यी घो़ दी इक् बील्लोङ्। 41ॱनी यङ् मी ॱसी़ खेरक्की रङ् ढोगङ् च्यीक्की ॱसने थुक् ठीक्कुक्क ॱनी हुले ॱल्हक्मु रङ् ङीङ्गङ् च्यीक्की ॱसने थुक् ज्युक्। 42ॱनी ॱसु रङ्ल ॱनङ् सीत्तु युङ्गुक्क हुल बीन्ज्यीत्। ॱनी ॱसु रङ्ल भुलीन् कीदु युङ्गुक्क हुल ॱमीत् तोङ् मत् सीच्च्यीत्।
डल झ्यम्ब झ्यीत् गोगेङ्गी ढीक्ल ४३-४८
43ॱनी यङ् हीन्दुक् सीर अक् यो़क्केन् बेत्।
रङ्गी लोल यो़क्केङ्गी मील झ्यम्ब धङ् ड झ्यीक्केल्ल ड दीरङ् झ्यीज्यीत् सीर खीत्रङ्ल ॱस्यो़च्च्ये यो़क्केन् बेत्। (लेवी १९:१८)
44हील ङे खीत्रङ्ल हीगो ॱस्येत् योङ्। खीत्रङ्ल ड झ्यीक्केन् घयेत्ल झ्यम्ब झ्यीज्यीत्। खीत्रङ्ल दुक्प अयेक्प तोङ्गेन् घयेक्की ढीक्ल को़न्ज्योक्ल ॱसुव तोप्च्यीत्। 45हीन्दुक् झ्यीन क, हस्सो़त् खीत्रङ्सो घयेत् तेङ् यी़न स्युगेन् खीत्रङ्गी यप्की भीज हीम्ब धक्केन् बेत्। घन्ड हीन् सीन्न खोङ्गी इक् मी ङेम्ब धङ् मी गङ्ज्येन् ॱङीक्कर्ल इम्ज्येत् मीप्प, ङीम ॱस्यर्तु ची़क्केन् बेत्। ॱनी को़न्ज्योक्की मी ढङ्बु धङ् ढङ्ज्ये मीप्प ॱङीक्कर्ल इम्ज्येत् मीप्प, छ्येप्प ज्यक्तु ची़क्केन् बेत्। 46खीत्रङ्गी रङ्ल झ्यम्ब झ्यीक्केल्लरङ् क खीक्की झ्यम्ब झ्यीक्को़त्न ॱनी, हील घन्डे ॱल दी थोप्को़त् सीक्केन्? हीगो डस्सीगी लेमु त गोलदर् सेगोक्प घयेक्की इक् झ्यीक्केन् मेम्बेक्क ॱनी? 47खीत्रङ्गी खीत्रङ् पी़न्ज्या नङ्गी पी़न् ठेप्पे यङ्ल तम् ॱनेन्सी लप्री चीयल हीगो खीक्की ॱल्हक्मु गस्सी च्यीक् झ्यीक्को़त् ॱनो़गुक्क? हीगो डस्सीगी लेमु त को़न्ज्योक् ॱस्यो़च्च्ये मीप्पे ज्यी़त् ॱयोङ् ॱयोङ्गी मी घयेक्की इक् झ्यीक्केन् मेम्बेक्क ॱनी? 48हीगी ढीक्ल तेङ् यी़न स्युगेन् खीत्रङ्गी यप् गयल छङ यो़प्प डस्सी खीत्रङ् ॱअङ् युङ झ्यीज्यीत्।
Markert nå:
मत्ती 5: LHM
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 1995 Wycliffe Bible Translators, Inc. and Nepal Bible Society
