GENESIS 30
30
1Ma si maṉa na ni Resela e rikia ne a’i si thare wela ifatha Jekofo, ni Resela ka ugalia thoona; ma nia ka una eri satha Jekofo, Falea mai akua tei wela; so e a’i, kwa mae akua. 2Ma tha Jekofo ka bii rakeiri uria ni Resela: ma nia ka una eri, Ni nau ku ’uria tha God, mado? ne suusia foana rakemu faisi oe. 3Ma kini eri ka sorea, Rikia fasi thari ni ra nau na ni Bila, ofu fasi bi nia, ma nia kai thare wela i maana ururuku, fasi ni nau lau boo kwai welaa suli nia. 4Ma nia ka falea mai ni Bila, na thari ni ra nia, fasi kai tolea: ma tha Jekofo ka ofu bia thari eri. 5Ma ni Bila ka iana, ka tharea tee fa kaluwane ifatha Jekofo. 6Ma ni Resela ka una eri, Tha God e thaitoomana maalutaku, me roṉoa lau boo liṉana ṉata laku, me falea akua tee fa kaluwane, nai nia: mania ka alaṉia thatana atha Dani. 7Ma ni Bila, kini ni ra ni Resela, ka iana lau, ma ruana ka tharea tee fa kaluwane ifatha Jekofo. 8Ma ni Resela ka una eri, Ana kwaikwairaui la baita ki nau ku kwaikwairaui bia thooku, ma sii nau e tatha: ma nia ka alaṉia thatana atha Nafatalae. 9Si maṉa ni Lia e rikia ne a’i si thare wela lau, nia ka tolea mai thari ni ra nia na ni Silifa, ka falea ifatha Jekofo fasi kai ofu bia thari eri. 10Ma ni Silifa, na thari ni ra ni Lia, ka tharea tee fa kaluwane ifatha Jekofo. 11Ma ni Lia ka una eri, Omea baita kai lae mai: ma nia ka alaṉia thatana atha Gada. 12Ma ni Silifa, na kini ni ra ni Lia, ruana ka tharea tee fa kaluwane ifatha Jekofo. 13Ma nia Lia ka una eri, Nau ku seethathala boo; uria na thari ki keki alaṉi nau ana ai ne lea iaku: ma nia ka alaṉia thatana atha Asa. 14Ma tha Rubeni e lae asi maṉa na unii uiti e rafo naa, ka fulatoona tei fa kabirei i masuu, ka ṉalia mai sana thainana na ni Lia. Sui ni Resela ka una eri sani Lia, Nau ku thathamia oki falea mai akua tee fa kabirei ana kabirei ba ki kaluwane oe. 15Ma kini eri ka soree isana, Tonee do neri, no ṉalia kamua arai nau, mado? mo thathamii ṉalia lau boo kabirei eki na kaluwane nau, mado? Ma ni Resela ka una eri, Mania arai eri kai teo isamu afa rodo nei maana kabirei ba ki kaluwane oe. 16Ma tha Jekofo ka lae na mai faisia i masuu i thaulafia, ma ni Lia ka lae fasi kai toda ani nia, ka una eri, E a’i si e’i oki ofu boo bi nau; sulaania ni nau ku usi oe mamana boo ana kabirei eki kaluwane nau. Ma nia ka teo isana afa rodo eri. 17Ma tha God ka fafuroṉoa bae lana ni Lia, ma nia ka iana, ka tharea limana kaluwane nia ifatha Jekofo. 18Ma ni Lia ka una eri, Tha God e falea mai foli laku, sulaania ku falea naa thari ni ra nau ba ifana arai nau: ma nia ka alaṉia thatana atha Isaka. 19Ma ni Lia ka iana lau, ka tharea ona kaluwane nia ifatha Jekofo. 20Ma ni Lia ka una eri, Tha God e faainamaruki nau ana foli laku na ka lea bana; asi maṉa eri arai nau kai to bana isaku uria ni nau ku tharea naa ono kaluwane nau ki ifana: ma nia ka alaṉia thatana atha Sebiulono. 21Ma iburiana nia ka tharea tee fa thari, ka alaṉia thatana ani Daena. 22Ma tha God ka onotoona ni Resela, ma tha God ka fafuroṉo nia mai, ka falea mai wela i rakena. 23Ma nia ka iana, ka tharea tee fa kaluwane: ka una eri, Tha God e lafua si do ne faaseenoni iaku. 24Ma nia ka alaṉia thatana atha Josefa, ka una eri, Tha Jihova kai safua ifaku ata kaluwane lau.
25Ma lalae mai, si maṉa na ni Resela e tharea naa tha Josefa, tha Jekofo ka soree isatha Lebana, Arasi nau, kwai lae nakua uria si kula nau italaaku, ma i fanua nau. 26Falea mai ro ai nau ba ki ma baree wela nau, na nau ku folida asi ra ku ra naa ania ifamu, oki alamatai nau kwai lae nakua: uria no thaitoomana naa ra nau eri na ku ra ania iamu na ba. 27Ma tha Lebana ka soree isana, Mado so riki nau ka lea, nau ku thathamia oki to si amua isaku: uria ni nau ku thaitoomana filoa na tha Jihova e alua lea la fafi nau inunufamu. 28Ma nia ka una eri, Sorea fasi foli lamu isaku, ma ni nau kwai falea boo. 29Ma nia ka soree isana, O thaitoomana naa ra la na ni nau ku ra ania ifamu na ba, ma to lana katele oe ki isaku. 30Uria na si do no rikidaki e ununa bana si maṉa kwasi fula u mai, ma si maṉa eri e baita alaa, ka oro faamau; ma ita asi maṉa ni nau ku fula na ba, tha Jihova ka alua lea la fafi oe: ma si maṉa eri kwai beta sulia toa i maafera nau italaaku iaṉita? 31Ma nia ka una eri, Si ta na kwai falea iamu? Ma tha Jekofo ka sorea, E a’i bana; osi falea boo ta si do iaku: mado soki ilia si do nei ifaku, nau kwai tharea lau feree sifi oe ki, ma kwai fono toi kalida. 32Nau kwai tatha si kau imaalutana feree sifi oe ki itaraena, kwai idua kau faisida aini do na kera karua ma keka boboloa, ma do mela ki sui bana imaalutana sifi ki, ma do kera karua ma keka boboloa imaalutana gota ki: ma do una eri ki na na do ana foli laku. 33Asi ade la eri abula laku ne kokoto kai to fatai asi maṉa ni u ki mai, si maṉa na toto oki lae mai, oki lio uria foli laku na kai ni inaofamu: atona bana ta do ne a’i si karua me a’i si boboloa imaalutana gota ki, me a’i si mela imaalutana sifi ki, do oki alaṉi nau mania so ku bilia mai neri. 34Ma tha Lebana ka una eri, Rikia fasi, ku thathamia sa keki ilia si ade la eri sulia bae lamu. 35Ma nia ka idua kau afa boṉi eri gota wane ki sui bana na kera ulili foloa, ma do keka karua, ma gota kini ki sui bana na kera karua ma keka boboloa, ma do eki sui bana na ta si kula i seeda e kwakwaoa, ma do mela ki sui bana imaalutana aini sifi ki, ka faleda i abana kaluwane nia ki. 36Ma nia ka alua laea ne talaana ulu fa thato imaalutani nia ma tha Jekofo: ma tha Jekofo ka tharea oretana feree sifi tha Lebana ki. 37Ma tha Jekofo e ṉalia si kadee ’ai bobola katha ki, ma si kadee ’ai faisia ’ai hesele ma ’ai sesenate; ka iria si kula i uṉana, fasi si kula tekwa ne kwakwaoa ana kadee ’ai eki ka to fatai. 38Ma nia ka alua kadee ’ai eki, ne iria si kula i uṉana, inaofana feree sifi eki ma feree gota eki asi kula i laala do taala kafo kera ni kuu la ki, si maṉa feree do eki keki lae mai uria kuu la, fasi keki bii iana si maṉa na keka lae mai uria kuu la. 39Ma feree do eki keki thafalii iana inaofana kadee ’ai eki, keka tharea kalee do na keka ulili foloa, ma keka karua, ma keka boboloa. 40Ma tha Jekofo ka alua lama eki keka to eeta kwailiu, ka alua maana feree do eki keki lio uria do eki na kero ulili foloa, ma do mela eki sui bana i feree do tha Lebana; ma feree do nia ki u boo nia ka aluda keki to talifili kera, e a’i si ofuda bia do tha Lebana ki. 41Ma lalae mai, atona bana ta si mana na katele sukwai ki keki iana, tha Jekofo ka alua si kadee ’ai ka teo i maana feree do eki asi do taala kafo ki, fasi keki bii iana imaalutana si kadee ’ai eki; 42Ma sui si maṉa tei do e a’i kesi sukwai, nia e a’i si alua si kadee ’ai eki iei: sulia si kula eri do kesi sukwai na ṉa do tha Lebana ki, ma do sukwai ka tatha ki na ṉa do tha Jekofo. 43Ma wane eri ka baita faamau ka lae alaa, ka rikii do ana feree do oro ki, ma kini ni ra ki, ma wane ni ra ki, ma kamela ki, ma ase ki.
Markert nå:
GENESIS 30: MLU1949
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
British and Foreign Bible Society 1949, 1951
