Mateo 10
10
Chin'nu'ke bënni lak'ke gbaaz kie' Jesús
(Mr 3:13-19; Lc 6:12-16)
1Jesús bliidze chin'nu'ke bënni useed kie', bnëëdzje kieke yëla rnabe' lubiije bë' xëwi len lu'un'ke bunach ki zian baya' len yëla rtzaag.
2Ki' le'ke bënni chin'nu'ke gbaaz kie' Jesús: Simón bënni'a bzue' le' Pedro len bënni bë'che'e Andrés; Santiago len bënni bë'che'e Juan, xi'ine Zebedeo; 3Felipe len Bartolomé, Tomás, Mateo bënni pkiixhje laaz'sua'ke ki Roma; Santiago bënni xi'ine Alfeo, len Tadeo; 4Simón bënni yëdz Caná, len Judas Iscariote bënni bdëëde Jesús lu naa'ke bunach.
Jesús rseed'de len rsë'le'e bënni gbaaz kie'
(Mr 6:7-13; Lc 9:1-6)
5Jesús psë'le'e bënni chin'nu'ke gbaaz kie' len re' leke: «Ti tziaj'li gia'a yeego ga nakua'ke bënni ti nak'ke ki yëdz Judea len ti tzaaz'li yëdz ki Samaria; 6gultziajl ga nakua'ba bëku'xhiila ki yëdz Israel bua'a nanitk'ba. 7Gultzajtixhji'kde ki chi za ga'la yëla rnabe' ki yewayuba. 8Gulu'un'ke bënni we', guluspaane bënni nat, gulu'un'ke bënni te'i'de baya' nuudzu len gulubiaj bë' xëwi. Guluzalaadxi'z le guluzalaadxi'ke kieeli.
9»Tibi dumi gua'li 10len ti gua'li le gia'aj'gaag'li tzal tzu'uli nëëz. Ti gua'li ye tu kë' xha'li, keg lëël'li, keg xuyaag, koma bënni ruune dxin rala'kz luga'we le'.
11»Kati gdxin'li tu yëdz, gulugiilje bënni gxhënilaadxi'li'ne len guluga'an liidxe tzal gdxin dza uza'li lu yëdz'a. 12Kati tzaaz'li nu'yu'a gululiidz'tzawi'ke bënni nakua'ke'a. 13Len yëla rë'dxi rzelaadxi'li'a uzua len leke, xhki bënni'a nakua'ke nu'yu'a nak'ke bach lazi'ke ley; san xhki ti nak'ke, udxin yubl len lbi'ili. 14Ati xhki ti lazi'ke lbi'ili len ti luzenaage le gnaali, guluroj nu'yu'a len lu yëdz'a len gulkuib bexhtë nua' ni'a'li. 15Le nak'te rea' lbi'ili ki kati gdxin dza'a kchuug'be'e Dios, yëla rsaka'zi' le lazi' yëdz ni uyali'ir, ka le lazi'ke bunach ki gia'a yeego ki Sodoma len Gomorra.
Yëla rlaag'yuudx
16»¡Guluyu'tzka! Neda rsë'la'a lbi'ili ka bëku'xhiila ladj'kba bëku'zuuga. Lena'a, guluspe'i kuin'li ka nabe'ik'ba bel', san lekz'ka' gulgak xhën'laadxi ka nak'kba palom. 17Gulun'chi'i kuin'li, koma bunach uludëëde lbi'ili lau'ke bënni tunabe'ke len ulusaka'zi'e lbi'ili lu yu'u useed 18len nia'a kia' lekz'ka' utzajua'ke lbi'ili lau'ke bunach tunabe'ke yëdz xhën len lau'ke bunach rnabe', ka gunn gap'li latj gun'li neda xhën ladj'ke'a len ladj'ke bunach yëdz yubl. 19San kati luche'ke lbi'ili lau'ke bunach tunabe'ke, ti suáli bagi'i nakxh gun'li uzi' kuin'li u bixh gnaali, koma kati gdxin dza rala gneeli, Dios gzeajni'i'de lbi'ili le gnaali. 20Koma keg lbi'ili gui'li diidza, le Bë' La'ay kie' Dios gui'e diidza ulaaz kieeli.
21»Bunach uludëëde bënni bë'chi'ke lu naa'ke bënni ludëëd'de leke, lekz'ka' luune xuuz'ke len bënni xi'in'ke, ati bënni xi'in'ke uludabaage'e xuuz'ke len uludëëd'de leke. 22Yugute'ke bënni yëdz'lyu lalei'de lbi'ili nia'a kia', san bënni sue' tzutzu nakati gdxin'r lu uudx ki, bënni'a yule'. 23Kati bunach ki tu yëdz lulaage lbi'ili gultziaj ye tu yëdz, le nak'te rea' lbi'ili ki ti gdach yëdz Israel tëëd'li kati Le' Xi'ine Bënni wëëde.
24»Gat'ga zue' bënni useed nak're xhën ka bënni pseed'de le', ati nutunu bënni wendxin nak're xhën ka bënni xaane. 25Yajlí'kz guune bënni useed xhki gdxiine gake ka bënni pseed'de le', len bënni wendxin ka bënni xaane. Xhki xaani yu'u te'ke le' Beelzebú, ¿bixh'gaar lanáke ki bënni xi'in'xhzue'?
Ti gaadxi'li kati gui'li diidza
(Lc 12:2-7)
26»Lena'a ti gaadxi'li bunach. Koma gat'ga de le rak baga'chi'z ku gnëëz, len gat'ga de le naga'chi' ku gdxin glui'lau'i. 27Yugute' diidza rea' lbi'ili ga nak chul, gulkixhjë' lau'i dza, len diidza rea' lbi'ili baga'chi'z, gulgun ga gdu yëdz'lyu gnëëzi. 28Ti gaadxi'li nu tudëëdi bunach koma ti nap'ke yëla wak ludëëd'de laadxi'li; gulgaadxi nu nap yëla wak ku'u laadxi'li len xhpeela'li lu gi'gabil.
29»¿Naru keg chop'ba bginn tuti'i'ke'ba ki tu dumi las'du? San keg tuuba wëxhj'ba xhki Xuuz'li ti gunne lsenz. 30Le rak lbi'ili lekz'ka' tu tu gitza ikj'li nulaabe. 31Lena'a ti gaadxi'li: Lbi'ili zaki'i'rli ka ziank'ba bginn'du.
Si'lunaa'ru naki'ru kie' Cristo lau'k bunach
(Lc 12:8-9)
32»Xhki nu rzi'lu'ne'i neda lau'k bunach, lekz'ka' neda si'luna'a'ne lau'e Xuuza zue' yewayuba; 33san bënni ti si'lu'ne'e neda lau'k bunach, lekz'ka' neda ti si'luna'a'ne lau'e Xuuza zue' yewayuba.
Jesús, rgu'e gdil
(Lc 12:51-53; 14:26-27)
34»Ti gaki'li zdujua'a yëla rë'dxi lu yëdz'lyu ni; ti zdujua'a yëla rë'dxi, zdujua'a gdil. 35Za'a ki ladil'e bënni xi'ine len xuuze, bi nguul til'bi len xhna'bi len nguul nutzag'na'nu til'nu len tau'nu; 36larakz bënni dia'dza'a lalei' lza'a'ke.
37»Xhki nu bënni nadxi'ir'de xuuze u xhne'e ka neda, ti nake bach gake bënni useed kia'; xhki nu bënni nadxi'ir'de bënni xi'ine u nguul xi'ine ka neda, ti nake bach gake bënni useed kia'; 38len bënni ti rue'e yaag kruuz kie' len rza'leene neda, ti nake bach gake bënni useed kia'. 39Bënni re'en'de usle' yëla naban kie', unitie' ley, san bënni nitie' yëla naban kie' nia'a kia', usle' ley.
Yëla ruzi'xhbei
(Mr 9:41)
40»Bënni rzi'e lbi'ili, neda rzi'e, len bënni'a rzi'e neda, rzi'e nu nusë'la neda. 41Nu rzi' le' bënni rue'e diidza ulaaz kie' Dios, uzi'e xhbei larakz le uzi'e xhbei bënni'a rue'e diidza ulaaz kie' Dios; len nu rzi' le' bënni nake bënni dxia'a, uzi'e xhbei larakz le uzi'e xhbei bënni dxia'a. 42Le nak'te rea' lbi'ili, ki nu'ti'teez bënni gnëëdzje zala tu xhiiga'z nis kiek'bi bi'dau' zak'leemi neda, uzi'e xhbei lea guune'a.»
Markert nå:
Mateo 10: PZD
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Sociedad Biblica de México AC
