مارکوس 5

حضرت عیسیٰ سی ردود ژوگسکھانّی میجیگ پھانچوگا زادس۔

1کھونگون تشوے پھارکا، گراسا یولجونگسلا سکیودس۔ 2حضرت عیسیٰ مسیح ٹُھوزینگنے بینّگا زادّاچیگ، ردود جُوگسکھان جیگ کھونگ جالّالا رومکھانگی ناسّانے بینگستے یونگس۔ 3کھو رومکھانگّونّی نانّگا دوگادپین، سوجیگیانگ کھو لدامستے بور مانیانّا اینپین، لچاگتھاگ نیامپوانگ۔ 4لان مانگپوجیگ کھوے کانگلاگّون لچاگتھاگ نیامپو تاگستے بورنانگ کھوے لچاگتھاگ چادتے پھانگس، سوجیگّانگ کھو لدامستے بورچیسّی شید میدپین۔ 5تشاننین میدپا کھو ری تانگ رومکھانگّونّی ٹوا کھورین، کُوچو تانگین، ردوا نونپو نیامپو رانگی زوگسپے شاگون چادّادپین۔

6کھوے تھاگرینگنے حضرت عیسیٰ سی جالّاچیگ، بالنگ تانگستے کھونگی لدُونلا کھورانگی پِیکمویکا گیل۔ 7کھوے نانّگا ژوگسکھانّی ردود پوے کُوچو شیدچان تانگستے زیرس، ”حضرت عیسیٰ سی خُدے کھیود چانی بُوژا نیرانگ نگے لاسّی نانّگا چیا ڈیسّاد؟ نگا ناگس میستانچیسلا، خُدے مِنتخسی نانّگا نا کھورّا زاد۔“ 8چیازیرنا حضرت عیسیٰ سی کھوا، ”ردود، کھیرانگ ای می بوے نانگنے بینگتے یونگ“ مولّا زادتے اینپین۔

9تینے حضرت عیسیٰ سی کھوا ٹیا زادس، ” کھیرانگی مینّگا چی این؟“

کھوے لانتانگس، ”نگے مینّگا ردودتشوگس این، چیازیرنا نگاجا مانگپوجیگ ای می بوے نانّگا ناستے یود۔“ 10تینے کھوے حضرت عیسیٰ سی کھونگون ای گیالکھاگنے تھاگرینّگا میپھینگچیسلا جوجو جوین یانگنے یانگ جُووا پھولس۔

11ری نییموجیگیکا پھاگی کھیو چھینموجیگ سا زین یودپین۔ 12ردودگونّی حضرت عیسیٰ سی جوجو جوین زیرس، ”نگاجا ا پھاگّونّی نانّگا کالا زاد، نگاجا تیگونّی نانّگا چھاچوگّا زاد۔“

13حضرت عیسیٰ سی گونگسپا سالّا زادپا، ردودگون بینگتے پھاگّونّی نانّگا ژوگس۔ تے پھاگی کھیو ہالام لتونگ نیس‏ جیگ، رینے تُھورلا بانگتانگستے تشوے نانّگا بُود یانگ چھوی نانّگا نوبتے شی۔

14پھاگتشوکھانگون ڈونگکھیر تانگ نییکھورّی ناسّاگونلا بانگتانگستے سونگ یانگ جونگکھان تشانگما شادس، میگون جُونگکھانگون ستالا سونگ۔ 15کھونگون حضرت عیسیٰ سی یودسا لیبّاچیگ، ردودتشوگس ژوگسکھانّی میبو، کوسلاگ گونتے سنیو ماسنیوا تیکا دُوگستے تھونگپا کھونگون جیگس۔ 16تے تشانگما تھونگکھانگونّی ردودگون ژوگسکھانّی می تانگ پھاگّونلا چونگکھانّی سکوربو میگونلا جیبسال چوستے شادس۔ 17تینے میگونّی حضرت عیسیٰ، کھونگونی یولنے بینگتے سکیود جوجو زیرس۔

18حضرت عیسیٰ سی ٹُھوزینگی نانّگا ژونّا زاد زانے سنگونلا ردودگون جُوگستے یودکھانّی می بوے حضرت عیسیٰ، کھو کھونگ نیامپو یونگ چوگّا زادچیسلا جوجو زیرین جُووا پھولس۔ 19اِین نانگ حضرت عیسیٰ سی کھو یونگ ماچوگس یانگ مولس، ”کھانگپا کھیرانگی نانگمی گُون یودسا سونگتے، مسیح کھیرانگی پھیا زادکھان تشانگما تانگ کھیرانگی کا کھونگی تسامشیگی سنینگرجے ستانّا زادکھانبو شود۔“ 20تینے کھو تیکانے سونگتے گیالسا دِکپُلِس یودکھانّی گیالکھاگی نانّگا حضرت عیسیٰ سی کھوا زادکھان تشانگما شادس، یانگ کھوے شادکھانگون تشورتے میگون ہالاس۔

بومو چھونگون شیکھان تانگ زُومو یونگکھانّی ناچھونگجیگ۔

21حضرت عیسیٰ مسیح یانگسکیار ٹُھوزینگی نانّگا تشوے چھوگسّی پھارکا لیبّاچیگ، تشوے تھاما یود زانے میتشوگس چھینموجیگ دزومستے کھونّگا کھورتے دُوگس۔ 22تینے یہُودی پے عبادت خانہے اُسکیونگ یائیر زیرکھانبو تیرو یونگس۔ حضرت عیسیٰ سی جالّاچیگ، کھو کھونگی جابسّی لدُونلا گییلتے 23سنینگنے جوجو جوین زیرس، ”نگے بومو چھونگونبو شیکییس دوگ۔ جوجو سکیودتے نیرانگی چھاگ کھویکا بورّا زادنا کھو پھانتے سوناین۔“

24حضرت عیسیٰ سی کھو نیامپو سکیودّا زادس۔ میتشوگس چھینمو، کھونگی ستینگرانگنے یونگستے کھونّگا نانتے کھیونگس۔ 25بودکھانّی لو چوگنییسنے پھارلا توسگیون ٹھاق بینگچیسّی زُومو یونگسکھانّی بوموجیگ میتشوگسّی ٹوا یودپین۔ 26امچھیگونّی ستاستوگسّی نانّگا ناگس مانگپو تھونگتے کھورانگی پینے تشانگما سکیاگستیانگ، کھو گیالّا چھاچیسّی سانگ مانّگا تھوا سونگتے یودپین۔

27کھوا حضرت عیسیٰ سی سکورلا تشورپا، میتشوگسّی نانّگا کھونگی گیابنے یونگستے کھونگی نامزا لاگپا توگس۔ 28چیازیرنا کھوے کھورانگی سیمسّی نانّگا سام، ”کالتیس کھونگی نامزا لاگپا تھوگنا نگے زُومو گیالّانوگ“ 29تینّامالّا ٹھاق پو چھادتے سوگپو زومونے پھانکھانبو کھوا گیوسّونگ۔

30تینّا توسلا، کھونگی نانگنے پھانچوگکھانّی ستوبس بینگستے چھاکھانبو حضرت عیسیٰ سی کھیین۔ کھونگی ینگو گیورین میتشوگسلا زیگستے ٹیس، ”سوی نگے کوسلاگّا لاگپا توگس؟“

31کھونگی لوبٹوگسگونّی کھونّگا زیرس، ”میتشوگسّی ناناین پھولین کھیونگچیسپو نیرانگی زیگسانوگ، تینے نیرانگی سوی نگا لاگپا توگس مولتے چیا ٹیا زادّاد؟“

32اِین نانگ لاگپا توگسکھانبوا زیگشیسلا کھونگی ینگو زیگسین جوگس۔ 33تینے بوموبوے کھورانّگا جُونگکھانگون گیوسیودپا، جیگساین دارین حضرت عیسیٰ سی لدُونلا یونگستے کھونگی ژابسّیکا گییلس یانگ کھونّگا چیتشانگما ٹانگپو شادس۔ 34حضرت عیسیٰ سی کھوا مولس، ”بومو کھیرانگی ایمانی کھیرانگ پھانچوگستے این۔ کھامزانگ نیامپو سونگ، کھیرانگی ردوگنگالبو میدکھان سونگتے اینوگ۔“

35کھونگی جالتا سالین یود زانے، عبادت خانہے اُسکیونگی کھانگپانے می کھاچیگ یونگستے کھوا زیرس، ”نیرانگی بوموبو شی، تا لوبپونلیا وبگیال ستانّا مازاد۔“

36اِین نانگ حضرت عیسیٰ سی کھونگونی زیرکھانبوا سنانّگا ماسالا اُسکیونگا مولس، ”جیگس ماجیگس۔ ایمان رانگ چوس۔“

37تینے حضرت عیسیٰ سی حضرت پطرؔس ، حضرت یعقُوبؔ تانگ، کھوے نو حضرت یُوؔحنّا ٰ ماستوگس جانسوجیگّانگ کھونگ نیامپو یونگ چوگّا مازادس۔ 38کھونگون عبادت خانہے اُسکیونگی کھانگپا لیبّاچیگ، کُوچو تانگین، نگواین می مانگپوجیگی ہیلینگس تانّگا حضرت عیسیٰ سی زِیگس۔ 39کھونگ نانگکوگا سکیودتے، ”چیپھیا نگواین ہیلینگس تانّگاد؟ ٹھوگوبو ماشیا نییدلوگستے این“ مولپا 40کھونگونی ٹھیلگود تانگس۔

حضرت عیسیٰ سی کھونگ تشانگما کھانگپانے پھیلوگا بینگستے بوموے پھاما تانگ، کھونگرانگی لوبٹوگس سومکو ٹھیدتے بومو یودسے نانّگا سکیودس 41یانگ بوموے لاگپا تھامسّا زادتے کھوا مولس، ”تالیتھا کُومی“ کابوے تونتاگپو ”بومو چھونگون لونگس“ زیرّانوگ۔ 42تینّامالّا لو چوگنییس چھاکھانّی بوموبو کواگ لانگستے ڈولس۔ تیبو تھونگتے کھونگون ماثانٹے ہالاس۔ 43چونگکھانبو سوانگ میشادچیسلا حضرت عیسیٰ سی کھونگونلا کا سالس، یانگ کھونگونلا بوموبوا چیتونگشیگ زا تانگچیسلا مولس۔

Markert nå:

مارکوس 5: LBJNT

Marker

Del

Kopier