مارکوس 3
3
حضرت عیسیٰ سی شابّادّی جاگّا میجیگ پھانچوگا زادس۔
1حضرت عیسیٰ مسیح مجلِس لا یانگسکیار سکیودس، تیرو لاگپا کھونگستے کول مانیانکھانّی میجیگ یودپین۔ 2حضرت عیسیٰ سی کھو گیالچوگنا شابّادّی آرام چوچیسی جاگّا لاس چوچیسپوا سکیون کالچیسلا فریسی پاگونّی کھونّگا گیالّا چوستے ستیندوگس۔
3لاگپا کھونگسکھانّی میبوا حضرت عیسیٰ سی مولس، ”یونگ یانگ تشانگمے لدُونلا لونگس۔“ 4تینے کھونگی کھونگونلا ٹیا زادس، ”چھوسٹھیمس نانگجین شابّادّی جاگّا لاس زانگپو چو چھوگّانوگّا یا نگانپا، سروک سکیوب چھوگّانوگّا یا ساد؟“ اِین نانگ کھونگونی کھونّگا لان ماتانگس۔
5حضرت عیسیٰ سی تھوگسثوے نانّگا کھونگ ریریا زِیگس، یانگ کھونگونی سنینگ سکیونگپو زیگستے کھونّگا ماثانٹے تھوگستشیر سکیودس۔ کھونگی لاگپا کھونگسکھانبوا مولس، ”لاگپا کیونگ“ یانگ کھوے لاگپا کیانگسپا تیبو سینگ گیال۔ 6تینے فریسی پاگون پھیلوگا سونگتے، گیالپو ہیرودِیس چھوگسپاگون نیامپو حضرت عیسیٰ سی سادچیسّی تھابس نگانپا لدینگس۔
میتشوگس حضرت عیسیٰ سی ستینگرانگنے سونگ۔
7حضرت عیسیٰ مسیح لوبٹوگسگون نیامپو تشوے چھوگسلا سکیودس، یانگ گلِیل نے میتشوگس چھینموجیگ کھونگی ستینگرانگنے یہُودیہ یونگس۔ 8حضرت عیسیٰ سی زادکھان تشانگمے سکورلا تشورپا، تے میتشوگسپو یہُودی یولجونگس، یروشالیمّی گیالسا، ایدومیا، یوردان لژانگسپو ے شار چھوگسّی ساچھاگون، یانگ چانگ چھوگسّی تھاگرینگی ناسّا صُور تانگ صیدا گیالسا گونّے یونگستے اینپین۔
9میتشوگسّی کھونگ نانس مینانچیسّی پھیا حضرت عیسیٰ سی کھونگی لوبٹوگس گونلا ٹُھوزینگ جیگ ڈالڈیگ چوچیسلا مولس۔ 10کھونگی می مانگپو پھانچوگا زادچیسپوے، زُومو یونگکھان تشانگمے کھونّگا لاگپا تھوگچیسلا نانتے کھیونّگادپین۔ 11یانگ ردودگونّی کھونگ جالّاچیگ، کھونگون جُوگستے یودکھانّی میگون حضرت عیسیٰ سی سکوندونلا سا گیابستے کُوچو تانگین زیرس، ”نیرانگ خُدےبوژا جُوگستے اینوگ۔“ 12اِین نانگ حضرت عیسیٰ سی ردودگونلا کھونگ سو جُوگستے اینکھانبو میشادچیسلا کا سالّا زادس۔
حضرت عیسیٰ سی رسُول چوگنییسگون لدامّا زادس۔
13تیبوے ستینگنے حضرت عیسیٰ مسیح ری جیگیکا سکیودتے کھونگی لدامّا زادکھانگونلا بودّا زادس، یانگ کھونگون کھونگ یودسا یونگس۔ 14کھونگی بودّا زادکھان چوگنییسپو کھونگرانگی رسُول گُونلا سکوا زادس۔ کھونگونی کھونّگا ٹوپا چوچیس یانگ کھونگی کھونگون تبلیغ سلا لامچوگا زادِین، 15یانگ کھونگونلا ردودگون پھینگچیسّی وانگچھا سالّا زادس۔ 16کھونگی سکوا زادکھانّی رسُول چوگنییسپو نی، شمعُوؔن (حضرت عیسیٰ سی کھوے مینّگا حضرت پطرؔس تاگا زادس)، 17زبدی بُوژا حضرت یعقُوبؔ تانگ کھوے نو حضرت یُوؔحنّا ٰ (کھونگ نیسکو ثونجان یودپا، حضرت عیسیٰ سی کھونگونلا ”بویانیرگے“ یانگنا ”ڈوگلدیرّی بُوژا گُون“ مینگ تاگا زادس)۔ 18حضرت اندرؔیاس ، حضرت فِلپُس، حضرت برتلما، حضرت متّی، حضرت توما، حلفئی سی بُوژا حضرت یعقُوبؔ ، حضرت تَدی، حضرت شمعُوؔن (یولدادچان)، 19تانگ یہُوداؔہ اِسکریوت پا کابوے حضرت عیسیٰ مسیح ستینگنے نگولوگ چوس۔
حضرت عیسیٰ سی ڈاو گونّی کھونّگا ردودگونّی گیالپو زیرس۔
20تینے حضرت عیسیٰ مسیح کھانگپاجیگی نانّگا سکیودس۔ میتشوگس دزومچیس گوزوگسپا، کھونگ تانگ کھونگی لوبٹوگس گونلا زانّانگ زاچیسّی توس ماتھوب۔ 21تے تشانگما حضرت عیسیٰ سی نانگمیگونلا تشورّاچیگ، کھونگون حضرت عیسیٰ سی کھانگپا ٹھیدتے کھیرچیسلا یونگس، چیازیرنا میگونّی، ”کھونگ سنیوستے اینوگ“ زیرّادپین۔
22اِین نانگ یروشالیم گیالسانے یونگسکھانّی شریعتی عالِم گونّی زیرس، ”کھوے نانّگا بیلزیبول جُوگستے اینوگ۔ تے ردودگونّی گوبے کھوا ردودگون پھینگچیسّی کھیود تانگستے اینوگ۔“
23حضرت عیسیٰ سی کھونگونلا بودّا زادتے سپے سالین لانسالّا زادس، ”کازوگی شیطانی شیطان کھورانگ پھینگ نیانّانوگ؟ 24کالتیس گیالثیدّی نانّگا یودکھانگون تھونتے مادوگنا تیبو ٹھانگسپو میلوس۔ 25کالتیس نانگتشانگسجیکّی میگون نولاین دوگنا کھونگونی نانّگا تھونڈیل میلوس۔ 26کالتیس شیطانی کھورانگی گیابگالّا نولتے کھوے کازوگی وانگثولین؟ کھو میدکھان چھاچیسّی توسپو لیبستے این۔ 27نگا یانگ سپیجیگ تانگچوگ، سوانگ می شیدچانجیگی کھانگپے نانّگا جُوگستے کھوے نور کو مینیان نامتشوگپا کھوے سنگونلا می شیدچانبو لدام میلدام، تینے کھوے کھانگپے نانّگا یودکھانّی نورگون کو نیا نین۔“
28”نگے کھیوجا لدینبا زیرّاد، میگونّی دِیگپا چوکھان تانگ خُدا نلوق چھوکھانن تشانگما مُعافی سالّا زادِین، 29اِین نانگ ہلژخمہ رُوح لا نلوق چھوکھاننگونلا مُعافی مانے سالّا میزاد؛ تھامیدپے دِیگپا چوچیسّی نونگسچان کھو اینوگ۔“ 30کھونگی کھونگونلا تیبو مولّا زادس چیازیرنا، کھونگونی ”حضرت عیسیٰ سی نانّگا ردود جُوگستے اینوگ“ زیرّادپین۔
حضرت عیسیٰ سی نانگتشانگس نگوسماگون۔
31تینے حضرت عیسیٰ مسیح اما تانگ نوگون یونگس، یانگ پھیلوگا دُوگستے میجیگ کھونّگا بودّالا کالس۔ 32حضرت عیسیٰ سی سکورتے یودکھانّی میتشوگسّی زیرس، ”نیرانگی اما تانگ سترِنگمو گُونی نیرانگ ژالین پھیلوگا دوگ۔“
33حضرت عیسیٰ سی لانسالس، ”سو اینوگ نگے اما تانگ نوگون؟“ 34تینے کھونگی کھونّگا سکورتے یودکھانگونلا زیگستے مولس، ”نگے اما تانگ نوگون یگون این۔ 35نامکھے نانّگا جُوگسکھان خُدے تھوگّونگس نانگجین چوکھانگون نگے اما تانگ مینگثینگ گُون این۔“
Markert nå:
مارکوس 3: LBJNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ladakhi Bible by The Love Fellowship is licensed under Creative Commons Attribution-ShareAlike 4.0 License.
