مادتھا 26
26
حضرت عیسیٰ سی سادچیسّی جوسنگان لدینگس۔
1حضرت عیسیٰ مسیح تے تشانگما مول تشارتے ستینگنے کھونگی لوبٹوگس گونلا مولس، 2”نانگسلا پیساگی توسچھین اینکھانبو کھیوجاگونلا گیوس اینّوگ، یانگ تے جاگّا اِبنِ آدم ڈاو لاگا کیانگشینگیکا کیانّگالا ستاداین۔“
3تینے اِمام کُنی چھونمو گونتانگ یہُودی پے اُسکیونگون، اِمامِ اعظم کائفاس زیرکھانّی پھوڈانگی نانّگا دزومستے 4سانگوے نانّگا حضرت عیسیٰ سی زومستے سادچیسّی جوسنگان لدینگس۔ 5اِین نانگ کھونگونی زیرس، ”پیساگی توسچھینّی توسلا میزوم چیازیرنا میتشوگسلا ثو یونگستے ہیلینگس پھینگچیس اینوگ۔“
حضرت عیسیٰ سی اوا ٹیجیم چانّی مار لوگس۔
6حضرت عیسیٰ مسیح بَیت عَنِیّاؔہ ڈونگسیبّا دزینادنے پھانکھان شمعُوؔن ی کھانگپے نانّگا 7چوگتسیکا ستینتے یودتوس، کایولّی نود ٹیجیم ّی مار کوسپو سکانگستے کھورکھانّی بوموجیک یونگس یانگ ٹیجیمبو کھونگی اویکا لوگس۔
8تیبو تھونّگاچیگ لوبٹوگس گونلا ثو یونگستے، چیگ تانگ چیگّا زیرس، ”چیا تیبو گودلا تانگستے اینوگ؟ 9ای ٹیجیم ّی ماربو رین چھینموجیکّا تسونگستے پینیبو نیالباچانگونلا تانگشیگپیانگ۔“
10حضرت عیسیٰ سی تیبو کھیینتے کھونگونلا مولس، ”کھیوجے ای بوموے سیمسلا چیا ناگس ستانّاد؟ کھوے نگے پھیا لاس زانگپو چوستے اینوگ۔ 11نیالباچانگون توسگیون کھیوجا نیامپو لوسین، اِین نانگ نگا کھیوجا نیامپو توسگیون میلوس۔ 12کھوے نگے زوگسپوا ٹیجیم لوگستے نگے زوگسپو قبرستان کھیرچیسّی پھیا ڈالڈیگ چوستے اینوگ۔ 13نگے کھیوجا لدینبا زیرّاد، دُنیا گانگپوے نانّگا کارُو گاموےناتسُول شادنانگ ای بوموبوے نگا چوسکھانبوانگ شادتے کھو ایدتو چوین۔“
کاریودپا یودے حضرت عیسیٰ نگولوگ چوس۔
14تینے لوبٹوگس چوگنییسّی نانگنے یہُوداؔہ اِسکریوت پا یہُوداؔہ زیرکھانبو اِمام کُنی چھونمو گون یودسا سونگتے 15ٹیس، ”کالتیس نگے حضرت عیسیٰ سی کھیوجاگونلا ستادنا، نگا چی تانگین؟“ کھونگونی کھوا مولّی پینے سومچو تانگس۔ 16تینّا توسنے پھارلا یودے حضرت عیسیٰ سی ستادچیسّی سکابس ژالچیس گوزوگس۔
حضرت عیسیٰ سی لوبٹوگسگون نیامپو پیساگی دونتانگ دونس۔
17سکیور میدکھانّی تاگی توسچھینّی گومے جاگّا، لوبٹوگسگون حضرت عیسیٰ مسیح یکا یونگستے ٹیس، ”نگاجے نیرانگ دونچیسّی پھیا پیساگی دونتانگ کارُو ڈالڈیگ چولے۔“
18کھونگی مولس، ”یروشالیمّی گیالسے نانّگا نگے زیرکھانّی میبویکا سونگتے کھوا زیر، لوبپونّی زیردوگ نگے پھیا لدامّا زادکھانّی توسپو نیمو دوگ۔ نگارانگی لوبٹوگسگون نیامپو کھیرانگی کھانگپے نانّگا نگا پیساگی دونتانگ زین۔“ 19تینے لوبٹوگسگونّی حضرت عیسیٰ سی مولکھان نانگجین پیساگی دونتانگ ڈالڈیگ چوس۔
20پھیتوگ چھاچیگ لوبٹوگس چوگنییس نیامپو حضرت عیسیٰ سی چوگتسے لدُونلا نیاسّیکا ستینتے 21دونتانگ دونین یودتوس، کھونگی لوبٹوگس گونلا مولس، ”نگے کھیوجا لدینبا زیرّاد کھیوجے نانگنے چیگ چیگی نگا نگولوگ چوین۔“
22کھونگون ماثانٹے تشیرتے کھونگونی تشیرلا چیگی ستینگنے چیگی ٹیس، ”مسیح لے، تانتان نگاتا مانڈو؟“ 23حضرت عیسیٰ سی لانسالس، ”نگا نیامپو دابین چیگی نانگنے زاکھانبوے نگا ڈاو لاگا ستاداین۔ 24ہلژخمہ شوقبُو بوے نانّگا ڈِیازادتے یودکھان نانگجین اِبنِ آدم شیگوس، اِین نانگ اِبنِ آدم ڈاو لاگا ستادکھانّی میبوا تسامشیگی جیگسپا مییونگ۔ تے سانگتا کھو ماسکییسپینّا کھوے پھیا گیالّا یودڈو۔“
25تینے حضرت عیسیٰ سی ڈاو لاگا ستادچیسچانّی یہُوداؔہ زیرس، ”رابّی تانتان نگاتا مانڈو۔“
حضرت عیسیٰ سی مولس، ”اونا کھیرانگ این۔“
26کھونگون دونتانگ دونین یودتوس، حضرت عیسیٰ سی تاگی نامستے خُدا شُکر جْوس تے چاگّا زادس یانگ لوبٹوگس گونلا سالین مولس، ”یبو نگے زوگسپو این، لینتے زو۔“
27تینے دونسکیوگپو نامس یانگ خُدا شُکر جْوس تے کھونگونلا سالین مولس، ”کھیوجا تشانگمے ای نانگنے تھونگ 28اِبو نگے ٹھاق این کابوے خُدے تانگ کھونگی میگونّی پارلا وعدہ بُو تانتان زادّانوگ، یانگ می مانگپوے دِیگپا گُون مُعاف تشولّا پھوس۔ 29نگے کھیوجا زیرّاد، ای رگونچھانگبو کھیوجاگون نیامپو نگے یانگسکیار میتُھونگ نامتشوگپا نگارانگی یابّی گیالثیدّی نانّگا ایبوا سوما تونتاگ میسال۔“
30کھونگونی خُدا ستودپے لو پھول تشارّاچیگ، کھونگون ذیتونی ریا سکیودس۔
حضرت پطرؔس سی حضرت عیسیٰ سی میشیسزون تانگچیسپو لونگستان زادس۔
31تینے حضرت عیسیٰ مسیح لوبٹوگس گونلا مولس، ”دیرینگ ژانلا کھیوجا تشانگمے نگا پھانگستے چھین چیازیرنا خُدے مولّا زادتے دوگ،
’نگے لُوگ زی بو سادچوگاین،
یانگ لوگکھیوی لوگّون یانتے چھین۔‘“
32”اینّانگ سونتیا لانّگا زادتے ستینگنے نگا کھیوجے سانگ سنگونلا گلِیلی یولجونگسلا چھین۔“
33حضرت پطرؔس سی لانتانگس، ”تشانگمے نیرانگ پھانّگا نانگ، نگے نیرانگ مانے میپھانگ۔“
34حضرت عیسیٰ سی مولس، ”نگے کھیورانّگا لدینبا زیرّاد اینّا ژانلا چاپوے چاسکاد تانگی سانگ سنگونلا، کھیرانگی نگا لان سوم میشیسزون تانگین۔“
35حضرت پطرؔس سی وتسوگ تانگستے زیرس، ”نگا نیرانگ نیامپو شیگوسنانگ، نگے نیرانگ میشیسزون مانے می تانگ۔“ تینّا ژوگس جان لوبٹوگس تشانگمیانگ زیرس۔
گتسمنی تشاسّی نانّگا حضرت عیسیٰ سی دُعا جْوس ۔
36تینے حضرت عیسیٰ مسیح لوبٹوگسگون نیامپو گتسمنی زیرسے ناسّا سکیودس یانگ کھونگی کھونگونلا مولس، ”کھیوجاگون ایکا دوگ، نگا اکا دُعا جوا چھاد“ 37کھونگی حضرت پطرؔس یانگ زبدی بُوژا حضرت یعقُوبؔ تانگ حضرت یُوؔحنّا ٰ نیسکو، کھونگرانگ نیامپو کھیرّا زادس، حضرت عیسیٰ سی تھوگستشیر سکیودتے کھونگ تشابسا زادس۔ 38حضرت عیسیٰ سی کھونگونلا مولس، ”نگے سیمسلا تشیرکھا ماثانٹے شیچیس ژوگس راگ۔ نگا نیامپو شان چوستے ایکا دوگ۔“
39حضرت عیسیٰ سی کھونگونی سانگ ژاپیگ تھاگرینّگا سکیودتے، گییلتے ژالدونگ سا پھابستے، دُعا جوین مولس، ”نگے یابلے، جان تھابسشیگ یودنا ای ردوگنگالّی کوریبو نگے کانے تھینّا زادّانگ، اِین نانگ نگے دودپا نانگجین مانپا، نیرانگی تھوگّونگس نانگجین چوا زاد۔“
40تینے حضرت عیسیٰ سی لوبٹوگ گُونی ژا لوگستے سکیودس یانگ کھونگ تشانگکو نیدلا سونگتے زِیگس۔ کھونگی حضرت پطرؔس لا مولس، ”چھوتشود چیگّانگ نگا نیامپو نیید ماتانّگا دوگمانیانّا؟ 41کھیوجا دِیگپے نانّگا میگییلچیسّی پھیا نیید ماتانّگا دُعا چوس۔ رُوحانی دودپا دِیگپے نانّگا میگییلچیس یودنانگ زوگسپو اُتھوکس یودتے اینوگ۔“
42لان نیسپا کھونگ ژاپیگ تھاگرینّگا سکیودتے دُعا جوا زادس، ”نگے یابلے، کالتیس ای ردوگنگالّی کوریبو نگے تھونگستے مانے تھین نیانچیس میدنا، نیرانگی تھوگّونگس نانگجین ڈوبشیگ۔“ 43کھونگ لوگستے سکیودّاچیگ، یانگسکیار لوبٹوگس تشانگکو نیدلا سونگتے زِیگس چیازیرنا کھونگون ثانٹے نگالتے یودپین۔
44لوبٹوگسگون یانگسکیار بورتے کھونگ ژاپیگ تھاگرینّگا سکیودتے لان سومپا سنگونما تسوگسلا دُعا جوا زادس۔ 45تینے کھونگ لوبٹوگسگون یودسا لوگستے سکیودتے مولس، ”تارُوانگ کھیوجا نیید تانگین آرام چوا؟ ستوس، اِبنِ آدم نگولوگ چوستے دِیگپاچان گُونی لاگا ستادچیسّی توستش اوت پو لیب تشار۔ 46لونگس، نگاتانگون چھین۔ ستوس، نگا نگولوگ چوکھانبو یونّگالا۔“
حضرت عیسیٰ سی زومس۔
47حضرت عیسیٰ مسیح جالتا سالین یود زانے لوبٹوگس چوگنییسپوے نانگنے یہُوداؔہ تیکا لیب، کھو نیامپو اِمام کُنی چھونمو گونتانگ یہُودی پے اُسکیونگونی کالکھانّی می مانگپو رایَ تانگ بیرگا رومپو کھورتے یونگس۔ 48نگولوگ چوکھانبوے کھونگونلا حضرت عیسیٰ سی زومّالا ستاگس شیگ چوین زیرس، ”نگے پوگ تانگکھانّی میبو کھیوجے زوم۔“ 49تینّامالّا یہُوداؔہ حضرت عیسیٰ سی یودسا یونگستے، ”رابّی، جولے“ زیرتے پوگ تانگس۔
50حضرت عیسیٰ سی کھوا مولس، ”دزاو، کھیرانگ چوالا یونگسکھانبو چوس۔“ تینے کھونگون یونگستے حضرت عیسیٰ سی زومس یانگ لچاگتھاگ نیامپو تاگس۔ 51ہونمیدلا حضرت عیسیٰ سی لوبٹوگس چیگی کھورانگی رایَ پھینگستے اِمامِ اعظم یوگپوا گیابستے کھوے نامچھوگپو چادتانگس۔
52حضرت عیسیٰ سی کھوا مولس، ”رایَ شوبسّی نانّگا گیونگ چیازیرنا رایَ کولکھان تشانگما رایَ کانے شِین۔ 53کھیرانگی چی سام، کالتیس نگے نگارانگی یابّا جونا تینّامالّا فرشتے ماگمی ڈانگس میدشیگ نگا سکیوبّا کالا میزادّا؟ 54اِین نانگ کالتیس تیبو نگے چونا، تینے ہلژخمہ شوقبُو بوے نانّگا یگون نگیکا چونگّوس مولکھانبو کازوگی ڈانڈا ڈوبین۔“
55تینے حضرت عیسیٰ سی کھونگ زومکھانگونلا مولس، ”رایَ تانگ بیرگا کھورتے نگا زومّا یونگستے چی نگا ستانشیگ اینّوگا؟ بیت المقدِس سی نانّگا جاگ تانگ نگے لابجا تانگ زانے کھیوجے نگا چیا مازومسپین؟ 56اِین نانگ ہلژخمہ شوقبُو بوے نانّگا پیغمبری ڈیسکھانگون ڈوبچیسّی پھیا ای تشانگما چونگّوس۔“ تینے کھونگ پھانگستے لوبٹوگس تشانگما شور۔
حضرت عیسیٰ سی یہُودی پے ژوکسپے لدُونلا کھیرس۔
57حضرت عیسیٰ مسیح زومکھانگونّی، کھونگ اِمامِ اعظم کائفاسیکا کھیرس، کارُو شریعتی عالِم گون تانگ یہُودی پے اُسکیونگون دزومستے یودپین۔ 58اِین نانگ حضرت پطرؔس اِمامِ اعظم پھوڈانگی گیانگسکور تشوگپا تھاگرینگجیکنے کھونگی گیابنے سونگ یانگ نانگکوگا سونگتے حضرت عیسیٰ سی چی چوروگ ستالا ثونگکھانگون نیامپو سیکا دُوگس۔
59اِمام کُنی چھونمو گونتانگ یہُودی پے ژوکسپے تھوسمی تشانگمے حضرت عیسیٰ سی سادنیانچیسّی زوسما گوا ژالس۔ 60می مانگپوے زوسمے گوا تانگنانگ کھونگ سادنیانچیسّی گواجیک ماتھوب۔ ستینگجوگا می نیس یونگستے 61زیرس، ”ای می بوے زیرّاراگپین، ’نگے خُدے بیت المقدِس شیگستے، جاگ سومی نانّگا یانگسکیار سیگ نیا نین‘۔“
62تینے اِمامِ اعظم لانگستے حضرت عیسیٰ سی زیرس، ” کھیرانگی گیابگالّا گوا تانگکھانگونلا لانتانّگا میدّا؟ رانگ سکیوبچیسّی پھیا کھیورانّگا زیرچیس میدّا؟“ 63اِین نانگ حضرت عیسیٰ سی چوبچادتے ژوگس۔ تینے اِمامِ اعظمی زیرس، ”نگے کھیورانّگا سونپو خُدے نا کالّاد، نگاجا شودّانگ کھیرانگ لدامّا زادکھانّی مسیحا، خُدےبوژا اینّا؟“
64حضرت عیسیٰ سی مولس، ”اونا نیرانگی زیرکھانبو این، اِین نانگ نگے کھیوجا زیرّاد، ماونگسپے توسّی نانّگا اِبنِ آدم کھیود چان خُدے چھاگ یاسپے ٹھیسّیکا دُوگستے، یانگ نامکھے ثینّیکا ژونتے یونّگا کھیوجے تھونگین ۔“
65تینے اِمامِ اعظم کھورانگی کوسپو شاگس یانگ زیرس، ”کھوے خُدا تتلوکچوستے اینوگ۔ نگاتانّگا ای سانگ مانّگا گوا چی گوسین؟ کھوے تتلوکچوکھانبو داگسارانگ کھیوجے تشورتے اینوگ۔ 66کھیوجے چی تھاگچادّاد؟“ کھونگونی لانتانگس، ”کھو سادگوشیسّی اوسپا اینوگ۔“
67تینے کھونگونی کھونگی ژالدونگیکا تھوگیابستے مولتھوگ چوستے ردونگس یانگ جانگونّی کھونّگا ڈاملچاگس تانگ 68ہابگود تانگین زیرس، ”لدامّا زادکھانّی مسیحا نگاجا لونگستان شودّانگ، کھیورانّگا ردونگکھانبو سو اینوگ؟“
حضرت پطرؔس سی حضرت عیسیٰ سی میشیسزون تانگس۔
69حضرت پطرؔس پھیلوگا پھوڈانگی گیانگسکورّی نانّگا دُوگستے یود زانے، یوگموجیک کھو یودسا یونگستے زیرس، ”گلِیل پا حضرت عیسیٰ سی نیامپو کھیورانّگانگ میدپینّا؟“
70اِین نانگ کھوے کھونگ تشانگمے لدُونلا زون تانگستے زیرس، ” کھیرانگی چی زیرتے این نگا ہاگوا میراگ۔“
71تینے کھو گیاسگھویکا سونگ، تیرو جان یوگموجیکّی کھو تھونگتے نیکھورلا یودکھانگونلا زیرس، ”ای میبو ناصرة پا حضرت عیسیٰ سی نیامپو دوگپین۔“
72کھوے یانگسکیار میشیسزون تانگین ناسکیالتے زیرس، ”تے میبو نگے شیسّامید۔“
73ژاپیگشیگی ستینگنے تیکا لانگستے یودکھانگون حضرت پطرؔس یودسا سونگتے زیرس، ”تانتان کھیرانگ کھوے ٹوپاگونّی نانگنے چیگ اینوگ چیازیرنا کھیرانگی سپیرا تانگتشولبو گلِیل پا ژوگس راگ۔“
74حضرت پطرؔس سی کھو نگان پھوگشیگ زیرین ناسکیالتے زیرس، ”نگے تے میبو شیسّامید۔“ تینّامالّا چاپوے سکاد تانگس۔
75تینے حضرت پطرؔس لا حضرت عیسیٰ، ”چاپوے چاسکاد تانگی سانگ سنگونلا، کھیرانگی نگا لان سوم میشیسزون تانگین“ مولکھانبو ایدتو یونگس، یانگ کھو پھیلوگا سونگتے ماثانٹے نگوس۔
Markert nå:
مادتھا 26: LBJNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ladakhi Bible by The Love Fellowship is licensed under Creative Commons Attribution-ShareAlike 4.0 License.
