مادتھا 22
22
باگستونّی رومس۔
1حضرت عیسیٰ مسیح شریعتی لابکھان گون لا یانگسکیار رومس گیُودتے لابجا سالس، 2”نامکھے گیالثید نی گیالپوے کھورانگی بوتشے باگستونّی پھیا دونتانگ ڈالڈیگ چوکھان ژوگس این۔ 3باگستونلا بودتے یودکھانگونلا یونگ زیرتے بودّالا گیالپوے کھورانگی یوگپوگون لامچوگس، اِین نانگ کھونگون یونّگالا ماتھاد۔“
4”گیالپوے یانگسکیار جان یوگپوگون بودّالا لامچوگستے زیرس، ’باگستونلا بودکھانگونلا، نگے دونتانگ ڈالڈیگ چوتشار، لانگتو تانگ بالانگ گیاگسپا گُون سادتے چیتشانگما ڈوب تشار، باگستونّی دونتانّگا یونگشیگ زیر۔‘ 5اِین نانگ کھونگونی تیبوا نانگستاگ ماتانّگا، کھاچیگ جینّگا سونگ، کھاچیگ تشونّگا سونگ۔ 6جان لوسکھانگونّی یوگپوگون زومستے کھونگ نیامپو نگانپا چوستے ساد۔“
7”گیالپوا ثو ماثانٹے یونگس، یانگ کھورانگی ماگمی لامچوگستے، تے می سادگون میدکھان چوس یانگ کھونگونی گیالسا میا ثاگس۔ 8تینے کھورانگی یوگپوگونلا زیرس، ’باگستونّی دونتانگ ڈالڈیگ چوتشار، اِین نانگ نگے بودکھانگون تینانّگا تھوشیس اوسپا میدوگ۔ 9سونگتے لامگونّیکا یودکھان تشانگما باگستونّی ڈونلا یونگ زیرتے بُود۔‘ 10گیالپوے یوگپوگون لامگونلا سونگتے تیکا یودکھان زانگپو تانگ نگانپا میتشانگما لدومستے کھیونگسپا، باگستونّی کھانگپا ڈونپوے گانگ۔“
11”اینّانگ گیالپو ڈونپوگونلا تھوگّالا یونّگاچیگ، باگستونّانگ زوبسپے کوسلاگ ماگونکھانجیک تھونگتے، 12کھوے زیرس، ’دزاولے، کھیرانگ زاب مازابّا باگستونلا کازوگی یونگسپین؟‘ کھوا چانگ لانتانگ مانیان۔ 13تینے گیالپوے کھورانگی یاتوگونلا زیرس، ’ای می بوے لاگپا تانگ کانگپاگون لدامستے، پھیلوگا مونڈیگی نانّگا پھونگ، تیرو ناگس ثانٹے جاستے نگوچیس تانگ سو ثیگچیس یونگین‘۔“
14دورلدوستے حضرت عیسیٰ سی مولس، ”نامکھے گیالثیدّی نانّگا مانگپوا بودّا زادس، اِین نانگ نیونگونجیک مانے لدامّا مازادس۔“
رومپے گیالپوا ٹھالشالچیس۔
15تینے فریسی پاگون تیکانے سونگ یانگ کھونگونی حضرت عیسیٰ مسیح مولکھانّی سپیراریگ گیُودتے کھونگ کھادچوگچیسلا ٹابس چوستے 16کھورانگونّی لوبٹوگسگون گیالپو ہیرودِیس چھوگسپاگون نیامپو حضرت عیسیٰ سی یکا ایزوگ زیرچیسلا لامچوگس، ”لوبپونلے، نیرانگ ٹانگپو زادکھانبو نگاجا گیوسیود، یانگ نیرانگی ٹانگپو نیامپو خُدے لامیکا ڈولچیس لابّا زادّانوگ۔ نیرانگی می نانّگا یاپھیس زادّا مانوگ چیازیرنا نیرانگی کھونگون سو اینکھانبویکا سنانّگا زادّا مانوگ۔ 17مولّا زادّانگ نیرانگی تھوگسّام چی این؟ رومی گیالپوا ٹھال شالچیس پو دودیدا مید؟“
18اِین نانگ حضرت عیسیٰ سی کھونگونی جوسنگان کھیینتے مولس، ”ریاکاری گُون چیا نگا سپیرے نانّگا سکارچیسّی سونڈوس چواد؟ 19ٹھالّا تانگکھانّی پینے جیک نگا ستونّانگ۔“ کھونگونی حضرت عیسیٰ سی رومپے مولّی پینیجیک ستانس۔ 20حضرت عیسیٰ سی کھونگونلا مولس، ”ای پینیکا یودکھانّی پار تانگ مینگ سوی اینوگ؟“
21کھونگونی لانتانگس، ”رومی گیالپوے۔“
تینے کھونگی کھونگونلا مولس، ”گیالپوے اینکھانبو گیالپوا تونگ یانگ خُدے اینکھانبو خُدا پھول۔“
22کھونگونی تیبو تشورّاچیگ، ہالاستے حضرت عیسیٰ سی بورتے تیکانے سونگ۔
سونتیا لانگشیسّی سکورلا ٹیوا۔
23تینّا جاگّا، شیکھانگون سونتیا لانّگا مانوگ زیرکھانّی صدُوقی پاگون حضرت عیسیٰ سی یودسا ٹیواجیک ٹیالا یونگستے زیرس 24”لوبپونلے حضرت مُوسیٰؔ سی مولتے اِنپین، ’کالتیس بُوژا جیک ٹھوگو میدپا شینا، کھوے فونو یا نوے ماگپا شیکھانّی بوموا ناما چوستے، شیکھانبوے میرگیود لوسشیسّی پھیا ٹھوگو سکییچوگ گوس۔‘ 25تا فونو نو ردون یودپین، تانگپوبوے ناما چوس، یانگ ٹھوگو میدپا شی، کھوے نوے تے بوموا ناما چوس 26تینّا ژوگس نیسپا تانگ سومپا تانگ ردونپا تشوگپا سونگ۔ 27ستینگجوگا بوموبوانگ شی۔ 28بوموبوے کھونگ تشانگما نیامپو ناما چوسپا، شیکھانگون سونتیا لانگی توسلا کھو کھونگونی نانگنے سوی ناما گیورین؟“
29حضرت عیسیٰ سی مولس، ”کھیوجے نورٹھولبو نی کھیوجاگونلا خُدے ستوبس یا ہلژخمہ شوقبُو بو ہاماگوا اینوگ۔ 30خُدے شیکھانگون سونتیا لانّگا زاد زانے، کھونگونی ناما میچو یا باگما می تانگ، کھونگون نامکھے فرشتا ژوگس گیورین۔“
31”اینّانگ شیکھانگون سونتیا لانّگا زادچیسّی سکورلا ہلژخمہ شوقبُو بوے نانّگا خُدے مولکھانبو کھیوجے ماسیلپینّا؟ 32تیبو نی،
’نگا نی حضرت اِبراہیم خُدے،
حضرت اِضحاقؔ گی خُدے تانگ حضرت یعقُوبؔ ی خُدے این۔‘
کھونگ نی شیکھانگونّی خُدے مانپا، سونپوگونّی خُدے اینوگ۔“
33تیگون تشورّاچیگ میتشوگس کھونگی لابجاگونّیکا ہالاس۔
حُکم تشانگمیسانگ کھاگچان۔
34صدُوقی پاگونّی حضرت عیسیٰ مسیح مولکھانبوا لانتانگ مانیانپا فریسی پاگون دزومس۔ 35کھونگونی نانگنے شریعتی عالِم جیکّی حضرت عیسیٰ سی تشودلتاچیسلا ای ٹیوابو ٹیس، 36”لوبپونلے، شریعتی نانگنے کا کاگیابو تشانگمیسانگ کھاگچان اینوگ؟“
37حضرت عیسیٰ سی مولس، ”مسیح کھیوجے خُدا سنینگ گانگپو، سیمس گانگپو، تانگ سامبا گانگپونے چیسپا چوس۔ 38تیبو نی حُکم ما کھاگچان تانگ ٹاگشوگپو این۔ 39تینّا تسوگسلا حُکم کھاگچان نیسپابو نی، رانّگا چوکھان ژوگس کھیرانگی کھییمتشیسپا چیسپا چوس۔ 40حضرت مُوسیٰؔ سی شریعت تانگ پیغمبر گونّی ڈیسکھانّی شوقبُوگون تے حُکم نیسکوے نانّگا دورلدوستے اینوگ۔“
مسیحا سوی اولاد این۔
41فریسی پاگون دزومستے یودتوس، حضرت عیسیٰ سی کھونگونلا ٹیا زادس، 42”خُدے لدامّا زادکھانّی مسیح سکورلا کھیوجے چی سامّاراگ؟ کھو سوی اولاد اینوگ؟“ کھونگونی لانتانگس، ”گیالپو حضرت داؤد ّی اولاد اینوگ۔“
43حضرت عیسیٰ سی کھونگونلا مولس، ”حضرت داؤد ّی مسیحا، ہلژخمہ رُوح گیُودتے مسیح چیپھیا زیرتے اینوگ؟ حضرت داؤد ّی زیرس،
44’خُدے نگے مسیحا مولس،
نگے کھیرانگی ڈاو تشانگما،
کھیرانگی کانگپے یوگا بوربور تشوگپا،
کھیرانگ نگے لاگپا یاسپے ٹھیسّیکا دوگ۔‘
45کالتیس حضرت داؤد ّی مسیحا ’مسیح‘ زیرّادنا، تینے کازوگی مسیحا کھوے اولاد اینوگ؟“
46سوجیکّانگ لانتانگ مانیان، ماتشاد تے جاگنے پھارلا سوجیکّیانگ کھونّگا ٹیوا ٹیچیسّی ہامپا ماچوس۔
Markert nå:
مادتھا 22: LBJNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ladakhi Bible by The Love Fellowship is licensed under Creative Commons Attribution-ShareAlike 4.0 License.
