مادتھا 13

جینگبادپے ساون تابسکھانّی رومس۔

1تینّا جاگّا حضرت عیسیٰ مسیح کھانگپانے بینّگا زادتے تشوے تھاما ژوگس۔ 2کھونگ یودسا میتشوگس مانگستیانگ مانگپو دزومپا کھونگ ٹُھوزینگی نانّگا ژونتے ژوگس، یانگ میتشانگما تشوے تھاما دُوگس۔

3تینے کھونگی میگونلا رومس گیُودتے لابجا مانگپو سالّا زادتے مولس، ”نیونشیگ، جینگبادپاجیک ساون تابّالا سونگ۔ 4جینّگا ساون تاب زانے کھاچیگ لامیکا بُود، چیپا یونگستے تیگون زوس۔ 5ساون کھاچیگ سا مانگپو میدسے ڈاگیکا بُود، سا مانگپو میدچیسپوے ساونبو گیوگسپا سکییس۔ 6اِین نانگ نییمے تشادّی جاستے جینگ سکییکھانبو تشیگ، یانگ پاٹاگ تینگچان مید پاسانگ، تیبو سکامستے شی۔ 7ساون کھاچیگ تشیرمانگی ٹوا بُود، یانگ تشیرمانگ سکیستے نانپا، جینگبو لدان ماتھوب۔ 8جان ساون گُون سا گیالّا یودسے ژینگیکا بودپا، ستونتھوگ سمین، کا بو ساون تابسکھان نی 30 60 یانگ 100 گیور یودپین۔ 9نامچھوگ یودکھانگونّی نگے زیرکھانلا نیونشیگ۔“

10لوبٹوگسگون یونگستے کھونّگا ٹیس، ”نیرانگی میگونلا رومس گیُودتے لابجا چیا سالّا زادّاد۔“

11حضرت عیسیٰ سی لانسالس، ”نامکھے گیالثیدّی سانگواگون ہاگوچیسّی سکابس کھیوجاگونلا سالّا زادتے اینوگ، اِین نانگ کھونگونلا ماسالس۔ 12نگے لابجا نیانکھانگونلا مانّگا ہاگوچوگّا زادِین، ماتشاد کھونگی نانگنے لودتے چھین اِین نانگ مانیانکھانگونّی نانگنے ہاگوتے یودکھانبوانگ کھیرّا زادِین۔ 13نگے رومس گیُودتے شادچیسّی تونبو نی ایبو این“،

”کھونگونی ستادوگ اِین نانگ کھونگونلا لدینبا تھونّگا میدوگ،

نیاندوگ اِین نانگ کھونگونلا تشورّا یا ہاگو تھوبّا میدوگ۔

14تیبوے یسعیاہ پیغمبری پیغمبری ماونگ لونگستانبو ڈوبتے اینوگ، کا بو

کھونگونی نگے شادکھانگون تشورنانگ ہاگو تھوبّا میدوگ،

کھونگونی نگے چوکھانگون تھونگنانگ نگا سو اینکھانبو نگوشیسّا میدوگ۔

15چیازیرنا کھونگونی سنینگ سکیونگپو گیورتے دوگ۔

نامچھوگّون گاگستے میگون زومستے دوگ

تے مانے کھونگونی نامچھوگنے تشورتے میگونّے تھونگتے،

کھونگونی سنینگنے نگا سو اینکھانبو ہاگوتے نگا چھوگسلا سیمس گیورتے،

نگے کھونگون پھانچوگستے یودڈو۔“ #13‏:15 حضرت یسعیاہ شوقبُو 6‏۔ 9

16”اینّانگ کھیوجے میگ تانگ نامچھوگ گُون برکت چان این چیازیرنا کھیوجے میگی تھونّگانوگ یانگ نامچھوگی تشورّانوگ۔ 17نگے کھیوجا لدینبا زیرّاد، کھیوجاگونلا تھونگکھان تانگ تشورکھانگون، سنگونمے پیغمبر تانگ می ٹانگپو مانگپوجیکّی تھونگچیس تانگ تشورچیسّی دودپا یودنانگ ماتھونّگا یانگ ماتشورّا اِنپین۔“

18”تا جینگبادپے ساون تابسکھانّی رومسّی دُونبو نیون۔ 19لامّا ساون بودکھانگون نی نامکھے گیالثیدّی کا تشورتیانگ ہاماگوکھانگون اینوگ چیازیرنا شیطان یونگستے کھونگونی سنینگی نانّگا تابسکھانبو کوگستے کھیرّانوگ۔ 20ڈاگیکا ساون بودکھانبو نی نامکھے گیالثیدّی کا تشورّاچیگ تھادپو نیامپو ایمان چوکھانگون اینوگ۔ 21اِین نانگ تیبوا پاٹاگ تینگچان مید پاسانگ توسیونرینگ میلوس۔ کھونگونی کے نانّگا ایمان چوچیسپوے ناگس تانگ باردو تھونّگاچیگ ایمان پھانگین۔ 22تشیرمانگسّی ٹوا ساون بودکھانبو نی خُدے حُکم تشورکھانگون اینوگ، اِین نانگ میتشیے تشیرکھا یانگ نورّی دودپا گُونی نانچیسپوے تیبوا ڈاسبو سمینّا مانوگ۔ 23اِین نانگ سا زانگپویکا ساون بودکھانبو نی خُدے حُکم نیانتے ہاگو تھوبکھانگون اینوگ، یانگ کھونگونلا ڈاسبو ساون تابسکھانبوے 30 60 یانگ 100 گیور سمینّانوگ۔“

جینگی نانّگا ژاس نگانّا رومس۔

24حضرت عیسیٰ مسیح یانگ رومس شیگ شادّا زادس، ”نامکھے گیالثید نی جینگبادپے کھورانگی جینّگا ساون زانگپو تابسکھان ژوگس این۔ 25ژانلا تشانگما نییدلوگستے یودتوس، کھوے ڈاو یونگستے ٹو تابسکھانّی ٹوا ژاس نگانّا ساون تابس یانگ سونگ۔ 26جینگ لدانتے سنییما چھاگسّاچیگ ژاس نگانّانگ تیٹوا سکییکھانبو تھونگ۔“

27”لاسمیگون یونگستے سپونبوا زیر، نیرانگی جینّگا ساون زانگپو تابّا مازادپینّا؟ تینے ژاس نگان کازوگی سکیستے این ہے؟“

28”سپونبوے زیرس، ’ ڈاو تابستے اینوگ۔‘ لاسمیگونّی کھوا زیرس، نگاجا سونگتے ژاس نگانپاگون پھودتے پھانّگا؟“

29”کھوے لانتانگس، ماچھا، ژاس نگانپا نیامپو ٹوے جینّگانگ بودتے یونگثیدچیس اینوگ۔ 30رنگابسا تانگتانگ تشوگپا نیسکو نیامپو سکییچوگ، تیتوسلا نگے رنگاکھانگونلا زیرین، سنگونلا ژاس نگانپا توستے میا تابّالا لدوم۔ تینے ٹوگون بانّگے نانّگا کھیر۔“

نیونگسکارّی ساونّی رومس۔

31حضرت عیسیٰ مسیح یانگ رومس شیگ شادّا زادس، ”نامکھے گیالثید نی نیونگسکارّی ساون ژوگس اینوگ کا بو میجیکّی کھورانگی جینّگا تابّالا کھیرس۔ 32ساونگونّی ٹونے تیبو تشانگمیسانگ چھونگون اِین نانگ ، لدان تشارّاچیگ تشاسّی نانّگا تشانگمیسانگ چھینمو لچانگما گیور، یانگ نامکھے چاگون یونگستے تیبوے یالگیکا تشانگس چوس۔“

33کھونگی یانگ رومس شیگ شادّا زادس، ”نامکھے گیالثید نی سکیور ژوگس این، کا بو بوموے، پھے مانگپوے نانّگا ثیستے روسپا سکیوربو پاگپے گانگپوے نانّگا ڈیس۔“

34حضرت عیسیٰ سی میتشوگسلا لابجا سال زانے توسگیون رومس کولّا زادّادپین۔ کھونگی رومس گیُودتے ماستوگس چی لابجاجیکّانگ سالّا میدپین۔ 35تیبوے پیغمبر گیُودتے سنگونلا مولکھانگون ڈانڈا ڈوبتے این،

”نگے میگونلا رومس گیُودتے سپیرا تانگین۔

یانگ دُنیا چھاگسپانے پھارلا

سانگستے یودکھانگون شادین۔“

ژاس نگانّا رومسّی تون۔

36تینے حضرت عیسیٰ مسیح میتشوگسپو پھیلوگا بورتے کھانگپے نانّگا سکیودس۔ کھونگی لوبٹوگسگون یونگستے کھونّگا زیرس، ”ژاس نگانّا رومسّی تونبو نگاجا ہاگوچوگّا زادّانگ۔“

37کھونگی مولس، ”ساون زانگپو تابسکھانبو، اِبنِ آدم این۔ 38جینگبو دُنیا، ساون زانگپو نامکھے گیالثیدّی میگون، یانگ ژاس نگانبو نگانپا اینکھان شیطانی میگون اینوگ۔ 39ژاس نگان تابسکھانّی ڈاو نی شیطان گونّی گوبا، رنگابسا نی تھامے توس یانگ رنگاکھانگون نی فرشتاگون اینوگ۔“

40”تھامے توسلا ژاس نگان توستے میا تابسکھان ژوگس جونگین۔ 41اِبنِ آدمی کھورانگی فرشتاگون کالین ، یانگ کھونگونی کھوے گیالثیدّی نانگنے دِیگپے گیو تشانگما تانگ نگانپا چوکھان تشانگما پھینگین۔ 42یانگ فرشتاگونّی کھونگ تشانگما نیالوے میے نانّگا پھانگین، تیرو ناگس ثانٹے جاستے نگوچیس تانگ سو ثیگچیس یونگین۔ 43تینے می ٹانگپوگون کھونگونی نامکھے یابّی گیالثیدّی نانّگا نییما تسوگسلا لتانگشان بارین۔ نامچھوگ یودکھانگونّی نگے زیرکھانلا نیونشیگ۔“

گیونور رینچان واستے یودکھانّی رومس۔

44”نامکھے گیالثید نی جینگی نانّگا واستے یودکھانّی گیونور رینچان ژوگس این۔ میجیکّا تیبو تھوبّاچیگ تھادتے تینّا جینگی نانّگا یانگسکیار واس، تینے کھو سونگتے یودکھانّی نور تشانگما تسونگس یانگ تے جینگبو نیوس۔“

45”نامکھے گیالثید نی تشونگپے ژالکھانّی موتیگ لاگمو رینچان گُون ژوگس این۔ 46موتیگ رینچان تھوبّاچیگ کھو سونگتے کھورانگی گیونور تشانگما تسونگستے، تیبو نیوس۔“

نیادولّی رومس۔

47حضرت عیسیٰ مسیح مولس، ”نامکھے گیالثید نی گیاتشوے نانّگا نیاریگس سناتشوگس زومّالا پھانگکھانّی نیادول ژوگس این۔ 48نیادولبو گانّگاچیگ تشوے تھاما ٹودتے کھیرین، سیکا دُوگستے نیا گیالّاگون پاگتسے نانّگا گیانگس یانگ گیالّا میدکھان گُون پھانگس۔ 49تینّا ژوگس تھامے توسلا جونگین، فرشتاگون سکیودتے می ٹانگپوگونّی ٹونے نگانپاگون پھیا زادتے، 50کھونگون نیالوے میے نانّگا پھانگین، تیرو ناگس ثانٹے جاستے نگوچیس تانگ سو ثیگچیس یونگین۔ 51حضرت عیسیٰ سی کھونگی لوبٹوگس گونلا ٹیا زادس، ای تشانگما کھیوجے ہاگوا؟“ کھونگونی لانتانگس، ”ہاگولے۔“

52حضرت عیسیٰ سی کھونگونلا مولس، ” شریعتی عالِم ، نامکھے گیالثیدّی لوبٹوگس گیورکھان تشانگما کھانگپے کھانگداگ ژوگس این، کابوے بانگدزودّی نانگنے رینچان نور سوما تانگ سنیینگپا نیسکو پھینگستے کھیونّگانوگ “

پیغمبر سیوا میتھوب۔

53حضرت عیسیٰ مسیح رومسگون شاد تشارّاچیگ کھونگ تیکانے سکیودس۔ 54کھونگرانگی ڈونگکھیرلا سکیودتے مجلِسی نانّگا میگونلا لابجا سالچیس گوزوگ۔ میگون ہالاستے ٹیس، ”ای میبوا شیسرابس تانگ معجزہ ستانچیسّی کھیود کانے تھوبکیاگ؟ 55کھو شینگکھانبوے بُوژا مانوگا؟ کھوے اما حضرت مریم یانگ یعقُوبؔ ، حضرت یُوسفؔ ، شمعُوؔن تانگ یہُوداؔہ گُون کھوے نو مانوگا؟ 56کھوے سترِنگمو تشانگما نگاتانگون نیامپو میدّا؟ تینے ای میبوا تے کھیودگون کانے تھوبکیاگ؟ 57کھونگون تشیگچیسپوے کھونگی کا ایمان ماچوس۔“

حضرت عیسیٰ سی کھونگونلا مولس، ”پیغمبر جیکّا رانگی ڈونگکھیر تانگ رانگی نانگتشانگسّی نانّگا مانے، جان کارونگسا سیوا چوروگ۔“ 58کھونگونی ایمان میچوچیسپوے جاستے، حضرت عیسیٰ تیرو معجزہ مانگپو ستانّا مازادس۔

Markert nå:

مادتھا 13: LBJNT

Marker

Del

Kopier