Matiə 8
8
Gbuuluukɛ Jeju cʋʋnɩ dɩ ɔɔ gbuul pɩɩraa
(Mar 1:40–45; Lu 5:12–16)
1Ɔbɔɔkɛ Jeju kɔɔ thenɩ gɔ̃gʋɔna da‐n gbũ, tibil jɔjʋɔ kɔɔ kpaaraarɛ. 2Dɩ gbuul bɩɛl pʋɔraa, a gburõku ɔɔ ƴɛra, sa sʋʋraa: Kɔ̃tɩn, ado fɩ ture fɩ punone cʋʋ mɩ dɩ ɩ̃ gbuul pɩ. 3Dɩ Jeju ˈlaa nyɔ̃ɔ a thaaraa sa sʋʋraa: Mɩ ture afɩ gbuul n pɛ. Dɩ dapaara ɔɔ gbuul pɩɩraa. 4Agɩpɩ Jeju sʋʋraa: Jɩɛ dʋ bʋrɛ fa‐n so tibillə ga, sɩ jala nɛna Thãgbaa bonɩ jidaar mɔ̃ fɩ hanɩ, a ˈlaanɛna phɔphʋɔl thɩ̃ɛɛkɛ Mʋɩjɩ kɔɔ sonɩ, gɩ nɩna tɩbɩla fɛʋ dɩ fɩ kpɛɛrɛ.#Lev 14:1–32
Jeju kpɛɛrɛ sɔrasɛ tamaa kɔ̃tɩ̃ bɩɛlɩ thɔ̃daar
(Lu 7:1–10)
5Mɔ̃kɛ Jeju kɔɔ lonɩ Kapɛrnayʋm, sɔrasɛ tamaa kɔ̃tɩ̃ bɩɛl pʋɔraarɛ da‐n phʋʋrʋʋ thakɛ ayɩwɔɔ: 6Kɔ̃tɩn, ɩ̃ thɔ̃daar hale a gbãgbar, a phɩ̃ le cʋɔrɔ da‐n ˈwãga jɔɔ ka. 7Dɩ Jeju sʋʋraa: Mɛrɛ, ma jaal a na kpɛsɛɛ. 8Dɩ sɔrasɛ tamaa kɔ̃tɩnna birsee ayɩ: Kɔ̃tɩn, ma teena dɩ fa lõ ɩ̃ cɔaˈ, sɔ nɔ haarɩkɛrakɛ dɔrɔɔm, sɩ ɩ̃ thɔ̃daar na kpɛɛrɛ. 9Gɩdonɩ mɛrɛ dakha, mɩ hananɛ ɩ̃ kɔ̃tɩ̃sɔɔkɛ jɔ mɩnɩ, dɩ mɩ hananɛ dakha sɔrasɛsɔɔkɛ mɩ jɔnɩ. A mɩ so bɩɛlla: Jala, dɩ jal. A mɩ so bɩɛlla wo ayɩ: Ɩna, dɩ ɩ̃. A mɩ so ɩ̃ thɔ̃daarra: Cʋɛ gɩrɛ, dɩ cʋʋ. 10Dɩ ɔbɔɔkɛ Jeju nɩɛnɩ dɩ mɩɩna thale pɩ, nʋɔ kpagʋʋrɛ dɩ so wɩrɛraakɛ n kpaaraanɩ ayɩ: Sobɔr mɩ so nar, Ɩjɩrayɛl dɩɩrarakɛ, ma kɔɔ yɩ tibil bɩɛllakɛ dɩ thʋ̃ hana ha pɛrɛ dɩɩ kɔ̃tɩ̃ thakaˈ. 11Dɩ gɛr gɩ mɩ so narɛ gɩrɛ, tibil jɔjʋɔ na ther wi phã paar na wi lõ paar, a na too dɩko kho paar na Abɩraham, na Ɩjakɩ, na Jakɔbɩ yũ fãgadaarɩ dɩra.#Lu 13:29 12Sɩ wa dʋnanɛ yũ fãgadaarɩ dɩɩ bɩsãsɔ jɩɛra dabirə paar na faa, ka wa bɩnɩ wa‐n yɩrna nyɩma.#Mat 22:13; 25:30; Lu 13:28 13Agɩpɩ Jeju sor sɔrasɛ tamaa kɔ̃tɩnaale ayɩ: Kɔna, mɔ̃ fɩ pɛrnɩ haar ɔmɛna ga ha; dɩɩ do wa bɔraalera thɔ̃daarɩlee kho kpɛɛrɛ.
Khodara jɔɔkɛ Jeju kpɛɛnɩ
(Mar 1:29–34; Lu 4:38–41)
14Agɩpɩ Jeju gbaar jal Pɩɛrɩ cɔ, a yɩ Pɩɛrɩ khɛrɩ nɩ dɩ phɩ̃ na tomɩ kporre, 15dɩ a thaaraarɛ nyɔ̃ɔ dɩɩ do ɔɔ tomɩ kpor ɩɩraarɛ, dɩ pal ɩɩr a teguu kpakpaalɛ. 16A dɩɩ dʋɔr, wɩ kɔɔ kpar kpãkpũdara jɔɔ a pɔnanaa. Dɩ a weere kɔ̃tɛɛbiisɔ na thɩmɩɩ bi bɩɛl, a kpɛɛna dakha khodara fɛʋ. 17Dɩ mɛ̃ gɩrɛ Thãgbaa bobon Ejaɩ kɔɔ sonɩ dã ayɩ: “Ɔr kɔɔ wea asɩ tomɩ sɩsɔ a hɛlna asɩ khosɔ a faa.”#Eja 53:4
Tɩbɩlaakɛ n yaalɛnɩ wɩ do Jejuu kpãkpãadara
(Lu 9:57–62)
18Mɔ̃ Jeju yɩnɩ tibil jɔ dɩ wɩ jɛ a kpalalaa, a ˈlaarɛ hʋɛ ɩnɩ‐n ire iiro. 19Dɩ jɔfʋ dɩɩrdaar bɩɛl tɔr wɔrɔ̃ɔ a sʋʋraa: Dɩɩrdaar, ma‐n kpa farɛ paar wo paarɩkɛ fɩ‐n jalnɩ. 20Dɩ Jeju birsee: Ɓãɓoisɔ hananɛ awɩ ka, dɩ ˈlominə hana awɩ tɛl, sɩ mɛr tibili Bikuun na hana ka ma jəəni yʋaˈ. 21Tibil bɩɛl wo kpãkpãadarara sʋʋraa: Kɔ̃tɩn, ha mɩ hʋɛ ɩ̃ jal ɩ̃ dʋ ɩ̃ thɩ ɓo. 22Sɩ Jeju birsee ayɩ: Na kpa mar sa sɛ khesɔra wa‐n dʋ awɩ khisɔ.
Kɩɛr Jeju cʋʋ thãgba jɩɛ dɩɩ kur
(Mar 4:35–41; Lu 8:22–25)
23Dɩ Jeju kɔɔ lʋʋn gboroona, dɩ ɔɔ kpãkpãadara kpaaraarɛ. 24Dɩ le jɛkhu kɔ̃tɩ̃ɩ ɩɩr mɩɩr nɔɔra, dɩ gborõo na‐n ibi nyʋɔn. Sɩ Jeju wer ha da‐n daar, 25dɩ kpãkpãadara tɔr pɔ a jagʋʋ sa sʋʋraa: Kɔ̃tɩn, taa sɩ sɩ‐n khiire. 26Dɩ bule wi ayɩ: Mɔ̃gɩdo dɩ maar fʋ nɩ, nɛrɛɛkɛ kanɩ hana ha pɛrɛ gbe? Le a ɩɩr a mana jɩɛ na mɩɩr nɔɔ, dɩ thɩ̃ɛ na‐n tutugo bã. 27Dɩ nʋɔ kɔɔ kpaarɛ tɩbɩlaale dɩ wa‐n bule ayɩ: Anyee tibil ca ha ʋrɛ ya fɛ, dɩ jɩɛrakɛ na mɩɩr nɔɔ na‐n nɩɩ nũu?
Kona yenyɔɔkɛ Jeju kɔɔ weeronɩ kɔ̃tɛɛbiisɔ a faa
(Mar 5:1–20; Lu 8:26–39)
28Ɔbɔɔkɛ Jeju iirni gɩ̃ iiro Gadarɛ̃daraa dʋɔ na pɩ, kona yenyɔɔkɛ hananɩ kɔ̃tɛɛbii ther khi dʋ paar dɩ wa‐n caanʋʋ. Wɩ‐n kʋrɛ maar ka, dɩ tibil na‐n ˈla dɩ kana hʋɛɛlaˈ. 29Dɩ wɩ mar dɩ wa‐n hulẽ ayɩ: Anye sɩ ha kha na fɛr, Thãgbaa Bikuun? Fɩ ɩnɛ kɛ fɩ hʋɔl sar, sɩ bɔɔ na dã na paa ya? 30Sɩ dabulo sɩthɔ jɔɔ wɛ a kɔɔ hale ƴɔɔ dɩ wa‐n khʋʋl. 31Dɩ kɔ̃tɛɛbiirə na‐n phʋʋr Jeju thakɛ ayɩ: Ado fɩ wee sɩ, thɔna sɩ sɩ lõ sɩthɔsɔraale. 32Dɩ a so warɛ: Nɩ jala. Dɩ wɩ thɩɩr a jal a lõ sɩthɔsɔraale bɩnɔ, a tinə wi fɛʋ dɩ wɩ ca birbirbir na gɔ̃gɔ̃ horʋ, a jiir mɩɩr nɔɔra, a khiir le nyʋɔnɔ. 33Dɩ wɩrɛɛkɛ n khɛ wɩnɩ, wɩ kɔɔ car kɔ̃, a mɩɩ dɩɩra thɩ̃ɛ fɛʋ na gɩrɛ kɔɔ dananɩ kuunnaakɛ kɔɔ hananɩ kɔ̃tɛɛbiisɔ. 34Dɩ tɩbɩla fɛʋ dɩɩra ther jal Jejuu pa; dɩ ɔbɔɔkɛ wɩ yɩɩnɩ, wɩ phʋʋrʋʋrɛ ayɩ a thɛ nɩ dɩɩra.
Gbãgbarʋʋkɛ Jeju kpɛɛnɩ
(Mar 2:1–12; Lu 5:17–26)
Markert nå:
Matiə 8: LOBIRI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Bible Society of Burkino Faso 1985.
