Matiə 10
10
Jeju phiire thɔ̃thɔna yʋɔr yenyɔ
(Mar 3:13–19; Lu 6:12–26)
1Agɩpɩ dɩ Jeju we ɔɔ kpãkpãadara yʋɔr yenyɔ a ha wɩ punone dɩ wa‐n weena kɔ̃tɛɛbi hɔ̃hɔlasɔ, wa‐n kpɛɛna khoosɔ dɩɩdɩɩ fɛʋ na tãdarasɔ dɩɩdɩɩ fɛʋ. 2Thɔ̃thɔna yʋɔr yenyɔɔ isɔra ha gɩrɛ: Cacadaar Sɩmɔ̃ɔkɛ wɩ‐n wenɩ Pɩɛr na ɔɔ õkuun Ãdire, Jakɩ Jebedee bikuun na Jã ɔɔ õkuun, 3Filipi na Bartelemɩ, Tomasɩ na Matiəəkɛ dɔnɩ war gbadaar, Jakɩ Alfee bikuun, na Tade, 4Sɩmɔ̃ɔkɛ dʋɔnnɩ gbɛ̃gbɛrɛ̃ tibil, na Judasɩɩkɛ thɛnɩ Karɩyɔtɩ dɩɩra, kɛ lirenanɩ Jeju.
Kpãkpãadara yʋɔr yenyɔɔkɛ Jeju thɔnɩ
(Mar 6:7–13; Lu 9:1–6)
5Wɛr dɔ yʋɔr yenyɔɔkɛ Jeju kɔɔ thɔnɩ a so war thakɛ ayɩ: Na‐n jal thɩldaraa pa ga, na‐n lõ Samarɩdarasɔɔ dɩsɔra ga. 6Sɩ nɩ ka na jala Ɩjɩrayɛl ca wɩrɛra bureni a ho banaa. 7Sɩ mɔ̃ nɩ‐n jalnɩ na‐n mɩa ayɛ, bɔɔ n daan dɩ ƴũ Fãgadaar na‐n gba fãga.#Lu 10:4–12 #Mat 11:24; Jən 19:24–28 8Na‐n kpɛɛnɛ khodarasɔ dakha, na‐n ɩrɛ khesɔ khirera, na‐n cʋɛ gbulosɔɔ gbuul ga‐n pɩ, na‐n wea kɔ̃tɛɛbiisɔ na faa. Khaar nɩ ˈlɛ, na‐n ˈlaanɛ khaar. 9Na‐n gba dɛ a fʋrɔaˈ, na‐n gba war dɩ war yɩra gɩ a to lokaaraˈ; 10na‐n fʋrɔ kpakpaar lokaaraˈ, na‐n gba kẽkena yenyɔaˈ, na‐n to nɛfaa ga, na‐n fʋrɔ gbʋʋlaˈ, gɩdonɩ thɔ̃daar teenanɛ haanɛ.#1 Kor 9:14; 1 Tim 5:18
11Dɩ dɩ kɔ̃tɩ̃ dɔɔraakɛ na lonɩ, a dɩ buurə gɩ, nɩ bulene ado tibil hale kɛ teananɩ a na tee nɩ. Nɩ tɔɔ le ntɛɛ pa phaphapha gɩ dana wireekɛ na thenɩ le. 12Sɩ ado na lõ cɔ dɔɔra, nɩ kɔɔ fʋɔrɛɛ. 13Ado cɔ dɔɔ teere kha, anɩ ha ie n ɓananaa, sɩ ado cɔ dɔɔ na tee kha ga, anɩ ha ie n birə nar. 14Ɔbɔɔkɛ wa‐n tee nɩnaˈ, dɩ ga do wɩ‐n pɛ anɩ thɩmɩɩ nũu dakha ga, nɩ thɛ cɔ dɔɔrara agɩbo dɩ dɔɔrara, sa kpɛɛnɛ thɩlãkobe anɩ nɛra.#Th t t 13:51 15Sobɔr mɩ so nar, wireekɛ Thãgba na kɩɩlnanɩ tɩbɩla, Sɔdɔmdara na Gɔmɔɔrdaraa kɩɩlɩkɛ wa ˈlɛnɩ na khɩɩr mɔ̃ dɩɩlee kɩɩl na khɩɩrnaˈ.
Kpooreekɛ na kɔɔ dananɩ
(Mar 13:9–13; Lu 21:12–17)
16Sɩ nɩ hɩnɛ, banaa nɩ ho dɩ ɩ̃ thɔ̃ kpesɔɔ thɩ̃thɩɩn; gɛr gɩ nɩ kpɛsɛnɛ sii kha sa hana hɛlɛlɛ a hɔ puusɩ̃ɛ.#Lu 10:3 17Sɩ na‐n jɩɛ dʋ bʋrɛ tɩbɩlala, gɩdonɩ wa fʋlɛ nɛr na jalna kɩɩl paar, wa ciil ner na khasa Juifisɔɔ Thãgba fʋɔr cɔra.#Mar 13:9–11; Lu 12:11–12; 21:12–15 18Mɛr na dɔ nɔɔ dɩ wa fʋlɛ nɩ na jalna gobanɛrsɔ na fãgadarasɔɔ ƴɛra, gɩ mɩɩ wɩ anɩ ha pɛda na ca kpala dakha. 19Sɩ ɔbɔɔkɛ wa liirna nɩnɩ, na‐n dɛ mɔ̃kɛ na mɩɩnɩ, agɩbo gɩrɛɛkɛ na sonaˈ. Gɩrɛ na sonɩ na ɩ̃ narɛ ga bɔraalera. 20Gɩdonɩ ga do nɛr na mɩa ga, sɩ anɩ Thɩɩ Thu gɩɩkɛ na mɩanɩ le anɩ bɩnɔ na ha nɩ.
21Õkuun na liirnanɛ ɔɔ õkũu bɩnɔ dɩ wa kʋ; ɔmɛ̃ thɩrɛ na cʋʋ na ɔɔ bɩsã. Bɩsana dakha na ɩɩrɛ na tɛna thɛ na nɛ na cʋʋ dɩ wa kʋʋr wɩ.#Mar 13:12; Lu 21:16 22Tɩbɩla fɛʋ na laar nɛr, gɩ do ɩ̃ i dɔ nɔɔ, sɩ ʋrɛ na yɩranɩ na dana khu paar, ɔr na ˈlɛ taarɛ.#Mat 24:9, 13; Mar 13:13; Lu 21:17 23A wɩ kpoo nar dɩ bɩɛlla, nɩ fuo ca ka dɩ kpɩɩra. Sɩ sobɔr mɩ so nar, na kpaar Ɩjɩrayɛl dɩɩ fɛʋ na pɩ sɩɩ do mɛr tibili Bikuun bire ɩ̃aˈ.
24Kpãkpãadaar na hale a na kɔ̃tɩ̃ na jɔ ʋrɛ n dɩrɛɛnaˈ, dɩ thɔ̃daar wo na hale a na kɔ̃tɩ̃ na jɔ ɔɔ kɔ̃tãˈ.#Lu 6:40; Jã 13:16; 15:20 25Gɩ daan dɩ wa hɩɩn kpãkpãadaar mɔ̃ wɩ‐n hɩɩnnɩ ʋrɛ n dɩrɛɛnɩ, wɩ hɩɩn thɔ̃daar dakha mɔ̃ wɩ hɩɩnnɩ ɔɔ kɔ̃tɩ̃. Ado wɩ we cɔdaar kuun Bɛljɛbul, dɩ mɔ̃ wa ka na we dɩphã ɔɔ cɔdara?#Mat 9:34; 12:24; Mar 3:22; Lu 11:15
Ʋrɛɛkɛ teananɩ na‐n ma
(Lu 12:2–7)
26Gɛr gɩ na‐n ma wɩ kpɩɩaˈ, gɩdonɩ thɩ̃ɛ na hale na ker sɩɩ do ga yɩraa ga, dɩ thɩ̃ɛ na hale na ha gbul sɩɩ do wa jɩ gaaga.#Mar 4:22; Lu 8:17 27Gɩrɛ mɩ khe narnɩ pa birə paar, nɩ sɔ gɩ dahɩrɛra tɩbɩla n nɩɛ. Gɩrɛ nɩ nɩɛnɩ bʋ̃bʋʋnɛna, nɩ hulene gi nãsʋrɔ. 28Na‐n ma wɩrɛ n kɔnɩ tomɩr, sɩ wa‐n puno thue dɩ wɩ kʋaa ga, sɩ nɩ ka na ma ʋrɛ hananɩ punone a na cʋʋ dɩ anɩ thu na anɩ tomɩ na kʋɛ bu paar dɔɔra. 29Wa‐n dolõ ˈlominə yenyɔ war be yenyɔaa? Sɩrakɛ bɩɛl na puno na ji thʋnɔ, sɩ agado anɩ Thɩ tuonaa ga. 30Anɩ thɛthɛɛ yʋsũsɔrakɛ Thãgba ther ger fɛʋ. 31Gɛr gɩ na‐n do maar na‐n fʋ naˈ, anɩ the nɔ khɩɩrɛ a jɔ ˈlomĩ jɔjɔjʋɔ.
Mɔ̃ tibil na tuni tɩbɩlaa ƴɛra, Jejuuda a do
(Lu 12:8–9)
32Gɛr gɩ tibil wo tibilikɛ na tuon mini tɩbɩlaa ƴɛra, mɛrɛ dakha ma tuure ɩ̃ Thɩraakɛ hanɩle ƴũu ƴɛra. 33Sɩ ʋrɛɛkɛ bɔ mɩnɩ tɩbɩlaa ƴɛra, mɛrɛ dakha ma bor ntɛɛle ɩ̃ Thɩraakɛ hanɩle ƴũu ƴɛra dakha.#2 Tim 2:12
Mɔ̃ Jeju ɩnanɩ leere
(Lu 12:51–53; 14:26–27)
34Na‐n kpɩɛr ha ɩɩ mɩ ɩna ɩ̃ ˈlaa thɩɩra ga. Ma ɩ̃ ɩ̃ ˈlaa ha ɩaˈ, sɩ bajɩna gɩ. 35Gɩdonɩ mɩ ɩnɛ ɩ̃ pɛr leere bikuunna na ɔɔ thɩ, bikhɩɛnna na ɔɔ nɩ, khɛrra na ɔɔ koo nɩ dakha,#Mis 7:6 36dɩ wɩrɛ dɔnɩ tibili cɔdara na fien na do ɔɔ lãlaardara. 37Ʋrɛ n naannɩ ɔɔ thɩ, a ɔɔ nɩ gɩ, a jɔ mɩ aa teena maˈ; dɩ ʋrɛɛkɛ n naannɩ ɔɔ bikuun, a ɔɔ bikhɛr gɩ, a jɔ mɩ aa teena maˈ. 38Dɩ ʋrɛɛkɛ na‐n gbaannɩ ɔɔ kʋkʋ thɩr dɩ heen da‐n kpana maraˈ, aa teena maˈ.#Mat 16:24; Mar 8:34; Lu 9:23 39Ʋrɛɛkɛ n tɛbanɩ ɔɔ yi, ga ka na buurəəre, sɩ ʋrɛɛkɛɛ yi na kanɩ na bu mɛrɛra, ɔr na lɛ waa gel.#Mat 16:25; Mar 8:35; Lu 9:24; 17:33; Jã 12:25
Tibilikɛ n tea nɩnɩ mɛr a tee
(Mar 9:41)
40Ʋrɛ tea nɩnɩ, mɛr a tee, dɩ ʋrɛɛkɛ tea mɩnɩ, ʋrɛɛkɛ thɔna mɩnɩ a tee dakha.#Mar 9:37; Lu 9:48; 10:16; Jã 13:20 41Ʋrɛ teanɩ Thãgbaa bobon Thãgbaa bobon teguu, a na ˈlɛr khor Thãgbaa bobonɩ kha; dɩ ʋrɛɛkɛ teanɩ tɩɩ sarʋ tɩɩ sar teguu, a na ˈlɛr khor tɩɩ sarʋʋ kha. 42Ʋrɛɛkɛ na cɛnɩ yɔ ie haarɩkɛrakɛ na ha ɩ̃ kpãkpãadaar pɩɛrʋʋkɛ, gɩdonɩ mɛrra a‐n kpa dɩɩ do gɛr dɔ nɔɔ, sobɔr mɩ so nar, ntɛ na ˈlee ɔɔ khoaˈ.
Markert nå:
Matiə 10: LOBIRI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Bible Society of Burkino Faso 1985.
