मट्टि 5
5
येसुऎ पङ्पङ्माबि पिॽमिम्पा खानावाँ
(लुका ६:२०-२३)
1येसुऎ ऎॽवा ह ऎॽवा याॽमिचि खाङ्टकुचि हाङ् खो एक्क पङ्पङ्माबि ठाङाहाङ् पेना। हाङ् खोम् टिङ्खुबाचि खोम् गॆअङ्मॆअङ् खोम्टि खारामि। 2हाङ् खोसॆ गर कामानुङ् खानावाँ चिन्पकुचि
3“निवाँहाङ् पाबुकि कामानुङ् मिन्खुबा आन्ना माङ्स माआनिहा याॽमिचि आसिका टक्चामिम्पाचि यो
मान्ठाभनॆ पारुबिऎ हाङ्डाम् खोचिम्न।
4नुःचाक्मि निवाँ टुक्मिम्पाचि,
मान्ठाभनॆ खोचिऎ हाङ्हाङ् टक्चाकुचि।
5नुःचाक्मि मिःछुॽमा लॆङ्खुबाचि,
मान्ठाभनॆ खोचिऎ बाखाटेम्पि ढुप्पाट्ट लॆकुचि।
6नुःचाक्मि निवाँनेन् खानावाँ नेन्चाखुबाचि,
मान्ठाभनॆ खोचिऎ बखारा चाःटुकुचि हाङ् डुङ्टकुचि।
7नुःचाक्मि होइढा याॽमिचि नाम्नाम् पिसिखुबाचि,
मान्ठाभनॆ खोचिऎ नाम्नाम् टक्चाकुचि।
8नुःचाक्मि सॆङ्सॆङॆ निवाँ चुखुबाचि,
मान्ठाभनॆ खोचिऎ निवाँहाङ् खाङ्टकुचि।
9नुःचाक्मि टङ्चामिक्खुबाचि,
मान्ठाभनॆ खोचि निवाँहाङ्मि पासाचि लिक्मि।
10नुःचाक्मि निवाँनेन् याॽमि लिमिम्पासॆ डुखा आङ्खुबाचि,
मान्ठाभनॆ पारुमि हाङ्डाम् खोचिम्न।
11“निवाँ टक्चामिम्पा आन्ना, का निवाँयुङ् लॆःॽमिम्पासॆ याॽमिचिऎ आन्ना इचाक्मि, डुखा पिःॽमि हाङ् हुन्नहा खानावाँ टिःसे काइर लॆकानि। 12हाङ् आन्ना चाइ चेन्चामानुङ् हाङ्हाङ् मिनानॆ मान्ठाभनॆ आन्नॆ पारुबि ढ्या इनाम् टक्चाकाम्नि। मान्ठाभनॆ आरेॽहा निवाँहाङ्मि खानावाँ लोखुबाचि सङ्क खोचिऎ आक्रहाङ्न डुखा पिट्टुचिमि।
युम् हाङ् ओप्लिङ्
(मारकुस ९:५०; लुका १४:४-३५)
13“आन्ना बाखाटेम्पिऎ युम्न, टर युम्मि युम्पॆन माखारा हाङ्ग आक्क होइखेपा माङ्ऎ युम्पॆ मुमॆ? आक्क कहाङ्माहाङ् याॽमिचिऎ सिक्मॆबाङ् होइक माङ्पि स योम्पक् पिॽनि।
14“आन्ना बाखाटेम्पिऎ ओप्लिङ् यो। पङ्पङ्माबि चुऎ हाटा चुम्सिखॆॽनि। 15हाङ् याॽमिचिऎ ओप्लिङ् ओबुकुचि हाङ् आसॆस बचॽवाऎ खोबुचिनि, टर पङ्पङ्माबि युङुकुचि। हाङ् आक्क खिम्पि चुखुबा चोब्नमि लागि हा। 16इरहाङ्न याॽमिचिम् लुम्पि आन्नामि ओप्लिङ् हाःर हाङ् खोचिऎ आन्नामि काम्नुहा योम्पक् खाङ्टकुचिर। मसॆ आक्खाचिऎ कानिम् पारुबिऎ आपामि निङ् ठेरुचिर।
यायेॽमामि खानावाँ
(लुका १६:१७)
17“काङा मोसामि यायेॽमा हाङ् निवाँहाङ्मि खानावाँ लोखुबाचिऎ लोमिम्पा खानावाँ चेन्लाङ्सि टाडिङ् आमिनानॆ काग आक्खा चेन्सि हेॽनॆ, टर यॆस्सि टाडिङ। 18चाइबान कॆ आन्ना लोकानि, नाम्फलिॽवा हाङ् बाखाटेम् लुक्खॆॽमाबाङ् याॽलन लोमिम्पा चोब्न खानावाँ मालिरढारि निवाँहाङ्मि यायेॽमाबाङ् एक्क मिःछुॽमा खानावाँ हाङ् साम्देन् स माखॆॽनि। 19मसॆ आसॆ चाइ इमिम्पा आक्खा खानावाँमि मिॽमिॽहा खानावाँ चेन्कु हाङ् होइढाचि सङ्क मरक्न लॆःॽमा चिनुकुचि, आक्क पारुबिऎ हाङ्डाम्पि मिःछुवा लि। टर आसॆ चाइ आक्खा खानावाँऎ लोमिम्पा खेम्कु हाङ् होइढाचि सङ्क चिनुकुचि, खो पारुबिऎ हाङ्डाम्पि ढ्या लि। 20मसॆ कॆ आन्ना लोकानि, मोसामि यायेॽमा चिन्खुबाचि हाङ् फारिसिचिबाङ् स एट्टान निवाँनेन् लिमानुङ् मापाइटानि हाङ्ग आन्ना पारुमि हाङ्डाम्पि भॆनभॆन्टकानिनि।
सिरिमि खानावाँ
21“आरेॽऎ लःबि गर लोमिम्पा आन्नॆ खेम्डाम्नि, ‘आनॆ याॽमि सेॽमा फॆन्नि, आसॆ याॽमि सेरुकु म डान्डाबि सि।’#पारास्ठान २०:१३; यायेॽमा ५:१७ 22टर कॆ आन्ना लोकानि, आसा चाइ याॽमि नुङ् सोम् खेरुक्, आक्कसॆ डान्डा टक्चाकु। हाङ् आसॆ चाइ एक्क याॽमि योम्पक् आपिक्खुबा लोकु, खो न्यायॆमि लागि याहुडि टुङ्घङ्पाचि खोम्ठाम् खिम्पि येॽमा लॆ। हाङ् याॽमि निवाँ मॆड्डिङ्मा लोखुबा चाइ नाराक्पिऎ किॽमालुऎ मिःबि सिट्टि खॆ।
23“मसॆ युङ्ठङ्पि भेटि टिमाबाङ् याॽल, एक्क याॽमि आनानुङ् काइखॆडा हाङ्ग, 24आम् भेटि युङ्ठङ्पिॽन याइडामानुङ् खारॆ हाङ् आक्क याॽमि नुङ् टङ्इटॆ। हाङ् टाऎहाङ् आम् भेटि टिःसॆ।
25“न्याये लॆःॽमॆ ठालबि टामाबाङ् याॽल लाम्फुबिन आनानुङ् खिखुबानुङ् टङ्इटॆ। हॆॽनॆ हाङ्ग आना आब्डिक् टिखुबॆ आना न्यायॆढिसबि टॆ हाङ् न्यायॆढिसऎ आना टुङ्घङ्पाबि टॆ हाङ् आना सॆक्चिम्पि सॆक्ढिङ्खॆःॽना। 26चाइबान कॆ लोक्ना, आक्रल आनॆ एक्क एक्क याङ् माफङ्लढारि आक्कबाङ् आम्पहिनानि।”
ब्याबिचारामि खानावाँ
27“आन्नॆ खेम्डाम्नि ‘हाबि ग हाबि मेॽनुङ्मा हाङ् वाठाङ्पाचिनुङ् इम्चाटिॽमा फॆन्नि।’#पारास्ठान २०:१४ 28टर कॆ लोकानि, आसॆ चाइ एक्क मेॽनुङ्मा काइसे निवाँऎ खाङ्कु, आक्कसॆ आसिॽन उम् निवाँबि आक्क मेॽनुङ्मा नुङ् ब्याबिचारा लॆसिम्पा लि। 29आनाम् चुप्ठिङ् मिगॆ आना हिङ्वाबि सिॽमि हाङ्ग, आक्क लाबकॆहाङ् कहाङ्सॆ। मान्ठाभनॆ आनाम् चोब्न सालुङ् नाराक्पि सिॽमाबाङ् ग सालुङ्पिऎ एक्क भाग वेन्मा न नुऎ लि। 30हाङ् आनाम् चुप्ठिङ् हुगॆ आना हिङ्वाबि सिॽमि हाङ्ग आक्क बॽलाङ्सॆ हाङ् वेन्हाङ्सॆ। मान्ठाभनॆ आनाम् चोब्न सालुङ् नाराक्पि खॆॽमाबाङ् ग सालुङ्पिऎ एक्क भाग लाबक्मा न नुऎ लि।”
खिम्टाङ्पा हाङ् खिम्टाङ्मा फाॽलिङ्खॆॽमॆ खानावाँ
(मट्टि १९:९; मारकुस १०:११-१२; लुका १६:१८)
31“गरहाङ् लोमिम्पा आन्नॆ खेम्डाम्नि, ‘खिम्टाङ्मानुङ् फाक्मा मिन्खुबॆ फाक्मिम्पा साब्चिरा पिट्टुर हाङ् फाक्र कामानुङ् लोडा।’#यायेॽमा २४:१ 32टर कॆ आन्ना लोकानि, ब्याबिचारा लॆःॽमिम्पा बाहेका होइढा खानावाँबि खिम्टाङ्मा याइखुबॆ खोम् खिम्टाङ्मा ब्याबिचारा लॆखुबा मुकु। हाङ् आसॆ आक्क मेॽनुङ्मा भ्या लॆकु खोसॆ सङ्क ब्याबिचारा लॆकु।”
कासाम आचामॆ
33“फेरि आन्नॆ आरेॽहा याॽमिचि गर स लोमिम्पा खेम्डाम्नि, ‘आन्नॆ चामिम्पा कासाम् आमिखॆटाम्नॆ, टर आनॆ पारभु निवाँहाङ् नुङ् लॆःॽमिम्पा चुप्लाङ् रक्न लॆटॆ।’#यायेॽमा ३०:२ 34टर कॆ आन्ना लोकानि, हानाम्स कासाम् आचाआनॆ। पारुमि निङ्पि कासाम् आचाआनॆ मान्ठाभनॆ आक्क ग निवाँहाङ्मि पेन्ठाम् ठाल यो। 35हाङ् बाखाटेम्मि निङ्पि कासाम् आचाआनॆ मान्ठाभनॆ ग निवाँहाङ्मि लाङ् युङ्ठाम ठाल यो। हाङ् यारुसालेम्मि निङ्पि स फॆन्नि, मान्ठाभनॆ ग ढ्या हाङ्मि हाटा रेम। 36हाङ् टाङ्पाम् निङ्टवाँमि निङ्पि स कासाम् आचाआनॆ, मान्ठाभनॆ आन्नॆ टाङ्पामि निङ्टवाँबिऎ एक्क टाङाक् स बिऎ हाङ् माइऎ मुहिसाम्निनि। 37टर चाइबान हाङ्ग चाइबान हाङ् हॆॽनॆ हाङ्ग हॆॽनॆ कासानॆ, आक्कबाङ् डिरिक् खानावाँ चाइ साइटानबाङ् टा।”
सिरि ऎन्मा फॆन्नि
(लुका ६:२९-३०)
38“आन्नॆ गर लोमिम्पा खेम्डाम्नि, ‘मिक्मि साट्ट मिक् हाङ् कॆङ्मि साट्ट कॆङ।’#पारास्ठान २१:२४; लेबि ४:२०; यायेॽमा १९:२१ 39टर कॆ लोकानि, आन्ना काइर लॆखुबा याॽमि आन्नॆ माङ्स आलॆटाम्नॆ। आसॆ आना चुप्ठिङ् यापक्पि फॆगुक् आक्क बॆङ्सिङ्ऎ यापक्स सङ्क टाप्टिटॆ। 40हाङ् आसॆ चाइ आनाम् लॽलिङ् लामा मिनुकु हाङ् आना न्यायॆ लॆठाम ठालबि टॆः हाङ्ग खो आम् बोट्टाङ् स पिॽहाङ्सॆ। 41हाङ् रोमि टिलिङ्गाऎ आना काङा एक्क घान्टार लाम्ढुबाॽङॆ कामानुङ् वो, खो हिच्चि घान्टा लाम्ढुबाक्कॆ। 42हाङ् आनानुङ् ङाग्खुबा याॽमि पिट्टॆ हाङ् सिङि लामा यक्खुबा पिट्टॆ।”
टाङ्पा काइर लॆखुबाचि नुःर लॆःॽमॆ
(लुका ६:२७-२८)
43“आन्नॆ गर लोमिम्पा खेमाम्नि, ‘टाङ्पाम् गॆअङ्मॆअङ्हाचि नाम्नाम् पिसिॽमा लॆ हाङ् काइर लॆखुबाचि सिच्चामा लॆ लोमिम्पा खानावाँ आन्नॆ लेकाम्नि।’#लेबि १९:१८ 44टर कॆ आन्ना लोकानि, टाङ्पा काइर लॆखुबाचि नाम्नाम् पिसिटाम्नॆ हाङ् डुखा पिक्खुबाचिम् लागि पारठाना लॆटानॆ। 45गरहाङ् आन्ना पारुबि पेन्खुबा निवाँहाङ् आपामि पासाचि लिकानि, मान्ठाभनॆ निवाँहाङ्ऎ काइसाचि हाङ् नुक्मिहाचिम् लागि नाम् ङिमिकु हाङ् हिङ्वा हाङ् निवाँनेन्चिम् लागि वारि टामिकु। 46मान्ठाभनॆ आन्ना नाम्नाम् पिसिखुबाचि टे नाम्नाम् पिसिकाम्चिनि हाङ्ग आन्नॆ माङ् नाम्याक् टक्चाकाम्नॆ? मान्ठाभनॆ यावॆङ्ग लाखुबाचि सङ्क आक्रक्न लॆःॽमि। 47आन्नॆ टाङ्पाम् याॽमिचिटे नुःर लॆकाम्नि हाङ्ग होइढाचिऎबाङ् माङ् काम्नुऎ योम्पक् यिगाम्नॆ? होइढा याॽमिचि सङ्क आक्रक्न लॆःॽमि। 48मसॆ आन्नामि पारुबिऎ आपा चोब्न खानावाँबि नुऎ लिसिन्टॽन आन्ना चोब्न खानावाँबि नुऎ लिसानॆ।”
Markert nå:
मट्टि 5: LBR
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2023, Wycliffe Bible Translators, Inc. and Nepal Bible Society
