मत्ती 14

यूहन्ना बपतिस्मा दिहंणे आले री हत्या

(मरकुस 6.14-29; लूका 9.7-9)

1तेऊ वक्ते चौथाई भागा रे राजा हेरोदेस यीशु री चर्चा शुणी, 2हेरोदेस राजे आपणे सेबका बै बोलू, यह यूहन्ना बपतिस्मा दिहंणे आल़अ साहा! सह मुंएदे मेज़ा का जिऊंदअ होऊ, एतकी तणी तेऊका सामर्थ्य रे काम हुँदा। 3किबेकि हेरोदेस आपणे भाई फिलिप्पुस री बेटड़ी हेरोदियासा री बजा का, यूहन्ना वै ढाकी करे जेले पाऊ थी। 4किबेकि यूहन्ना तेऊबै बोलू, कि भाई री लाड़ी डाहंणी ताहबे व्यवस्था रे साबे ठीक नांई आन्धा। 5एतकी तणी हेरोदेस यहुना बपतिस्मा दीण आल़े मारणा चाहन्दा थी, पर लोका का डरा थी, किबेकी लोका तेऊ भविष्यद्वक्ता मना थी। 6पर जेबा हेरोदेसा रा जन्मदिन आउआ, तेबा हेरोदियासा री शोहरीए पराऊणे रे सामने नाची करे रिहाही करे हरोदेस खुश करू। 7एता में तेऊ शपथ खाई करे बचन दिना, जोह कुछ तुह माँगली, हाऊं ताहबे देलअ। 8तेसा आपणी आमा रे बोलणे में बोलू, यूहन्ना बपतिस्मा दिहंण आले रअ मुंड अखी थाली मे महा बे शाद। 9राजा हेरोदेस दुखी होऊ, पर आपणी शपथा रै, होर संघे बेशण आले रे कारण, आज्ञा दिनी कि यहुना रअ मुंड एसा बे दीनअ लोडी। 10होर सपाही भेजी करे तेऊए जेलखाने में यूहन्ना रअ मुंड काटू; 11होर तेऊरअ मुंड थाली में आणु होर शोहरी बै दिनअं, जोह तेसे आपणी आमा सेटा बे निऊं। 12तेबा यूहन्ना रे चेले आए होर यहुना बपतिस्मा दीण आल़े री लास आणी करे आटी, होर नाहीं करे यीशु बे खोजी करे शुणाउं।

पांज़ हज़ार लोका बै खलाउंणा

(मरकुस 6.30-44; लूका 9.10-17; यूहन्ना 6.1-14)

13यीशु यह शुणु, तेबा किस्ती में चढ़ी करे, सुनसान जागहा वै नाठै। लोका यह शुणी करे नगरा-नगरा का पैदल ही तेऊ पीछे चली। 14तेऊ निखल़ी करे एक बडी भीड़ हेरी होर त्या पैंदे दया करी, होर त्यारे बमार ठीक करी। 15जेबा बयाल्क होई तेबा यीशु रे चेले सेटा इच्छी करे बोलू, यह सुनसान ज़ागा साहा देर होई; लोका बिदा करा कि या बस्ती में नाहीं करे आपुबे रोटी लए। 16यीशु तयाबे बोलू, त्यारे नाहंणे री जरूरी नांई! तमे ही याह बे खाणा देया। 17चेले यीशु बे बोलू, अखे हामा सेटा पांज़ रोटी होर दुई माछी छाडी करे होर किछे नांई आंधा। 18तेऊ तयाबे बोलू, त्या अखे महा सेटा बे आँणा। 19तेबा तेऊ लोका बे घाऊ पैंदे बेशणे बे बोलू, होर त्याहे पांज़ रोटी होर दुई माछी आपणे हाथे चुआकी; होर सरगा फेरा बे हेरी करे धन्यवाद करू होर रोटी चोड़ी करे चेले बे दिंनी, होर चेले लोका बै दीनी। 20जेबा खाई करे त्या रजी, तेबा चेले बची दी रोटी रे भरी दी बारह टोकरी चुआकी। 21होर खाणे आले में बेटड़ी होर शोहरू छाडी करे पांज़ हज़ारा मर्द थी।

यीशु रा पाणी पैंदे हाँडणा

(मरकुस 6.45-52; यूहन्ना 6.15-21)

22तेबा यीशु तेभरी आपणे चेले किस्ती में चढ़ने बै मजबूर करी की त्याह तेऊका पहिले गलीली समुन्द्र पारा बै नाहंे, जेबरे तणी सह लोका बिदा करे। 23तेबा लोका भेजी करे सह ज़ोता वै प्रार्थना करदअ नाठअ होर बयाले सह तखे केलह थी। 24तेऊ वक्ते धरती का दुर किस्ती समुद्रा रे मेंझे छाली में हिलदी लागी, किबेकि बागुरा सामने का थी। बागरी री बजा कअ झीला में छाली उठती लागी थी। 25होर यीशु राचके चऊथे पहरा में समुद्रा पैंदे हाँडदअ त्याह सेटा बै आउअ। 26चेले तेऊ समुद्रा पैंदे हाँडदे हेरी करे डरी। होर बोलदे लागे, यह भूत साहा। होर डरा रै मारे चिलाऊंदे लागे। 27यीशु तेभरी त्या संघे गला करी होर बोलू, होसला करा! हाऊं साहा नांई डरा! 28पतरसे तेऊबै उतर दिना, हे प्रभु, अगर तुह ही साहा, तेबा महा आपु सेटा बे पाणी पैंदे हाँडणे री आज्ञा दे। 29यीशु बोलू, ईच्छ! तेबा पतरस किस्ती का उतरी करे यीशु सेटा नाहंणे बे पाणी पैंदे हाँडदअ लागअ। 30पर बडी बागुरी हेरी करे डरु, होर जेबा डूबदअ लागअ तेबा जोरे करे बोलू, हे प्रभु, महा बचाह! 31यीशुये तेभरी जेह नांही करे पतरस ढाकु होर तेऊबै बोलू, हे अल्पविश्वासी, तांई किबे शक करू? 32तेबा त्याह किस्ती में चढ़ी, तेबा बागुर रुकी। 33एता में त्याह जोह किस्ती में थी, तेऊबै झुकी करे नमस्ते करी करे बोलू, “सच्ची, तूह परमेश्वर रअ शोहरू साहा।”

गन्नेसरता में रोगी ठीक करने

(मरकुस 6.53-56)

34त्याह पार उतरी करे गन्नसरत प्रदेशा रे कनारे पूज़े। 35तखले लोके यीशु पछेणु होर आसा-पासा रै सारे इलाके में समाचार भेजू, होर सभे बमार तेऊ सेटा बै आँणी, 36होर तेऊ सेटा बमार लोका हाथा जोडी करे अर्जा करदे लागे की सह त्याह आपणे झिकड़े रअ पूंझ ही छुंहंणे दे; जेतरे भी तेऊरे झिकडे रअ पूज छुंहूँ, त्याह सारे ठीक होई।

Markert nå:

मत्ती 14: ISJNT

Marker

Del

Kopier