परेरीत 15

यरूसलेम में महा सभा बईठथें

1फेर तनिक मईनसे मन एहूदिया जिला ले आए के मसीह बिस्वासी मन ला सिखाए लागीन, “अगर मूसा कर सिखावल रीती कर अनुसार, तुमन कर खतना नई होही, त तुमन उद्धार नई पाए सका।” 2पौलुस अऊ बरनबास ओमन कर बात ले राजु नई होईन, तेकर ले ओमन कर मझारे बंहसा-बंहसी होईस, त कलीसिया हर पौलुस, बरनबास अऊ ओमन में ले तनिक मईनसे मन ला चुनीन कि ए गोएठ कर बारे में, परेरीत मन अऊ ऊहां कर मसीह मंडली कर अगुवा मन जग, यरूसलेम में जाए के बात करें। 3मसीह मंडली कर मईनसे मन ओमन के भेज देहीन, त ओमन फीनीके अऊ सामरिया ईलाका ढूकत-मारत, गैर यहूदी मन परभू ला कईसे अपनाईन तेकर बारे में बताईन, एला सुईन के सबेच बिस्वासी भाई मन ढेरेच फुरमा होईन। 4जे घनी ओमन यरूसलेम पहुंचीन, त मसीह मंडली अऊ परेरीत अऊ अगुवा मन ओमन जग ढेरेच खुसी कर संगे भेंटाईन अऊ ओमन ला बताईन कि परमेस्वर ओमन कर संगे रईह के, कईसना-कईसना काम करीसे। 5बकिन फरीसी मन कर दल में ले, जेमन बिस्वास करे रहीन, ओमे ले तनिक झेमन उईठ के कहीन, “गैर यहूदी मन ला खतना करे बर चाही अऊ मूसा कर कानहूंन ला माने कर अगियां देहे बर चाही।”

6तेकर परेरीत मन अऊ मुखिया मन, ए गोएठ कर बारे में सोंचे बरीक जूटीन। 7तेकर ढेरेच बंहसा-बंहसी होए कर पाछू, पतरस हर ओमन जग ठड़होए के कहीस, “ए भाई मन, तुमन जानथा कि ढेरे दिन कर आगू, परमेस्वर हर तुमन में ले मोके चुनीस, कि मोर मूंह ले गैर यहूदी मन, सुघर खभेर कर बचन ला सुईन के बिस्वास करहीं। 8ओहूच मन ला हमर सहींक पबितर आत्मा देके, मन कर जंचोईया परमेस्वर हर ए साबित करीस कि ओमन के अपनाए लेहीस 9परमेस्वर हर ओमन कर मन ला सुद्ध करीस, काबरकि ओमन बिस्वास करीन, एकरले हमर अऊ ओमन में कांही भेद-भाव नई राखीस। 10त तुमन काबर परमेस्वर कर परीछा करथा कि गैर यहूदी बिस्वासी मन कर ढेंटू में एकस बोझ राखथा, जेला हमर पूरखो मन नई उठाए सकीन अऊ हमू मन उठाए नई सकबो? 11हओ, हमर ए बिस्वास हवे कि ओ परभू ईसू कर किरपा ले, जेकस ओमन कर उद्धार होईसे, ओही कस हमू मन उद्धार पाए हवन।”

12तेकर सब सभा कर मईनसे मन कले-कस रईह के, बरनबास अऊ पौलुस कर गोएठ ला सुने लागीन कि परमेस्वर हर ओमन कर चलते गैर यहूदी मन में कईसे बड़खा-बड़खा चिन्ह चमत्कार कर काम ला देखाईस। 13जे घनी ओमन अपन बात ला कएह दारीन, त याकूब हर कहे लागीस, “ए भाई मन, मोर गोएठ ला सुना, 14समोन हर बताईस कि परमेस्वर हर सुरू में, गैर यहूदी मन कर उपरे केतना मान दया करीस कि ओमन में ले तनिक झेमन ला अपन बनाए लेहीस। 15एमे अगमजानी मन कर गोएठोच हर मिलथे, जेकस कि लिखल हवे,

16‘एकर पाछू मंए फेर आए के,

दाऊद राजा कर गिरल घर ला उठाहूं

अऊ ओकर उजरल मन ला फेर बनाहूं

अऊ तियार करहूं।

17एकरले कि बांचल मईनसे मन, मतलब कि सबेच गैर यहूदी मन,

जेमन मोर नांव कर कहाथें, परभू ला खोजहीं।

18एला ओही परभू हर कहथे,

जेहर दुनिया कर सुरू ले,

ए गोएठ कर खभेर देहत आईस हवे#आमोस 9:11,12।’

19याकूब हर एकस बतातेच रहीस कि मोर सोंच एकस हवे कि गैर यहूदी में ले, जे मईनसे मन परमेस्वर कती फिरथें, हमरे ओमन ला परेसान नई करबो। 20बकिन ओमन ला लिख के भेजब, कि तुमन मूरती मन कर आगू में चघावल कोनो चीज ला झईन खईहा अऊ बेभिचार ले अऊ ढेंटू अईंठल मारल मांस ले अऊ लहू ले दुरीहां रईहा। 21काबरकि तईहा जुग ले गांव-गांव में मूसा कर कानहूंन कर परचार करोईया मन, होवत चलत आईन हवें अऊ एला सब पबितर दिन में धरम सभा कर घर में पढ़ल जाथे।”

गैर यहूदी बिस्वासी मन बर चिट्ठी

22तेकर परेरीत अऊ अगुवा मन, कलीसिया कर सबेच मईनसे मन कर संगे एला ठाएन लेहीन कि ओमें ले तनिक मईनसे मन ला चुईन के, पौलुस अऊ बरनबास कर संगे अंताकिया भेजब। एकरे ले ओमन यहूदा जेला बरसबा कथें अऊ सीलास, जेहर भाई मन कर मुखिया रहीस, ओमन के चुईन लेहीन 23ओमन ए दुनो झन कर हाथ में चिट्ठी भेजीन, “अंताकिया सहर अऊ सीरिया अऊ किलिकिया सहर कर गैर यहूदी बिस्वासी मन, तुमन ला परेरीत अऊ मुखिया भाई मन कती ले जोहार। 24हमरे सुने हवन कि हमर में ले तनिक झेमन उहां जाए के, तुमन ला अपन गोएठ मन ले अचमहों कएर देहीन अऊ तुमन कर मन ला घुमाए देहीन हवें, बकिन हमरे ओमन के एकस अगियां नई देहे रहेन। 25एकरले हमरे एक मन होए के, ठाएन लेहेन कि चुनल मईनसे मन ला, अपन दुलरुवा बरनबास अऊ पौलुस कर संगे तोर जग भेजब। 26एमन अईसना मईनसे हवें, जेमन अपन जिनगी ला, हमर परभू ईसू मसीह कर नांव बर, जोखीम में डालीन हवें। 27एकरले हमन यहूदा अऊ सीलास ला भेजे हन, जेमन अपन बात में ए चिट्ठी कर लिखल गोएठ ला पका करहीं। 28पबितर आत्मा ला अऊ हमके ला ठीक लागीस कि ए जरूरी बात ला छोंएड़ के, तुमन कर उपरे अऊ बोझ नई डालब; 29कि तुमन मूरती मन कर आगू में चघावल कांही जाएत ला झईन खईहा अऊ बेभिचार ले अऊ ढेंटू चिपके मारल मांस ले अऊ लहू ले दुरीहां रईहा, अऊ ए सबेच जाएत ले दुरीहां रईहा, त तुमन कर भलाई होही।”

30फेर ओमन बिदा होए के अंताकिया पहुंचीन अऊ सभा ला जूटाए के ओ चिट्ठी ला ओमन के देहीन। 31ओमन चिट्ठी ला पएढ़ के, ओमे कर उपदेस ले ढेरेच फुरमा होईन। 32यहूदा अऊ सीलास जेमन खुद अगमजानी रहीन, ढेरेच गोएठ ले बिस्वासी मन ला उपदेस देके ओमन कर मन ला बजर करीन। 33ओमन तनिक दिन ओजग रहिके, बिस्वासी मन जग ले सांती कर संगे बिदा होईन कि यरूसलेम कर मसीह मंडली में फिर जाई। 34(बकिन सीलास ला उहां रहे ले बढ़िहां लागीस।) 35बकिन पौलुस अऊ बरनबास अंताकिया में रईह गईन। ओमन ढेरेच मईनसे मन कर संगे, परभू कर बचन कर उपदेस देहत अऊ सुघर खभेर सुनावत रहीन।

पौलुस हर बरनबास ले अलगे होथे

36तनिक दिन कर पाछू, पौलुस हर बरनबास जग कहीस, “जे-जे सहर में हमरे परभू कर बचन ला सुनाए रहेन, आओ फेर ऊहां जाए के अपन बिस्वासी मन ला देखी कि ओमन कईसना हवें।” 37तेकर बरनबास हर यूहन्ना जेला मरकुस कथें, ओहू के संगे ले जाए बर सोंचीस। 38बकिन पौलुस हर मरकुस ला जेहर पंफूलिया में ओमन जग ले अलगे होए गए रहीस, अऊ काम में ओमन कर संगे नई गईस, ओके संगे ले जाए बर ठीक नई समझीस। 39बकिन जबरजस बंहसा-बंहसी होईस कि ओमन एक दूसर ले अलगे होए गईन, अऊ बरनबास मरकुस ला लेके पानी जहाज में ले साईपरस चएल देहीस। 40बकिन पौलुस हर सीलास ला चुनीस अऊ बिस्वासी मन ला परभू कर किरपा में, सोंएप देहे कर पाछू, उहां ले चएल देहीस। 41ओहर सीरिया अऊ किलिकिया में ढूकत-मारत उहां कर मसीह मंडली मन ला बजर करत गईस।

Markert nå:

परेरीत 15: SGJ

Marker

Del

Kopier