परेरीत 13

बरनबास अऊ साऊल ला सेवकाई बर भेजथें

1अंताकिया कर कलीसिया में कईयो झन अगमजानी अऊ उपदेस देवईया मन रहीन, जेकस बरनबास अऊ समोन जेला नीगर कथें, अऊ कुरेनी गांव कर लूकियुस, साऊल अऊ मनाहेम जेकर जीयन-खान चाएरो देस कर राजा हेरोदेस कर संगे होवत रहीस। 2जे घनी ओमन उपास कर संगे परभू कर अराधना करत रहीन, त पबितर आत्मा हर कहीस, “मोर बरीक बरनबास अऊ साऊल ला ओ काम बरीक अलगे करा, जेकर बर मंए ओमन के ठहराए हों।” 3तेकर ओमन उपास अऊ पराथना करीन अऊ बरनबास अऊ साऊल कर उपरे हाथ राएख के ओमन ला सेवकाई बर भेजीन।

पौलुस अऊ बरनबास हर साईपरस कर टापू में सेवकाई बर जाथें

4पौलुस अऊ बरनबास पबितर आत्मा कर अगुवाई ले, सिलूकिया सहर में गईन, जिहां ले पानी जहाज में चएघ के साईपरस टापू में पहुंचीन। 5तब सलमीस सहर में पहुंच के, परमेस्वर कर बचन ला यहूदी मन कर धरम सभा कर घर में सुनाईन अऊ यूहन्ना ओमन कर संगे मदेत करे बर रहीस। 6ओमन ओजग कर सबेच टापू ले होवत-मारत पाफुस सहर में पहुंचीन, त बार-ईसू नांव कर एक यहूदी मईनसे जग भेंटाईन, जेहर टोनहां अऊ झूठा अगमजानी रहीस। 7ओ राएजपाल सिरगियुस हर पौलुस कर संगे रहीस, जेहर बूईधमान मईनसे रहीस। ओहर बरनबास अऊ साऊल ला अपन संगे बलाए के, परमेस्वर कर बचन ला सुने बर करीस। 8बकिन इलीमास टोनहां हर, (काबरकि ओकर नांव कर मतलब एही हवे) ओमन कर बिरोध कएर के राएजपाल ला बिस्वास करे ले, रोके बर करत रहीस। 9तेकर साऊल हर जेकर नांव पौलुस हवे, पबितर आत्मा ले भरपूर होए के, एक ढींट ओकरे कती ला देखे लागीस अऊ कहीस, 10“ए सब कपट अऊ सबेच चतुराई ले भरल दुस्ट सैतान कर लईका अऊ सब सचाई कर बिरोधी, का तंए परभू कर सोज डगर ला, टेड़गा करे बर नई छोंड़बे? 11अब सुन, परभू कर हाथ हर तोर बिरोध में उठीस हवे अऊ तंए तनिक घनी बर अंधा होए जाबे, अऊ बेर ला नई देखबे।” तेकर तुरतेंच ओकर आंएख में अंधार छाए गईस अऊ ओहर इते-ऊते टमूड़े लागीस कि कोनो ओकर हाथ ला धएर के ले जाएं। 12तेकर राएजपाल हर जे घटना होए रहीस, ओला देख के बिस्वास करीस, काबरकि ओहर परभू कर बारे में उपदेस ला सुईन के अचमहों होए गईस।

पौलुस अऊ बरनबास पिसिदिया कर अंताकिया में जाथें

13पौलुस, अऊ ओकर संगता मन पाफुस सहर ला छोंएड़ के पानी जहाज ले, पंफुलिया ईलाका कर पिरगा सहर में गईन, बकिन मरकुस जेला यूहन्ना कहत रहीन, ओहर ओमन ला छोंएड़ के यरूसलेम में फिर गईस। 14ओमन पिरगा ले आगू बईड़ के, पिसिदिया कर अंताकिया में पहुंचीन अऊ पबितर दिन में धरम सभा कर घर में जाए के बईठीन। 15परमेस्वर कर कानहूंन अऊ अगमजानी मन कर किताब ला पढ़े कर पाछू, धरम सभा कर घर कर मुखिया मन ओमन जग खभेर भेजीन, “ए भाई मन, अगर मईनसे मन ला उत्साह देहे बर, कांही गोएठ होही त बतावा।”

16तेकर पौलुस हर ठड़होईस अऊ हाथ ले इसारा कएर के कहे लागीस, “ए इसराएली मन अऊ परमेस्वर कर भगत गैर यहूदी मन, सुना! 17ए इसराएली मन कर परमेस्वर हर, हमर पूरखा मन ला चुएन लेहीस हवे अऊ जे घनी एमन मिसर देस में परदेसी होए के रहत रहीन, त ओमन ला बढ़ाईस अऊ अपन बड़खा सामर्थ ले, ओमन ला ओ देस ले निकाएल लानीस। 18ओहर चालीस बछर ले रेगिसतान में ओमन कर देख-रेख करीस अऊ ओमन कर बात मन ला सहीस। 19कनान देस कर, सात जाति मन ला ओहर नास कएर के, ओही देस ला ओमन कर हक में कएर देहीस। ए सब जाएत ला होए में करीबन साढ़े चाएर सौ बछर लागीस। 20एकर पाछू, परमेस्वर हर समूएल अगमजानी कर घरी तक ओमन ला ढेरेच नियाओ करोईया मन ला देहीस। 21ओकर पाछू, इसराईली मन अपन बर एगोट राजा मांगीन, तेकर परमेस्वर हर बिनयामीन कर गोती में ले, कीस कर बेटा साऊल ला ओमन कर राजा बनाईस, ओहर चालीस बछर तक राएज करीस। 22फेर साऊल ला हटाए के, दाऊद ला ओमन कर राजा बनाईस, जेकर बारे में परमेस्वर हर गवाही देहे रहीस, ईसे कर बेटा दाऊद, मोर मन पसंद कर एगोट मईनसे हवे; जेहर मोके मिलीसे, ओही हर मोर सबेच ईछा ला पूरा करही।”

23ए दाऊद कर संतान में ले परमेस्वर हर, अपन बात जबान कर अनुसार इसराएली मन जग उद्धार करोईया ईसू ला भेजीस। 24ओकर आए कर आगू यूहन्ना हर, सबेच इसराएली मन ला, अपन पाप ला छोंएड़ के अऊ परमेस्वर कती मन ला फिराए के, बतिस्मा लेहे कर परचार करीस। 25जे घनी यूहन्ना हर अपन सेवकाई ला पूरा करोईया रहीस, त ओहर कहीस, “तुमन मोके जे समझत हा? ओ मंए ना लागों! बकिन मोर पाछू में एक झन अवईया हवे, जेकर गोड़ कर जूतोच ला मंए छोरे लाएक नई हों।”

26“ए भाई मन, अबराहम कर संतान अऊ परमेस्वर कर भगत गैर यहूदी मन, तुमन बर ए उद्धार कर बचन ला भेजल गईस हवे।” 27काबरकि यरूसलेम कर रहोईया अऊ ओमन कर अगुवा मन, ईसू ला नई चिन्हींन अऊ ओमन अगमजानी मन कर बात मन ला नई समझीन, जेला पबितर दिन में पढ़ल जाथे, तेकर ले ओमन ओके दोसी ठहराए के ओ बात मन ला पूरा करीन। 28बकिन ओमन ओके माएर मरुवाए कर लाएक, कांहीच दोस ओकर उपरे नई पाईन, तबो ले राएजपाल पीलातूस जग बिनती करीन कि ओके ला माएर देहल जाए। 29जे घनी ओमन ओकर बारे में लिखल सब गोएठ ला पूरा करीन, त ओके कुरूस ले उताएर के मठ में राखीन। 30बकिन परमेस्वर हर ओके, मरल में ले जीयाईस। 31फेर जेमन ईसू कर संगे गलील जिला ले यरूसलेम सहर में आए रहीन, ओमन कर आगू में ओहर ढेरेच दिन ले देखार देहत रहीस, एमन अझेर ले मईनसे मन बर ओकर गवाह हवें।

32हमन ए सुघर खभेर ला तुमन के सुनाथन। ए सुघर खभेर हर हमर पूरखा मन ला देहल ओ बात जबान कर अनुसार हवे। 33परमेस्वर हर ईसू ला जीयाए के, ओही बात-जबान ला हमर बर पूरा करीस, जेमन ओमन कर संतान लागी, जेकस दूसर भजन में लिखल हवे,

“तंए मोर बेटा लागस,

अब मंए तोर दाऊ बएन गए हों#भजन संहिता 2:7 ।”

34परमेस्वर हर ईसू ला मरल में ले जीयाए उठाईस, तेमेकि ओहर कभों झईन सरे। ओहर एकस कहीस,

“मंए तोके ला ओ पबितर अऊ अटल आसीस देहूं,

जेला देहे कर जबान मंए राजा दाऊद जग करे हों#यसायाह 55:3 ।”

35तेकर ले ओहर एगोट भजन में अऊ कहीसे,

“तंए अपन पबितर जन ला सरे बर नई देबे#भजन संहिता 16:10 ।”

36काबरकि राजा दाऊद हर तो परमेस्वर कर ईछा कर अनुसार, अपन जुग में सेवा कएर के मएर गईस अऊ ओके ओकर पूरखा मन जग माटी देहीन, अऊ ओकर देंह हर सरियो गईस। 37बकिन जेके ला परमेस्वर हर मरल में ले जियाईस, ओहर सरे नई पाईस। 38एकरले, “ए भाई मन, तुमन जाएन लेआ कि एही ईसू कर चलते, पाप कर छमा कर खभेर तुमन ला सुनाल जाथे। 39अऊ जेमन एही ईसू कर उपरे बिस्वास करथें, तेमन परमेस्वर कर देख में पूरा तरह ले निरदोस होए गईन हवें, जेहर मूसा कर कानहूंन कर द्वारा तुमन बर नई होए सके। 40एकरे ले सवाचेती रहा कि जे बात हर अगमजानी मन कर किताब में लिखल हवे, ओहर तुमनो उपरे आए झईन परे।”

41“ए निंदा करोईया मन, सुना,

अचमहों होए के नास होए जावा,

काबरकि मंए तुमन कर दिन में, एगोट अईसना काम करहूं,

अगर कोनो हर तुमन जग, ओकर बारे में गोठियाही,

तबोले तुमन कभों बिस्वास नई करीहा।”

42पौलुस अऊ बरनबास कर जाए घनी, मईनसे मन ओमन जग बिनती करे लागीन कि अवईया पबितर दिन में ए गोएठ मन ला, हमके फेरेच सुनाएं। 43जे घनी सभा उईठ गईस, त यहूदी मन अऊ यहूदी धरम कर अपनोईया भगत मन में ले ढेरेच झेमन, पौलुस अऊ बरनबास कर पाछू होए लेहीन अऊ ए दुनो झे ओमन ला समझाईन कि परमेस्वर कर किरपा में बने रहा।

44आगू कर पबितर दिन में सहर कर सबेच मईनसे मन, परभू कर बचन ला सुने बरीक जुईट गईन। 45बकिन यहूदी मन भीड़ ला देख के, इसगा ले भएर गईन अऊ निंदा करत पौलुस कर बात कर बिरोध में गोठियावत रहीन।

46तेकर पौलुस अऊ बरनबास, निडर होए के कहीन, “जरूरी रहीस कि परमेस्वर कर बचन ला आगू, तुमन यहूदी मन ला सूनावल जातीस, बकिन तुमन ओला दुरीहां करथा अऊ अपन-आप ला अमर जिनगी कर लाएक नई बनावा, त सुना, हमरे गैर यहूदी मन कती फिरत हवन। 47काबरकि परभू हर हमके ला ए अगियां देहीस हवे,

मंए तुमन ला गैर यहूदी मन बर इंजोर ठहराए हों,

तेमेकि तुमन कर द्वारा उद्धार कर खभेर धरती कर आखरी तक बगेर जाए#यसायाह 49:9 ।”

48एला सुईन के गैर यहूदी मन खुस होईन अऊ परभू कर बचन कर बड़ाई करे लागीन अऊ जेतना झेमन अमर जिनगी जीये बर चुनल गए रहीन, ओमन बिस्वास करीन।

49एकरले परभू कर बचन हर ओ पूरा देस में बगरे लागीस। 50बकिन यहूदी मन, भगत अऊ ऊंच परिवार कर सवांगीन मन ला अऊ सहर कर बड़खा मईनसे मन ला भड़काईन। ओमन पौलुस अऊ बरनबास कर बिरोध में सताव करुवाए के, ओमन ला अपन ईलाका ले बाहरी निकाएल देहीन। 51त परभू ओमन ला एक दिन जरूर दंड देही, एला देखाए बर पौलुस अऊ बरनबास, अपन गोड़ कर धुररा ला झराईन, तेकर इकुनियुम सहर में चएल देहीन। 52अंताकिया सहर कर चेला मन, आनंद अऊ पबितर आत्मा ले भरपूर होवत गईन।

Markert nå:

परेरीत 13: SGJ

Marker

Del

Kopier