Luk 12
12
Betse yene medzi isole
1Ndili yayu, batu beyitsi baya kukene kone Zezu. Bangu badzangite boko metambi ne li muutu le dze uyitsi. Zezu atanda ne bebingi bedzi ati: «Pikayi kebe ne umpyeli ŋwen nda ŋwen batu be Falizi, umpyeli ŋwen bangu ŋwedzi ni nda yila yi ndzilise lipembe. 2Mesi midzi isole betse yene, mesi me batu nde yiba betse yiba. 3Ni mesi me beyi biwowe ne pinzi, batu betse yuka mangu ne musa, ne me beyi biwowe me wawayi se meluyi me booko se liyi ye ndaku ye pii, batu besi betse wowe yanga yanga kule myanza mye mendaku.»
We beyi bituka lepe
4«Me tanda ne beyi, beyi bembatsi bami, beyi nde yene bongo ve batu bibuuma nyulu, ni mbisa ye wawu, nde yila yoko ye bangu bituka vele pika. 5Me laka beyi we beyi bituka lepe. Lipayi Nzambi we mbisa liku adzi ne singa ye uyisa beyi, se ibila dze nde sele. Ee, me tanda beyi, we beyi bituka lepe si Nzambi!»
6«Nde tuka sumbise bilele bye be nde tse bitanyi ne bedolo bole? Ni Nzambi nde dzimbise nyodzi ti ne motu. 7Nzambi ayiba untalu ŋwen suyi yidzi se myulu mye beyi. Beyi nde yene bongo. Beyi batakwe benyodzi beyitsi mvunu!»
Beyi nde yene sonyi ye Zezu
8Me vele tanda beyi miti: «Ti muutu atanda busu ve batu besi.» Ati: «Medzi ni umbingi we Zezu, ne we yikwene Muutu atse tanda busu ve betuma be Nzambi.» Ati: «Muutu yu ni wami.» 9Ni muutu ti atanda busu ve batu besi ati: «Wangu nde yiba me, nami me tse tanda busu ve betuma be Nzambi miti, nami we yikwene Muutu me nde yiba wangu.» 10Muutu ti apanda, we yikwene Muutu, Nzambi atse boloko wangu. Ni muutu ti atuka Fudzu ye Umpende, Nzambi nde tse boloko wangu.
11«Ndili ye bitse bapa beyi se mendaku me umbondu, ne busu ve bekani, ne bepami be mamvu, beyi nde yene bayi ne ukasa midzitsi, nde yene bayi ne me beyi biwowe. 12Ndili mene yayu, Fudzu ye Umpende yetse lakise beyi me beyi bitse tanda.»
Untamvu ŋwen ilongo dzi
13Muutu motu se tima ye unkuka atanda ne Zezu ati: «Kuŋwu, tanda ne unkulu wami akabene uŋkobo ŋwen tata we besu edzika.» 14Zezu akalule nedzi ati: «Medzi wa, kaka ne upama mamvu me beyi, ne ukabaka Untamvu ŋwen beyi.» 15Yumana vavu, Zezu atanda ne batu besi ati: «Pikayi kebe, beyi nde tondo Untamvu ŋwen ilongo. Ni libɨku le muutu nde se Untamvu ŋwedzi, dzakene wangu tadze ne Untamvu ŋwi yitsi.»
16Zezu ate bangu ngana: «Mekuba me muutu motu wedzi ne Untamvu ma kwa ipoko dze bila.» 17Wangu atsimene se unlima ŋwedzi ati: «Maki pika ni vi? Me nde buma ye ibula yami ibata bila bi byesi.» 18Yayu wangu ati: «Yene nda mitse pika. Metse tsala metala mekala ne utunga meneni. Yayu me somo ipoko dzami ne mitamvu myami myesi se kati. 19Ti ma mana, me tse wowe nami mene miti: A umbatsi wami, wedzi ne Untamvu wi yitsi ŋwitse dze bisiwu ne bisiwu. Dzunda, dza, noto, tamba yowe.» 20Ni Nzambi nedzi ati: «We ni suwa! Pindzi yi, wa wele. Ni muutu unsusu ni wa kitse tamba ne Untamvu ŋwowe ebata.» 21Zezu avele tanda ati: «Yene mitse ya kule muutu wi kukise Untamvu ŋwedzi mene, ni Nzambi nde yiba Untamvu ŋwedzi ŋwaŋwu.»
Udze ne ivukidze ne Nzambi
22Zezu atanda ne bebingi bedzi ati: «Yami itanda ne beyi miti, beyi nde yene bayi ne bila bye beyi binyinga, ne bye beyi bilunga ne byangu, ne mikanda mye beyi bifumba swa. 23Ni libɨku la takwe bila, ne nyulu ya takwe mikanda. 24Wayayi benyodzi! Bangu nde kuna, nde tolo. Bangu nde mebula, nde metala, ni Nzambi abungule bangu. Ni beyi batakwe benyodzi. 25Dzakene ti wa yene bayi, we nde tuka velise vʉsa ti ne votu se libɨku lowe. 26Ti beyi nde tuka pika mamvu mete ma, ni ye beyi bivele yene bayi ne mamvu moko ni yi? 27Wayayi nda nzombo yi mendze! Yangu nde dzanza nde dzuma mikanda. Ni me tanda beyi, ne Salomon eke bomo mikanda mive se likuma ledzi nda nzombo. 28Bɨmvu bidzi lolo se mekuba, yana betsumba se ŋwunyan. Ni Nzambi aswise ne bimvu mikanda mive. Beyi batu be nde ivukidze dzi yitsi, uve beyi bayiba ati, Nzambi atse swise ne beyi si vavu. 29Beyi nde buuma nyulu ne ufumba bye beyi bidzele, ne bye beyi binotele. 30Batu be nde yiba Nzambi, ni bifumba bya byesi mendili mesi. Ni Nzambi Tata we beyi ayiba ati, beyi bedzi ne unyingu ve bila byabu byesi. 31Bandayi fumba Ukani ve Nzambi, yayu wangu atse kaba beyi byesi bye beyi binyinga.»
Untamvu ŋwen ikulu
32«Beyi bidzi ni dzinvu dzite, dzikayi yene bongo. Tata we beyi ayene uve, ne ukaba beyi Ukani ve ikulu. 33Sumbisayi byesi bye beyi bidzi ne byangu, kabayi be mimvuvu bedolo. Tungayi myanza mite mye nde biwe. Dzikayi Untamvu ŋwen beyi kwele ye Nzambi, kwele ye ŋwangu nde tse biwe. Awawu, beyiibi nde tuka kobise, ne meselele nde tuka dza. 34Buma yedzi ne mitamvu mye beyi, ne milima mye beyi midzi si wawu.»
Bedzanzi bimoko
35«Dzayi mitele ne dzanza dze Nzambi, takisayi me bamvu me beyi. 36Dzayi nda bedzanzi bibuka kuŋwu we bangu wi yinga ibala. Ndili yedzi itse ya, ye dzitse dzumidze kutse ye ndaku, bedzanzi betse dzuvile. 37Bedzanzi bedzi bedzi se itsisa, ndili ye kuŋwu we bangu ikobise bangu be moko. Ee me tanda beyi ni umbu amene, wangu atse swa ingoyi dzedzi dze dzanza, atse sundise bedzanzi bedzi mitsitsi ne ukabaka bangu bila. 38Kuŋwu ti aya tima ye pinzi, dzakene ne suka kwen, ti akobise bedzanzi bedzi bemoko, wangu atse yene uve.»
39«Yukayi dzi, kuŋwu we ndaku abiki yiba ndili ye unyiibi iya, tadzi wangu nde tuka dzika unyiibi ŋwa nyidzile se ndaku yedzi. 40Ne beyi dzayi mitele, ne beyi nde yiba ndili ye we yikwene Muutu itse ya.»
Undzandzi we tele ne we utsengu
41Pyeli ne Zezu ati: «Kuŋwu, dzamvu dzowe me tanda besu dzi, dzedzi ni dze besu mene, na dze batu besi?» 42Zezu akalʉle nedzi ati: «Undzandzi uve, ne ŋwen utsengu ni ŋwowi? Ŋwangu ni ŋwen kuŋwu we ndaku itanda ne ubata ndaku, na ŋwen kuŋwu iluma ne ukaba bedzanzi boko bila ndili ti ya kalwe. 43Undzanzi adzi se itsisa, sudzi ye kuŋwu iye vutse, aya kobise wangu adzanza. 44Me tanda beyi ni umbu, kuŋwu atse kaba wangu Untamvu ŋwenzi ŋwesi ne ubata.» 45Ni ti undzanzi atanda ati: «Kuŋwu wami nde tse ya mesadzi.» Yedzi ibuumaka bedzanzi be mebaka, ne be baatu meluba, wangu adza, anoto melaku akwative, 46ni kuŋwu atse ya palikise vusa ve undzanzi nde yiba. Undzanzi nde yiba ndili ye kuŋwu itse panza wangu, atse kanzaka wangu nda bikanzaka batu be nde kuuna Nzambi. 47Undzanzi wiyiba me kuŋwu wedzi itondo, ni wangu ti nde pika nda kuŋwu itondo, kuŋwu atse damaka wangu mimbisa miyitsi. 48Ni uŋnzanzi ŋwen nde yiba me kuŋwu wedzi itondo, ndili yedzi ipika mamvu mebi, betse damaka wangu va ite. We beme kaba uyitsi, betse suŋwule wangu uyitsi. We bikaba biyitsi amene, betse suŋwule wangu bitakwe uyitsi amene.
Zezu atse dze ni utsina ve uŋbayi
49«Me meya ni ne uya takise ŋwunyan se senze, ni me me fumba ni miti ŋwangu ŋwen takene. 50Uve ma boko meteme, unlima ŋwami nde uve nzii nami iboko meteme mamu. 51Beyi nde tsimene ati, me meya ni ye kaba beyi itavu se senze. Nyen, itsina nami, batu nde tse dze ne ibila. 52Ve lolo vu, ndili ye batu betanyi bidzi se ndaku mbotu, bangu nde tse dze ne ibila. Bole nde ibila ne besatu, ne besatu nde ibila ne bole. 53Tata nde tse dze ne ibila ne ŋwana we ibaka, ne ŋwana we ibaka nde tse dze ne ibila ne tata. Mama nde tse dze ne ibila ne ŋwana we ŋwatu, ne ŋwana we ŋwatu nde tse dze ne ibila ne mama. Mbambidzi nde tse dze ne ibila ne umbombi, ne umbombi nde tse dze ne ibila ne mbambidzi.»
Uyuka metsɨna me mamvu me Zezu ipika lolo
54Zezu atanda ne mikuka mye batu ati: «Ndili ye beyi biyene lingutsʉ liya kwele ye itadzi dzi nawen.» Ye beyi bitanda ati: «Mvula anole.» Ye mvula ino. 55Ndili ye ipepe dze umbidze dzi kukidze#12.55 A Izayeli yidzi ne ikanye dzi neni ndili ye ipepe ti dza yinga kwele ye ikanye dzadzu ye betanda ati ye dzele ne umbidze. ye beyi bitanda ati: «Yedzele ne umbidze.» Ye umbidze ŋwi ya. 56Batu be umpyeli, ye beyi biwaya senze ne ikulu, beyi beyuka misuta, yayu ye beyi nde tuka yiba mamvu misuta ma ni yi?
Dzayi ne ibila ne biluna beyi
57«Ye beyi mene nde yene me beyi bituka pika ni yi? 58Ndili ye muutu ibapa we busu ve bepami be mamvu, mikise yebise mamvu me beyi nedzi ne peyi. Toko wangu abapa we busu ve umpami we mamvu, ye umpami we mamvu ikaba we ne bewolo, ye bewolo bisomo we ungenenge. 59Me tanda we dzamvu dzotu, we nde tse pula wawu ti we nde wuta bedolo besi bowe ibika wangu.»
Markert nå:
Luk 12: WUM
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
