Luk 10
10
Zezu aluma bebingi bedzi meku untsami ne bebingi bole
1Yumana, Kuŋwu atobo bebingi bedzi meku untsami ne bebingi bole, yedzi eluma bebingi bole ne ubandaka se bingundu ne bibuma byesi byedzi mene itse tse. 2Zezu ne bangu ati: «Buka ya yele, ipoko dza naŋwen ni bedzanzi ute, suŋwulayi ne kuŋwu we buka aluma bedzanzi beyitsi ne uya dzanza. 3Tsekayi, me luma beyi nda baana be bindomvene tima ye benyama bekamve. 4Ni beyi ti batse, beyi nde bapa bedolo, beyi nde bapa myanza ne bekotoko, beyi nde sita ne peyi ne unyusele batu. 5Ndili ye beyi binyinzile se ndaku mbotu, uve beyi babanda tanda ati: “Itavu dze dze se ndaku yi.” 6Ti yadze ne muutu widzi ne itavu se ndaku yayu, itavu dzavuka nedzi, ti nde vavu itavu dza vʉtse ne beyi. 7Ti batu bidzi se ndaku yayu bayamba beyi, dzayi wawu, dzayi bila, notayi bye bikaba beyi, undzanzi uve abomo mewuta, beyi nde vele tse ne nyinzile se mendaku moko, 8ndili ye beyi bikalwe se ngundu yotu, ti bangu bayamba beyi, dzayi bila bye bikaba beyi. 9Sakayi mibedzu mye ngundu yayu, tandayi ne bangu ati, Ukani ve Nzambi va tsindene kone bangu. 10Ndili ye beyi bidzanga se ngundu yotu, ti batu be ngundu nde yamba beyi, tsekayi se bibuma bye mikuka beyi betanda bangu ati. 11Besu betemise iwulu dze ngundu ye beyi, dze menata se metambi me besu, besu bevʉtise beyi dzangu. Ni uve beyi bayiba ati, Ukani ve Nzambi vedzi kone beyi.» 12«Me tanda beyi vʉsa ve Nzambi itse pama batu, umpami ŋwen ngundu yi ŋwetse takwe umpami ŋwen sodome kamve.»
13«Ndoko ne beyi batu be ngundu ye Kolazi, ndoko ne beyi batu be ngundu ye Betsayida. Mamvu me likimiyinda mami epika kwele ye beyi, ni kaka kwele ye batu be ngundu ye Tili ne Sidon. Ni me biki pika mamvu mamu se Tili ne se Sidon, batu babu bebiki nyuwen ne dzika mamvu mebi, ne uyikwene kwele ye Nzambi. Tadzi bangu beswa mikanda mye pusu, ne usuwaka isiyiku kule myulu.» 14Umpami ŋwen batu be Kolazi ne batu be Betsayida ŋwetse takwe ŋwen batu be Tili ne Sidon. 15Ni beyi batu be ngundu ye kapenayumi, beyi betsimene nati, beyi betse takwe boko nzii ikulu? Ndika, we tse sundaka nzii se ibila dze nde sele. 16Zezu avele tanda ne bebingi bedzi ati: «Ndili ye muutu iyuka beyi, ame yuka wawu ni me. Ni muutu take yamba beyi, ame lewe wawu ni yambe me. We nde yamba me, ame lewe wawu ni we me luma me.»
Bebingi be Zezu baye vʉtse
17Yumana vavu, bebingi be Zezu meku untsami ne bebingi bole, baye vʉtse kwele ye Zezu ne itsisa ati: «Kuŋwu, ne mimbiti mye kuuna besu, ndili ye besu biwowe ne myangu ne kumvu yowe.» 18Zezu akalule ne bangu ati: «Me yene Satan ayinga ikulu anaŋwen nda ngandzi tawelime. 19Yukayi, ma kaba beyi singa ye ulanda kule betadzi ne bedziŋga ne undzangite singa ye mimbiti. Nde yituka yukuvuse beyi mbonzi. 20Ni beyi nde tsisa ne vavu, ne mimbiti mikuuna beyi, ni tsisayi itsina ne Nzambi atende mekumvu me beyi ikulu.»
Zezu akumise Nzambi
21Ndili mene mbotu, Fudzu ye Umpende ya kaba Zezu itsisa. Zezu ati: «Tata wami, Kuŋwu we ikulu ne senze, mekaba we live ne mamvu mowe mesodze bekani ne batu be utsengu, yayu wa laka mangu ne baana bete. Ee Tata, we mene ni we metondo vavu. 22Tata wami akaba me byesi, nde muutu wiyiba me Ŋwana we ibaka. Wiyiba me si Tata, nde muutu wiyiba Tata, si me Ŋwana we ibaka wiyiba Tata. Ni me Ŋwana we ibaka me fumba laka Tata ne booko, yayu ne bangu beyiba wangu.» 23Yumana, ye Zezu eyikwene kwele ye bebingi bedzi, awowe ne bebingi bedzi ati: «Beyi bedzi se itsisa ne uyene me beyi biyene.» 24Me tanda beyi: «Batu be Nzambi beyitsi ne bekani befumba yene me beyi biyene, ni bangu beke yene, bangu befumba yuka me beyi biyuka ni bangu beke yuka.»
Kumvu ye muutu we mamvu meve we Samali
25Unlakisi we bitsila motu awasa dendise Zezu unlamvu. Wangu atelime atanda ne Zezu ati: «Kuŋwu, me pika ni vi ne ubomo lɨbiku le nde siya?» 26Zezu akalʉle nedzi ati: «Me Moyizi etende se sanguvu ye bitsila bye Nzambi ni me nza? Ndili yowe itangala sanguvu ye bitsila, mowe iyuka ni me nza?» 27Muutu mene akalule nedzi ati: «Batende se bitsila bye Moyizi.» Ati: «Uve wa tondo Kuŋwu wowe Nzambi ne unlima ŋwowe ŋwesi, ne nyulu yowe, ne singa yowe, ne utsengu vowe vesi, uve wa tondo booko nda witondo nyulu wowe mene.» 28Zezu akakʉle nedzi ati: «We me yiba kalʉle. Pika vavu yayu we bomo libɨku le umbu ne umbu.» 29Ni unlakisi we bitsila efumba ni bomo mbiŋgu. Yedzi isuŋwule ne Zezu ati: «Moko nami ni nza?» 30Zezu akalule nedzi ati: «Muutu motu ayinga Zeluzalemi ne utse Zeliko. Ye mipita mye lwanise wangu. Bangu baboko wangu byesi, babuuma wangu luba, bangu batse ye bangu bedzika wangu tima ye lɨbiku ne liku. 31Kuŋwu we ndaku ye Nzambi, edze ne suta se peyi mene. Yedzi eyene muutu mene, wangu abamvʉle asuta kwele. 32Ne muutu motu we ikaka dze Levi awunze buma mene, ayene muutu we beyukuvuse mbonzi, nedzi abamvʉle asuta kwele. 33Ne muutu we yinga ilongo dze Samali, adzanga kone we beme yukuvuse mbozi. Wangu ayene muutu mene, ayene wangu tsesi. 34Wangu atsindene kone dzi, asuwaka madzi ne melaku se mepinzi medzi akutaka ne usaka wangu, amana vavu, atumbidze wangu atedze kule bodzi yedze ne bapa wangu, yedzi etse nedzi se ndaku ye benzenze ne ubata, ne usaka wangu.» 35Vusa ve seŋwen, muutu we ilongo dze samali akaba bepitisi bole be bedolo ne kuŋwu we ndaku ye benzenze, wangu nedzi ati: «Bata me muutu yu. Ti wayisa bedolo boko kule bami mekaba we, ti maya, mavutise.» 36Zezu asuŋwule ne unlakisi we bitsila ati: «Se metsimini mowe, tima ye bedzungi besatu ba, muutu we mipita mye buuma luba, widzi moko nedzi ni nza?» 37Unlakisi we bitsila bye Nzambi akalule ne Zezu ati: «Ka muutu we me yene wangu tsesi.» Ye Zezu etanda nedzi ati: «Nowe tseke we pika nda wangu.»
Mata bane Maliya bayamba Zezu
38Zezu bane bebingi bedzi bedze ne utse Zeluzalemi, bakalwe se mbuka mbotu. Ŋwatu we kumvu Mata ayamba bangu se ndaku yedzi. 39Wangu edze ne ŋwanzi we kumvu Maliya. Maliya asunda untsitsi se senze, sina mekulu me Kuŋwu ne uyuka medzi edze ne utanda. 40Mata edze ne dzanza uyitsi me kwele mesi, ne ilamba dze bila. Wangu aya kone Zezu nedzi ati: «Kuŋwu, ŋwanzi wami adzika me ne dzanza me mene. We nde yene ubi, tanda wangu aya yamene me.» 41Zezu akalʉle nedzi ati: «Mata, Mata, wedzi ne bayi ne mamvu meyitsi, 42ni yila yineni ni yotu. Maliya atobo ikavu dzive dze muutu ti ne motu nde tse tuka pinule wangu dzangu.»
Markert nå:
Luk 10: WUM
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
