Like 5
5
Jesu aswolo alwoni a nde ancomi
1Cuhu lemo Jesu aki osyese a jaanga e Ngenesarete, lemvuuru lemajenehe nde. Lepya nde, mo oyuha mbari e Njyami. 2Nde omoni ambuungu mwele ma osyese a jaanga, anga mo aki amasuriha mo ocuka aponji. 3Jesu okumi o nca mbuungu mo, mbuungu jya eki e Simo. Jesu oduhi na Simo ndi ciina na mbuungu mwa anja. Nde oya o nci nca mbuungu, ayisiha lemvuuru.
4Nde omana oyisiha, nde na Simo ndi: «Ciisa mbuungu mwa okeri, lehe aponji ma anja, mo okwara a ncu.» 5Simo okaali na nde ndi: «Nkʉmu, bisi lemajanja lempiibi leciina, leka abaha kiila ni. Ŋa me elehe aponji ma anja lemihi na eduhi e we.» 6Bo alehi aponji ma anja, akwari a ncu a kuna, aponji aya mabaha. 7Bo acwoli abuha ma aki o mbuungu emo, na ayamaha bo. Bo ayi, aluusi ambuungu a mwele. Ancu amavʉla kuna, ambuungu aya majina. 8Simo Pyere omamono maami maa aso, nde ovi ma avwo o miisi a Jesu. Nde na nde ndi: «Aa Nkʉmu, labaha na me, me osi ambiini.» 9O ŋa, Simo bɨla abuha a nde aso amoni vwoho, obila mo kuna a ncu a bo makwari. 10Jake bɨla Jan baana a Jebede, aki bɨla Simo amoni vwoho se. Ŋa Jesu oduhi na Simo ndi: «We oka monoho vwoho ni, na ema ka we, janja e we oma ka lesaha le baari.» 11Bo amaya na mbuungu o sabi, asubi mo kalihi, alwoni Jesu.
Jesu osalihi nga ebila
12Cuhu mo Jesu aki nca onguundu. Balaha mo, eki na ebila, omono Jesu, oyi na akumuha o miisi a nde mpaa o ncye. Na nde ndi: «Nkʉmu, me eyaa mbɨri we odya, we abuuna osalaha me.» 13Jesu olabi kwoho, otiili nde ndi: «Me edya, wuuma!» O ŋiŋa, ebila ewi. 14Jesu ndi: «We oka duha mvuuru ni. Jyehe na alaha nyuru mpili osi avwoŋi, mo ompa vwoŋi mo osuumbu a Moyise aduhi. Mo osiisa enywa mbɨri we omiwuuma.» 15Baari kuna mawobo o ncya e nde. Lemvuuru lekuha na e nde, mo oyuha nde, mo osaha nde osalaha angaa a bo. 16Ŋa nde oyeni nca kayi na avwono Njyami.
Jesu osalihi obuka
17Cuhu mo Jesu aki ayisiha. Afarisi bɨla ayisihi me ekele a Njyami, aki o nci o paani e Jesu. Bo awihi ampuhu a ma angaala a Ngalili na onguundu o Jide na Jerusaleme. Mpari e Nkʉmu eki bɨla Jesu mo osalaha abyeri. 18Baari ayi bɨla obuka o yula okuba mo osaha osuumbu mo onyunuŋa nca njo, mo ocuusa nde o miisi a Jesu. 19Baari aki amavʉla kuna, bo aka yaa osuumbu onyunuŋa ni, bo akumi yula njo. Anaani maha, atubi bulu. Apiisi okuba o mwa okuha, o miisi a Jesu. 20Nde omoni oyalihi eki bɨla bo, na obuka ndi: «Ambiini a we amiboloho.» 21Ayisihi me ekele bɨla Afarisi, aya mawobo ndi: «Yu mvuuru na, atuuha Njyami yu? Ongula Njyami na mvuuru okɨmaabuuna oboloho ambiini? Kali, Njyami otu!» 22Jesu aki oyahi ecimiŋi e bo, okaali ndi: «Be bi ecimiŋi ema? 23Osyami kali oma? Leduha le mbɨri “Ambiini a we amiboloho” si kali mo oduha ndi: “Temeŋe, we olaana?” 24Mo bu mbɨri be leyaa mbɨri Mwana Mvuuru na onkʉmu ma oboloho ambiini o yula ncye.» Nde na obuka ndi: «Temeŋe, yaha okuba a we, aje njo.» 25O ŋiŋa, obuka otemihi o miisi a baari, oyahi okuba a nde akihi o yula nde. Oyeni njo e nde na okuusa lekʉma le Njyami. 26Baari aso aki nca lekimi na lenyiima, bo makuusa lekʉma le Njyami ndi: «Lobi bisi lemimono maami a lwari.»
Jesu oswoli Levi
27Emana Jesu oyeni, omoni otoniŋi lepo a nkuumi Levi, aki o nci obiri e nde e janja. Jesu na nde ndi: «Lwono me!». 28Levi otemihi, osubi eso kalihi, olwoni nde. 29Emana Levi osi biila e kuna, ocwoli Jesu njo e nde na aja. Baari aki kuna, na abuha a nde ma atoniŋi ma lepo. 30Afarisi bɨla ayisihi me ekele maŋiina, na alwoni a Jesu ndi: «Be leja, lenywa bɨla atoniŋi ma lepo, na asi ma ambiini mo oma?» 31Jesu okaali na bo ndi: «Baari ma ali enganaha kaama mo osalihi kali, abyeri baari ma ali na kaama. 32Me eka aya na acwolo baari macimiŋa ndi bo ali tele ni, ŋa asi ma ambiini, mo bu ndi bo akaala eku.»
Jesu awobo ma ongerehe
33Afarisi na Jesu ndi: «Alwoni a Jan Batise bɨla a bisi ma aka ongerehe ma ovwono. Ŋa alwoni a we, ma aja, ma anywa.» 34Jesu okaali na bo ndi: «Ŋa cuhu e cinda e baala be lebuuna onyila andihi mo olumi aki njala o ntini olumi ali bɨla bo? 35Ŋa ntini eje oto, ma aje ocyese olumi o mpaniŋi e bo. Bya ecuhu ebo ma aje oka ongerehe.»
36Jesu oti bo ncincami ndi: «I buuna ocebe o bari o mfa e nyarihi mo ocwa bɨla mfa e kala ni. Osa vwa, abiisi mfa e nyarihi. Obari kya se i vunuha bɨla mfa e kala ni. 37Mvuuru i buuna olehe mali ma anyarihi nca ambasa a kala ni. Caaki mo abulihi, nde oyeli aso. 38Ove alehi mali ma anyarihi nca ambasa ma anyarihi. 39Mvuuru i buuna onywa mali a kala ovurihi opɨsi ma anyarihi ni. Obila baari ndi: “A kala avʉli ove.”»
Markert nå:
Like 5: MDT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
