मत्तयाल 6
6
दर्मम कियना बारेमते येसु कराहता पोल्लें
1उसारते मंटु! मिमेट लोकुल्कुंक हुप्सनाहाटीं नीति कबाह्क कियमट. अल्हा कीते, स्वर्गमते मनना मीवा पेनबाबानहेंदाल मीकु बतले इनाम दोर्को.
2अदुनहेंके मिमेट बोनकन्ना दर्मम कियनेंके डप हाटमट. बारित्ते अल्हा डोंगि लोकुल्क मिटिंगुल्कुना जेगाते,#6:2 मिटिंगुल्कुना जेगाते दर्मसास्त्रम कराहना लोह्कुने. हरकुन पीसि ओर्कुन कदर कियगोम इंचि कींतुर. नना निजम वेहंतन, बोर अय्ते अल्हा कींतुरो ओर्कु ओरा इनाम दोर्कुता. 3मिमेट बोनकन्ना दर्मम कियनेंके मीवा तिना कय बतल कींतनो अद रोड्डा कय्दुक बिल्कुल तेळियामन्नि. 4अल्हा कीते मिमेट कियना दर्मम बोनकु तेळियाकोंटा मनंता, अद बतल आंदो मीवा पेनबाबांक एर्के मंता. अदुन हूळसे मीकु इनाम हींतोर.
पारतनाता बारेमते येसु कराहता पोल्लें
(लूकाल 11:2-4)
5अल्हेने बस्के अय्ते मिमेट पारतना कींतिरो, अस्के डोंगि लोकुल्कुनलेसीं कियमट. डोंगि लोकुल्क हरकुना मूलनपोर्रो, पंचादिं कियना जेगाने नित्तिसि पारतनां कींतुर, अल्हा कीते वेल्ले लोकुल्क ओर्कुन हूळंतुर इंचि ओर्कु अनपिंचंता. गानि नना मीकु निजम वेहंतन, ओरा इनाम ओर्कु दोर्कुता. 6गानि मिमेट पारतना कियना वेलाक लोता लोप्पोटा अर्राते होंचि तल्पु वाटकुंचि बोर्के दिसुवा मीवा पेनबाबांक पारतना कीम्टु. अस्के मीवा पेनबाबाल मीकु अद पारतनाता जवाब हींतोर.
7वेरे जातितोर#6:7 वेरे जातितोर वेरे हरदे ताकानोर, वेरे पेनदुक मोळ्कानोर. पारतना कियनेंके उंदे पोल्लेतुन वेल्लेन मल्कां वळकांतुर, अल्हा कीते पेन ओरद केंजंता इंचि ओर्क अनपिच्चंता. 8गानि मिमेट ओरा लेह्का आयमट. बारित्ते मीकु बतल गावालेनो अद तल्कका मुन्नेन पेनदुक एरपाट मनंता. 9अदुनहाटीं मिमेट पारतना कियनेंके इल्हा पारतना कीम्टु:
“ए स्वर्गमते मनना मावा पेनबाबा, नीवा पोरोलतुन अंटोर कदर कियिरकांटी.
10निमेन मापोर्रो राज्येम कीम, स्वर्गमते नीवा इच्चा बल्हा पूरा आंतानो,
अल्हेन ई बूमिपोर्रोगुडा आयिकांटी.
11माकु रोजता तिंडि इय्यालागुडा हीम,
12माकु विरोदमते कीता तप्पुकुन मोमोट बल्हा माप कीतोमो,
निमेगुडा मोमोट कीता तप्पुकुन माप कीम.
13 # 6:13 इद वचनम कोन्नि पांडु लिपिने हिल्ले. माकुन पट्टुने अर्राकोंटा कापाळा, सेड्डातनमताल माकुन पिसागोट्टा.
बस्केळक राजाल निमेन आंदिन.
अदुनहाटीं ताकत आनि महिमा बस्केळक नीवदे आंद.” आमीन!#6:13 आमीन इत्ते अल्हेन आयि, सहमत मंतन. इंचि अर्तम.
14मिमेट वेरेतोरा तप्पुकुन माप कीते, स्वर्गमते मनना पेनबाबालगुडा मीकुन माप कींतोर. 15गानि उंदि वेलाते मिमेट मनकालोरा तप्पुकु मापि कियाकोंटे स्वर्गमते मनना मीवा पेनबाबालगुडा मीकुन मापि किय्योर.
ओक्कापोद्दुना बारेमते येसु कराहता पोल्लें
16मिमेट बस्के ओक्कापोद्दु#6:16 ओक्कापोद्दु उपासम (12 गंटनदाका बतले तिना-उनाकोंटा पेनदा बक्तिते मनमळ.) मनंतिटो अस्के मिमेट जिव्वरा मोकोम कीसि मनमट. डोंगि लोकुल्क अल्हेन कींतुर. ओर्कु अनपिंचंता गदा जिव्वरा मोकोम कीसि मत्ते लोकुल्क ओर्कुन हूळसि ईर ओक्कापोद्दु मंतुर इंचि इंतुर. गानि नना मीकु निजम वेहंतन, ओर्कु ओरा इनाम दोर्कुता. 17अदुनहाटीं मिमेट बस्के अय्ते ओक्कापोद्दु मनंतिटो, अस्के तल्लाक निय होकसि मोकम नोर्राट. 18अल्हा कीते ओक्कापोद्दु मत्तद बोर्के दिस्सो गानि बोर्के दिसुवा मीवा पेनबाबाल मात्रम ओक्का पोद्दुन हूळांतोर. अदुनहेंके मीकु इनाम हींतोर.
दनमता बारेमते येसु कराहता पोल्लें
(लूकाल 12:33-34; 11:34-36; 16:13)
19मिमेट बूमिपोर्रो दनम जमा कीते अदुन सेदेल तिंचि, सिलुम पीसि नासडेम आंता आनि दोंगाल्क दोसकुंचि ओंतुर. अदुनहाटीं ई बूमिते दनम जमा कियमट. 20गानि मिमेट मीवाहाटीं स्वर्गमते दनम जमा कीम्टु, अगा अवुन सेदेल तिन्नो, सिलुम पिय्यो, दोंगाल्कगुडा दोसकुंचि ओयुर. 21बारित्ते मीवा दनम बगा मत्ते अग्गेन मीवा मनसु मनंता.
22मीवा कळु मेंदुलता वेडसि आंदु. अदुनहाटीं मीवा कळु बेस मत्ते, मीवा मेंदुलंता वेलगु मनंता. 23मीवा कळु बेस हिलाकोंटे मीवा मेंदुलंता हीकटे मनंता. दानहाटीं मिमेटगिंटा पेनदा वेलगुन हूळाकोंटे मीवा पिस्वरंता हीकटे मनंता.
24अल्हेन वरोर मनकल इव्वुर मालकुल्कुनगा सेवा किया पर्रोर. अल्हा सेवा कीते ओर वरोन बेस पावरम कींतोर, इंकावरोन हयसोर. हिलाकोंटे वरोना पोल्ले बेस केंजंतोर इंकावरोना पोल्ले बारे केंजोर. इंचि मिमेट पेनदुन आनि दनमतुन उंदे मल्का सेवा किया पर्रिर.
रंदि कियमट
(लूकाल 12:22-32)
25अदुनहाटीं नना मीकु वेहनद बतल इत्ते जीवा तिंडिकन्ना मुक्केम, मेंदुल कपडींकन्ना मुक्केम आंदु. इंचि पिस्सनाहाटीं तिनकोम बतल, उनकोम बतल, इंका मेंदुल्ताहेंका केर्कोम बतल इंचेके रंदि कियमट. 26आ पिट्टेनहेके हुळट, अव वीतों आनि कोय्यों, अचोने आयका गुम्मिने जमागुडा किय्यों, अय्नागानि मीवा स्वर्गमते मनना पेनबाबाल अवुंक तिंडि हींतोर. मीकु अय्ते पेनदा मुन्ने पिट्टेंकन्ना बच्चोनो विलवा मंता इदु मीकु एर्के मंता. 27अय्नागानि रंदि कीसि ओना आवसुन उंदि गंटा एक्को बेरसागोटतोर मीवा नड्डुम बोरन्ना मंतोरा?
28मरि मिमेट केर्रना कपडिनहाटीं रंदि बारि कींतिट? केडाते पूयाना आ पूतनहेके हुळट अव बल्हा बेर्ससंतांगो! अव कबळ किय्यों, कपडिं इंका कुट्टों. 29गानि नना वेहानद बतल इत्ते, सुलेमान राजाल वेल्लेन सिरमंत मंचिगुडा ओना कपडिं आ पूतानाल उंदि पूतातच्चोगुडा सोकु मनाहिल्लें. 30अरे विस्वासम तक्को लोकुरिटा, जाडि इय्याला मंता, नाडि तडमिते वेसि दांता. अयना पेनबाबाल अवुंक इच्चो बेसता कपडिं हींतोर, अय्ते अवुंकन्ना बेसता कपडिं मीकु हिय्या पर्रोरा?
31अदुनहाटीं बतल तिंदकोम, बतल उंडकोम, बतल केर्कोम इंचि रंदि कीसेक मनमट. 32विस्वासम कियवोरगुडा इव गावाले इंचि तनलाळसेक मनांतुर. गानि मीकु इव अन्नि गावाले इंचि स्वर्गमते मनना मीवा पेनबाबांक एर्के मंता. 33अदुनहाटीं मिमेट मुन्ने स्वर्ग राज्येमतुन आनि पेनदा नीतितुन पह्कट, अस्के इव अन्निगुडा मीकु दोर्कनुं. 34बस्केळक बद्दना बद रंदि मनंता. इंचि नाडीता रंदि इयालेन कियमट. नाडीता रंदि नाडीताहाटीं होळसीम्टु.
Markert nå:
मत्तयाल 6: esg-Deva
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2022, Wycliffe Bible Translators, Inc. All rights reserved.
