Matta 6
6
Ka̱sak ka zi nin wwat ka-kyang ni
1“Yi ta̱rwam bu nkyang a yi yya nnani tyyei tssup nyin na a̱ta̱ssi ba̱nyet ni, ho na bu yet bu nkyang cyang ba̱nyet. Ki yi yya a̱mi, yi ni byyi zang nyyai da̱ A̱tyyi nyin nu a̱ shyi Tazwa ni ba.
2“Ki a ni nang a̱yin nu a̱ byyi dizot i kyang, ryok tyyei ba̱nyet ba; a̱mi ba̱nyet raai ba̱nyet ba nan yya a a̱bat a̱duwa na bu na̱ta̱ryen na. Ba na yya a̱mi ba̱nyet a̱ ga ba̱ dyep. Ka̱ryong a̱mi n ya tyyei: i yya na a̱mi ba ssang zang mba ji kyi i ka̱sa ka. 3Ma ki a ni brang a̱yin nu a̱ byyi dizot i, a ryok wwon ma a̱rywai nwan a̱ bvwo kyang a a yya ni ba, 4seko a yya i nrang. A̱tyyi nwan nu a̱ shyi Tazwa ni a̱ ni ryi kyang a a yya i nrang a ni a̱ na̱ ryi zang nwan ji.”
Ka̱sak ka zi nan yya a̱duwa ni
(Luka 11:2-4)
5“Ki yi ni yya a̱duwa, yi ryok yya di ba̱nyet raai ba̱nyet iya ni ba. Ba na cat ta̱za a̱ sseng a a̱bat a̱duwa na ko gak a̱zi ryen, ba̱nyet ba a̱ swrap ni a̱ ga ba̱ ryi. Ka̱ryong n ya tyyei: ba wa ka̱n san zang mba ji kyi i ka̱sa ka. 6Ki a ni yya a̱duwa, a nwa ka̱yat bat nwan i yyik ka̱bvwa ka i naai A̱tyyi nwan nu a̱ shyi i nrang ni. A̱tyyi nwan nu a̱ cyang kyang a a yya i nrang a ni a̱ ni na̱ ryi zang nwan.
7“Ki a shyi i yya a̱duwa nu, a ryok ki gon ryat a̱jinjing ba̱ryat u a̱ sang diccu ni ba. A̱mi ba̱nyet cyi Ka̱za ba ba nan yya. Ba hwa di a̱jinjing a̱duwa mba nu a̱mi a̱ ni tyyi Ka̱za a̱n ba̱ hok. 8Yi ryok yya da̱ mba ni ba, rot A̱tyyi nyin nu a̱ wa ka̱n bvwo kyang a yi cat naai a ni nyyai yi ka̱n krang ba. 9Ki yi naa-naat yya a̱duwa nu, yi yya ni,
‘A̱tyyi njit u a̱ shyi Tazwa ni:
Ba dyep diyrek nwan ti;
10Dityok nwan ti i ba,
ba yya i ka̱sa ka kyang a a cat i
da̱ni di ban yya Tazwa ni.
11Za ryi kyang a zi ni ya ka̱pfun ni.
12Za tssu a̱ka̱tuk u zi na̱ yya mi ni,
da̱ni di zin yya ba̱nyet ba a̱ za ywap ni.
13Ryok za tyyi a a̱ka̱tuk ka̱me ba
i za tun an bvak Ka̱ta̱nyrang.’
14“Ki yi bring ba̱nyet ba a̱ ya ywap a npfwa ni, a̱mi A̱tyyi nyin nu a̱ shyi Tazwa ka ni na̱ ma̱ nin ya bring. 15Ma ki yi rak bring ba̱nyet ba a̱ ya ywap ni, a̱mi A̱tyyi nyin nu Tazwa ka na̱ ma̱ nin dak bring a̱ka̱tuk u yi ka̱n yya ni.”
Yya a̱zumi
16“Ki yi yya a̱zumi, yi ryok shyik a̱ssi nyin na n cong ba; a̱mi ba̱nyet raai ba̱nyet ba ba nan yya; ba na shyik a̱ssi mba na, a̱ ga tyyei ba̱nyet ka̱sak ka ban yya a̱zumi ni. Ka̱ryong n ya tyyei: ba wa ka̱n san zang mba ji. 17Ma ka̱ram ka a nin yya a̱zumi ni, a sso i ya jyi sa̱rei, 18ho ba̱nyet a̱ bu bvwo da̱ a yya a̱zumi, se A̱tyyi nwan nu a̱ shyi Tazwa i nrang ni nu a̱ ni bvwo. A̱tyyi nwan nu a̱ cyang kyang a a yya i nrang a ni a̱ ni na̱ ryi zang nwan ji.”
Tung zwa Tazwa
(Luka 12:33-34)
19“Yi ryok ya tung zwa kyi i ka̱sa ba, ka̱bvwa ka shushwap bu nkyang ka̱byen ba nin za ni, ko ba̱tang a̱ yyi. 20Ma yi ya tung zwa Tazwa, ka̱bvwa ka shushwap bu nkyang ka̱byen ban cong ni ba, di ba̱tang ba ni yyi ni ba. 21Rot ka̱bvwa ka zwa nwan ji zin shyi ni, ka̱ yemi rya nwan na ku ma̱n shyi.”
Kyang a cong di rwam a ka̱bvwa sai ni
(Luka 11:34-36)
22“Assi njit a a̱ ryi di fitila ni. Ki a̱ssi nwan na a̱ cyang ansham, rwam nwan na ma̱ ni sai di ka̱bvwa sai ni. 23Ma ki a̱ssi na a̱ cyang ba, rwam a ma̱ ni naat ba̱gbyik. Rot a̱mi ki fitila nwan ji ryi gbyik, rwam nwan na ni ryi gbyik a̱ka̱tuk ryi!”
Tssup Ka̱za bu byyi zwa
(Luka 16:13; 12:22-31)
24“A̱yin a̱n shyi a̱ ni maai yya dikwwa ba̱tyyi na̱sa na̱hwa ba. Ko na̱ rak a̱ntyok ka̱ryi a̱yring a̱ tssup a̱yring, ko meyang na̱ yya a̱yring dira̱ntong a̱ tyong a̱yring u. A̱yin a̱n maai a̱ yya Ka̱za bu zwa dikwwa bu ka̱ram ka̱yring ba.
25“Nkpa n ya tyyei: yi ryok dam kyang a yi ni ya ko yi sswa i gi yet ba̱cet i ba, ko ba̱tro ba yi ni shya n kup rwam ni. Sucet nyin na ran kyangya na baa? Ki ndwam nyin na ran ba̱tro ba baa? 26Yi cyang na̱non na a̱ ka naat i: ba tssup zwa ba, di ba na yya yak a̱ tyyi a a̱ngban ba. A̱tyyi nyin nu a̱ shyi nTazwa ni a̱mi a̱ ba̱ tssung. Yi ran na̱non na baa? 27A̱nyan a̱huhwa nu na̱ ni tyyi na̱n ya brang a̱rya nu na?
28“A̱huhwa ba̱tro nu a̱ yet a̱nying a̱nzan? Yi cyang ka̱sak ka nkpyat na̱kon ka̱yit a nan dai ni. Na yya pfong ba, di na ya cat ba̱tro ba. 29Ma n ya tyyei, ko Solomon bu zwa nu ji a̱ yin byyi na̱sham ba̱tro di nkpyat a ni ni ba. 30Ka̱za a̱mi mbvak nka a̱ jyi ba̱pyyi ba zi cyang ni, ba̱nying ba a̱ ni ta̱kyem ka̱pfun, ka̱ntson ba cak a̱ tyyi an dong ni, ba̱lle nyin o, ba̱nyet cincong ka̱ryong! Tyyi rya na ya zzak o? 31Rot a̱mi ryok nwa a̱huhwa yya, ‘Ke n ni n shya kyangya ko kyang sswa ko kyang a n nin kup ni.’ 32(Taka̱i a̱huhwa na ni a̱mi ba̱nyet cyi Ka̱za ba ba yya kozan ka̱ram.) A̱tyyi nyin nu a̱ shyi Tazwa ka ni a̱ bvwo yi cat nkyang ani sa̱rei. 33Seko yi yen yet ka̱son cat Dityok Ka̱za ti bu a̱tsatsak yya nka nu; nka meyang ka ma̱n ya brang kpikpit nkyang ani. 34Rot a̱mi ryok sook a̱huhwa ka̱ntson ba, ka̱ntson a̱ ni cam diccu nka. Kyang a nwa ka̱pfun ni n maai ka̱bvung nom ka.”
Markert nå:
Matta 6: kaj
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2011, Wycliffe Bible Translators, Inc. All rights reserved.
