John 1
1
Hapaki oharo
1Avare koare la hoa, Oharo Iele aeaveape; Oharo Iele Aualari i hareho aeaveape; Oharo Iele va Aualari hovea hovea. 2Are va avare koare hoa Aualari i hareho aeaveape. 3Eharu oaria are karikipe: are va karia va laila, karikivahaeape la eharu oaria va au karikivahaeaila. Eharu oaria are hiki karikivahaeape. 4Ovokake are v'ila aeaveape. La ovokake haela oaria ve ovava leipe. 5La ovava mea muru hoa heauapavila, mea muru arero auhohi kekela va ka.
6Aualari haela ae kipareape; areve rare va John. 7La haela ovava vavavakive ekepe, ehovea haela oaria are v'ila iki kelavakive. 8La ovava are havahu ka, aka arero kiparaeape Aualari, ehovea la ovava v'ila vavavakive.
9Meahaiapo ekevahaelula haela oaria aiaravila la ovava va iele. 10Are meahaiapo aeaveape, are meahaiapo karikipe, aka meahaiapo haela arero ore au leila. 11Are are havahu ve eharu ve ekepe, aka areve haela arero auhohi au leila. 12Aka arero auhohi leivahaeape la haela, are erero aheke aiarape, Aualari ve akoremari hovea leikive, areve rare iele kelavalula la haela. 13Ere va apu v'ila aka aivau v'ila au eravahaeaila, ere va Aualari v'ila erape.
14Oharo Iele aivau maea leipe, ela i hareho aeaveape. (Ela areve haharika eavape, Oa ve la Akore haroapo ve haharika hovea) are ove meru i o iele ila. 15John are v'ila mari kileape, Ara ma haela v'ila oropa kileape, Araro airekai ekeki la haela ere arave oropa ve ikivere leikilai ehovea are arave oropa ve aeaveape. 16Elaviila oaria areve iele le avape, ikiore i ove meru ila hovea hovea, eapapo iele. 17Ehovea pupu oaria Moses aiarape, aka meru i O iele ila Iesu v'ila ekevahaeape. 18Haela oaria Aualari au eavaila, Aualari epape Akore haroapo hiki la, Oa ve iki ureve aeavila la akore, are hiki arero hihika amoeape.
John Baptist Iesu v'ila vavavape oharo
19Jew haela va oharo haela i Levite haela ila uku Jerusalem ve paparaehape ehovea arero velavela leikive, A leita ha? 20John erero kavale mari maeaeape — are hehepo au leila, are erero hihika maeaeape, Ara Keriso ka. 21Ere arero apevelavela leipe, Lehae a va Elias ha? Are macaeape, Ka. A va la peroveta haela ha? Are kavale maeaeape, Ka. 22Laelave ere arero maeape, A va leita ha? — Ehovea elaro kipaparaehape la haela, ela kavale oharo maeaeakive — A va elare rare learia kimaeaeakilai ha? 23Are maeaeape, Ara huakara ita havila haela ve āra maria: — Amua ve okiharo ehohoe karikiki — Isaiah maeape oharo la.
24Arero velavela leikive ekevahaeape la haela va Pharisee haela. 25Ere arero velavela maria leivahaeape, A va Keriso, aka la peroveta haela leiki aue la leikilava, a va haela bapatiso leivahaevila ehovea leve ha? 26John erero kavale maeaeape, Ara ma v'ila bapatiso leivila, aka eve aru hihi ve haela le peave — e va arero haveva. 27La haela arave aire ekekilai, kai arave oropa leikilai, ara areve loa iilu ve ela helaukakive hovea va ka. 28Ma eharu Bethabara, Jordan ukai ve, leivahaeape. John bapatiso horova leipe la ita.
29La opoa hare John Iesu ekevila eavi mariape, Eavaila, Aualari ve Mamoe Akore — Meahaiapo haela ve heahaha hapururukavila la Mamoe Akore. 30Ara ma haela v'ila maeape, Arave aire ekeki la haela arave oropa leikilai, ehovea are arave oropa ve aeaveape. 31Ara arero ore au leila, aka ara v'ore hiki are Israel haela oropa ve hihika leikilai, laelave ara ma v'ila bapatiso leikive ekevila. 32John maria vavavape, Ara Ove huva hovea kaia ve kihoauvila eavape, are areve akea ve epavape. 33Ara arero ore au leila, aka araro ma ve bapatiso leikive kiparaeape la haela araro mari kimaeape, A va Ove areve akea ve ma kihoaila eavaki la haela — Are Ove Veveke v'ila bapatiso leivila haela. 34Ara eavape — kai vavavape — la haela are va Aualari ve Akore.
John Baptist ve kilea haela i Iesu ila
35La opoa hare John i kilea haela orahokaila ila epavape. 36Are Iesu veavila eavi mari maeaeape, Eavaila, Aualari ve Mamoe Akore. 37La kilea haela orahoka areve oharo iapai, Iesu airekai auvahaeape. 38Iesu helari erealilara eavi maeape, Ealila le la haroparo ha? Erealila kavale maeape, Rabbi (la oharo ve iele Haelapo), a va lahoa aeavila ha? 39Are erelilara maeaeape, Ari iki ovohae eavaila. Erealila ai are aeaveape la uvi eavape kai la hare are i hareho apeape, ehovea hailaea hoa 4 o'clock. 40John ve oharo iapai Iesu airekai auvahaeape haela ae ve rare Andrew, Simon Peter ve akoreheari. 41Are oropa Simon areve akoreapo koarai mari maeape — Ela Messiah (la oharo ve iele, Keriso) lakoaraila. 42Are arero Iesu ve leia lai aupe. Iesu arero eavi mari maeape, A va Simon, Jona ve akore, a va aireaki rare itavaki rare, Cephas — (la rare ve iele, Peter — have).
43La opoa hare Iesu ikivere Galilee hoaukive. Are Philip koarai mari maeape, Araro airekai ekela. 44Philip va Bethsaida haela, Andrew i Peter ila ve karikara. 45Philip Nathaniel koarai mari maeape, Ela va Moses pupu buka i peroveta ila ve oharo haeape, la haela koarape — Iesu Nazareth haela Joseph ve akore. 46Nathaniel mariape, Eharu veveke Nazareth karikara kihorerakilai ha? Philip arero maeape, Iki ovohae eavaki. 47Iesu Nathaniel ekevila eavi are v'ila maeape, Eavaila — iki veveroro Israel haela la. 48Nathaniel arero maeape, A araro ore lahoa leipe ha? Iesu arero kavale maeape, Philip aro aire lamaeaila ara aro oropa laeavila, lauka kora ipi ve. 49Nathaniel kavale maeape, Rabbi, a va Aualari ve Akore! A va Israel ve Amua! 50Iesu arero kavale maeape, Ehovea ara aro mari maeape, Ara aro lauka kora ipi ve laeavila, a araro iki lakekelaila ha? La va iele karia — a va aireaki eharu ehoaha iele havahu eavavahaeakilai. 51Are arero maeape, O iele, o iele, ara aro maeaive, aireaki hoa a va kaia hapaila eavakilai, kai Aualari ve aneru pekahavaki kihoahukaki v'ila eavakilai.
Markert nå:
John 1: ORO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Published by the British and Foreign Bible Society 1963-1972
