Péna a Apotereri 14
14
Pôl rá̧ Barnabas ka̧ Ikoniyɔm
1A Ikoniyɔm, Pôl rá̧ Barnabas sé ɓil vûn gɔ́ŋ Gáŋvbôn a Juyífri, a niŋ ɓá mbêwké a tɔ́ʼɔɓay a Gáŋvbôn. Njukuri ɓá ŋgɛ̧́náké, Juyífri rá̧ njukuri ka zi tí ɓá Juyífri yáy láɓulaw. 2Dáy, Juyíf a há̧narí̧ ka zi láɓulaw yáy, kó nǎŋnɔ́ a uru njukuri ka zi láɓulaw yáy, a ɓá ɓéké ɓay kɔ̧ law a kuriri, ɓay kú fɔny njuku láɓulawri. 3Pôl rá̧ Barnabas kaw ɗiɓaŋ a Ikoniyɔm. Kú saɓay táŋ wɔ́w a law mbêw sé tûl a Gáŋmbây Zezú, Nǎŋnɔ́ Gáŋmbây hí̧ kuriri kpɔ́ŋa niŋ hɛ̧sáʼamari̧ rá̧ hɛ̧ yérkéri ɓay a tɔ́ʼɔ ɓá, ɓay a kuriri ɓá gbátɓay. 4Ɗéma niŋ a bazeŋ a njuku pûkéri. Njuku a há̧narí̧ sé kuu Juyífri, a fékéri sé kuu apotereri. 5Juyíf a há̧narí̧ rá̧ njuku a há̧narí̧ ka zi tí ɓá Juyíf yáy, mára̧ há̧narí̧ kuu mbây a kuriri ɓay a ŋgbá Pôl rá̧ Barnabas a kú vbú kuriri a saw. 6Gelka, Pôl rá̧ Barnabas láɓayké, kú ŋgú kála sé ŋgboro pû Listɛrɛ rá̧ Dɛrbe, a tísiri a Likayoní rá̧ gun pû a gbaŋkéri. 7A sá̧ kɔ́, kú gé tɔ́ʼɔ Bélaɓay a Zezú Kiris hí̧ njukuri.
Pôl rá̧ Barnabas ka̧ Listɛrɛ
8A Listɛrɛ, njuku a há̧na erú, a kaw ɔ ɓá tísiri, ɓayhí̧lé bɛʼɛ zi belyá, kú mbuŋ nɛ́ nǎŋnɔ́, ké zi séséna bɔʼɔ mbêw yá. 9Sêe a há̧na, ké lá Pôl kaw tɔ́ʼɔɓay, dáy Pôl ɛ̧rɛ̧ nɛ́ a kó ɓá, ké erú ka láɓulaw ɓay a ziŋ ŋgɛ́rɛ. 10Dáy, a sa hí̧ nɛ́ ka ŋgɛ́rɛ: «Mɔ́ uru ew tûl bɔʼɔ!» Njuku ráy ŋgbá gel ka uru, a tí séséna. 11Gelka njukuri kó hɛ̧ ka Pôl niŋ, kú vbá̧nzáʼa, ka nzáʼa pû kuriri Likayoniyɛ̧ ɓá: «vbônri̧ mbí mûn a njuku a ɗere gí gel a maná dá!» 12Dáy, a ɗí Barnabas ɓá: «Zɛs», a ɗí Pôl ɓá: «Hɛrmɛ́s», ɓayhí̧lé ɓá mɛ̌ Pôl, pé ɓá njuku saɓay. 13Gáŋnjuku nzáʼaká̧na a vbôn Zɛs, ka vûnké e ka nzáʼaŋgboro ri ɓil pûy, ɓá gun ndayri gí, a ɓula kuriri ka fúná dii, kú zi ɓá njukuri kú gí niŋ hɛ̧púna rú̧, hí̧ Pôl rá̧ Barnabas ka nzáʼa vûnké. 14Gelka Pôl rá̧ Barnabas láɓayké, kú gɔ́rɔ́ laa a kuriri, a ŋgú ɓá gánáké gí ɓil a njukuri a vbá̧nzáʼa ɓá: 15«Wǎyri, ɓayhí̧rá̧, i niŋ hɛ̧ nǎŋnɔ́ lé? Ɓurú, rú kaw ɓá njuku ɓá báŋa a wǎyri kɔ́. Rú e a gelé ɓay tɔ́ʼɔ Bélaɓay hí̧ wǎyri, ɓay a i pɔŋ tɔ́ŋ hɛ̧ a baaké nɔ́, a i fere káwa a wǎyri hí̧ Gáŋvbôn ka mɔny nûnalê, tísiri, mbii lúkí rá̧ hɛ̧ri̧ too ka e a ɓilkéy. 16A ɓil nâm a mbɛlkéri, Gáŋvbôn pɔŋ nzáʼaɓayri too, tɔ́ŋ ŋgboro a kuriri ɓá báŋké a kú ziy. 17A ɓilké nɔ́ too, Gáŋvbôn tɔ́ʼɔ mûn nɛ́ a ɓil niŋ béla a mɛ̌. Ké pɔŋ mbɔ̂m tɔ́ kɔ̧ tûl hɛ̧pay a wǎyri, a hí̧ lâʼa hí̧ wǎyri nâm too, a ɓá sáʼa mbá law a wǎyri.» 18Dáy a ɓil sa nǎŋnɔ́ too, apotereri rú ɓá pɔ̧́nɔ́ rá̧ pé a de njukuri pû hɛ̧ hí̧ kuriri.
19Dáy, Juyíf a há̧narí̧ ka gí ka Aŋtiyós ka tísiri a pisidí rá̧ Ikoniyɔm, gí rɔ́ʼɔ njukuri, dáy, kú ŋgbá Pôl, a vbú nɛ́ ka saw, a kɔʼɔ nɛ́ tɛ̧́ ɓil pû, a kɛrɛ ɓá ké hú dá. 20Nǎŋnɔ́, gun láɓulawri mára̧ gí ɗɔ́ŋ nɛ́, a goló, ké uru, a ri ɓil pû. Típélé a féké, ké uru a kála kuu Barnabas sé Dɛrbe.
Pôl rá̧ Barnabas regí fal gí kó gun láɓulawri
21A ɓil pû a Dɛrbe, Pôl rá̧ Barnabas gí tɔ́ʼɔ Bélaɓay a Zezú, njukuri ɓá ŋgɛ̧́náké láɓulaw. Falké, Pôl rá̧ Barnabas rekála regí Listɛrɛ, Ikoniyɔm rá̧ Aŋtiyós ka tísiri a pisidí. 22Dáy, a gí hí̧ nzáʼa nzɛ́rɛ hí̧ gun láɓulawri, ɓá kú ew ɓá kpúnáké a ɓil láɓulaw a kuriri. Kú resa ɓáy ɓá: «A ɓil tɔ́ʼɔsêe ɓá ŋgɛ̧́náké, pé ná e ziŋ ri ɓil Pû a Gáŋvbôn.» 23A ɓil Egilize mbêw mbêw too, Pôl rá̧ Barnabas ten gáŋnjuku tûl pénari̧. A fal sáŋhɛ̧ rá̧ gɔ́ŋ Gáŋvbôn, kú pɔŋ kuriri kɔ̧ ɓil ndɔ̂ʼɔ a Gáŋmbây, a kú láɓulaw hí̧ nɛ́y.
24Dáy, kú uru a ɓil kaw a pisidí a ka̧ tísiri a Pamfílí. 25Kú tɔ́ʼɔɓay a Gáŋvbôn ka pɛrze, falké kú ɗere sé Atali. 26A goló, kú gé he batô, ɓay a sé Aŋtiyós ka tísiri a Siri, gel a kú ɓá kuriri kɔ̧ ɓil ndɔ̂ʼɔ a Gáŋvbôn, ɓay tûl pénáké nɔ́, a kú ziŋ niŋákéy. 27Gelka, kú ka̧ Aŋtiyós, Pôl rá̧ Barnabas, mára̧ gun láɓulawri a sa hí̧ kuriri, hɛ̧ too ka Gáŋvbôn niŋ ka ŋgboro a kuriri, rá̧ báŋké a ké ŋgburu ŋgboro láɓulaw hí̧ njukuri, a zi tí ɓá Juyífri yáy, a kú láɓulaw hí̧ Zezú kɔ́. 28Pôl rá̧ Barnabas kaw ɗiɓaŋ kuu gun láɓulawri ka Aŋtiyós.
Markert nå:
Péna a Apotereri 14: pnz
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2023 CABTAL
