मत्ती 8
8
पुन् स्यप्पे म्ही फेन्बल
(मर्कुस् १:४०-४५; लुका ५:१२-१६)
1येसु गङ्तोर्चे फप्जेत्मम् य्हक्को म्हीमा थेङ्की लीप्चे खज्यी। 2हुजु बेलोरीनो पुन् स्यप्पे म्ही गी थेङ्की ङोन्री खज्यीम् पुइ जुःज्यीम्, “प्रभु, थेङ्की थुः मुसम् ङत फेन्नलजेत्प खम्ब” बी पङ्ज्यी। 3ओसेम् येसुचे थेङ्की फ्याचे हुजु म्हीत छुजेत्ज्यी, ओसेम् सुङ्जेत्ज्यी, “ए फेन्खइ पङ्बे सेम् ङल मुब, ए फेनो!” होले सुङ्ब साच्चेनो हुजु म्ही पुन् ग्यम्चे फेन्ज्यी। 4हुजु लीप्चे येसुचे हुजु म्हीत सुङ्ज्यी, “चु तम् खल्तेएनो थस्येतो, तर सर्-सर् लम्बुज ङ्यीज्यीम् र्हङ्त ङोनो, ओसेम् मोसाचे कुल्ब र्हङ्लेनो ठा पीन्ज्यीम् म्हीमाइ ङोन्री ए फेन्बल ङोनो#८:४ ए फेन्बल ङोनो- हुजु बेलोरी पुन् स्यप्पे म्ही ल्हो-ल्हो म्हीमातेङ् बक्च्य टी अम्यङ्ब मुबल। हुजु पुन् स्यप्पे म्ही फेन्बल मुब बी लम्बुचे अपङ् गदे हुजु म्ही फेन्ज्यी अपङ्ब मुबल। ।”
रोमी कप्तान्की योक्पो फेन्बल
(लुका ७:१-१०)
5येसु कफर्नहुम् सहर्री ब्योन्खमम् रोमी कप्तान् गी थेङ्ज खज्यीम् फ्या लज्यीम् पङ्ज्यी, 6“प्रभु, ङइ योक्पो या कङ् अचल्तीबे नेत्चे नज्यीम् दीम्री न्हुःबे ग्लारी क्योङ्ले मुब।” 7ओसेम् येसुचे कप्तान्त, “ङ खज्यीम् थेत फेन्न लपीन्स्ये मुब” बी सुङ्ज्यी। 8तर कप्तान्चे पङ्ज्यी, “प्रभु, ङ थेङ्त ङइ दीम्री स्वागत् स्य्हेङ्बे लागीरी जेःबल अरे#८:८ ङ थेङ्त ङइ दीम्री स्वागत् स्य्हेङ्बे लागीरी जेःबल अरे- चु स्यीपाइचे यहुदीमा यहुदी अय्हीन्बे म्हीमाकी दीम्मारी खेमेएनो अवङ् पङ्बे तम् स्येःबल मुबल। । थेङ्चे फ्रोइकीनो सुङ्जेतो, ङइ योक्पो फेन्स्ये मुब। 9तलेपङ्सम् ङएनो ङ्हच्छ्यङ् हाकीम्माकी दुङ्री मुब, ओसेम् ङइ दुङ्रीएनो स्यीपइमा मुब। ङचे गीत ‘य्हरो’ पङ्ब थे य्हर्ब, ओसेम् गीत ‘खोउ’ पङ्ब थे खब, ओसेम् ङइ योक्पोत ‘चु स्य्हेङो’ पङ्ब थेचे हुजु स्य्हेङ्ब।”
10चु तम् सेन्जेत्ज्यीम् येसु तेःङेन् तजेत्ज्यी, ओसेम् थेङ्की लीप्चे ब्रबलमात सुङ्ज्यी, “ङ एङ्यीमात देमेन्नो पङ्ब, चोतेबे ङ्हच्छ्यङ् बीस्वास् ङचे इस्राएलीमाकी गुङ्रीएनो यङ्बल अरे। 11ङ एङ्यीमात देम्मेन्नो पङ्ब, स्यर्तेङ् न्हुब् ग्यम्चे यहुदी अय्हीन्बे य्हक्को म्हीमा स्वर्गइ य्हुल्री खज्यीम् अब्रहाम्तेङ् इसहाक् ओसेम् याकुब्तेङ् बक्च्य डोन्री टीस्ये मुब। 12तर स्वर्गइ य्हुल्री तथोस्येकी इस्राएलीमामी दोरी म्हुन्दुङ्न्हङ् ख्लास्ये मुब। हुजुरी थेङ्यीमा क्राज्यीम् स क्रीतीक्स्ये मुब।”
13हुजु लीप्चे येसुचे कप्तान्त, “ङ्यीउ, एचे खतेबे बीस्वास् स्य्हेङ्बल मुब, होतेबनो तखइ” बी सुङ्ज्यी। ओसेम् कप्तान्की योक्पो हुजु बेलोरीनो फेन्ज्यी।
येसुचे नबे म्हीमा य्हक्कोत फेन्न लजेत्पल
(मर्कुस् १:२९-३४; लुका ४:३८-४१)
14ओसेम् येसु पत्रुस्की दीम्री स्येजेत्मम् पत्रुस्की स्युमे छव खज्यीम् न्हुःटीबल म्रङ्जेत्ज्यी। 15ओसेम् येसुचे थेइ या छुपीन्जेत्मम् थेत छवचे पीत्थेन्ज्यी। हुजु लीप्चे थे रेःज्यीम् येसुत क्योङ्ज्यी।
16ङ्येसे तब बीसेम्#८:१६ ङ्येसे तब बीसेम्- यहुदीमाकी दुःब न्हबे दीन्री तइ लक्एनो स्य्हेङ्ब अतब मुबल। तर दीनी गल्ब साच्चेनो दुःब न्हबे दीन् बेब, ओसेम् म्हीमाचे लक् स्य्हेङ्ब तब मुबल। म्हीमाचे म्हङ् स्यप्पे नबमा य्हक्कोत थेङ्ज बज्यी। थेङ्चे फ्रोइ ग्यम्चेनो म्हङ्मात तेत्लाजेत्ज्यी, ओसेम् नबलमा जम्मतनो फेन्न लजेत्ज्यी। 17चोले यसैया अगम्बक्तचे पङ्बे तम् टोप् तज्यी-
“थेङ्चे ङ्य्हङ्माकी नबमा नोम्जेत्ज्यी,
ओसेम् ङ्य्हङ्माकी नेत्मात नाजेत्ज्यी।”#यसैया ५३:४
येसुइ लीप्चे ब्रबरी फाथोबे सेइ
(लुका ९:५७-६२)
18येसुचे र्हङ्की कोरोरो य्हक्को म्हीमा म्रङ्जेत्ज्यीम् थेङ्की डबमात, “ग्येइ क्योम्सङ् ङ्यीइ” बी सुङ्जेत्ज्यी। 19हुजु लीप्चे धर्म लोप्पोन् गी थेङ्ज खज्यीम्, “लोप्पोन्, थेङ् खन-खन स्येजेत्प, ङएनो थेङ्की लीप्चे ब्रस्ये मुब” बी पङ्ज्यी। 20येसुचे थेत सुङ्ज्यी, “ल्हुन्दीमाल टीबे ऊःखुङ्मा मुब, ङ्यम्ङ्यमाल टीबे जङ्मा मुब, तर म्हीइ जलमी क्र ग्युत्पे ग्लाकीएनो अरे।”
21ओसेम् थेङ्की ल्हो-ल्हो डब गीचे थेङ्त, “प्रभु, ङोन्ग्यम् ङत ङइ दीम्री ङ्यीपुङ्जेतो ओसेम् अप स्यीब बीसेम् बुब्लापुङ्जेतो” बी पङ्ज्यी। 22तर येसुचे थेत, “स्यीबे म्हीत स्यीबे म्हीचेनो बुप्खइ, एमी ङइ लीप्चे ब्रउ” बी सुङ्ज्यी।
येसुचे लाबलुङ्तेङ् छाल्त सान्त लजेत्पल
(मर्कुस् ४:३५-४१; लुका ८:२२-२५)
23हुजु लीप्चे येसु दोङ्गरी क्रेत्जेत्ज्यी, ओसेम् थेङ्की डबमाएनो थेङ्तेङ् बक्च्य ङ्यीज्यी। 24थेङ्यीमा ब्रब साच्चेनो ग्येरी लोङ्बे लाबलुङ्तेङ् छाल् खज्यी, ओसेम् दोङ्ग दीम्ब छ्येज्यी, तर येसु स्हीम्टीब मुबल। 25ओसेम् डबमा येसुइ रेइरी ङ्यीज्यीम् थेङ्त छ्यीङ्ज्यीम् पङ्ज्यी, “प्रभु, ङ्य्हङ्मात थर्नलजेतो! ङ्य्हङ्मा स्यीब छ्यबल मुब!” 26येसुचे थेङ्यीमात सुङ्ज्यी, “एङ्यीमा तले लोङ्बल? खइ एङ्यीमाकी बीस्वास्?” हुजु लीप्चे थेङ् रेःजेत्ज्यीम् लाबलुङ्तेङ् छाल्त बाराजेत्ज्यी, ओसेम् हुजु सान्त तज्यी। 27चु म्रङ्ज्यीम् डबमा जम्मनो तेःङेन् तज्यीम् पङ्ज्यी, “चु म्ही खल? लाबलुङ्तेङ् छाल्चेएनो थेचे कुल्बे तम् ङ्येन्बटीम्!”
म्हङ् स्यप्पे म्ही ङ्य्ही फेन्बल
(मर्कुस् ५:१-२०; लुका ८:२६-३९)
28ओसेम् येसु ग्येइ क्योम्सङ् गदरीनीमाकी प्रदेस्री दोःमम् दुर्सइ ऊःमा ग्यम्से डोङ्ज्यीम् खबे म्हङ् स्यप्पे म्ही ङ्य्ही थेङ्तेङ् खतु तज्यी। हुजु ङ्य्ही य्हक्को लोङ्बल मुबल, होत्तज्यीम् खल म्हीएनो हुजु ग्यम्से तोर्-मोर् ब्रब अखम्ब मुबल। 29हुजु म्हङ् स्यप्पे म्ही ङ्य्हीचे क्रीङ्ज्यीम् चोले पङ्ज्यी, “ओ पर्मेस्वर्की ज, थेङ् ङ्यीमात ता लबरी ब्योन्खबल? थेङ् ङ्यीमात बेलो अतननो दुख न्हङ्बरी ब्योन्खबल य्हीन्ब?”
30चेक्पजाकी थारीङ् तीलीमाकी य्हक्को ङ्हच्छ्यङ् बतेन् गी छटीबल मुबल। 31ओसेम् हुजु म्हङ्माचे येसुत फ्या लज्यीम् पङ्ज्यी, “थेङ्चे ङ्यीमात तेत्लाजेत्पनो पङ्सम् ङ्यीमात क्युजु तीलीमान्हङ् वङ्पुङ्जेतो।” 32ओसेम् येसुचे थेङ्यीमात, “य्हरो” बी सुङ्ज्यी, होत्तज्यीम् म्हङ्मा डोङ्ज्यीम् तीलीमान्हङ् वङ्ज्यी, ओसेम् जम्मनो तीलीमा क्रसु-क्रसु छ्योङ्ज्यीम् ग्येन्हङ् दीम्ज्यीम् स्यीज्यी।
33ओसेम् तीली छबे गोर्तेन्मा छ्योङ्य्हर्ज्यीम् ज्यीद सहर्री ङ्यीज्यी। ओसेम् म्हङ् स्यप्पे म्हीमात ता-ता तज्यी हुजु तम् जम्मनो हुजुरी स्येत्पीन्ज्यी। 34हुजु लीप्चे ज्यीद सहर्की जम्मनो म्हीमा येसुत खतु लबरी खज्यी। ओसेम् थेङ्यीमाचे थेङ्त म्रङ्ब बीसेम् हुजु प्रदेस् ग्यम्चे थारीङ् स्येःगो पङ्ज्यीम् फ्या लज्यी।
Markert nå:
मत्ती 8: WTDG
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2025 by Mother Tongue Translators Society, Nepal Bible Society
and Wycliffe Bible Translators, Inc.
