Málɩ́kɩ 1
1
Zán Batísɩ gɩglà Zozíi a zà dʋ̀dʋ kʋ́
(Matíe 3.1‑12; Lúkɩ 3.1‑18; Záan 1.19‑28)
1A lɛ́bhɛ Lagɔ a Yuwliyʋ Zozi Klísɩ a Námadìè a bháàda. 2Lagɔ a nékʋ́cinyɔ Ezayíi a bɔ́gʋ̀ɔ̀ a mnɩ́, á jɩ́jrà mɔ̀ɔ mà:
Lagɔ anɩ́:
Ɩ́ yi ná cíecíenyɔɔ́ cíè,ɔ ká bhlà plɩ́,
Ɔ ká nà nyúzɔ̀ɔ̀ gɩglà.
3 Nyɔ pá wɔlɩ́ zɩkpɩkɔfʋ́ a mnɩ́,
Ɔ́ nie:
A gɩglà Kanyɔ a nyúzɔ̀ɔ̀,
Lé a srí ɔ nyízɛ̀ɛ̀ sá! # 1.2‑3 A zɛlɩɩ sáà Mala 3.1; Eza 40.3.
4Ɩ́ zà Zán Batísɩ yi zɩkpɩkɔfʋ́ a mnɩ́ lé ɔ́ ŋwʋ́ɛ́ nyʋa nyú wlú. Ɔ́ pá wɔlɩ́, ɔ́ nie: «A cɩ́cɩ a nɩnɩgbɩ! Ká amɔ nyú wlú ŋwʋ́, bhè Lagɔ ká amɔ a nyumoé ciè!»
5Zudéebhlɩɛ́ yà Zelízalɛ́mʋ a nyʋa a lɔ̀fɩ́ɛ́ sɔ́ yió gɔ̀, lé á sa á nyumoé mnɩ́, lé Záan ŋwʋ́ɛ́ á nyú wlú Zrʋdɛ́ɛnyié a mnɩ́. 6Záan yrʋ́ʋ mnamneku ʋ́ jɩ̀ a mnekubɛ̀tʋ. Kpáàkpɩ́ ŋwɔ́ɔ ɔ́ lelilɩ, lé ɔ́ mɛlɛ lovúkpʋ. 7Ɔ́ srʋɛ nyʋa, ɔ́ nie: «Nyɔɔ́ ɔ̀ yie lɛ́ mɔ́ɔ bɩ́ a, ɔ pɔ́wa pɩalɛ ná naá kʋ́. Nɩ́ ɔ síi a bhlí a tɔ́sɔɛ neé bhɩa. 8Mɔ́ɔ, ɩ́ ŋwʋ́ɛ́ amɔ nyú wlú, mà ɔ́mɔ́ ɔ́ nɩ nyúó ɔ́ na ká amɔ wlú ŋwʋ́ a, Blɔ̀blɔ̀zùzùò mʋ́ ɔ́ na ká amɔ mʋ́ wlú ŋwʋ́.»
Zán Batísɩ ŋwʋ́ Zozíi nyú wlú
(Matíe 3.13‑17; 4.1‑11; Lúkɩ 3.21‑23; 4.1‑13)
9Bhʋ́ a tányɩɛ́, Zozíi wlʋ́ Galilée bhlɩɛ́ a dúó ʋ̀ ŋwɔ́ɔ Nazalɛ́tɩ a, lé ɔ́ yi lé Záan ŋwʋ́ ɔ́ Zrʋdɛ́ɛnyié a mnɩ́ nyú wlú. 10Zozíi wlʋ́ɛ́ yɩ́ nyíé a mnɩ́, mà ɔ́ dʋdʋ̀ lagɔɔ́ a mɔ̀ɔ kalɔ klʋ́, lé Blɔ̀blɔ̀zùzùò kwlíloó jɩ̀ kpóòkpú bhísakʋ́. 11Lé niwɔlɩ wlʋ́ lagɔɔ́ lé ɩ́ kwlíi, ɩ́ anɩ́: «Ɩ̀ ŋwɔ́ɔ ná Wàwàyʋ, mɔ̀ ɩ́ gbázɩ̀ mʋ́.»
Dɩ́blʋ trányɩ Zozíi
12Tányɩɛ́ mʋ́, ɩ̀lɩa plɩ́ kɔ́ɔ̀kʋ́ a, Blɔ̀blɔ̀zùzùò fa Zozíi zɩkpɩkɔfʋ́ a mnɩ́, 13ɔ́ zi mɔ̀ɔ yrií a gwlɩ̀ sɔ́. Mà bhʋ́ a tányɩɛ́, Dɩ́blʋ trányɩlɔɔ́. Ɔ́ kʋ klámna a nyièdɩ lé kplɔkplɔzìzi zrɩ lɔɔ́ gà.
Zozíi cí Lagɔ a Námadìè a wɔlɩ́
(Matíe 4.12‑22; Lúkɩ 4.14‑15; 5.1‑11)
14Á ŋwʋ́ fɩ́ɛ́ Záan jɩ̀ɩ, lé Zozíi mʋ Galilée bhlɩɛ́ a mnɩ́ Lagɔ a Námadìè a wɔlɩ́ cí ka, ɔ́ anɩ́: 15«Tányɩɛ́ Lagɔ ŋwʋ́ wá ʋ́ a, ɛ́ ya ŋnɩ, Lagɔ a Léyibhlɩɛ́ a tányɩɛ́ ya ŋnɩ. Ɩ́zà ɩ́ srʋɛ amɔ lé, a ŋwnʋ́ʋ Lagɔ a Námadìè kʋ́ lé a cɩ́cɩ a nɩnɩgbɩ.»
Zozíi wle zrìbhlanyʋa a mɔ̀na
16Yruú a múó kʋ́, Zozíi kʋ Galilée nyíplʋɔ́ a tʋtrʋda lé ɔ́ yɛ́ zrìbhlanyʋa a sɔ́. Simɔ́ɔ yà ɔ nɩ́ayʋ́ Adrée sɔ́, á pálɛ pílo. 17Lé ɔ́ srʋ á, ɔ́ anɩ́: «A jɩ́ mɔ́ɔ kʋ́ bhè ká amɔ nyʋa fɩa nyʋa mʋ́ pláa.» 18Zozíi cíí kɔ́ɔ̀kʋ́ a, á cíe a pilie sá lé á jɩ́ ɔ́ kʋ́.
19Ɩ̀lɩa plɩ́ a, Zozíi sɩsa bhɩɩ́ jɩ̀ a, ɔ́ yɛ́ sɔ́kʋ́ Zebedée a yúó, Zákɩ yà Záan sɔ́, á kʋ gɔ́lʋ́ a mnɩ́, á sa a pílo jí. 20Ɔ́ wle kɔ́ɔ̀kʋ́ ámá a, á tɩ ʋ́ a tʋ́ Zebedée yà ɔ́ nɔnʋzrɩ̀nyʋ̀àà sɔ́ gɔ́lʋ́ a mnɩ́, lé á jɩ́ ɔ́ kʋ́.
Zozíi sa nyɔ a múó nyumozùzu jɩ̀
(Matíe 8.14‑17; Lúkɩ 4.31‑44; Nɩnɩgbɩ 10.38)
21Yruú a múó kʋ́ Zozíi yà ɔ́ kʋjɩ̀nyʋ̀àà sɔ́ mʋ Kapɛnayʋ́mʋ. Mà Zúfʋnyʋa a nyɔbhleyruó kʋ̀ʋ̀ lé Zozíi pla zúfʋcɛcɩwlʋɔ́ a mnɩ́ lé ɔ́ cíe cɩ́acʋ́ kʋ́. 22Mà nyʋaá à pʋ ɔ nyúkwlí a, neé mnaá ɔ́ wɔlɩ́ yɩbhlɩɛ a zà. Ɔ nɩ́ cɩ́a lɔ̀ a másɛnyʋaá bhísakʋ́, mà pɔ́wakanyɔ bhísakʋ́ ɔ́ cɩ́alɛ.
23Nyɔ a múó kʋ la zúfʋcɛcɩwlʋɔ́ a mnɩ́, lé nyumozùzu kʋ ɔ́ la jɩ̀. Mà nyɔɔ́ sa yrè, ɔ́ nie: 24«Nazalɛ́tɩ a Zozíi, wɔlɩ́ gbá ɩ yrálɛ àmɔ̀ mʋ́ a? Nà yi lé kà àmɔ̀ bhusuu? Ɩ́ yì mɔ̀, mɔ̀ ŋwɔ́ɔ lɛ́ Lagɔ a Kplɔkplɔnyɔɔ́ ɔ́ cíe lɛ́ a.» 25Nyumozùzùò cí lɛ́ saá, Zozíi gáa lʋʋ́ kʋ́, ɔ́ anɩ́: «Bhli né kʋ́, lé wlʋ́ nyɔɔ́ jɩ̀!» 26Á kʋ dáamúó lé, nyumozùzùò vɔ́gɔ̀ nyɔɔ́ lé ɔ́ bhɩa wɔlɩ́, lé ʋ́ wlʋ́ ɔ́ jɩ̀. 27Mà nyʋaá fɩ́ɛ́ kʋ̀ ʋ́ a, neé mnaá. Á anɩ́: «À nɩ́ à zà saá wɔlɩ́ yɛ́! Cɩ́acʋ́ yalʋ cegbá ɔ́ la bhè ʋ̀ kà saá pɔ́wa a? Nyumozìzìè, ɔ́ jɩ́lɩɩ́ lé ɩ́ ŋwʋ́ɛ́ ʋ́ ɔ cícíwɔlɩ!» 28Ɔ ŋnɩ́ bhli kakamnɩ́lɛ́ Galilée bhlɩɛ́ a lɔ̀fɩ́ɛ́.
Zozíi yalɩma Simɔ́ɔ a ŋwʋ́trɔ lé gupuonyʋa kɔ́kɔ́mnɩ́
(Matíe 8.14‑17; Lúkɩ 4.38‑41)
29Zozíi wlʋ́ kɔ́ɔ̀kʋ́ zúfʋcɛcɩwlʋɔ́ a mnɩ́ a, ɔ yà Zákɩ lé Záan sɔ́ mʋ Simɔ́ɔ yà Adrée sɔ́ a gbó. 30Mà á mʋ a, Simɔ́ɔ a ŋwʋ́trɔ pʋ́ la ʋ́, wɔtrɔkukó yɔɔ́ kla. Lé á srʋ Zozíi ŋwnɔ́ɔ́ a wɔtrɔɔ́ a wɔlɩ́. 31Ɔ́ ŋnɩ ɔ́ gɔ̀ lé ɔ́ bhli ɔ́ glɔ̀gbá kʋ́ lé ɔ́ sɔɔ́ glù, á kʋ dáamúó lé wɔtrɔɔ́ dúò lé ŋwnɔ́ɔ́ nyɛ́ á lelilɩ.
32Kosúgbòsa, yrʋ́ ya yɩ́ lagɔ bhɩa, gupuonyʋaá fɩ́ɛ́, lé nyʋa ànàà nyumozìzi kʋ jɩ̀ a, á la á lɔ̀fɩ́ɛ́ Zozíi gɔ̀. 33Dúó a mnɩ́ a nyʋa a lɔ̀fɩ́ɛ́ ŋnɩlɔ̀ gbinekʋ́ wlú. 34Zozíi yalɩma ʋ́ gupuonyʋa a cícící, lé ɔ́ jɩ́ɩ nyumozìzi kɔ́kɔ́mnɩ́. Cémʋ́ nyumozìzìè yìò a, ɔ nɩ́ɩ́ cíida nyɛ́.
Zozíi mʋ gbanyɩkʋ́ a dí a mnɩ́ Lagɔ̀wɔ̀lɩ̀ɛ̀ cí ka
(Lúkɩ 4.42‑44)
35Zizìèda, cúcú kʋ àyɩ dʋ̀dʋ kʋ́, lé Zozíi soglù lé, ɔ́ flʋ zɔ̀. Ɔ́ wlʋ́ʋ dúó gwá lé ɔ́ mʋ dɛ́ɛ́ nyʋa nɩ́ plɩ́ɩ kpanyɩ a, bhibhie ka. 36Mɔ̀ɔ ɔ́ kʋ lé Simɔ́ɔ yà nyʋa àna sɔ́ mʋ ɔ́ mɔ̀ɔmɔ̀ mʋ́mɔ ka. 37Á yɛ́ ɔ́ a, á srʋ ɔ́ mà: «Másɛɛ̀! Mɔ̀ nyʋaá fɩ́ɛ́ mʋ́mɔ.» 38Bhʋ́ Zozíi srʋ á mà: «A yi à kà yígàdà da mʋ! Dɛ́ gbanyɩkʋ́ a dí a mnɩ́, à kà mɔ̀ɔ mʋ! Mà ɩ́ ka lé ɩ cí sáà mɔ̀ɔmɔ̀ Lagɔ̀wɔ̀lɩ̀ɛ̀, ɩ́zà ɩ́ flʋ lɛ́ zɔ̀.» 39Mà Zozíi plɩ́ɩ Galilée, lé ɔ́ cí mɔ̀ɔ a zúfʋcɛcɩghlɩ a mnɩ́ Lagɔ̀wɔ̀lɩ̀ɛ̀, lé ɔ́ jɩ́ɩ nyumozìzi.
Zozíi yalɩma kosugɔ̀bhànyɔ
(Matíe 8.2‑4; Lúkɩ 5.12‑16)
40Kosugɔ̀bhlànyɔ a múó yi Zozíi gɔ̀, lé ɔ́ sra ɔ́ drɩ̀ koti sá, lé ɔ́ srʋ ɔ́ mà: «Másɛɛ̀, nɩ̀ wà a, ɩ̀ yi míi lé ɩ̀ yi mɔ́ɔ yalɩma, lé ɩ́ yi kplɔɔ̀.» 41Ɔ́ cí saá, ŋazɩ kɔ́sɔ Zozíi wlú lé ɔ́ fa sɔɔ́ lé ɔ́ gbɔ́ nyɔɔ́ lé ɔ́ srʋ ɔ́ mà: «Ɩ́ yrá lé yalɩma!» 42Dáamúó, kosugɔ̀gùò wlʋ́ nyɔɔ́ mʋ́, lé ɔ́ yalɩma. 43Mà Zozíi nyɛ́ ɔ́ tába, lé ɔ́ jɩ́ɩlɔɔ́. 44Ɔ́ srʋ ɔ́ mà: «Nɩ̀ mʋ a, nàa sa nyɔ dí, mà mʋ Lagɔ̀bʋ̀bɔ̀nyɔ gɔ̀, ɔ ká mɔ̀ yɛ́. Lé kà Moyízɩ a Jràmáá a bʋbɔ̀lɩ̀ɛ̀ sa à, bhè nyʋa fɩ́ɛ́ ká saá yɩbhlɩ mà yà yalɩma.» 45Mà nyɔɔ́ mʋ a, bhlɩ́ɛ́ fɩ́ɛ́ jɩ̀ ɔ́ plɩ́ a ɔ́ sa mɔ̀ɔ a nyʋa dí. Ɩ́ nɩ lé Zozíi a dí a mnɩ́ a plaplʋ́ ka yɩ́ la gbʋ́ nyʋa a klʋ́ jɩ̀. Ɔ́ wlʋ́lɛ díé gwá, mɔ̀ɔmɔ̀ ɔ́ kʋɛ lé nyʋa wlʋ́ɛ́ bhlɩ́ɛ́ fɩ́ɛ́ jɩ̀ lé á ŋnɩlɔɔ́ mɔ̀ɔ.
Markert nå:
Málɩ́kɩ 1: NEY
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© (Active), Wycliffe Bible Translators, Inc. All rights reserved.
