Matìyò 14
14
Icheg ne mbi zwete Jɔn we ne yaya nàʼà mənib
(Mag 6:14-29; Lug 9:7-9)
1Anyumə̀ we ne Yeso yaya chwìte inug a Kàpenàwum, Erɔ̀d ne yaya sàʼa Galìli ya zug inug imbə̀ʼ aməd. 2Wì ya ghà abə bəd àfàʼì məd gha, “Aŋa ya Jɔn we ne yaya nàʼà mənib wì zwème iwu! À ya aton ne tika ni fàʼ iyeti inug yaʼi inga məd.”
3Erɔ̀d yaya kɔ̀ndɔ ane imbə̀ʼ icheg ne wì ya fə ghì mbi gwì Jɔn kɔd niŋ ghò zì a ndəŋ imbə̀ʼ Èrodìyàs we ne ya yaʼi iweg Filib, ifi məd. 4Aton ne wì ya ghi mbi zì Jɔn a ndəŋ ya imbə̀ʼ icheg ne Jɔn yaya ghà ibo gha, “Chəyi mə̀nɔ̀ʼɔ̀ chwi gha àghò nam iweg ìwe ifi.” 5Erɔ̀d yaya kə̀bə̀ ni zweti Jɔn, si ya gha, wì yaya bɔ bəd imbə̀ʼ icheg ne bəd ya kyeri gha Jɔn ya wə̀dkə̀n Ŋwiye.
6Aneg ne mbi ya gwi Erɔ̀d ya kòʼ, wì tɔ̀ŋi bəd gha mbe yeʼe ane iteri. Ŋwan àyi ìwi Èrodìyàs ya bin imbìghè abə bəd mbe, ghì fìŋ abə Erɔ̀d taŋ bɔ̀ŋ inga. 7Ane, wì ya kàʼ zɔ̀m nyɔd gha zìye biri nàʼ aghi ne ŋwan àyi we bìri. 8Ngɔb ŋwan àyi we ya ghì wì gho ghà abə ifɔn Erɔ̀d gha, “Mə kə̀b gha àghò sɔb atog abə Jɔn we ne yaya nàʼà mənib zì inga ambatì akaŋ nàʼ inum.” 9Anug ze ya se ifɔn Erɔ̀d, si ya gha, icheg ne wì ya kàʼi zɔ̀m nyɔd imbìghè abə bəd mbe ne ya yaʼi ane iteri we, wì ya bḛ ni fàʼ anug ze ne ŋwan àyi we ya gha. 10Ifɔn Erɔ̀d ya ghì mbi nyi inga nəb ndəŋ, sɔb atog abə Jɔn we ne yaya nàʼà mənib. 11Mbi ya sɔb atog abə Jɔn ane, zì inga ambatì akaŋ, niŋ ghò nàʼ abə ŋwan àyi we. Ŋwan àyi we ya si bèʼì atog ze ghò nàʼ abə ngɔb məd. 12Mə̀mə̀nənùg ìmbi Jɔn ya ghò niŋ awu məd inga nəb ndəŋ, ghò twə̀ŋi, si ghò ghà abə Yeso.
Yeso jə bəd chuʼ ita̰
(Mag 6:30-44; Lug 9:10-17; Jɔn 6:1-14)
13Anyumə̀ ne Yeso ya zughi anug ne ya du tì Jɔn we ne yaya nàʼà mənib, wì ya nɔ̀ʼ anjìm anjìm nyi inga abaŋ igyi ghò a asiŋi mɔ̀ʼɔ tèzìʼì. Inɔ̰ bəd ne ya zughi gha Yeso fə nɔ̀ʼ ane asiŋi ze, ya nɔ̀ʼ inga iben ndan ndàn yḛ̀ ighog ghò abɔ̀ʼ məd. 14Anyumə̀ ne Yeso ya du inga abaŋ igyi bàd inɔ̰ bəd we, wì ya bèrì àsɔ̀mnəfiŋ igun inɔb, bə̀ ghù ìmbɔb ighɔn.
15Anyumə̀ ne ituʼ ya ko ni fin, mə̀mə̀nənùg məd ya yeʼe pè ghà ibo gha, “Ituʼ fə se fḭ̀yḛ. Asiŋi azo̰ ya asiŋi zɔbi. Àghò cha inɔ̰ bəd gho̰ mbe gho inga iben mbe ne yaʼi iban iban ne tì mbi zon ighijəg.”
16Yeso ya ywìtì gha, “Chəyi mbi beri ni ghò a asiŋi mɔ̀ʼɔ. Mbə̀ naʼa aghi mɔ̀ʼɔ inɔb mbe jəg.”
17Mbi ya ywìtì abə Yeso gha, “Tì bèrì məyi chiŋ ngə̀ŋ tita̰ tì su tibe.”
18Wì ya ywìtì inɔb gha, “Mbə̀ niŋ chiŋ ngə̀ŋ te tì su te yèʼe nàʼ inum aŋa.” 19Wì ya ghà abə bəd gha mbe chughi aseg igun agyen. Wì ya ghà ane, si niŋ chiŋ ngə̀ŋ te tita̰ tì su te tibe, nɔ̀ atog nèn ikaŋ àbɔ̀ŋɔ, nàʼ məyakà abə Ŋwiye, si bə̀ʼri nàʼ abə ìmbi mə̀mə̀nənùg gha mbe ghapa. Ane, mə̀mə̀nənùg məd ya niŋ se ghàpà abə bəd mbe məjìm. 20Bəd mbe məjìm ya jəg kɔd. Mə̀mə̀nənùg məd ya si fèti ibəʼri ighi ne ya bùʼi, mbi sweg tiko ìghum chɔ̀b ibe. 21Inɔ̰ bəd we ne ya jəghi ya yaʼ mbaŋà ka chuʼ ita̰ ne chəyi mbi taŋi mə̀yi fɔrɔ bɔn.
Yeso yèn igun igyi
(Mag 6:45-52; Jɔn 6:15-21)
22Kwàʼ anyumə̀ ne mbi ya jəghi mànì, Yeso ya ghì mə̀mə̀nənùg məd nyi inga abaŋ igyi ko ghò ibo imbìghè ijin igyi ìywin. Yeso ya si chùghi ni nàʼrì abə inɔ̰ bəd we bɔŋ mbi se kùrə ghò inga ìmbɔb ichan. 23Anyumə̀ ne Yeso ya fə cha bəd mbe mbi ghò inga ìmbɔb ichan, wì ya kɔʼ ghò ikaŋ iwum ni chàʼra Ŋwiye məd tèzìʼì. Ikwikwiri we, məd ya yaʼ angu tèzìʼì. 24Abaŋ igyi ze ya fə nyi ghò inga igyi agha sà. Afim yaya yèʼe aba imbìghè se ghìyə̀ àwàwà tḭ̀yḛ abaŋ igyi ze. Ane, chəyi mbi yaya kə yḛ̀.
25Anyumə̀ ne ituʼ ya se chə̀ghə, Yeso yaya yḛ̀ igun igyi ghò abɔ̀ʼ inɔb. 26Anyumə̀ ne mə̀mə̀nənùg məd ya bàri icheg ne wì yaya yḛ̀ igun igyi, mbɔb ya bɔ se kyḛ gha, “À ya wə̀d ne ku dù!”
27Yeso ya ghà inɔb kwàʼ ati ati gha, “Mbə̀ nyimi fìŋ! À ya mo. Imbə̀ʼ mbə̰ bɔ awən”
28Pità ya ywìtì ibo gha, “Anɔŋisəg, àmə yaʼ àghò, ghiyə mə̀ yḛ igun igyi yèʼe abɔ̀ʼ ine.”
29Yeso ya ghà ibo gha, “Yḛ yèʼe!”
Ane, Pità ya dù inga abaŋ igyi ze ko yèn igun igyi ni ghò abɔ̀ʼ Yeso. 30Anyumə̀ ne Pità ya bàri afim ze, ànum ya san məd, wì ko se bɔ bə̀ ko se nyḭ̀yḛ ghò aton igyi. Wì ya si dèg ane gì ka ka ghà abə Yeso gha, “Anɔŋisəg, pumni amə!”
31Yeso ya chà àzi abo kwàʼ ati ati gwì aməd, si ghà ibo gha, “Àghò ya kwàʼ wə̀d ne ibḛfiŋ kə! Aton ne àghò we jə̀mə̀ àkə gha?”
32Anyumə̀ ne mbi ya kɔʼi nyi inga abaŋ igyi ze, afim ze ya sɔbɔ. 33Bəd mbe ne ya yaʼi inga abaŋ igyi ze ya ko se ghùmnə Yeso gha, “Kwàʼ tesiʼ, àghò ya kwàʼ Ŋwan Ŋwiye.”
Yeso ghù bəd ne ghɔ̰̀ inga aben Gènesarèd
(Mag 6:53-56)
34Anyumə̀ ne Yeso tì mə̀mə̀nənùg məd ya bani atəŋ ze ghò ijin igyi iywin, mbi ya nyi inga aben Gènesarèd. 35Anyumə̀ ne bəd inga aben ze ya kyeri gha à ya Yeso, mbi ya tɔm tikən inga iben mbe ne yaʼi iban iban. Ane, bəd ya niŋ ìmbɔb bəd ne ghɔ̰̀ ghò abə Yeso. 36Mbɔb ya pè boʼ ibo ibo gha, wì saŋa bəd ne ghɔ̰̀ bete məyi ibug ndwi məd. Bəd aghɔn ne ya bèti ibug ndwi məd, ìmbɔb ighɔn ya mèg.
Markert nå:
Matìyò 14: MBTP
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2019 CABTAL
