တမၢၼ်ႇၸဝ်ႈ 5

1ၼႂ်းဝႃႈၼၼ်သေၵေႃႈ ၵူၼ်းၵေႃႉၼိုင်ႈဢၼ်လႆႈၸိုဝ်ႈဢႃႇၼၼီႉ တင်းမေးမၼ်းသပ်ႉၽီႉရေႇၼၼ်ႉၸမ်ႉ၊ ၶၢႆဢုၵ်ႉၸႃႇၶဝ်သေၸိူဝ်ႉသေပိူင်သေယဝ်ႉ၊- 2မၼ်းၼၼ်ႉ ၸႂ်သၽေႃးမိူၼ်ၵၼ်တင်းမေးမၼ်းလႄႈ ဢဝ်ၵႃႈမၼ်းၶၼ်မၼ်းပုၼ်ႈၼိုင်ႈသိူင်ႇမႅပ်ႉဝႆႉယဝ်ႉ၊ ၸင်ႇဢဝ်ၵႃႈမၼ်းၶၼ်မၼ်းပုၼ်ႈၼိုင်ႈၵူၺ်းမႃးဝႆႉ ၵႃႈတီႈႁိမ်းတိၼ်တမၢၼ်ႇၸဝ်ႈၸိူဝ်းၼၼ်ႉဢေႃႈ။- 3ပေႇတရူႉၵေႃႈလၢတ်ႈလႄႈဝႃႈ၊ ဢႃႇၼၼီႉဢိူၺ်း၊ ႁဵတ်းသင်လႄႈ မႂ်းႁႂ်ႈၸႃႇတၢၼ်ႇတဵမ်ဝႆႉၼႂ်းႁူဝ်ၸႂ်မႂ်းႁႂ်ႈမႂ်းလႆႈပႅတ်ႉလႅၼ်ဝီႉၺိၺ်ႇဢၼ်မူတ်းၸၢင်ႇၸဝ်ႈလႄႈ ဢဝ်ၵႃႈလိၼ်ၶၼ်လိၼ်ၼၼ်ႉ ပုၼ်ႈၼိုင်ႈသိူင်ႇမႅပ်ႉဝႆႉၼင်ႇႁိုဝ်။- 4ၼႂ်းမိူဝ်ႈဢၼ်လိၼ်ၼၼ်ႉမီးယူႇၼၼ်ႉၸိုင်၊ တူဝ်ၸဝ်ႈၵဝ်ႇပိူင်ႇဢမ်ႇၸႂ်ႈႁိုဝ်။ ဢၼ်ၶၢႆလႄႈ လႆႈၵႃႈမၼ်းၶၼ်မၼ်းၼၼ်ႉ ပဵၼ်ၶွင်တူဝ်ၸဝ်ႈၵဝ်ႇဢမ်ႇၸႂ်ႈႁိုဝ်။ ႁဵတ်းသင်လႄႈ မႂ်းၵျၢမ်ႇပွင်ၸိူဝ်ႉၼင်ႇၼႆၵႃႈၼႂ်းၸႂ်မႂ်းၼင်ႇႁိုဝ်။ မႂ်းလၢတ်ႈမူႉသႃႇတီႈၵူၼ်းၵူၺ်းယဝ်ႉဢမ်ႇၸႂ်ႈ။ လၢတ်ႈမူႉသႃႇတီႈၽြႃးပဵၼ်ၸဝ်ႈယဝ်ႉ၊ ဝႃႈၼင်ႇၼႆဢေႃႈ။- 5ဢႃႇၼၼီႉၼၼ်ႉ ငိၼ်းၵႂၢမ်းၼၼ်ႉသေယဝ်ႉလူမ်ႉတၢႆၵႂႃႇဢေႃႈ။ ၵူၼ်းဢၼ်လႆႈငိၼ်းလွင်ႈတီႈႁဵင်းၼၼ်ႉတင်းသဵင်ႈတင်းလူင် မီးၸႂ်ဢၼ်ၵူဝ်ႁႄၼႃႇလူင်လၢင်ဢေႃႈ။- 6ၵူၼ်းဢွၼ်ႇတင်းလၢႆၵေႃႈလုၵ်ႉဢဝ်တူဝ်တၢႆၼၼ်ႉသေလႄႈဢဝ်တင်းၶူဝ်းလဵင်းၶဵၼ်းႁေႃႇယဝ်ႉၸင်ႇဢဝ်ၵႂႃႇသၢင်းၵျူဝ်ႇသေဢေႃႈ။

7လိုၼ်းၼၼ်ႉ ႁိုင်သေသၢမ်ၼႃႇရီႇၼိုင်ႈၸမ်ၸမ်သေယဝ်ႉ၊ မေးမၼ်းၼၼ်ႉယင်းဢမ်ႇႁူႉလွင်ႈဢၼ်ပဵၼ်ယဝ်ႉၼၼ်ႉလႄႈ ၶဝ်ႈမႃးဢေႃႈ။- 8ပေႇတရူႉၵေႃႈထၢမ်လႄႈဝႃႈ၊ သူၶၢႆလိၼ်ၼၼ်ႉလႄႈလႆႈထၢၼ်ႇၼႆႉၵူၺ်းႁိုဝ်။ လၢတ်ႈၵဝ်လူး၊ ဝႃႈၼင်ႇၼႆသေယဝ်ႉ၊ မၼ်းၵေႃႈလၢတ်ႈလႄႈဝႃႈ၊ ၸႂ်ႈၶႃႈယဝ်ႉ၊ လႆႈထၢၼ်ႇၼႆႉၵူၺ်းၶႃႈဢေႃႈ၊ ဝႃႈၼင်ႇၼႆဢေႃႈ။- 9ပေႇတရူႉၵေႃႈလၢတ်ႈတီႈမၼ်းလႄႈဝႃႈ၊ ႁဵတ်းသင်လႄႈ သူၸႂ်သၽေႃးမိူၼ်ၵၼ်လႄႈ ၵျၢမ်ႇပွင်ႁႂ်ႈလႆႈၸၢမ်းတူၺ်းဝီႉၺိၺ်ႇထႃႇဝရႃႉၽြႃးၼင်ႇႁိုဝ်။ တူၺ်းလူး၊ တိၼ်ၶဝ်ၸိူဝ်းဢၼ်သၢင်းၵျူဝ်ႇၽူဝ်မႂ်းၼၼ်ႉ ယင်းမီးယူႇၵႃႈတီႈႁိမ်းၽၵ်းတူၼၼ်ႉလႄႈ၊ မႂ်းၼႆႉၵေႃႈၶဝ်တၵ်းဢဝ်ၵႂႃႇလူးၵွၼ်ႇဢေႃႈ၊ ဝႃႈၼင်ႇၼႆသေယဝ်ႉ၊- 10မၼ်းၼၼ်ႉလူမ်ႉၵႃႈတီႈႁိမ်းတိၼ်ပေႇတရူႉၵမ်းလဵဝ်သေလႄႈ တၢႆၵႂႃႇဢေႃႈ။ ၵူၼ်းဢွၼ်ႇၸိူဝ်းၼၼ်ႉၵေႃႈၶဝ်ႈမႃးလႄႈမိူဝ်ႈဢၼ်ထူပ်းႁၼ်မၼ်းၼၼ်ႉ တၢႆယဝ်ႉၼၼ်ႉၸိုင်၊ ဢဝ်မၼ်းၵႂႃႇသၢင်းၵျူဝ်ႇၵႃႈတီႈႁိမ်းၽူဝ်မၼ်းၼၼ်ႉသေဢေႃႈ။- 11ၸႃႉၸဵမ်ၶဝ်ၸိူဝ်းဢၼ်ၶဝ်ႈၸိူဝ်းၸဝ်ႈ ဢိၵ်ႇတင်းၶဝ်ၸိူဝ်းဢၼ်လႆႈငိၼ်းလွင်ႈတီႈႁဵင်းၼႆႉတင်းသဵင်ႈတင်းလူင်ၼၼ်ႉ မီးတင်းၸႂ်ဢၼ်ၵူဝ်ႁႄၼႃႇလူင်လၢင်ဢေႃႈ။

12တမၢၼ်ႇၸဝ်ႈၸိူဝ်းၼၼ်ႉၵေႃႈ ႁဵတ်းၼီႉမိၵ်ႈလၢၵ်ႈၶၼႃႇလႂ်၊ လွင်ႈတၢင်းဢၼ်လီဢၢမ်းလႂ် ၵႃႈတီႈၽၢႆႇၼႃႈၵူၼ်းၼမ်ၼႃႇဢေႃႈ။ ၶဝ်တင်းသဵင်ႈတင်းလူင်ယူႇႁူမ်ႈၵၼ်ၵႃႈတီႈၼႂ်းၸၢၼ်းသေႃးလမုၼ်ႇၼၼ်ႉလႄႈ၊- 13ပိၵ်ႉသမ်ႉၵူၼ်းဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉ ဢမ်ႇႁတ်းႁဵတ်းၵေႃႉႁဵတ်းသေႈလူၺ်ႈၵၼ်တင်းၶဝ် သေၵေႃႉသေၵူၼ်းသေၵေႃႈ၊ ၵူၼ်းတင်းလၢႆယွင်ႈယေႃးပၼ်တၢင်းလီတီႈၶဝ်ယူႇဢေႃႈ။- 14ၶဝ်ၸိူဝ်းဢၼ်ယုမ်ႇမၢတ်ႈၸဵမ်ယိင်းၸဵမ်ၸၢႆးၼမ်ၼႃႇလူင်လၢင်ၸိူဝ်းၼၼ်ႉ ယဵင်ႈၶႅၼ်းၼမ်မႃးၵိုၼ်းမႃးလႄႈ ၶဝ်ႈၽၢႆႇၸဝ်ႈၽြႃးဢေႃႈ။- 15ပိူဝ်ႈၼႆလႄႈ ၼႂ်းမိူဝ်ႈဢၼ်ပေႇတရူႉယင်းတိုၵ်ႉၸွမ်းတၢင်းၵႂႃႇယူႇၼၼ်ႉၸိုင် ၶဝ်ဢဝ်ၵူၼ်းၶႆႈၵူၼ်းပဵၼ်ဢွၵ်ႇဝႆႉၵႃႈတီႈႁိမ်းတၢင်းလႄႈ တၢင်ႇဝႆႉၵႃႈၼိူဝ်ၵူႇလႂ်၊ ၵႃႈၼိူဝ်ၽႃႈၵွပ်းလႂ်၊ ႁႂ်ႈၵွင်ႉငဝ်းမၼ်းလႆႈႁူမ်ႇမႅၼ်ႈၵႃႈၼိူဝ်ၶဝ်ၸိူဝ်းဢၼ် မီးတၢင်းၶႆႈတၢင်းပဵၼ်သေၵေႃႉၵေႃႉၼၼ်ႉဢေႃႈ။- 16ၵူၼ်းဢၼ်မီးယူႇၵႃႈၼႂ်းဝဵင်းတင်းလၢႆ ၵႃႈတီႈႁိမ်းၼၼ်ႉၼမ်ၼႃႇၸိူဝ်းၼၼ်ႉ ဢဝ်ၶဝ်ၸိူဝ်းဢၼ်မီးတၢင်းၶႆႈတၢင်းပဵၼ်ဢိၵ်ႇတင်းၶဝ်ၸိူဝ်းဢၼ်ၽီႁၢႆႉၼိၵ်ႈၸၢၵ်ႈငႅၼ်းသႄးၼၼ်ႉမႃးၸူႉၵၼ်တုမ်ၵၼ်ၵႃႈတီႈဝဵင်းယေႇရူႉသလႅမ်ႇလႄႈ ၵူၼ်းဢၼ်မီးတၢင်းၶႆႈတၢင်းပဵၼ် တင်းသဵင်ႈတင်းလူင်ၸိူဝ်းၼၼ်ႉ လႆႈၵၢင်းလွတ်ႈတင်းတၢင်းၶႆႈတၢင်းပဵၼ်ဢေႃႈ။

17မိူဝ်ႈၼၼ်ႉ ၶုၼ်ယိတ်ႈပရေႃးႁဵၵ်ႈ ဢိၵ်ႇတင်းၶဝ်ၵႃႈဢၼ်မီးလူၺ်ႈၵၼ်တင်းမၼ်း ဢၼ်ပဵၼ် ၵိူင်းၸတ်ႉတူႉၵႄးၸိူဝ်းၼၼ်ႉ လုၵ်ႉလႄႈတဵမ်ဝႆႉတင်းတေႃးသႃႉတင်းၸႂ်မႆႈသေယဝ်ႉ၊- 18တီႉဢဝ်တမၢၼ်ႇၸဝ်ႈတင်းလၢႆလႄႈၶင်ဝႆႉၵႃႈၼႂ်းထွင်ႇဢေႃႈ။- 19ၶိင်ႇၵၢင်ၶိုၼ်း တမၢၼ်ႇၵၢင်ႁၢဝ်ထႃႇဝရႃႉၽြႃး ၽုၺ်ႇၽၵ်းတူထွင်ႇယဝ်ႉၸင်ႇ ဢဝ်ၶဝ်ၼၼ်ႉဢွၵ်ႇသေလႄႈ သင်ႇလၢတ်ႈဝႃႈ၊- 20ၵႂႃႇၸုၵ်းယူႇၵႃႈၼႂ်းပိၵ်ႈမၢၼ်ႇၸဝ်ႈသေလႄႈ ႁေႃးလၢတ်ႈၵႂၢမ်းတြႃးတၢင်းဢၼ်ဢသၢၵ်ႈလိပ်းတင်းသဵင်ႈတင်းလူင်ၼၼ်ႉ တီႈၵူၼ်းတင်းလၢႆတႃႉ၊ ဝႃႈၼင်ႇၼႆဢေႃႈ။- 21မိူဝ်ႈဢၼ်ငိၼ်းၵႂၢမ်းၼၼ်ႉယဝ်ႉၸိုင် ၶိင်ႇမိူင်းလႅင်းၵၢင်ၼႂ်ၸဝ်ႉၸဝ်ႉ ၶဝ်ၶဝ်ႈၵႃႈၼႂ်းပိၵ်ႈမၢၼ်ႇၸဝ်ႈသေလႄႈ သင်ႇသွၼ်သုင်းမႃႉပၼ်ယူႇဢေႃႈ။ ၶုၼ်ယိတ်ႈပရေႃးႁဵၵ်ႈ တင်းၶဝ်ၸိူဝ်းဢၼ်မီးလူၺ်ႈၵၼ်တင်းမၼ်းၼၼ်ႉမႃးလႄႈ ႁႂ်ႈၸႃႉၸဵမ်ၶုၼ်တီႈလုမ်းလူင်ဢိၵ်ႇတင်း ၶဝ်ၸိူဝ်းဢၼ်ပဵၼ်ၵူၼ်းထဝ်ႈၵူၼ်းၵႄႇၵႃႈၼႂ်းၵူၼ်းဢီႉသရေႇလႃႉတင်းလၢႆ ၵႃႈမီးၸူႉၵၼ်တုမ်ၵၼ်သေယဝ်ႉ၊ ပွႆႇၸႂ်ႉၵႂႃႇၵႃႈတီႈထွင်ႇလႄႈ ႁွင်ႉဢဝ်တမၢၼ်ႇၸဝ်ႈၸိူဝ်းၼၼ်ႉမႃးဢေႃႈ။- 22လုၵ်ႈဢွၼ်ႇၶုၼ်ၸိူဝ်းၼၼ်ႉ ႁွတ်ႈထိုင်ၵႃႈတီႈထွင်ႇသေယဝ်ႉ၊ ဢမ်ႇထူပ်းဢမ်ႇႁၼ်တမၢၼ်ႇၸဝ်ႈၸိူဝ်းၼၼ်ႉ ၵႃႈၼႂ်းထွင်ႇလႄႈၶိုၼ်းမႃး၊- 23လဝ်ႊလၢတ်ႈလႄႈဝႃႈ၊ ႁဝ်းၶႃႈလႆႈထူပ်းလႆႈႁၼ် ၽၵ်းတူထွင်ႇဢိုတ်းဝႆႉမီးယူႇသေႇၶျႃႇလီငၢမ်းလႄႈ ၶဝ်ၸိူဝ်းဢၼ်ပႂ်ႉထွင်ႇၼၼ်ႉၵေႃႈ ၸုၵ်းယူႇၽၢႆႇတၢင်းၼွၵ်ႈၽၵ်းတူၼၼ်ႉၶႃႈယဝ်ႉ။ ၵူၺ်းၵႃႈႁဝ်းၶႃႈၽုၺ်ႇသေယဝ်ႉ၊ ဢမ်ႇထူပ်းဢမ်ႇႁၼ်ၽူႈလႂ် ၵႃႈတီႈၼႂ်းမၼ်းၶႃႈ၊ ဝႃႈၼင်ႇၼႆဢေႃႈ။- 24ၵႄႇပိၵ်ႈမၢၼ်ႇၸဝ်ႈ တင်းယိတ်ႈပရေႃးႁဵၵ်ႈလူင်ၸိူဝ်းၼၼ်ႉ၊ ငိၼ်းၵႂၢမ်းၼၼ်ႉသေယဝ်ႉ၊ ဝူၼ်ႉၼႂ်းၸႂ်လႄႈဝႃႈ၊ လွင်ႈတၢင်းၼႆႉၸိုင်တၵ်းပဵၼ်ၸိူဝ်ႉၼင်ႇႁိုဝ်၊ ဝႃႈၼင်ႇၼႆဢေႃႈ။- 25မိူဝ်ႈၼၼ်ႉ ၵူၼ်းၵေႃႉၼိုင်ႈမႃးလဝ်ႊလၢတ်ႈလႄႈဝႃႈ၊ ၶဝ်ၸိူဝ်းဢၼ်သူၸဝ်ႈၶင်ဝႆႉၵႃႈၼႂ်းထွင်ႇၼၼ်ႉ ၸုၵ်းယူႇၵႃႈၼႂ်းပိၵ်ႈမၢၼ်ႇၸဝ်ႈသေလႄႈ သင်ႇသွၼ်သုင်းမႃႉပၼ်တီႈၵူၼ်းတင်းလၢႆယူႇၶႃႈဢေႃႈ၊ ဝႃႈၼင်ႇၼႆဢေႃႈ။- 26မိူဝ်ႈၼၼ်ႉ ၵႄႇပိၵ်ႈမၢၼ်ႇၸဝ်ႈ ဢိၵ်ႇတင်းလုၵ်ႈဢွၼ်ႇၶုၼ်ၸိူဝ်းၼၼ်ႉ ၵႂႃႇၸူးသေယဝ်ႉ၊ ယင်းဢမ်ႇႁဵတ်းပႄႉႁဵတ်းၼႅင်ႇလႄႈ ႁွင်ႉဢဝ်တမၢၼ်ႇၸဝ်ႈၸိူဝ်းၼၼ်ႉမႃး ၵွပ်ႈပိူဝ်ႈဢၼ်ၵူဝ်ႁႄ ၵူၼ်းတင်းလၢႆလႄႈ၊ ၵူဝ်တူဝ်ၸဝ်ႈၵဝ်ႇတၵ်းလႆႈၶၢမ်ႇတၢင်းဢၼ်ဢဝ်မၢၵ်ႇႁိၼ်ထိမ်ႈၼၼ်ႉဢေႃႈ။- 27ႁွင်ႉဢဝ်မႃးၸိူဝ်ႉၼင်ႇၼၼ်သေယဝ်ႉ၊ ၶဝ်ဢဝ်ဝႆႉၵႃႈတီႈ ၽၢႆႇၼႃႈၶုၼ်တီႈလုမ်းလူင်တင်းလၢႆသေလႄႈ ၶုၼ်ယိတ်ႈပရေႃးႁဵၵ်ႈၵေႃႈထၢမ်လႄႈဝႃႈ၊- 28လွင်ႈၼင်ႇႁိုဝ်သူတၵ်း ဢမ်ႇဢိင်ပိုင်ႈၼႃႇမႃႉၸိုဝ်ႈသဵင်ၼၼ်ႉလႄႈ သင်ႇသွၼ်ပၼ်ပိူၼ်ႈၸိုင်၊ ႁဝ်းသင်ႇလၢတ်ႈပၼ်တီႈသူလီလီငၢမ်းငၢမ်းယဝ်ႉဢမ်ႇၸႂ်ႈႁိုဝ်။ တူၺ်းလူး၊ သူႁႂ်ႈဝဵင်းယေႇရူႉသလႅမ်ႇၼႆႉ တဵမ်ဝႆႉတင်းဢယူႇဝႃႇတႃႉသူၼၼ်ႉယဝ်ႉလႄႈ ၵျၢမ်ႇပွင်ႁႂ်ႈလိူတ်ႈၵေႃႉၼၼ်ႉႁွတ်ႈမႃးၵႃႈၼိူဝ်ႁဝ်းလူင်ပႄႇ၊ ဝႃႈၼင်ႇၼႆဢေႃႈ။

29 ပေႇတရူႉ တင်းတမၢၼ်ႇၸဝ်ႈတၢင်ႇၵေႃႉၸိူဝ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ႁဝ်းၶႃႈထုၵ်ႇလီထွမ်ႇဢဝ်ၵႂၢမ်းၽြႃးပဵၼ်ၸဝ်ႈၼႃႇသေၵႂၢမ်းၵူၼ်းၶႃႈဢေႃႈ။- 30ၽြႃးပဵၼ်ၸဝ်ႈပူႇပေႃႈႁဝ်းၼၼ်ႉ ႁႂ်ႈယေႇသူႉဢၼ်သူဢဝ်ႁွႆႈၵႃႈတီႈသဝ်မႆႉလႄႈဢဝ်တၢႆၼၼ်ႉလုၵ်ႉၶိုၼ်းမႃးယဝ်ႉ။- 31ၸဝ်ႈၼၼ်ႉၸိုင် ၽြႃးပဵၼ်ၸဝ်ႈၶၢၼ်းဝႆႉ ၼႂ်းဢရႃႇၸဝ်ႈဢၼ်ဢုပ်ႉပိူင်ႇ ဢိၵ်ႇတင်းဢရႃႇၸဝ်ႈဢၼ်ၵႄႇၶျွတ်ႈၼၼ်ႉလႄႈ ယုၵ်ႉယွင်ႈဝႆႉၵႃႈတီႈၽၢႆႇၶႂႃမၼ်းၸဝ်ႈ ႁႂ်ႈလႆႈပၼ်တြႃးတၢင်းဢၼ်ၶုၵ်းၸႂ်လႆႈမႆႈၸႂ် တင်းဢၶႂၢင်ႉဢၼ်ပွႆႇလွတ်ႈဢပႅတ်ႈတီႈၵူၼ်း ဢီႉသရေႇလႃႉတင်းလၢႆယဝ်ႉၶႃႈယဝ်ႉ။- 32ႁဝ်းၶႃႈပဵၼ်ၵေႃႉဢၼ်ၶၢမ်ႇသၢၵ်ႈသေႇလွင်ႈတၢင်းၸိူဝ်းၼႆႉၶႃႈဢေႃႈ။ ဝီႉၺိၺ်ႇဢၼ်မူတ်းၸၢင်ႇၸဝ်ႈဢၼ်ၽြႃးပဵၼ်ၸဝ်ႈပၼ်တီႈၶဝ်ၸိူဝ်းဢၼ် ထွမ်ႇဢဝ်ၵႂၢမ်းမၼ်းၸဝ်ႈၼၼ်ႉၵေႃႈ၊ ပဵၼ်ၵေႃႉဢၼ်ၶၢမ်ႇသၢၵ်ႈသေႇၶႃႈဢေႃႈ၊ ဝႃႈၼင်ႇၼႆဢေႃႈ။

33ၶဝ်လႆႈငိၼ်းၵႂၢမ်းၼၼ်ႉသေယဝ်ႉ၊ ႁူဝ်ၸႂ်ၶဝ်မိူၼ်ၸိူဝ်ႉၼင်ႇတၵ်းတႅၵ်ႇတၵ်းလႅဝ်ၵႂႃႇလႄႈ၊ ၵေႃႉၼိုင်ႈလႄႈၵေႃႉၼိုင်ႈ တိူင်ႇပၢင်ႇလၢတ်ႈၸႃၵၼ် ႁႂ်ႈလႆႈဢဝ်တမၢၼ်ႇၸဝ်ႈၸိူဝ်းၼၼ်ႉတၢႆဢေႃႈ။- 34မိူဝ်ႈၼၼ်ႉၵူၼ်းၽႃႇရီႉသႄး ဢၼ်လႆႈၸိုဝ်ႈၵႃႇမလျေးလႃႉ ဢၼ်ပဵၼ်သြႃႇဢၼ်သွၼ်ပၼ်ၼႂ်းတြႃးၸဝ်ႈလႄႈ ၵူၼ်းတင်းလၢႆရူဝ်ႇသေႇၵူဝ်ယမ်ၼၼ်ႉၵေႃႉၼိုင်ႈ လုၵ်ႉၵႃႈၼိူဝ်လုမ်းလူင်သေလႄႈ မီးဢမိင်ႉႁႂ်ႈတမၢၼ်ႇၸဝ်ႈၸိူဝ်းၼၼ်ႉ ဢွၵ်ႇၵႂႃႇၵႃႈၼွၵ်ႈၵမ်းၼိုင်ႈယဝ်ႉ၊- 35ၸင်ႇလၢတ်ႈလႄႈဝႃႈ၊ ၵူၼ်းဢီႉသရေႇလႃႉၶဝ်ဢိူၺ်း၊ လွင်ႈတၢင်းဢၼ်သူတၵ်းႁဵတ်းတီႈၶဝ်ၼၼ်ႉ ၸိူဝ်ႉၼင်ႇႁိုဝ်ၼၼ်ႉၸိုင်၊ တူဝ်ၸဝ်ႈၵဝ်ႇႁဵတ်းသတီႉလႄႈ ၶႆႈၸႂ်ဝူၼ်ႉၸႂ်သေၵမ်း။- 36လွင်ႈမၼ်းၸမ်ႉ ဢွၼ်တၢင်းမိူဝ်ႈၼၼ်ႉၼၼ်ႉ ၵူၼ်းဢၼ်လႆႈၸိုဝ်ႈထူႉတႃႉ ၵေႃႉၼိုင်ႈပေႃႇမႃးလႄႈလၢတ်ႈဝႃႈ၊ ၵဝ်ၼႆႉပဵၼ်ၵူၼ်းပၢၼ်ၵၢင်ဢမ်ႇၸႂ်ႈ၊ ဝႃႈၼင်ႇၼႆလႄႈ ၵူၼ်းသေသီႇပၢၵ်ႇၼိုင်ႈၸမ်ၸမ်ၸူႉၵၼ်တုမ်ၵၼ်ပဵၼ်ၽၢႆႇမၼ်းၵႂႃႇဢေႃႈ။ ၵေႃႉၼၼ်ႉႁွတ်ႈထိုင်တၢင်းဢၼ်လူႉဢၼ်လႅဝ်သေလႄႈ ၵူၼ်းဢၼ်ယုမ်ႇမၢတ်ႈမၼ်းၵႃႈမီးၸိူဝ်းၼၼ်ႉၵေႃႈၽၢတ်ႇၽႄၵၼ်ႁၢႆလၢႆၵႂႃႇဢေႃႈ။- 37ဝၢႆးသေၵေႃႉၼၼ်ႉ၊ ၼႂ်းၶိင်ႇမိူဝ်ႈဢၼ်ၽႃႇငိုၼ်းၵဵပ်းငိုၼ်းၼၼ်ႉ ၵူၼ်းမိူင်းၵႃႇလီႉလႄး ဢၼ်လႆႈၸိုဝ်ႈယူႉတႃႉ ၵေႃႉၼိုင်ႈၵေႃႈပေႃႇမႃးလႄႈ တိုၵ်းယူင်းၸူဝ်းဢဝ်ၵူၼ်းၼမ်ၼႃႇ ၸွမ်းပႃႈလင်မၼ်းဢေႃႈ။ ၵေႃႉၼၼ်ႉႁွတ်ႈထိုင်တၢင်းဢၼ်လူႉဢၼ်လႅဝ်သေလႄႈ ၵူၼ်းဢၼ်ယုမ်ႇမၢတ်ႈမၼ်းၵႃႈမီးၸိူဝ်းၼၼ်ႉၵေႃႈလူႉလႅဝ်ႁၢႆလၢႆၵႂႃႇဢေႃႈ။- 38တေႃႈလဵဝ်ၼႆႉၵေႃႈ ၵဝ်ဝႃႈတီႈသူၸမ်ႉ၊ ဝႄႈပိူင်ႈၶဝ်ၼႆႉသေလႄႈႁႂ်ႈၶဝ်ယူႇႁင်းၶဝ်သေၵမ်း။ တၢင်းၵျၢမ်ႇတၢင်းပွင်ၼႆႉ ဢမူႉၼႆႉပေႃးၸႂ်ႈတၢင်းၵျၢမ်ႇတၢင်းပွင်ၵူၼ်း ဢမူႉၵူၼ်းၸိုင်၊ တၵ်းႁွတ်ႈထိုင်တီႈဢၼ်လူႉဢၼ်လႅဝ်ဢေႃႈ။- 39ၵူၺ်းၵႃႈပေႃးၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈၸိုင်၊ သူဢမ်ႇယႃႉပႅတ်ႈလႆႈ။ လီၵူဝ်တၵ်းထူပ်းႁၼ်လွင်ႈဢၼ်တူဝ်ၸဝ်ႈၵဝ်ႇ ပဵၼ်ၵူၼ်းၸိူဝ်းဢၼ်တိုၵ်းတေႃးၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆဢေႃႈ။

40ၶဝ်ၼၼ်ႉ ထွမ်ႇဢဝ်ၵႂၢမ်းမၼ်းသေယဝ်ႉ၊ ႁွင်ႉဢဝ်တမၢၼ်ႇၸဝ်ႈၸိူဝ်းၼၼ်ႉမႃးလႄႈ ပေႃႉယႅၼ်ႉသေယဝ်ႉ၊ လွင်ႈၼင်ႇႁိုဝ်တၵ်းဢမ်ႇလႆႈဢိင်ၼႃႇမႃႉၸိုဝ်ႈသဵင်ယေႇသူႉၼၼ်ႉသေလႄႈ ႁေႃးလၢတ်ႈၸိုင်၊ ႁၢမ်ႈတၢပ်ႈႁႄႉၶႅၼ်လႄႈပွႆႇၵႂႃႇသေဢေႃႈ။

41တမၢၼ်ႇၸဝ်ႈၸိူဝ်းၼၼ်ႉၵေႃႈ သိူဝ်းၸူမ်းၵွပ်ႈပိူဝ်ႈဢၼ်မၼ်းၸဝ်ႈမၢတ်ႈၶဝ်ပဵၼ် ၶဝ်ၸိူဝ်းဢၼ်ထုၵ်ႇလႆႈႁွတ်ႈထိုင် တၢင်းဢၼ်ၶၢမ်ႇတၢင်းဢၼ်ဢူၵ်းဢၼ်ဢၢႆပိူၼ်ႈ ၵွပ်ႈပိူဝ်ႈၼႃႇမႃႉၸိုဝ်ႈသဵင်ၸဝ်ႈၼၼ်ႉလႄႈၸင်ႇဢွၵ်ႇသေၵႃႈၼႂ်းလုမ်းလူင်ၼၼ်ႉၵႂႃႇဢေႃႈ။- 42ၶဝ်သင်ႇသွၼ်သုင်းမႃႉပၼ်လႄႈႁေႃးလၢတ်ႈတြႃးသတၢင်းသိူဝ်းပျေႃႇဢၼ်ဝႃႈ လွင်ႈဢၼ်ယေႇသူႉ ပဵၼ်ၸဝ်ႈၶရိၸ်ႈၼၼ်ႉၵႃႈၼႂ်းပိၵ်ႈမၢၼ်ႇၸဝ်ႈ ဢိၵ်ႇတင်းၵႃႈၼႂ်းႁိူၼ်း ယူႇၵူႈမိုဝ်ႉၵူႈဝၼ်းတႃႇသေႇဢမ်ႇထၢတ်ႇဢေႃႈ။

Populære bibelvers fra
တမၢၼ်ႇၸဝ်ႈ 5

Videoer om တမၢၼ်ႇၸဝ်ႈ 5

Apostlenes gjerninger kap. 1–7

Overblikk: Apostlenes gjerninger 1-12

Bibel:

Shan

Bibelutgave: သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး - CBMS