တမၢၼ်ႇၸဝ်ႈ 10
10
ပေႇတရူႉလႆႈထူပ်းၺႃးၵေႃးၼီႇလီႉ
1ၵႃႈၼႂ်းဝဵင်းၵေႇသရီႉၼၼ်ႉ မီးၵူၼ်းဢၼ်လႆႈၸိုဝ်ႈၵေႃးၼီႇလီႉလႄႈ ပဵၼ်တပ်ႉမူး ဢၼ်လႆႈဢုပ်ႉၵူၼ်းသိုၵ်းပၢၵ်ႇၼိုင်ႈၵႃႈၼႂ်းတပ်ႉ ဢၼ်လႆႈႁွင်ႉႁဵၵ်ႈ တပ်ႉဢီႉတလီႉ၊- 2ဢၼ်ပဵၼ်ၵေႃႉဢၼ်မူၼ်ႈပျေႃႇၼႂ်းဝၢတ်ႈၽြႃးလႄႈ ဢိၵ်ႇလူၺ်ႈၵၼ်တင်းၵူၼ်းၵႃႈမီးၼႂ်းႁိူၼ်းမၼ်းၸိူဝ်းၼၼ်ႉ ၵူဝ်ယမ်ၽြႃးပဵၼ်ၸဝ်ႈ ဢၼ်ႁဵတ်းတၢင်းဢၼ်ၽႄၸွၼ်းယိုၼ်ႈမႅင်ႇၼမ်ၼႃႇ တီႈၵူၼ်းတင်းလၢႆလႄႈ သူးတွင်းၽြႃးပဵၼ်ၸဝ်ႈယူႇတႃႇသေႇၼၼ်ႉၵေႃႉၼိုင်ႈဢေႃႈ။- 3ဝၼ်းၼိုင်ႈၶိင်ႇၵဝ်ႈၼႃႇရီႇၸမ်ၸမ် မၼ်းၼၼ်ႉလႆႈႁၼ်တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈႁွတ်ႈမႃး ႁွင်ႉမၼ်းလႄႈဝႃႈ၊ၵေႃးၼီႇလီႉဢိူၺ်း၊ ဝႃႈၼင်ႇၼႆၼၼ်ႉ ၼႂ်းပျႃႇတိၵ်ႈရူႇပႃႇရူင်ႇ ထၢင်ႇထၢင်ႇသႃးသႃးဢေႃႈ။- 4မၼ်းယႅၵ်ႉတူၺ်းတမၢၼ်ႇၵၢင်ႁၢဝ်ၼၼ်ႉၸေးၸေးသေယဝ်ႉ၊ တူၵ်းၸႂ်လႄႈထၢမ်ဝႃႈ ၸဝ်ႈႁဝ်းမီးလွင်ႈၵႃႈသင်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ တမၢၼ်ႇၵၢင်ႁၢဝ်ၵေႃႈလၢတ်ႈလႄႈဝႃႈ၊ တၢင်းဢၼ်မႂ်းသူးတွင်းႁဵတ်းပထၼႃႇ ဢိၵ်ႇတင်းတၢင်းဢၼ်မႂ်းၽႄၸွၼ်းယိုၼ်ႈမႅင်ႇၸိူဝ်းၼၼ်ႉၶိုၼ်ႈၵႂႃႇ ပုၼ်ႈဢၼ်တၵ်းၶုၵ်းၸႂ်လႆႈၶႆႈၸႂ်ထူပ်း ၵႃႈတီႈၽၢႆႇၼႃႈၽြႃးပဵၼ်ၸဝ်ႈပုၼ်ႉယဝ်ႉ။- 5ပိူဝ်ႈၼႆလႄႈ ပွႆႇၸႂ်ႉၵူၼ်းၵႂႃႇၵႃႈတီႈဝဵင်းယွပ်ႉပႃႉ ပုၼ်ႉလႄႈ ပၢင်းဢဝ်သီႉမုၼ်ႇ ဢၼ်လႆႈၸိုဝ်ႈမႂ်ႇ ပေႇတရူႉၼၼ်ႉမႃးတႃႉ။- 6မၼ်းၼၼ်ႉသွၼ်ႈပိုင်ႈယူႇၵႃႈတီႈႁိူၼ်း သီႉမုၼ်ႇ ၵူၼ်းႁဵတ်းၼင်ၼၼ်ႉဢေႃႈ။ ႁိူၼ်းမၼ်းၸမ်ႉမီးၵႃႈတီႈႁိမ်းပၢင်ႇလၢႆႇဢေႃႈ၊ ဝႃႈၼင်ႇၼႆဢေႃႈ။
7တမၢၼ်ႇၵၢင်ႁၢဝ်ဢၼ်လၢတ်ႈပၼ်တီႈ ၵေႃးၼီႇလီႉၼၼ်ႉ ၵႂႃႇသေယဝ်ႉ၊ ၵေႃးၼီႇလီႉႁွင်ႉဢဝ်ၵူၼ်းဢွၼ်ႇမၼ်းသွင်ၵေႃႉ ဢိၵ်ႇတင်းၵူၼ်းသိုၵ်း ဢၼ်မူၼ်ႈပျေႃႇၼႂ်းဝၢတ်ႈၽြႃး ဢၼ်မီးၼႂ်းၶဝ်ၸိူဝ်းဢၼ် ယူႇႁူမ်ႈၵၼ်တင်းမၼ်းတႃႇသေႇၼၼ်ႉၵေႃႉၼိုင်ႈမႃးလႄႈ၊- 8မွၵ်ႇလၢတ်ႈလွင်ႈတၢင်းၸိူဝ်းၼၼ်ႉတင်းသဵင်ႈတင်းလူင်ယဝ်ႉၸင်ႇ ပွႆႇၸႂ်ႉၶဝ်ၵႂႃႇၵႃႈတီႈဝဵင်းယွပ်ႉပႃႉ ပုၼ်ႉဢေႃႈ။
9ဝၼ်းမိူဝ်ႈၽုၵ်ႈ ၼႂ်းမိူဝ်ႈဢၼ်ၶဝ်ၸွမ်းတၢင်းၵႂႃႇလႄႈ ႁွတ်ႈထိုင်ၵႃႈတီႈႁိမ်းဝဵင်းယွပ်ႉပႃႉၼၼ်ႉၸိုင် ၶိင်ႇႁူၵ်းၼႃႇရီႇၸမ်ၸမ်၊ ပေႇတရူႉၼၼ်ႉ၊ ၶိုၼ်ႈၵႂႃႇၵႃႈၼိူဝ်မုင်းႁိူၼ်းႁႂ်ႈလႆႈသူးတွင်းဢေႃႈ။- 10မၼ်းတွင်ႉမႆႈတွင်ႉႁွၼ်ႉလႄႈ မီးဢလူဝ်ႇၶႂ်ႈၵိၼ်တၢင်းၵိၼ်သေယဝ်ႉ ၼႂ်းမိူဝ်ႈဢၼ်ပိူၼ်ႈယင်းတိုၵ်ႉမႄးႁႅၼ်းတၢင်းၵိၼ်ယူႇၼၼ်ႉၸိုင်၊ မၼ်းၼၼ်ႉပဵၼ်ၸိူဝ်ႉၼင်ႇၼွၼ်းၽၼ်ႁၼ် ၼႂ်းတူဝ်ၸဝ်ႈၵဝ်ႇသေလႄႈ၊- 11လႆႈႁၼ်ၵၢင်ႁၢဝ်ၽုၺ်ႇပိုတ်ႇဝႆႉလႄႈ ၶိူင်ႈပိူင်ဢၼ်ပဵၼ်ၸိူဝ်ႉၼင်ႇ တၢၼ်းသိူဝ်ႇလူင် ဢၼ်မတ်ႉသီႇၸဵင်ႇသေလႄႈၶျႃးယွၼ်ႇတူၵ်းၵႃႈၼိူဝ်လိၼ်မိူင်းၼၼ်ႉ လူင်းမႃးၸူးတီႈမၼ်းဢေႃႈ။- 12ၼႂ်းၶိူင်ႈပိူင်ၼၼ်ႉ မီးၸႃႉၸဵမ်တရိၵ်ႈသၢၼ်ႇ ဢၼ်မီးတိၼ်သီႇၶွၼ်ၵူႈၸိူဝ်ႉၵူႈပိူင် ဢိၵ်ႇတင်းတရိၵ်ႈသၢၼ်ႇ ဢၼ်ၸၢင်ႈၵႂႃႇၸၢင်ႈၵၢၼ်းၵႃႈၼိူဝ်လိၼ်၊ တင်းၼူၵ်ႉဢၼ်ၸၢင်ႈမိၼ်ၵႃႈၼိူဝ်ၽႃႉၵၢင်ႁၢဝ်တင်းလၢႆဢေႃႈ။
13သဵင်ၵႂၢမ်းၽႅဝ်မႃးတီႈမၼ်းလႄႈဝႃႈ၊ပေႇတရူႉဢိူၺ်း၊ လုၵ်ႉဢဝ်တၢႆသေလႄႈၵိၼ်တႃႉ၊ ဝႃႈၼင်ႇၼႆဢေႃႈ။- 14ပေႇတရူႉၵေႃႈလၢတ်ႈလႄႈဝႃႈ ဢမ်ႇပဵၼ်လႆႈၶႃႈၸဝ်ႈ။ ၵဝ်ၶႃႈဢမ်ႇတွၼ်ႉၵိၼ်ၶိူင်ႈပိူင်ဢၼ်ၵူဝ်ႈၵိူၵ်ႇ တင်းၶိူင်ႈပိူင်ဢၼ်ဢမ်ႇမူတ်းသႂ်သေပွၵ်ႈၶႃႈ၊ ဝႃႈၼင်ႇၼႆဢေႃႈ။- 15လိုၼ်းၼၼ်ႉပွၵ်ႈတူႉတီႉယႃႉ သဵင်ၵႂၢမ်းၽႅဝ်မႃးလႄႈဝႃႈၸမ်ႉ၊ ဢၼ်ၽြႃးပဵၼ်ၸဝ်ႈႁႂ်ႈမူတ်းသႂ်ၼၼ်ႉၸိုင် မႂ်းယႃႇပေထၢင်ႇၵူဝ်ႈၵိူၵ်ႇတႃႉ၊ ဝႃႈၼင်ႇၼႆဢေႃႈ။- 16ပဵၼ်ၸိူဝ်ႉၼင်ႇၼၼ် ထူၼ်ႈထိုင်သၢမ်ပွၵ်ႈယဝ်ႉၸင်ႇ ၶိုၼ်းသိမ်းဢဝ်ၶိူင်ႈပိူင်ၼၼ်ႉ ၶိုၼ်ႈၵႂႃႇၵႃႈၼႂ်းၵၢင်ႁၢဝ်ပုၼ်ႉသေဢေႃႈ။
17ပျႃႇတိၵ်ႈရူႇပႃႇရူင်ႇ ဢၼ်တူဝ်ၸဝ်ႈၵဝ်ႇလႆႈႁၼ်ၼၼ်ႉၸမ်ႉ၊ တၵ်းၶႂ်ႈဝႃႈၸိူဝ်ႉၼင်ႇႁိုဝ်ဝႃႈၼႆ၊ ၼႂ်းမိူဝ်ႈဢၼ်ပေႇတရူႉ ယင်းတိုၵ်ႉၶႆႈၸႂ်ဝူၼ်ႉၸႂ်ယူႇၼၼ်ႉၸိုင်၊ ၵူၼ်းဢၼ် ၵေႃးၼီႇလီႉ ပွႆႇၸႂ်ႉမႃးၸိူဝ်းၼၼ်ႉ ထၢမ်ႁႃႁိူၼ်းသီႉမုၼ်ႇသေယဝ်ႉ၊ ၸုၵ်းၵႃႈတီႈၽၢႆႇၼႃႈၽၵ်းတူယူႇသေလႄႈ၊- 18ႁွင်ႉသႅၼ်ႇထၢမ်လႄႈဝႃႈ၊ သီႉမုၼ်ႇဢၼ်လႆႈၸိုဝ်ႈမႂ်ႇ ပေႇတရူႉၼၼ်ႉ သွၼ်ႈပိုင်ႈယူႇၵႃႈတီႈၼႆႈႁိုဝ်၊ ဝႃႈၼင်ႇၼႆဢေႃႈ။
19ၼႂ်းမိူဝ်ႈဢၼ်ပေႇတရူႉ ယင်းတိုၵ်ႉၶႆႈၸႂ်ဝူၼ်ႉၸႂ်လူၺ်ႈလွင်ႈပျႃႇတိၵ်ႈရူႇပႃႇရူင်ႇၼၼ်ႉယူႇၼၼ်ႉၸိုင်၊ ဝီႉၺိၺ်ႇၸဝ်ႈလၢတ်ႈတီႈမၼ်းလႄႈဝႃႈ၊ တူၺ်းလူး၊ ၵူၼ်းသၢမ်ၵေႃႉႁႃမႂ်းယူႇဢေႃႈ။- 20လုၵ်ႉလႄႈလူင်းၵႂႃႇတႃႉ၊ ယႃႇပေၶႆႈၸႂ်ဝူၼ်ႉၸႂ်၊ ၸွမ်းၶဝ်ၵႂႃႇတႃႉ။ လွင်ႈမၼ်းၸမ်ႉ ၶဝ်ၼၼ်ႉပဵၼ်ၵေႃႉဢၼ်ၵဝ်ပွႆႇၸႂ်ႉမႃးယဝ်ႉ၊ မိူဝ်ႈဢၼ်မၼ်းၸဝ်ႈဝႃႈၼင်ႇၼႆၸိုင်၊- 21ပေႇတရူႉၵေႃႈ လူင်းၵႂႃႇလႄႈလၢတ်ႈတီႈၶဝ်ၼၼ်ႉလႄႈဝႃႈ၊ ၵဝ်ၼႆႉၸမ်ႉ ပဵၼ်ၵေႃႉဢၼ်သူႁႃဢေႃႈ။ မီးလွင်ႈၸိူဝ်ႉၼင်ႇႁိုဝ်လႄႈမႃး၊ ဝႃႈၼင်ႇၼႆဢေႃႈ။- 22ၶဝ်ၼၼ်ႉၵေႃႈၶိုၼ်းလၢတ်ႈလႄႈဝႃႈ၊ တပ်ႉမူးၵေႃးၼီႇလီႉ ဢၼ်ပဵၼ်ၵေႃႉဢၼ်သိုဝ်ႈတေႃႇ ဢၼ်ၵူဝ်ယမ်ၽြႃးပဵၼ်ၸဝ်ႈလႄႈမီးသရေႇ ၼႂ်းၵူၼ်းယူႉတႃႉ တင်းသဵင်ႈတင်းလူင်ၼၼ်ႉ၊ ၼင်ႇႁိုဝ်တၵ်းလႆႈႁွင်ႉပၢင်းဢဝ်ၸဝ်ႈႁဝ်း ၵႂႃႇၸူးၵႃႈတီႈႁိူၼ်းမၼ်းလႄႈ ထွမ်ႇငိၼ်းၵႂၢမ်းၸဝ်ႈႁဝ်းၸိုင် လႆႈၶၢမ်ႇပျႃႇတိၵ်ႈရူႇပႃႇရူင်ႇ ၵႃႈတီႈတမၢၼ်ႇၵၢင်ႁၢဝ် ဢၼ်မူတ်းၸၢင်ႇယဝ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။
23ပိူဝ်ႈၼႆလႄႈပေႇတရူႉ ႁွင်ႉဢဝ်ၶဝ်ၼၼ်ႉ ၶဝ်ႈၵႂႃႇၵႃႈၼႂ်းႁိူၼ်းသေလႄႈ ႁဵတ်းဝၢတ်ႈၶႅၵ်ႇဢေႃႈ။ ဝၼ်းမိူဝ်ႈၽုၵ်ႈၼၼ်ႉ မၼ်းၸင်ႇၵႂႃႇလူၺ်ႈၵၼ်တင်းၶဝ်ၼၼ်ႉလႄႈ ပီႈၼွင်ႉၸိူဝ်းဢၼ်ပဵၼ်ၵူၼ်းဝဵင်းယွပ်ႉပႃႉၼၼ်ႉ ၵမ်ႈၽွင်ႈၵေႃႈၸွမ်းၵႂႃႇဢေႃႈ။- 24လိုၼ်းၼၼ်ႉဝၼ်းၼိုင်ႈ ၶဝ်ၶဝ်ႈၵႃႈၼႂ်းဝဵင်းၵေႇသရီႉလႄႈ ၵေႃးၼီႇလီႉၼၼ်ႉ ႁႂ်ႈပီႈၼွင်ႉၸိူဝ်ႉၶိူဝ်းမၼ်း ဢိၵ်ႇတင်းၵေႃႉသေႈမၼ်းတင်းလၢႆ ၸူႉၵၼ်တုမ်ၵၼ်သေယဝ်ႉ မုင်ႈထႃႈမွင်းထႃႈၶဝ်ယူႇဢေႃႈ။- 25မိူဝ်ႈဢၼ် ပေႇတရူႉႁွတ်ႈထိုင်ၸိုင်၊ ၵေႃးၼီႇလီႉၼၼ်ႉ ႁပ်ႉႁူဝ်တၢင်းလႄႈ ၶုပ်ႉမူပ်ႇၵႃႈတီႈႁိမ်းတိၼ်မၼ်းသေယဝ်ႉ ႁဵတ်းရူဝ်ႇသေႇၵူဝ်ယမ်ဢေႃႈ။- 26ပေႇတရူႉၼၼ်ႉ ႁႂ်ႈမၼ်းလုၵ်ႉလႄႈဝႃႈ လုၵ်ႉတႃႉ၊ ၵဝ်ၼႆႉတူဝ်ၸဝ်ႈၵဝ်ႇပဵၼ်ၵူၼ်းလႆ၊ ဝႃႈၼင်ႇၼႆဢေႃႈ။- 27ပေႇတရူႉၼၼ်ႉ တၵ်ႉလၢတ်ႈၸိူဝ်ႉၼင်ႇၼၼ်ယူႇသေလႄႈ၊ ၶဝ်ႈၵႂႃႇၵႃႈၼႂ်းလႄႈထူပ်းႁၼ် ၵူၼ်းဢၼ်ၸူႉဢၼ်တုမ်ၼမ်ၼႃႇသေယဝ်ႉ၊- 28လၢတ်ႈတီႈၶဝ်ၼၼ်ႉလႄႈဝႃႈ လွင်ႈဢၼ်ၵေႃႉဢၼ်ပဵၼ်ၵူၼ်းယူႉတႃႉၼၼ်ႉ ဢမ်ႇလီႁဵတ်းၵေႃႉႁဵတ်းသေႈလႄႈ သုတ်ႉၸပ်းသုတ်ႉၸူးၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉၸိုင် သူႁူႉယူႇဢေႃႈ။ ၼႂ်းဝႃႈၼၼ်သေၵေႃႈ လွင်ႈၼင်ႇႁိုဝ် တၵ်းဢမ်ႇလႆႈႁွင်ႉၽူႈလႂ်လႄႈဝႃႈ ၵူဝ်ႈၵိူၵ်ႇ၊ ဢမ်ႇမူတ်းသႂ်၊ ဝႃႈၼင်ႇၼႆၸိုင် ၽြႃးပဵၼ်ၸဝ်ႈၼႄပျႃးတီႈၵဝ်ယဝ်ႉ။- 29ၵွပ်ႈႁွႆးၼႆႉလႄႈ မိူဝ်ႈဢၼ်သူႁွင်ႉဢဝ်ၵဝ်ၼၼ်ႉၸိုင်ၵဝ်ယင်းဢမ်ႇတွပ်ႇဢမ်ႇထဵင်လႄႈမႃးဢေႃႈ။ ပိူဝ်ႈၼႆလႄႈ မီးလွင်ႈၼင်ႇႁိုဝ်လႄႈ သူႁွင်ႉၵဝ်မႃး၊ ၵဝ်ထၢမ်တီႈသူဢေႃႈ၊ ဝႃႈၼင်ႇၼႆဢေႃႈ။
30 ၵေႃးၼီႇလီႉၵေႃႈလၢတ်ႈလႄႈဝႃႈ၊ ဝၼ်းဢၼ်ပူၼ်ႉမႃးယဝ်ႉသီႇဝၼ်းၼၼ်ႉ ၵဝ်ၶႃႈၵမ်တၢင်းၵိၼ်တေႃႇထိုင်ႁွတ်ႈၶိင်ႇၼႃႇရီႇၼႆႉလႄႈ ၼႂ်းၶိင်ႇၵဝ်ႈၼႃႇရီႇၼၼ်ႉ ၵဝ်ၶႃႈသူးတွင်းယူႇၵႃႈတီႈႁိူၼ်းဢေႃႈ။ ၼႂ်းၶိင်ႇၼၼ်ႉၵူၼ်းဢၼ်ၼုင်ႈၶူဝ်းဢၼ်ႁိူဝ်ႈလႅင်းၵေႃႉၼိုင်ႈ ၸုၵ်းယူႇၵႃႈတီႈၽၢႆႇၼႃႈၵဝ်ၶႃႈလႄႈ၊- 31လၢတ်ႈဝႃႈ၊ ၵေႃးၼီႇလီႉဢိူၺ်း၊ တၢင်းဢၼ်မႂ်းသူးတွင်းႁဵတ်းပထၼႃႇၼၼ်ႉၸိုင် မၼ်းၸဝ်ႈလႆႈငိၼ်းယဝ်ႉ။ တၢင်းဢၼ်မႂ်းၽႄၸွၼ်းယိုၼ်ႈမႅင်ႇၸိူဝ်းၼၼ်ႉၵေႃႈ မၼ်းၸဝ်ႈမၢတ်ႈတွင်းဝႆႉယဝ်ႉ။- 32ပိူဝ်ႈၼႆလႄႈ ပွႆႇၸႂ်ႉၵႂႃႇၵႃႈတီႈဝဵင်းယွပ်ႉပႃႉၼၼ်ႉလႄႈ ပၢင်းဢဝ်သီႉမုၼ်ႇ ဢၼ်လႆႈၸိုဝ်ႈမႂ်ႇ ပေႇတရူႉၼၼ်ႉမႃးတႃႉ။ မၼ်းၼၼ်ႉ သွၼ်ႈပိုင်ႈယူႇၵႃႈတီႈႁိူၼ်းသီႉမုၼ်ႇ ၵူၼ်းႁဵတ်းၼင် ဢၼ်မီးၵႃႈတီႈႁိမ်းပၢင်ႇလၢႆႇၼၼ်ႉဢေႃႈ။ မိူဝ်ႈဢၼ်မၼ်းၼၼ်ႉႁွတ်ႈမႃးၸိုင် မၼ်းတၵ်းႁေႃးလၢတ်ႈပၼ်တီႈမႂ်းဢေႃႈ၊ ဝႃႈၼင်ႇၼႆဢေႃႈ။- 33ပိူဝ်ႈၼႆလႄႈ ၵဝ်ၶႃႈၸင်ႇပွႆႇၸႂ်ႉၵႂႃႇၸူးၵႃႈတီႈၸဝ်ႈႁဝ်းၵမ်းလဵဝ်ဢေႃႈ။ ၵွပ်ႈပိူဝ်ႈဢၼ်ၸဝ်ႈႁဝ်းမႃးၵႃႈတီႈၼႆႈလႄႈၸဝ်ႈႁဝ်း ႁဵတ်းလီလီငၢမ်းငၢမ်းယဝ်ႉ။ ၵွပ်ႈႁွႆးၼႆႉလႄႈ တေႃႈလဵဝ်ၼႆႉႁဝ်းၶႃႈတင်းသဵင်ႈတင်းလူင် မီးယူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈ ႁႂ်ႈလႆႈထွမ်ႇလႆႈငိၼ်း ၵႃႈဢၼ်ၸဝ်ႈၽြႃးသင်ႇလၢတ်ႈဝႆႉ ၵႃႈတီႈၸဝ်ႈႁဝ်းၼၼ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။
ၵႂၢမ်းတြႃးဢၼ်ပေႇတရူႉႁေႃးလၢတ်ႈ
34မိူဝ်ႈၼၼ်ႉပေႇတရူႉၸင်ႇ ပိုတ်ႇပၢၵ်ႇလႄႈမွၵ်ႇလၢတ်ႈဝႃႈ ၵဝ်ႁူႉႁၼ်လွင်ႈဢၼ် ၽြႃးပဵၼ်ၸဝ်ႈ ဢမ်ႇလူဢမ်ႇတူၺ်းၼႃႈၵူၼ်းလႄႈ၊- 35ၼႂ်းၵူၼ်းၵူႈၸိူဝ်ႉၵူႈၶိူဝ်း ၵေႃႉဢၼ်ၵူဝ်ယမ်ၽြႃးပဵၼ်ၸဝ်ႈလႄႈ ႁဵတ်းသိုဝ်ႈႁဵတ်းတေႃႇၼၼ်ႉၵူၺ်း လႆႈၼႃႈလႆႈတႃၵႃႈတီႈၽြႃးပဵၼ်ၸဝ်ႈၼၼ်ႉယူႇဢေႃႈ။- 36တြႃးဢၼ်မၼ်းၸဝ်ႈပၼ်ၵႂႃႇၵႃႈတီႈ ၵူၼ်းမဵဝ်းဢီႉသရေႇလႃႉတင်းလၢႆလႄႈ ယင်းတိုၵ်ႉႁေႃးလၢတ်ႈသတၢင်းသိူဝ်းပျေႃႇ ၸဝ်ႈဢၼ်ၸၢပ်ႈသႅင်ႇၵၼ်တင်းတၢင်းၼိမ် ၵွပ်ႈပိူဝ်ႈ ယေႇသူႉၶရိၸ်ႈ ၸဝ်ႈဢၼ်ဢုပ်ႉပိူင်ႇၵူၼ်းတင်းသဵင်ႈတင်းလူင်ဢၼ်ဝႃႈ၊- 37လွင်ႈတီႈႁဵင်းၼႆႉ ဢၼ်ၸွတ်ႇတူဝ်ႈၸႃႉၸဵမ် မိူင်းၵႃႇလီႉလႄး မိူင်းယူႉတႃႉ ၵူႈတီႈၵူႈလႅၼ် ဝၢႆးလင်ယူဝ်းႁၢၼ်ႇ ႁေႃးလၢတ်ႈတြႃးပပ်ႉတီႉၸမ်ႇယဝ်ႉၼၼ်ႉၸိုင်၊ သူႁူႉယူႇဢေႃႈ။- 38လွင်ႈတီႈႁဵင်းၼႆႉၸမ်ႉ ၽြႃးပဵၼ်ၸဝ်ႈဢဝ်ဝီႉၺိၺ်ႇဢၼ်မူတ်းၸၢင်ႇၸဝ်ႈ ဢိၵ်ႇတင်းတၼ်းၶူဝ်းၸဝ်ႈ ပၼ်ၽိၵ်ႈသိၵ်ႈတီႈယေႇသူႉ ၵူၼ်းဝဵင်းၼႃႇၸရႅတ်ႈဢၼ် ၵွပ်ႈပိူဝ်ႈဢၼ်ၽြႃးပဵၼ်ၸဝ်ႈမီးယူႇလူၺ်ႈၵၼ်တင်းမၼ်းလႄႈ ၵႂႃႇလႄႇလဵပ်ႈႁဵတ်းၵျေးၸူးလႄႈ ပၼ်ၵတ်းယဵၼ်ၶျၢမ်းသႃႇတီႈၶဝ်ၸိူဝ်းဢၼ်မႃႇၼၢတ်ႈၼိၵ်ႈၸၢၵ်ႈငႅၼ်းသႄး ၵႃႈမီးၼၼ်ႉဢေႃႈ။- 39ႁဝ်းၵေႃႈပဵၼ်ၵူၼ်းဢၼ်ၶၢမ်ႇသၢၵ်ႈသေႇလွင်ႈတၢင်း ၵႃႈဢၼ်မၼ်းၸဝ်ႈႁဵတ်း ၸႃႉၸဵမ်ၼႂ်းဝဵင်းယေႇရူႉသလႅမ်ႇ တင်း မိူင်းယူႉတႃႉၼၼ်ႉဢေႃႈ။ ၸဝ်ႈၼၼ်ႉၸိုင် ၶဝ်ဢဝ်ႁွႆႈဝႆႉၵႃႈတီႈသဝ်မႆႉလႄႈဢဝ်တၢႆယဝ်ႉ၊- 40ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ ၽြႃးပဵၼ်ၸဝ်ႈႁႂ်ႈမၼ်းၸဝ်ႈလုၵ်ႉၶိုၼ်းလႄႈ ၼႄပျႃးထၢင်ႇသႃးဢေႃႈ။- 41ၼႄပျႃးတီႈၵူၼ်းတင်းသဵင်ႈတင်းလူင်ဢမ်ႇၸႂ်ႈ၊ ၼႄပျႃးတီႈၶဝ်ၸိူဝ်းဢၼ်ၶၢမ်ႇသၢၵ်ႈသေႇ ဢၼ်ၽြႃးပဵၼ်ၸဝ်ႈၶၢၼ်းဝႆႉဢွၼ်တၢင်းဢၼ်ဝႃႈ ႁဝ်းဢၼ်ၵိၼ်လူၺ်ႈၵၼ်တင်းမၼ်းၸဝ်ႈ ဝၢႆးလင်မၼ်းၸဝ်ႈလုၵ်ႉၵႃႈတၢင်းတၢႆၶိုၼ်းလိပ်းယဝ်ႉၼၼ်ႉၸိူဝ်းၼႆႉဢေႃႈ။- 42မၼ်းၸဝ်ႈပိင်းၺၢပ်ႈဝႆႉတီႈႁဝ်း လွင်ႈဢၼ်တၵ်းလႆႈႁေႃးလၢတ်ႈတီႈၵူၼ်းတင်းလၢႆလႄႈ ၶၢမ်ႇသၢၵ်ႈသေႇ လွင်ႈဢၼ်ၸဝ်ႈၼၼ်ႉပဵၼ်ၸဝ်ႈဢၼ် ၽြႃးပဵၼ်ၸဝ်ႈၶၢၼ်းဝႆႉ ႁႂ်ႈလႆႈၸီႇယၢင်ႇတြႃးတီႈၵူၼ်းဢၼ်ဢသၢၵ်ႈလိပ်းယူႇ ဢိၵ်ႇတင်းၵူၼ်းဢၼ်တၢႆယဝ်ႉတင်းလၢႆဢေႃႈ။- 43ပရေႃးၽႅတ်ႈတင်းသဵင်ႈတင်းလူင်ၵေႃႈၶၢမ်ႇသၢၵ်ႈသေႇ လွင်ႈဢၼ်ၶဝ်ၸိူဝ်းဢၼ်ယုမ်ႇမၢတ်ႈမၼ်းၸဝ်ႈၼၼ်ႉ ၵႃႈမီးတင်းသဵင်ႈတင်းလူင် ၵွပ်ႈပိူဝ်ႈၼႃႇမႃႉၸိုဝ်ႈသဵင်မၼ်းၸဝ်ႈၼၼ်ႉလႄႈ တၵ်းလႆႈၶၢမ်ႇတၢင်းဢၼ်ၵၢင်းလွတ်ႈတင်းဢပႅတ်ႈၼၼ်ႉဢေႃႈ၊ ဝႃႈၼင်ႇၼႆဢေႃႈ။
ၵူၼ်းတၢင်ႇၸိူဝ်ႉတၢင်ႇၶိူဝ်းႁပ်ႉဢဝ်ဝီႉၺိၺ်ႇမူတ်းၸၢင်ႇၸဝ်ႈ
44ၼႂ်းမိူဝ်ႈဢၼ် ပေႇတရူႉ မွၵ်ႇလၢတ်ႈၵႂၢမ်းၼၼ်ႉယူႇၼၼ်ႉၸိုင် ဝီႉၺိၺ်ႇဢၼ်မူတ်းၸၢင်ႇၸဝ်ႈ လူင်းမႃးၵႃႈၼိူဝ်ၶဝ်ၸိူဝ်းဢၼ်ထွမ်ႇငိၼ်းၼုၵ်ႈၵပၢတ်ႈတြႃးၸဝ်ႈယူႇ တင်းသဵင်ႈတင်းလူင်ၸိူဝ်းၼၼ်ႉဢေႃႈ။- 45ၵွပ်ႈပိူဝ်ႈဢၼ်သွၼ်းလေႃႇၵျေးၸူးဝီႉၺိၺ်ႇဢၼ်မူတ်းၸၢင်ႇၸဝ်ႈ ၵႃႈၼိူဝ်ၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉလႄႈ ၶဝ်ၸိူဝ်းဢၼ်ၶၢမ်ႇတၢင်းဢၼ်ထိူဝ်ႁိမ်းၵႃႈဢၼ်ယုမ်ႇမၢတ်ႈလႄႈ ပႃးမႃးလူၺ်ႈၵၼ်တင်းပေႇတရူႉၸိူဝ်းၼၼ်ႉ ၵႂင်ၸႂ်ယုင်ႈၸႂ်ယူႇဢေႃႈ။- 46လွင်ႈမၼ်းၸမ်ႉၶဝ်လႆႈငိၼ်း ၶဝ်ၼၼ်ႉဢဝ်တင်းၵႂၢမ်းၽႃႇသႃႇၵူႈၸိူဝ်ႉၵူႈပိူင် လၢတ်ႈလႄႈယွင်ႈယေႃးၽြႃးပဵၼ်ၸဝ်ႈဢေႃႈ။
47မိူဝ်ႈၼၼ်ႉ ပေႇတရူႉၵေႃႈ လၢတ်ႈလႄႈဝႃႈ ၼင်ႇႁိုဝ်ၶဝ်ၸိူဝ်းဢၼ်လႆႈၶၢမ်ႇဝီႉၺိၺ်ႇဢၼ်မူတ်းၸၢင်ႇၸဝ်ႈ မိူၼ်ၸိူဝ်ႉၼင်ႇႁဝ်းၼႆႉၼၼ်ႉ တၵ်းဢမ်ႇလႆႈၶၢမ်ႇပပ်ႉတီႉၸမ်ႇၸိုင် ၽူႈလႂ်ႁၢမ်ႈတၢပ်ႈႁႄႉၶႅၼ်ၼမ်ႉဝႆႉလႆႈ၊ ဝႃႈၼင်ႇၼႆသေယဝ်ႉ၊- 48ၸီႇယၢင်ႇႁႂ်ႈၶဝ်လႆႈၶၢမ်ႇပပ်ႉတီႉၸမ်ႇ ၼႂ်းၼႃႇမႃႉၸိုဝ်ႈသဵင်ၸဝ်ႈၽြႃးဢေႃႈ။ လိုၼ်းၼၼ်ႉ ၶဝ်တွင်းပၢၼ်ႇႁႂ်ႈပေႇတရူႉ ယူႇႁၢမ်ႉႁိုင်ဢေႃႈ။
Markert nå:
တမၢၼ်ႇၸဝ်ႈ 10: CBMS
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Copyright © 2021 by OMF International, Shan Baptist Churches Fellowship
