Markus 1
1
Polayatan Yohanes Pombaptis
(1:1-8)
(Mat. 3:1-12; Luk. 3:1-18; Yoh. 1:19-28)
1Ninam Kabar Boi' mongona'i Yesus Kristus, Ana' Allah. 2Kabar Boi' nantai mula'i sama'an inyo ditulis Nabi Yesaya, ninam pomandiran-Nyo:
“Dinga'ancam! Aku tajahan monyiuh utusan-Ku mondoholu'i Duatn.
Utusan-Ku nantai tajahan momposiapan jalatn pakai' kodatakan Duatn.#1:2: Doi' buku Maleakhi 3:1
3Ado urakng inyo mondongkakng-mondorah di padakng pasir,
‘Sodia'ancam jalatn pakai' Tuhatn.
Bujurancam jalatn pakai' Sio.’ ”#1:3: Doi' buku Yesaya 40:3
4 Urakng inyo diutus Allah nantaiam Yohanes Pombaptis. “Io moncumul di padakng pasir ongko momboritoan mongona'i baptisan huatan monsio gola' moninggalan dosa oca' ulih diamputi.” 5Jadi, banya' urakng doi' kota Yerusalem ongko doi' soluruh propinsi Yudea datakng. Sia' mongaku'i dosa sia' lalu io mombaptis sia' di sungai Yordan.
6Yohanes momakai jubah inyo dipulah doi' bulu unta. Ikat pinggakngnyo dipulah doi' kulit lou'. Sio makatn bunta' ongko madu singat. 7Sio momadahan kabar ni'in: “Ado urakng inyo tajahan datakng lopas aku. Sio lobih bokuaso doi' aku. Pakai' tundu' ongko ngompucut'i tali sopatunyo pan aku kinyo cucu'. 8Aku bayo mombaptis kaitn agatn ara'i. Apo Sio tajahan mombaptis kaitn agatn Roh Allah.”
Yesus dibaptis
(1:9-11)
(Mat. 3:13-17; Luk. 3:21-22; Yoh. 1:32-34)
9Timpu nantai, Yesus datakng doi' laman Nazaret di propinsi Galilea. Yohanes mombaptis Sio di sungai Yordan. 10Lopas jadi dibaptis, Yesus hagar koluar doi' ara'i. Timpu nantai jam, langit tobuka'. Yesus moniant Roh Allah turutn ko pucu'-Nyo samo sama'an burukng daro. 11Lalu kodinga'an saro Allah doi' sorugo momadahan, “Kolainam Ana'-Ku inyo Ku kasihi. Kolainam monyonangan hati-Ku.”
Rajo Sitatn moncubo'i oca' Yesus bodosa
(1:12-13)
(Mat. 4:1-11; Luk. 4:1-13)
12Lopas nantai, Roh Allah moirikan Yesus ko padakng pasir. 13Di santai, Sio bodiapm somanah ompat puluh ari, Rajo Sitatn moncubo'i Sio. Ado boko bonatakng liar bosamo agatn Sio jam ongko boko molekat molayati Sio.
Yesus mula'i polayatan-Nyo di propinsi Galilea
(1:14-15)
(Mat. 4:12-17; Luk. 4:14-15)
14Lopas Yohanes ditangkap ongko dimansu'an ko ponjara,#1:14: kisah Yohanes ditangkap ongko dibunuh ado di Mat. 14:1-12, Mrk. 6:14-29 ongko Luk. 9:7-9. Yesus botula' ko propinsi Galilea, momadahan Kabar Boi' doi' Allah. 15Kato-Nyo, “Watu inyo ditontuan Allah udah datakam. Koraja'an Allah udah dampikam.#1:15: Masudnyo, Yesus udah datakng ko dunia ni'in, jadi monsio ulih pocayo Sio nam Rajo Inyo Dijanjian Allah. Aman pocayo nantai, moninggalan dosa, lalu monuruti Yesus, monsio ulih monjadi anggota koluarga Koraja'an Allah. Jadi, tinggalancam boko dosa kaitn ongko pocayocam agatn Kabar Boi' ni'in!”
Yesus moningkau ompat urakng nolayatn monjadi boko murid-Nyo inyo potamo
(1:16-20)
(Mat. 4:18-22; Luk. 5:1-11)
16Pas Yesus tongahan bojalatn di pinggir danau Galilea, Sio moniant duo urakng nolayatn, ia'an Simon ongko somadikannyo, Andreas. Sia' tongahan monjalo ikatn di danau. 17Kato Yesus ko sia', “Hincapm, tuyut-Ku huatan kaitn paca'an Ku jadian ponjalo monsio.” 18Timpu nantai jam, Simon ongko Andreas lansukng moninggalan jalo sia' lalu tuyut Yesus.
19Yesus bojalatn torus, lalu moniant duo urakng somadikan inyo bukai, ia'an Yakobus ongko Yohanes, poana'an Zebedeus. Sia' di dalapm porohu, tongahan monambal jalo sia'. 20Yesus moningkau sia' duo pakai' monjadi murid-Nyo. Timpu nantai jam, sia' lansukng moninggalan bopai sia' di dalapm porohu bosamo-samo agatn boko urakng upahannyo. Lalu, sia' tuyut Yesus.
Yesus monundukng roh jahat
(1:21-28)
(Luk. 4:31-37)
21Yesus ongko boko murid-Nyo datakam di kota Kapernaum. Watu ari Sabat, Yesus mansu' ko dalapm rumah sombayakng lalu mongajar boko urakng di santai. 22Sia' hiratn mondinga'an Sio mongajar. Obai, Sio mongajar agatn kuaso doi' Allah, kinyo samo sama'an boko guru agama Yahudi. 23Timpu nantai, di rumah sombayakng sia' ado urakng inyo korasu'an roh jahat. Kali labuh, io mondorah, 24“Ih! Yesus, urakng doi' laman Nazaret, Duatn honda' bulah lapo agatn koi? Aku tohu Duatn Inyo Suci doi' Allah! Kata'an Duatn datakng pakai' mombonasoan koi ni'in bai?”
25Yesus mohakap roh jahat nantai, “Lolangunt! Koluarcam doi' urakng ni'in!” 26Lalu, roh jahat nantai monggora'-gora'an urakng nantai kotakng kuat, lalu koluar doi' urakng nantai kapikng mondorah agatn saro borakng.
27Somuo urakng kotakan hiratn, jadi sia' bopandir agatn siku'-monyiku', “Hebat bondar ajaran boharu ni'in inyo Sio ajaran agatn kuaso. Sio monyiuh boko roh jahat, lalu sia' monuruti sio!” 28Jadi kabar mongona'i Yesus copat toborito di soluruh doerah Galilea nantai.
Yesus monyamani ponyakit montuho botina' Simon Petrus ongko boko urakng bukai
(1:29-34)
(Mat. 8:14-17; Luk. 4:38-41)
29Lopas koluar doi' rumah sombayakng nantai, Yesus, Yakobus, ongko Yohanes botula' ko rumah Simon ongko Andreas. 30Montuho botina' Simon mangkakan di kotidu'annyo lobai gorikng. Jadi, sia' lansukng momadahannyo ko Yesus mongona'i nantai. 31Yesus mohampikinyo, lalu moncama' longannyo, monulukngnyo angkat. Lansukng watu nantai, indai nantai nyamanam, lalu io mula'i molayati sia'.
32Watu kobabahariannyo, lopas matoari tonggolapm, banya' urakng boponyakit dibaba' ko Yesus, tomansu' inyo korasu'an boko roh jahat. 33Hampir somuo pondudu' kota nantai bokumpul di muka' lawakng rumah nantai. 34Yesus monyamani banya' urakng inyo mondorita' kona' bomacapm ponyakit. Sio pan monundukng banya' roh jahat. Yesus morarakng boko roh jahat nantai bopandir, obai sia' mongotohu'i sopo Sio.
Yesus mongajar di boko kota di propinsi Galilea
(1:35-39)
(Luk. 4:42-44)
35Sunsukng pukau, watu ari ija' potakng, Yesus huas lalu botula' ko doerah inyo langunt ongko bodoa di santai. 36Apo Simon ongko pokawalannyo mombodapan Sio. 37Ahirnyo, sia' monomuan-Nyo. Kato sia', “Somuo urakng tongahan monggoyapi Duatn.”
38Timbas Yesus, “Hincapm kito botula'am ko boko laman bukai di sokitar si'itan oca' Aku ulih monyampaian Kabar Boi' di siatan jam. Nianam alasan Ku datakng ko dunia ni'inan.” 39Jadi, Sio botula' ko somuo tompat di soluruh propinsi Galilea. Sio monyampaian Kabar Boi' di boko rumah sombayakng sia' ongko monundukng boko roh jahat.
Yesus monyamani urakng inyo hontapm ponyakit kulit inyo bogola'i
(1:40-45)
(Mat. 8:1-4; Luk. 5:12-16)
40Ado urakng inyo boponyakit kulit inyo bogola'i datakng ko Yesus. Sio tundu' monyungkapan di pohadapan Yesus lalu muhun. Katonyo, “Tulukng nyamaniku. Aman Duatn honda', Duatn ulih mo monyamaniku.”
41Yesus mooso kasihan agatnnyo. Sio mouluran longan-Nyo, moncama' urakng nantai, lalu bopandir, “Aku honda'mo. Nyamancam!” 42Lansukng io nyamanam doi' ponyakit kulit nantai. 43Lalu, Yesus monyiuh urakng nantai botula' apo agatn poringant'an ni'in. 44Kato-Nyo, “Jangan mongisahan hal ni'in ko sopo pan. Apo, botula'cam ko imam holu'ai. Minto io moriso'i kolai udah nyamanam. Lopas nantai, onju' posombahan sosuai agatn porintah Musa pakai' monjadi buti ko urakng bukai, kolai bondar-bondar udah nyamanam.”#1:44: Tiat buku Imamat 14:1-2.
45Apo, urakng nantai botula' kinyo botongga' momboritoan kojadian nantai di mono-mono. Obai nantai, Yesus culih mansu' ko dalapm kota agi' socaro torakng-torakan. Sio gola' diapm di luar di tompat inyo langunt. Apo, urakng torus bodatakan ko Sio doi' mono-mono.
Markert nå:
Markus 1: TBDS
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
