Génesis 14
14
Abram oguenohẽ Lótpe ijejopy vaietégui
1Ojehu Amrafel, Sinar retã ruvicha árape; Arioc, Elasar retã ruvicha árape; Quedorlaomer, Elam retã ruvicha árape, ha Tidal, Goim retã ruvicha árape,
2ko’ãva ou ojeity hag̃ua Bera, Sodóma táva ruvicha ári ha Birsa, Gomórra táva ruvicha ári ha Sinab, Adma táva ruvicha ári ha Semeber, Zeboim táva ruvicha ári ha Bela táva ruvicha ári, péva hína Zoar.
3Ko’ãva oñembyatypa Sidim ñuguasúpe, péva hína ko’ág̃a Mar Saládo (Yguasu Juky pegua).
4Ha’ekuéra opytáma 12 áño Quedorlaomer poguýpe ha pe áño 13-hápe oñemoĩ hikuái hese.
5Ha pe áño 14-hápe Quedorlaomer ou ambue tetã ruvichakuéra ndive hendápe, ha ombopoguy Refayguakuérape, Astarot Karnaímpe, ha umi Zuziguápe Hámpe, umi Emiguápe Savequiriataim ñuguasúpe,
6ha umi Horguápe Seir cérrope, Paran ñu meve, opytáva desiérto ypýpe.
7Ha upéi ojere ou hag̃ua Enmispátpe, péva Cades, ha ombotaperepaite hikuái Amalec retãme, ha umi Amorgua oikóva Hazezontamárpe.
8Ha osẽ Sodóma táva ruvicha, Gomórra táva ruvicha, Adma táva ruvicha, Zeboim táva ruvicha ha Bela táva ruvicha, péva Zoar, oñorãirõ hag̃ua hendivekuéra Sidim ñuguasúpe;
9ko’ãva Quedorlaomer, Elam retã ruvicha; Tidal, Goim retã ruvicha; Amrafel, Sinar retã ruvicha; ha Arioc, Elasar retã ruvicha, ko’ã irundy tetã ruvicha oñemoĩ umi 5 táva ruvicha rehe.
10Ha Sidim ñuguasu henyhẽte asfálto kuágui; ha Sodóma ha Gomórra táva ruvicha okañy jave ohóvo, oĩ ho’ámiva ipype; ha ambue hembýva katu okañy cérro gotýo.
11Ha Quedorlaomer, iñirũnguéra ndive, oguerahapa Sodóma ha Gomórra mba’erepyeta, hembi’urã, ha oje’ói hikuái.
12Ogueraha avei hikuái Lot, Abram ryvy ra’ýpe, Sodómape oikóva, ha ojapyhy imba’erepyeta ha oho hikuái.
13Ha ou peteĩva umi okañyva’ekue apytégui, omombe’upa hag̃ua Abrámpe, hebréova. Upejave ha’e oikohína Mámre, pe Amorgua encinatýpe, péva hína Escol ha Aner ryvy; oiko hikuái Abram ndive peteĩ ñe’ẽme.
14Abram ohendúvo ojegueraha hague ityvýra ra’ýpe ombyaty 318 hembiguái ikatupyrývape, onaceva’ekue hógape, ha oho hikuái hapykuerikuéra Dan peve.
15Upépe Abram omboja’o hembiguaikuérape mokõi atýpe, ha ojeity hi’arikuéra pyharekuépe, ha ipu’aka hesekuéra upéi omuña ichupekuéra Hoba peve, opytáva Damásco nórte gotýo.
16Ha oipe’apa jevy ichuguikuéra umi mba’erepyeta, Lot ha umi kuña ha ambue hembiguaikuérape.
Melquisedec ohovasa Abrámpe
17Abram ha hembiguaikuéra ou jevývo, ipu’aka rire Quedorlaomer rehe, osẽ Sodóma táva ruvicha, ambue táva ruvichakuéra ndive, ojejohu hag̃ua Abram ndive Save ñuguasúpe, péva oñembohéra táva ruvicha ñuguasu.
18Upéramo Melquisedec, Salem retã ruvicha, ogueru pan ha víno, ha’e ningo Ñanderuete, pe Jára Ipu’akapáva pa’i,
19ha he’i Abrámpe: Ñanderuete, pe Jára Ipu’akapáva, yvagakuéra ha yvy apohare tanderovasa.
20Toñemomba’eguasu Ñanderuete, pe Jára Ipu’akapáva, omoĩva’ekue nde poguýpe umi nderehe ija’e’ỹvape. Ha Abram ome’ẽ ichupe opaite mba’égui pe diézmo (10 mymbágui peteĩ).
21Upéramo pe Sodóma táva ruvicha he’i Abrámpe: Eme’ẽnte chéve che rembiguaikuéra ha topyta ne mba’erã ramo ore mba’erepyeta (ne rembiapo repy ramo).
22Ha Abram he’i Sodóma táva ruvichápe: Che amopu’ã che po ame’ẽ hag̃ua che ñe’ẽ che Ruete, pe Ipu’akapaitéva rérape ha umi yvága ha yvy apohare renondépe,
23ndaguerahamo’ãi mba’eve ne mba’e apytégui, ni peteĩ inimbo térã peteĩ sapatu sã jepeve, ani hag̃ua nde ere: Che amboheta Abram mba’erepyeta.
24Umi mitãrusu ho’uva’ekuémante, ha umi kuimba’e ohova’ekue chendive Aner, Escol ha Mámre, ha’ekuérante togueraha imba’erã.
Markert nå:
Génesis 14: ÑÑP2015
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
