Matthew 4

Sa Namadasan Satan Nanulisugan Ḵan Jesus

(Mrk. 1:12-13; Luk. 4:1-13)

1Pune sadi, impuyut ni Ispiritu Santu aḵ Jesus atte bumbummaaw ta padason Satan sulisugon. 2Pun nallaun aḵ opatpuḻu we aḻgaw ḵan labi woḵ nauḻauḻat. 3Aḵ Satan we pasig sumulisug ummadani ḵan siya woḵ ḵanana, “Nu siḵa Abeng Apudyus, bilinom da annae batu ta ambalinda'ḵ tinapay.”

4Yaḵon ḵanan Jesus, “Nigili'tte Ugud Apudyus we, ‘Daḵampun aḵ abus maḵan aḵ iḵatagun ni tagu yaḵon ḵasapuḻana bos da losane Ugud Apudyus.’ ”#4:4 Deuteronomy 8:3.

5Pun intallay Satan aḵ Jesus atte siyudad Apudyus ad Jerusalem woḵ pinataḵdogna'tte ḵataḵnangan ni templo we boḻoy Apudyus, 6woḵ ḵanana ḵan siya, “Nu siḵa Abeng Apudyus, an-ottagḵa te sa ḵanan ni nigili'tte Ugud Apudyus,

“ ‘Bilinona da anghelna'tte mipanggob ḵan siḵa’

ya ‘tapayaonda siḵa atta imada,

ta adi da suḵim mitupaḵ atte batu.’ ”#4:6 Psalm 91:11-12.

7Ḵanan Jesus, “Adiḵpun te nigili'tte Ugud Apudyus, ‘Adim padason aḵ Apu we Apudyusnu we ipailana ḵan siḵa ayyuwanna.’ ”#4:7 Deuteronomy 6:16.

8Pun inḵasin Satan intallay aḵ Jesus si antaḵnataḵnange beleg woḵ impailana ḵan siya da losane ampangatan atte lubung ya da ḵinabaḵnangda, 9woḵ ḵanana, “Ittoḵ ḵan siḵa losan da sana nu analluḵuḵa ya andayawḵa ḵan saḵon.”

10Ḵanan Jesus, “Ḵumassadḵa, Satan! Te ḵanan ni nigili'tte Ugud Apudyus, ‘Sa Apu we Apudyusnu, siya abus aḵ dayawom ḵan anserbiyam.’ ”#4:10 Deuteronomy 6:13.

11Pune sadi, ummoyon aḵ Satan. Baag-en dummatong da anghel woḵ binadanganda'ḵ Jesus.

Sa Nangisaḻdan Jesus We Nantuttudu

(Mrk. 1:14-15; Luk. 4:14-15)

12Dingngoḻ ḵad Jesus we nibaḻud aḵ John we ambobonyag, nipauli'tte probinsiya'd Galilee. 13Pun tinenana ili'd Nazareth woḵ ummoy inninggaw ad Capernaum we osae ili'tte taḻantag ni baybay ad Galilee si saḵubna'd Zebulun ḵan Naphtali. 14Naḵwa ḵaḵna ta mituttuwa impaigilin Profeta Isaiah we ḵanana,

15“Sa lutan da Zebulun ḵan Naphtali,

atte ḵapon si baybaye domang ni tawwang Jordan,

ya sa probinsiya'd Galilee ye ummiliyan da Gentil.

16Da tagu ḵad sidi, isudan inggaw si pongot

te isunan nalibuuwan ilida si ḵatoy.

Yaḵon sa umali ye aḻgaw, ilanda ampigsapigsae silaw

te ampaila ḵan dida anilaw atta somsomoḵda.”#4:15-16 Isaiah 9:1-2.

17Inggan ni sadi ye timpu, insaḻad Jesus we nangiwaḻagawag woḵ ḵanana, “Ibabawiyu da basuḻyu ya agayyu we angwa te gattoḵe sinsadi awad ḵan diḵayu ampangatan Apudyus.”

Sa Nangayagan Jesus Atta Ummunae Disipuluna

(Mrk. 1:16-20; Luk. 5:1-11)

18Nanadtaddaḻan ḵad aḵ Jesus atte taḻantag ni Baybay ad Galilee, innilana da duwae ansunude mammaugadiwe anabuḵuḻ, da Simon we ngannonda Peter ḵan Andrew. 19Ḵanan Jesus ḵan dida, “Tun-udonaḵ ta ambalinoḵ diḵayu'ḵ disipuluḵ ya tuttuduwaḵ diḵayu si inonyu we angiyadani'tta tagu we amati ḵan saḵone isun ni inonyu we anabuḵuḻ atta ugadiw.” 20Pune sadi, daguse tinenanda da tabuḵuḻda woḵ nitun-udda ḵan siya.

21Pinagatupan ḵad Jesus we nanaddaḻan innilana bos da duwae ansunud, da James ḵan John we abeng Zebedee. Inninggawda si bangka ḵan Zebedee ye amadae angisagana si tabuḵuḻda. Pun inayagan Jesus dida. 22Pune sadi, daguse tinenanda bangkada ya aḵ amada woḵ nitun-udda ḵan Jesus.

Sa Nangiwaḻagawagan Ya Sa Nangaanan Jesus Atta Saḵit

(Luk. 6:17-19)

23Ginaḵay Jesus da losane ili'tte probinsiya'd Galilee woḵ nantuttudu'tta sinagogada.#4:23 Sinagoga - siya andaḵdaḵngan da Judyu si umoyda andayaw ḵan Apudyus atta aḻgawe miyadi anḵewaaḻ. Awad da sinagoga'tta losane ili ye inggawan da Judyu. Andayawda ḵan alluwaḻuda sidi, basaonda nigili ye Ugud Apudyus ya andongoḻda'tta tuttudu. Iwwaḻagawagna Ambaḻu we Damag mipanggob si ampangatan Apudyus. Ḵinaanna da nankalakalasi ye saḵit ḵan ampaḵaḻaman da tagu. 24Nandinongoḻ da ḵingwan Jesus atta losane saḵubna'd Syria. Pun nan-iyoyda ḵan siya'tta losane nasaḵit ya da ampaḵaḻam, isun da naaḻanan, naḵoḻtoy ya da naparalaes woḵ ḵinaanna da saḵitda. 25Nitun-ud ḵan siya da ummamdane tagu we naḻpu'tte probinsiya'd Galilee, siyudad ad Jerusalem, probinsiya'd Judea ya da nampaliḵwos ad Decapolis ya da ili ye inggaw si domang ni tawwang Jordan.

Markert nå:

Matthew 4: kml

Marker

Del

Kopier