Johan 2
2
Kana Tuartiak Puai ah
1A ni thumnak ah Galilee peng sungih Kana khua ah tuartiak puai a om, culeh Jesuh ih nu cu acunangah a om. 2Jesuh leh a kaizulle khaw tuartiak puai ahcun sawm an i ve. 3Sabitti ni a dengtaak hngai tikah Jesuh cu a nu ni, “Sabitti an ngei ti lo,” tiah a sim. 4Culeh Jesuh ni, “Minu, acu cu nang leh kei ih siaherh ding itu a om hmen? Ka tikcu a pha rih tal lo,” tiah a ti. 5A nu ni tungsaule cu, “A tan sim hngaimi poh ṭuan lei cu,” tiah a ti hngai. 6Acunangah Judah thianfaitiaknak daan caah lung tireng paruk an om. Pakhat ni gallon kul in sawmthum tiang an tlum kho. 7Jesuh ni tungsaule cu, “Tireng cu ti a khat in thun uh,” tiah a ti hngai. Culeh a khat vek in an thun. 8Jesuh ni, “Tireng sungih ti cu thiak lei cu khawh puai hotupa hemah pia uh,” tiah a ti hngai. Curuangah a ti mangcun acu pa cu an pia. 9Puai hotupa ni sabit ah a cangmi ti cu a tepla, culeh khawnang in a pha ti a tiah loih (ti a thun tu tungsaule ni cu an tiahkau) nupitupa cu koin, 10“Micang ni cu sabitti a tuimi peitleng ah mi an tul, culeh khualpawl khimtein an din hnukah a siadeuh mi an tul. A i nain nang cu atu tiang sabitti tui na siahtia rih hi maw,” tiah a ti. 11Jesuh ni hi a khithmuhnak peitatleng hi Galilee peng Kana khua ah a vua ih a sunlawinak a phuanglang; culeh a kaizulle ni amah cu an zum. 12Cuhnukah Kapernaum khua laah a nu, a naule, cun a kaizulle rum an zong tat; culeh acunangah ni tlawmte an omta.
Biakinn a Thian
(Mat 21:12-17; Mar 11:15-19; Luk 19:45-48)
13Judah mipawl ih Lontaak Puai a nai vel ih Jesuh cu Jerusalem laah a so. 14Biakinn sungah cawpe, tuu, laileeng zuartule, cun tangka thlengtule an cabuai ah toin a hmu hngai. 15Mithawinak hri hrual hratin, tuupawl leh cawpepawl an zate biakinn in a ṭhawl hngai. Tangka thlengtule khaw an tangkanawipawl vorh piak hngai in an cabuaipawl a kuplet hngai. 16Thunu zuartule cu, “Hi thunupawl hi hinang in suah uh! Ka Pa ih inn cu dawr vuaknak ih hman awl vel uh,” tiah a ti hngai. 17A kaizulle ni cu, “Na inn ka tlaihsannak ni mei kan in a ma kaang ciam thok,” tiih nganmi an vonmang. 18Cutikah Judah mipawl ni, “Hi thil na vuak khawh khithmuhnak itu i lei maw a man hmuh?” tiah an ti. 19Jesuh ni, “Hi biakinn hi ṭhet u la ni thum sungah ka sa thok,” tiah a sawn hngai. 20Judah mipawl ni, “Hi biakinn hi kum sawmli leh kum ruk sung sak reromi i na, nang ni ni thum sungah maw na sak lei?” tiah an ti. 21Ihmansela Jesuh ni biakinn a timi cu a ruangpun a ii. 22Mithi lakin thawhsak a ik hnukah a kaizulle ni acu a sim cu an vonmang; culeh Lai Thianghlim leh Jesuh ih simmi aanka cu an zum. 23Lontaak Puai sung, Jerusalem ih a om lioah, a vuak reromi khithmuhnakpawl an hmu ih mi tlungpi ni amah cu an zum. 24Ihmansela Jesuh ni cu mi hmawhhmawh itumang an ik ṭhatein a tiah hngai ruangah an hemah a piaktiak duh lo. 25Mi pakhatkhat ih thu ahuhman ni a hemih sim a ṭul lo, icatile amah rori ni mikip sungih ommi a tiah.
Markert nå:
Johan 2: KHBF
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Khualsim Holy Bible © Bible Society of Myanmar, 2021.
