Yele-za-pɛr-tib 2
2
1À ŋá n'a a Naaŋmɩn tɩ ír a salom nɩ a tẽw nɩ a bome al za na be a pʋɔ a baarɩ. 2A Naaŋmɩn na tɩ tõ a ʋ tome za baar'a, ʋ pɩ̃ɛnɩ nɩ a bibie ayopõi sob, a ʋ tome za ʋ na tɩ tõ a ƴãw. 3A Naaŋmɩn tɩ maal'ɩ a bibie ayopõi sob, ɛ́ ɩ k'ʋ ɩ a ʋ bibi-sora. Bʋ̃ʋ n'ʋ vɛ̃, ʋ tɩ pɩ̃ɛnɩ nɩ a ʋlɩ bibir nɛ a ʋ bome íru tome za ƴãw. 4A salom nɩ a tẽw beba yele n'ɩ à à ŋá, a lɛn daar a Naaŋmɩn na tɩ ír a a.
A Edɛn tẽw zaadɛ̃ yele
A lɛn daar a Sore Naaŋmɩn na tɩ maalɩ a salom nɩ a tẽw a, 5vale za bɛ tɩ be a tẽw zu sɛr ɛ, mɔ̃le za bɛ tɩ bul sɛr ɛ. Bʋ̃ʋ n'ʋ vɛ̃, a Sore Naaŋmɩn bɛ tɩ ƴãw saa wa a tẽw zu sɛr ɛ, nɩsaalbɛ mɩ̀ bɛ tɩ be be na kʋɔr a tẽsɔw ɛ. 6Ɛcɛ kʋ̃ɔ kãw tɩ tɛbr'a yire a tẽw, bure a tẽsɔw za.
7A Sore Naaŋmɩn tɩ de nɩ a tẽsɔw tã-buulu mɛ n a nɩsaal, ɛ́ pɛblɩ a nyɔ-vʋʋrʋ pɩɛlʋ ƴãw a ʋ nyɔbɔgɛ pʋɔ, a nɩsaal lɩɛbɩ bʋ̃-vʋʋra. 8Al pùorí, a Sore Naaŋmɩn tɩ ƴãw nɩ zaadɛ̃ a Edɛn tẽw, a saa-pɛrɩ́, ɛ́ de a nɩsaal ʋ na mɛ a ƴãw a be. 9A Sore Naaŋmɩn tɩ ɩ na a tẽsɔw bul tɩ-pɛ-bʋʋrɛ za na sãá vɩɛlɩ vɩɛlɩ ɛ́ a wɔmɛ nʋmɛ a. A nyɔ-vʋʋrʋ tɩɛ#2:9 Nyɔ-vʋʋrʋ tɩɛ: Nyɛ̃ Yzt 3.22, Zʋkp 3.18, Yel-w 2.7, 22.2. nɩ a tɩɛ ʋl na mɩ́ ɩ fʋ bãw a vla nɩ a faa a tɩ be n a zaadɛ̃ sɔwlɩsɔw.
10Man kãw tɩ yi n a Edɛn tẽw pʋɔ, ɛ́ a kʋ̃ɔ zɔrɛ tɔlɛ a zaadɛ̃ pʋɔ. Ʋ tɩ ɓar'ɩ a be tɛr gbɛ́ɛ anaar. 11A man-gbɛ́r kãw tɩ dɩ na kɛ́ Pison, ʋlɛ n'ʋ viiri koli a Hawila tẽw#2:11 Hawila tẽw: Arabi tẽw vuo kãw na pɩɛlɩ a Eziptɩ tẽw a n'ʋ.. Salm-zɩɛ be n a tẽw ŋa pʋɔ. 12Salm-zɩɛ mɩŋa mɩŋa nɩ tɩɛ kʋ̃ɔ kãw na nyùur vla bɛ bʋɔlɛ bidelium a, nɩ a kʋsɛ-bi-nyɩla na dɩ onisɩ a mɩ̀ be n be. 13A man-gbɛ́ɛ ayi sob tɩ dɩ na kɛ́ Gihon. Ʋlɛ n'ʋ cen viiri koli a Kusɩ tẽw#2:13 Kusɩ tẽw: Ʋ be n a Mezopotami tẽw bɩɩ a Eziptɩ tẽw saa-pɛrɩ́-dʋrʋ-lowr, ɛ́ na tɔ̃w ɩ a tɩ dɩ̃a Sudã bɩɩ Etiopi ten.. 14A man-gbɛ́ɛ ata sob tɩ n'ɩ a Tɩɩgɩr na zɔrɛ a Asuur tẽw saa-pɛrɩ́ a. A man-gbɛ́ɛ anaar sob tɩ n'ɩ a Efaratɩ#2:14 Tɩɩgɩr nɩ Efaratɩ: A Mezopotami tẽw man-bɛrɛ bɛrɛ n'a..
15A Sore Naaŋmɩn tɩ de nɩ a nɩsaal ƴãw a Edɛn tẽw zaadɛ̃ pʋɔ, k'ʋʋ kʋɔr ʋ ɛ́ gùre ʋ. 16A Sore Naaŋmɩn tɩ ƴãw nɩ nʋɔr ŋa kʋ̀ a nɩsaal: «Fʋ na tʋ̃ɔ́ na dɩrɛ a zaadɛ̃ tɩɩr za wɔmɛ. 17Ɛcɛ, a tɩɛ ʋl na mɩ́ ɩ fʋ bãw a vla nɩ a faa a wɔmɛ a, fʋ kʋ̃ dɩ a ɩ. Bʋ̃ʋ n'ʋ vɛ̃, a ʋlɩ bibir nɛ fʋ nãà wa dɩrɛ a ʋ wɔm a, a kũu n'a fʋ na kpi.»
18A Sore Naaŋmɩn tɩ yel'a: «A bɛ vɩɛl kɛ́ a dɛb ɩ ʋ yõ ɩ. Ɩ̃ na maal'ɩ sõwne bɛ na de taa vla vla a kʋ̀ ʋ.» 19Lɛ n'a a Sore Naaŋmɩn tɩ de a tanɛ mɛ n a wɛ-dʋn za nɩ a saa-zu lili za, ɛ́ tɛr a wa n a dɛb zie k'ʋʋ wa nyɛ̃ a lɛ ʋ na na por a a yée a. Bʋ̃-vʋʋra za na mɩ́ tɛr'ɩ a yúor ʋl a dɛb na na por ʋ a. 20A dɛb tɩ por'ɩ yée a yir dʋn, a wɛ-dʋn nɩ a saa-zu lili. Ɛcɛ a ʋl mɩŋa ƴãw a, a dɛb bɛ tɩ nyɛ̃ sõwne, ʋlɛ nɩ ʋl na de taa a ɩ. 21Lɛ n'a a Sore Naaŋmɩn tɩ ɩ a dɛb ʋ gúr kpalɩtam gã. Ʋ tɩ ír'ɩ a dɛb nyabikɔbr kãw, ɛ́ lɛb tal a ƴã-gã-nɛn pàw a bɔw. 22A Sore Naaŋmɩn tɩ maal'ɩ pɔw nɩ a nyabikɔbr ʋ na ír a dɛb zie a, ɛ́ tɛr a pɔw wa n a dɛb zie. 23Lɛ n'a a dɛb tɩ cɩɩrɩ:
«Ʋ̃'hʋ̃ʋ! Ƴɛrɛŋa ʋl a, pãa nyɛ̃ nɩr
na ɩ mɛ̃ a mãa a, mãa mɩŋa zɩ̃ɩ n'ʋ#2:23 Nyɛ̃ Yzt 29.14, Ƴɛ̀r-d 9.2, 2Sa 5.1, 19.13.!
Bɛ na bʋɔlɛ ʋ nɩ pɔw
a dɛb pʋɔ na n'a ʋ yi a ƴãw.»
24Alɛ n'a so a dɛb na mɩ́ bɛr a ʋ sãà nɩ a ʋ mã, ɛ́ lãw nɩ a ʋ pɔw bɛ ɩ nɩ-been#2:24 Nyɛ̃ Mat 19.5, Mark 10.7, 1Ko 6.16, Efɛ 5.31..
25A dɛb nɩ a ʋ pɔw tɩ ɩ n baw-zawlɛ bɛ za ayi, ɛ́ bɛ tɩ zɔrɛ taa vĩ ɛ.
Markert nå:
Yele-za-pɛr-tib 2: DBDC
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
La Bible en Dagara © Alliance Biblique du Burkina Faso, 2013.
