Matayo 3
3
1Kyeeri kilya Yohane mbatisa kasha kalosha vandu kulya bateń ya Yoridane eenumbuaa: 2Ilashikeń mirimiń yanu, fulya umangi lwa Iṛuva lwansha kufui. 3Yohane ni ulya, mwauya fisuku Yesaya eemmusendaa eereraa: Lwifo ununga lwa nndu akee ivaanga bateń: Tobiṛień Nndumi shia! Rendentień miko yamwi! 4Na Yohane eeṛaa nseto mooke na mafuli a ngamia na kitati kisiń kyamwi. Na shoonga yamwi ikee nrie na uki wa mbakoń. 5Llyo vandu va Yerusalemu vanshea na vandu va Yudaya woose na va kulya Yoridane. 6Vakabatiswa yye ifo mureń wa Yoridane veerambuaa mareko awo. 7Neeli andelolia Vafarisayo na Vasadukayo veengi veeshaa na kwamwi amu avabatise, kavaia: Ini vana va vamakavili, ni i amufunda sheeli mumakii irisha uumisio lukaa lushe isangeń? 8Kyasia ṛundeń mashoṛa mesha a iilashika! 9Ini mutakusaṛe mwinumbuaa: Ise toore nde yeru Abraamu. Namuia: Iṛuva amakii yaṛuya Abraamu mawe va ave vana vamwi. 10Na kyaaṛa kyammaa inulwa, na nri woose kitaare uvikaa nunda shinuru uminywaa na ikumbwa muroń. 11Nkya dede niń nkee imubatisa na mura kiimba kya iilashika. Kake ito ashaa numa yakwa awore finya kita niń. Ana nta nkaṛiaa ikurika faaru famwi ndi. Ye amubatisaa na Mumuyo Nsongori na muro. 12Nae arie kyeele na uko lwamwi, nae aangataa kivasha kyamwi kiile fyu na isańiṛia umbi wamwi ikumbiń. Kake muulu to aukoṛaa na muro utarunyikaa.
13Llyo Yesu andeuka kulya Galilaya, kafika kulya Yoridane kwa Yohane, amu andebatisyo-fo. 14Kake Yohane kalleya eemwiaa: Niń kyashiwara ibatiswa ni iwe, nawe kwasha na kwakwa? 15Yesu kamwia: Tia kive kuro! Amu nkuro kyatiwara yawutia ifo fa usumani foose. Kyasia kamwirikia. 16Neeli Yesu andemaa ibatiswa, lia eni kauka ifo mureń. Lia eni iṛuvewu likaruuka kalolia Mumuyo wa Iṛuva eemwolokyaa akee sha mbuku kankaya. 17Na ununga lukauka iṛuvewu lwireraa: Uu mMwana wakwa nkunde ashisenye.
Markert nå:
Matayo 3: RWK72
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
