MÁKHI 1
1
Yankan bhwe Jan-Nduhɛ́nháwo étɔ
(Ɔ́n wú Mat 3.1-12; Ɔ́n wú Lwik 3.1-18; Ɔ́n wú Jan 1.19-28)
1Krɛn nɔn Ábhwe Bhwábhwá khɛ́n étɔ Jezwi-Krisi ali Yankan Mi phɔ bhwe bhɔhɛ́n. 2Bhwetɔ́tréwo Ezayi hrɔ́ hrómɛn wo tɔ sa:
“Yankan étɔlé wu a, mɛn mán chɛ́ mɛn mranchɛ́wo
bhá hɛ hɛ́nmɛn,
sa anphwan sitó ká hɛ lé.
3Lephan bɛn bha ánánkhuthé elúkhwɛ́ tɔ sa:
Ɔ́n cɔ Hwánthe sitó tɛ́
ló ɔ́n tɛ́ mɛ́n sitó yali!”
4Ló Jan thandi ánánkhuthé, ánkranmán néphan lée:
– Ɔ́n jrɛn hɔ́n yítɛ́, ɔ́n chɛ́ ohá hɔ́n nduhɛ́n, ló Yankan bha yɔ́ hɔ́n ne phɔ́ hɔ́n.
5Ló Jude gothonɛ́n le Jeruzalɛ́mɛn khúbhɛ́nɛ́n ɔ́nmɔn ebhá mɛ́n yé, wo élu wo ne ápasá hɛ́nmɛn, ló Jan ehá wo nduhɛ́n Judɛn ndubhɛ hromɛn.
6Jan sɔ ntráliɛ́ obho frímú khókho-ngbɔwo yɔnmrɛ than, ló ńmɔn ńnánhrɔ́ kpakpa thé. Ántha ńgɔgɔmán, ló anní ábithe hoyá nɔ́n. 7Ánkranmán ápasá khúnbrɛn gbée salé: – Lephan khɛ́n abha mɛn mánji ebhá, ńpɛ sɛ́npɛ́ brɛn mɛn, mɛn nɛn ni lephan apriman khɛ́n ágɛ súlé hrwɛn mɛ́n ngbawa bhɛ́ nwɛ́ lɔ. 8Mɛn ɔn, ńdu nɔn mɛn mo mɛn há hɔ́n hɛ́n, khɛ́n mɛ́n-ɛ, Nánnánmi Créncré nɔn ánman mó há hɔ́n hɛ́n.
Wo ha Jezwi nduhɛ́n, wo sui wu
(Ɔ́n wú Mat 3.13—4.11; Ɔ́n wú Lwik 3.21-22; 4.1-13)
9Lóka hromɛn nɔn Jezwi chan Nazarɛ́thi khúbhɛ́ abha Galile gotho bha, ló Jan hɛ nduhɛ́n, Judɛn ndubhɛ hromɛn. 10Lóka Jezwi chan ńdu hrómɛn ethándi, ńwu átho éphwan, ló Nánnánmi Créncré chantho ebhá mɛ́n tho sa bhwebhwe a. 11Ńye átɔ́ bɛn chantho dɛn ebhá, ló étɔ sa:
– Hɛ nɔn ɛli mɛn Mi khɛ́n mɛn pɔ, ló hɛ tho nɔn mɛn mo mɛn phɔhá khúnbrɛn tre.
12Lóyámɛ́n, Nánnánmi Créncré chɛ nkɛ lo ánánkhuthé. 13Ńtɛ ńcíbhí grebhɛ ánánkhuthé, lóne nɔn Abhɔsɛ́mɔ́n sui wu. Ńma ábithe nbranmán thethé, ló Yankan-mranchɛ́mán ékhwɛn nkɛ hɛ́nmɛn nɛn.
Jezwi che dukúmán bhwelí
(Ɔ́n wú Mat 4.12-22; Ɔ́n wú Lwik 4.14-15; 5.1-11)
14Wo ka Jan khúthé, lómánji Jezwi lo Galile gotho étɔ Ábhwe Bhwábhwá achan Yankan yé.
15– Ló ántɔlé, ácí wo ha tre ɔn, ási, ló Yankan Bhringbi khúbhɛ́ lɔ gbali phɔ. Ɔ́n jrɛn hɔ́n yítɛ́, ló ɔ́n mú Ábhwe Bhwábhwá mímí!
16Lóka Jezwi khɔ Galile duphé jɛ́ njɛ nɛ́nsi élo, lótɛ ńwu dukúmán mɔn, Simɔn le mɛ́n hɔnsɛ́n Andre, ekú sawá duphé hrómɛn. 17Ló Jezwi kranman nkɔn sa:
– Ɔ́n ma gɛ mɛn thá, ló mɛn chɛ́ hɔ́n kú néphan du.
18Lóyámɛ́n, wo yɔ wo sawá khwa, ló wo gɛ nkɛ ɔ́nmɔn lo.
19Jezwi lo hɛ́nmɛn, ló ńwu Zebede miɔn, Jakhi le mɛ́n hɔnsɛ́n Jan. Wo bha hran mɛn wo égrɛ wo sawá. 20Lóyámɛ́n, Jezwi che wo, wo yɔ wo the Zebede le júmánmán ɔ́nmɔn khwa hran mɛn, ló wo gɛ nkɛ thá.
Lephan khɛ́n nánnánmi phromɛn bha phɔ
(Ɔ́n wú Lwik 4.31-37)
21Jezwi le mɛ́n yíchwɛmán ɔ́nmɔn lo Kapɛnaúmɛn khúbhɛ́. Saba cí, ńno hɛ́nbhúrɛ si ánnie yí. 22Mɛ́n yí ánnie lóbhwe etán néphan hɛ́nmɛn kábrɛ. Ánnie yí mɛ́n sɛ́npɛ́ ńgɛ mɛn, ló ále khɔ́ bidíyɛ́nmán ékɛ yábhɛ si akhɔ élie.
23Lóka yábhɛ nɔn sɛ bɛn ka hɛ́nbhúrɛ si. Sɛ lókɔn nánnánmi phromɛn bha mɛ́n phɔ, ló ńnukhwɛ́ sa:
24– Jezwi Nazarɛ́thi sɛ, ébí bhwe bha lo le hɛ ɔ́nmɔn thethé ɛ? Wú bhá ɛbha ɛchɛ́ lo liá? Mɛn yɛn hɛ lephan yábhɛ ɛli. Hɛ, ɛli Créncré Yankan chɛ bha!
25Jezwi khan nkɛ lé, ló ńtɔ sa:
– Tɛmɛ ɛtémélé, ló ɛchán lephan lókɔn phɔ thándi!
26Nánnánmi phromɛn hɔn lephan lókɔn jika kranmɛn, ńnukhwɛ́, ló ńchan nkɛ phɔ thandi. 27Lóbhwe etán néphan khúnbrɛn hɛ́nmɛn kpɛ́ɛ́n, áchɛ́se wo ya wo hromɛn wo ébhi wo bɛn nbrɛn sa:
– Ébí li lókɔn? Ébí pɔ́pɔ́ li lókɔn wo élie sɛ́npɛ́ mɛn yábhɛ nɛn ɛ? Lephan lókɔn tɔ bhwe sɛ́npɛ́ mɛn sé nánnánmi phromɛn phromɛnhɔn, ló wo lɔ wo jí nkɛ!
28Áchɛ́se Jezwi lehɛ́n wáwa pi Galile gotho khúnbrɛn.
Jezwi tɛ lɔ́phɔmán búdúbúdú phɔ jan
(Ɔ́n wú Mat 8.14-17; Ɔ́n wú Lwik 4.38-41)
29Lómánji wo chan hɛ́nbhúrɛ si thandi, ló wo le Jakhi le Jan ɔ́nmɔn wo yalisi lo Simɔn le Andre ɔ́nmɔn hwan. 30Ágbalɔ́ hɛn Simɔn ngrobhie phɔ, ló ńnalé. Lóka Jezwi di lóne, lópán wo tɔ lóbhwe se. 31Ńtigbali nkɛ, ńhɔn nkɛ mɔ́n, ló ńti nkɛ chanfe, lótɛ ágbalɔ́ chan mɛ́n phɔ féne, ló ánkhwɛn nkɔn hɛ́nmɛn nɛn.
32Ácí ka égu, khɛ́n ácɛ́nmɛ esɔ́ha, lótɛ néphan khwɛn lɔ́phɔmán khúnbrɛn, le wo khɛ́n nánnánmi phromɛn phromɛn bha wo phɔ bha Jezwi yé. 33Ákhúbhɛ́nɛ́n khúnbrɛn gba bhurɛhɛ́n khúmɛ́n. 34Néphan tɛɛ álɔ́ yábhɛ yábhɛ ehɔ́n, Jezwi tɛ wo khúnbrɛn phɔ jan, ló ńtránman nánnánmi phromɛn phromɛn búdúbúdú lɔ, khɛ́n ńnɛn se brɛ mɔ́nsi otɔ bhwe, lósi akhɔ tɛ ɔn, wo yɛn mɛ́n lephan yábhɛ ńni hɛ́nthé.
Jezwi éjekhali Galile gotho
(Ɔ́n wú Lwik 4.42-44)
35Ácí ka aci, ńjuju fítaan, lóka áyé ka lɛ mwámwá, Jezwi chan bháthó thándi lo ásibɛn ajanbu ká njɛ éla Yankan. 36Simɔn le mɛ́n jɔn ɔ́nmɔn lo énɛn nkɛ: 37wo gɛ nkɛ, ló wo kranman nkɛ sa:
– Néphan khúnbrɛn énɛn hɛ.
38Khɛ́n Jezwi kranman nkɔn sa:
– Oló si nankhɛ, ákhúbhɛ́hɔn agbali lo jɛ́ njɛ hrómɛn, ló mɛn tɔ Yankan bhwe lóne lɔ. Átɛsalé lóhɛ́nthé nɔn mɛn ma.
39Ló ńno Galile gotho si khúnbrɛn. Ńtɔ Yankan bhwe hɛ́nbhúrɛ si abha lóne gotho, ló ńtránman nánnánmi phromɛn phromɛnhɔn.
Jezwi tɛ khokhóbhé-phɔ́wo bɛn phɔ jan
(Ɔ́n wú Mat 8.1-4; Ɔ́n wú Lwik 5.12-16)
40Khokhóbhé-phɔ́wo bɛn bha Jezwi yé, ńmɔ ntráhɛ́nlé nkɛ hɛ́nmɛn ánna nkɛ sa nkɛ dɔnmɛn mɔ́n, ló ántɔ sa:
– Kasé ɛpɔ, ɛgɛ tɛ́ mɛn phɔ chán.
41Mɛ́n bhwe ka Jezwi phɔ kpɛ́ɛ́n, Jezwi tia mɔ́n, ńpa nkɛ pɛ, ló ńkránman nkɛ sa:
– Mɛn pɔ, tɛmɛ hɛ phɔ ochán!
42Lóyámɛ́n, khokhóbhé ya mɛ́n phɔ lia, ló mɛ́n phɔ chan. 43Lóka Jezwi ha nkɛ mɛ́n khrákhrá mɛn phu, lótɛ ńthu nkɛ hɛ́n ka.
44– Khɛ́n Jezwi kranman nkɛ sa: Ɛyé, ɛlé tɔ lóbhwe sé lephan brɛ oyé bhrɔ́ɔ́, khɛ́n tɛmɛ ɛhɔ́n hɛ nbrɛn lo lie nphaháwo owú hɛ phɔ si akhɔ chan. Lómánji, ɛha ńpha khɛ́n Moyízi tɔ lóbhwe, ochɛ́sé néphan khúnbrɛn oyɛ́n salé hɛ phɔ jan.
45Khɛ́n lephan lókɔn lo, ló áyí atɛ, ńtɔ lóphɔ bhwe pi si khúnbrɛn. Lóhɛ́nthé Jezwi le wúsi khɔ́ bhó mɛ́n phɔ thándi ákhúbhɛ́ brɛ hromɛn npɔhɔ́n, anmá ási ajanbu ká njɛ, lótɛ khɛ́n néphan chán si nankhɛ jɛ́ njɛ khúnbrɛn bha gɛ.
Markert nå:
MÁKHI 1: ENT96
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ebrié New Testament © Bible Society of Côte D'Ivoire, 1996.
