Maariko 14

Ësëëmyö iya ukwita Yëësu

(Mataayo 26:1-5; Ruuka 22:1-2; Yohana 11:45-53)

1Mbe, waanyöörrë sitighaayë sinsikö ibhërë igho, ebhe inyangi iya Epasaka#14:1 Inyangi iya Epasaka. Yaarenga inyangi eno Abhayahudi bhaahiitanga bhono Waryobha yaatöörya abhakörö abhaabho ukurwa mo-bhoghorwa ku-kyaro ikya Miisiri. Amangʼana ghayö ghaabhaayë ko-nkaagha iya Mosa. Maaha mo-faharaasa engʼana, Epasaka. bheena inyangi iya okorya emekaate gheno ghetatöörrwë-mo ehamiira. Abhanene abha abhasëngëri abha Waryobha na abhëëghya abha amaraghërryö agha Mosa, bhaatunanga enshera iya okoghoota Yëësu bhughunyi igho, abhantö bhatamanyirë, okore bhamobhotorre ikiina, bhamwite. 2Kasi, bhakatëëbhania igha, “Tutighe tangata inyangi ehete, ho tomanye okomoghoota, okore abhantö bhatakaasha okokora riihë.”

Omokari ono yaahakirë Yëësu amaghuta

(Mataayo 26:6-13; Yohana 12:1-8)

3Enkaagha eno Yëësu yaarë mu-kishishi ikya Bhetania, ararya ibhyakorya ka wa Simööni ono yaahwënëri obhoghenge, akaasha-ho omokari aana inshubha iya ebheghera ibhya arabhaasita eena amaghuta agha ikirumba ikiiya ikya enarido. Öbhöghöri ubhwa amaghuta agha enarido, m-bonene bhwaarë. Omokari uyö akaatya umunywa ughwa inshubha, akahomerra Yëësu ko-motwe. 4Mbe, abhantö nyabhorebhe bhano bhaarë mu-nyumba muyö, bhakarerra. Bhakasimya okoghamba abheene ko abheene igha, “N-kwakë akosarya amaghuta amaiya kya ghayö? 5Amaghuta ghano, ngakaaghöriibhwi seehera seno sekorengʼaana na ehoorohooro iya ömöntö, ko-mooka umughima,#14:5 Seehera seno sekorengʼaana na ehoorohooro iya ömöntö, ko-mooka umughima. Mu-Kiyunaani ni-igha, sidinaari maghana atatö. na seehera siyö bhahaane abhatöbhu.” Bhakahamera bhököngʼu omokari uyö.

6Kasi Yëësu akabhatëëbhya igha, “Mumutighe. N-kwakë mukumunyankya? Engʼana eno omokari ono ankörëëyë, ni-nshiiya bhököngʼu. 7Abhatöbhu, mmoonabho sinsikö syonswe igho. Moratora okobhakorra bhuuya, enkaagha yoyonswe igho eno mukutuna. Kasi temoobhe hamwë na öni, sinsikö syonswe igho hë. 8Omokari ono, nakörrë keno akotora. Amaghuta ghayö anhakirë,#14:8 Okohaka amaghuta. Iyö ne-teemo iya Abhayahudi yaarë iya okohaka abhaku amaghuta agha ikirumba ikiiya. Maaha mo-ketabho ikya Maariko 16:1. nasëëmëri okobheekwa ukwane. 9No-bhoheene nkobhatëëbhya igha, ahasë honswe igho, hano Amangʼana Amaiya ghararaarekwenga ko-kebhara kono, engʼana eno omokari ono ankörëëyë, yonswe neraghambwenga, ko okomoheetoka.”

Yuuda Isikariyote araikërrya ukunyeera Yëësu inikö

(Mataayo 26:14-16; Ruuka 22:3-6)

10Mbe, Yuuda Isikariyote, ömwë mo-bheegha ikömi na bhabhërë abha Yëësu, akaghya ko-bhanene abha abhasëngëri, ukunyeera Yëësu inikö, okore abhööröki enshera iya okomoghoota. 11Hano abhanene abha abhasëngëri bhaaighuurë amangʼana ghayö, bhakashomerwa bhököngʼu. Bhakaikererrania na Yuuda igha bhamohaane seehera. Mbe, Yuuda akasimya ukutuna umweya umuuya ughwa okobhaghöötya Yëësu.

Yëësu ararya ibhyakorya ibhya Epasakahamwë na abheegha abhaaye

(Mataayo 26:17-25; Ruuka 22:7-14, 22:21-23; Yohana 13:21-30)

12Urusikö urwa okotanga inyangi iya okorya emekaate gheno ghetatöörrwë-mo ehamiira, ruyö ndwo rwaarë urusikö urwa ukumwensa ikighuruki ikya ringʼöndi irya Epasaka. Mbe, hano urusikö ruyö rwaahikirë, abheegha abha Yëësu bhakamöbhöörya igha, “Bhoono, hai ukutuna igha toghende tökösëëmëri-ho, ahasë aha ukunyeera-ho ibhyakorya ibhya Epasaka?”

13Mbe, Yëësu akatoma abheegha bhabhërë, akabhatëëbhya igha, “Moghende mu-mughi ghuyö, musikana-mo na umushaasha aitëëkirë ensengo, muhinane nawe hano akughya. 14Mu-nyumba eno araasohe-mo, na bhëënyu mosohe-mo, mötëëbhi mwene nyumba iyö igha, ‘Umwëghya arabhöörya igha, “Ikinyumba ikyane keno ndaanyeere-mo ibhyakorya ibhya Epasaka hamwë na abheegha abhaane hëkërëngë?”’ 15Ho mwene nyumba, araabhööröki ikinyumba ëkëgharë keno kësëëmiibhwi ko-ghorofa. Muyö mo moraaghi, mötösëëmëri-mo Epasaka.” 16Abheegha bhayö bhakatanora, bhakaghya mu-mughi ghuyö. Amangʼana ghonswe igho, ngaabhaayë kya bhono Yëësu yaabhatëëbhëri, bhakasëëmya ibhyakorya ibhya Epasaka.#14:16 Maaha mo-ketabho ikya Ukurishoka 12:3-11.

17Hano omoghoroobha ghwaahikirë, Yëësu akaghya mu-nyumba iyö hamwë na abheegha abhaaye ikömi na bhabhërë. 18Hano bhaaryanga, Yëësu akabhatëëbhya igha, “No-bhoheene nkobhatëëbhya igha, ömwë uwëënyu ono akorya hamwë na öni hano, naraannyeere inikö.”

19Abheegha abhaaye bhakasimya okobhaabhayera. Bhakamöbhöörya kyömwë ömwë igha, “M-maheene Raabhi igha nö-öni?”

20Yëësu akabhahonshora igha, “Ono araanyeere inikö, nö-ömwë mö-bhëënyu ikömi na bhabhërë ono akötöngërya hamwë na öni mo-kebhaköri mono. 21Öni Omoona uwa Ömöntö nendaaitwe kya igho yandëkirwë mo-Maandeko Amahörëëru. Kasi haahö, ömöntö ono araannyeere inikö. Nyakara hano ömöntö uyö atakaaibhööywë.”

Ibhyakorya ibhya Omonene

(Mataayo 26:26-30; Ruuka 22:14-23; 1 Abhakörintö 11:23-25)

22Mbe, enkaagha eno bhaaryanga, Yëësu akaghegha omokaate, akakumya Waryobha, akaghobhotora, akahaana abheegha abhaaye, na eno akabhatëëbhya igha, “Mogheghe, moraaghere, ghono ngo ömöbhërë ughwane.” 23Ghwiki, akaghegha ekekombe ikya idivai, akakumya Waryobha, akahaana abheegha abhaaye, bhonswe igho bhakanywera ekekombe kiyö. 24Akabhatëëbhya igha, “Ghano ngo amaanyinga aghaane agha Imuuma#14:24 Imuuma. Maaha mo-faharaasa. ghano ghareeteke ko okoghera iya abhantö abhaaru. 25No-bhoheene nkobhatëëbhya igha, ukurwa reero, tindinywa ghwiki idivai okohekera urusikö rono ndinywa idivai eehya ko-Bhokama ubhwa Waryobha.”

26Ho bhaamarrë, bhakarëëtya rirëëtyö irya ukukumya Waryobha. Bhakeemoka ukurwa hayö, bhakaghya mu-nguku iya Ëmëzëituuni.

Yëësu ararootera Peetero igha naraamwikaane

(Mataayo 26:31-35; Ruuka 22:31-34; Yohana 13:36-38)

27Hano bhaarenga ko-nshera, Yëësu akatëëbhya abheegha abhaaye igha, “Bhëënyu bhonswe igho moraashe mongʼose ko bhoora yandëkirwë mo-Maandeko Amahörëëru igha,

‘Nendaateme omonaghya,

amangʼöndi ghanyaraghane.’#14:27 Maaha mo-ketabho ikya Zakaria 13:7.”

28Yëësu akaghëndërrya okobhatëëbhya igha, “Kasi hano ndiryoka, nendebhatangatera ukughya mo-mokowa ughwa Ghariraaya.”

29Kasi Peetero akamötëëbhya igha, “Bharikyane bhonswe igho mbakakongʼosa, kasi öni tengʼose nkutighe hë.”

30Yëësu akamötëëbhya igha, “No-bhoheene nkökötëëbhya igha, noraashe unyikaane katatö, setaraaraghora urwa kabhërë ubhutikö ubhwa reero.”

31Kasi Peetero akakangʼasërrya igha, “Nyoore nkukwa, tigha nkwe hamwë na uwe, kasi tinkwikaane hë.” Kora abheegha bharikyaye bhonswe igho, bhakaghamba bhuyöbhuyö.

Yëësu arasaasaama ku-nguku iya Ghetisemane

(Mataayo 26:36-46; Ruuka 22:39-46)

32Hano bhaahikirë Ghetisemane, Yëësu akatëëbhya abheegha abhaaye igha, “Bhëënyu mwikare hano, öni ngi okosaasaama haara.” 33Akaghegha Peetero, Yaakobho na Yohana, akaghya nabho mbere hake igho, akasimya okobhaabhayera bhököngʼu na ukunyanka mo-nkoro iyaaye. 34Mbe, akabhatëëbhya igha, “Enkoro iyaane ebhaabhayëëyë bhököngʼu, kya hano nkaakwa. Mwikare hano, mwiraarerre hamwë na öni.”

35Yëësu akaghya mbere hake igho, akairekera hansë bhubhuumaayë. Akasaasaama igha, “Nyoore nkebha, ntakahetera inyaanyi eno. 36Taata, ku-uwe ghonswe igho nkobha gharë. Ku bhuyö ndakosabha unduusiri-ho ekekombe ikya inyaanyi eno. Kasi, otakaakora bhono öni nkutuna, kora bhono uwe ukutuna.”

37Mbe, hano Yëësu yaakyörrë ko-bheegha abhaaye abhatatö bhayö, akanyoora abheegha abhaaye bharaayë. Akabhöörya Peetero igha, “Simööni, ökërrwë ukwiraarerra kora esa ëmwë iyeene igho? 38Mwiyangarre, na mosaasaame Waryobha, okore motakaashe mushaashwe. Enkoro eratora ököghömërrya ukushaashwa, kasi inyanko, nö-möbhërë.”

39Yëësu akaghya-yo ghwiki okosaasaama, akakyorra okoghamba amangʼana ghaaraghaara. 40Hano yaakyörrë ko-bheegha abhaaye bhayö, akanyoora ghwiki bharaayë, ko bhoora bhaaritöhëëywë bhököngʼu na seetero. Hano yaabhaturrë, tebhaarë na engʼana iya okoghamba hë.

41Hano yaakyörrë urwa katatö, akabhatëëbhya igha, “Nanyabhoono mokeraayë moramuunya? Bhoono haisirë. Enkaagha iya inyaanyi iyaane ihikirë. Bhoono mwitegherre mbatëëbhi, öni Omoona uwa Ömöntö nendaaghootwe ntoorwe mu-bhitaano ibhya abha ëbhëbhë. 42Mbe, bhoono mobhooke toghende. Tamaaha, ömöntö ono anyërëëyë inikö haangʼë arë.”

Yëësu araghootwa

(Mataayo 26:47-56; Ruuka 22:47-53; Yohana 18:3-12)

43Enkaagha eno waanyöörrë Yëësu akishumaasha, Yuuda ömwë uwa bheegha abhaaye ikömi na bhabhërë bhaara, akahika aana rikomo irya abhantö. Rikomo riyö ryaarenga remanööyë imishonge na sirungu. Ryaaruurë ko-bhanene abha abhasëngëri abha Waryobha, abhëëghya abha amaraghërryö agha Mosa na ko-bhaghaaka abha Ikiyahudi.#14:43 Abhanene abha abhasëngëri abha Waryobha, abhëëghya abha amaraghërryö agha Mosa na ko-bhaghaaka abha Ikiyahudi. Bhayö mbo bhaarë abha ebharasa enene iya Abhayahudi. 44Yuuda ono yaanyëërëëyë Yëësu inikö, yöörökëri abhantö abha rikomo riyö ekemanyërryö igha, “Ömöntö ono ndaakëëri ku ukumwibhaara, momanye igha we. Muushe momoghoote, motanore nawe, momonaghi.”

45Mbe, Yuuda akaghya ku-Yëësu, akamobherekera igha, “Raabhi!” Akamwibhaara. 46Mbe, abhantö bhayö bhakaghoota Yëësu. 47Kasi, ömöntö ömwë mo-bhano bhaimërëëyë haangʼë na Yëësu, akasomora umushonge ughwaye, akagheesha omoghorwa uwa omonene uwa abhasëngëri, akamobhotora ökötwë ukwa bhoryo.

48Yëësu akatëëbhya abhantö bhayö igha, “Ndarra mwishirë kongoota moona imishonge na sirungu, okanya igha m-mogharanshöri uwa eserekaare ndë? 49Ndarra sinsikö syonswe igho naaikaranga hamwë na bhëënyu, ndëëghya mo-bhogho ubhwa risengerro irya Waryobha, temwakaangöötirë hë? Kasi bhoono ni-igha Amaandeko Amahörëëru ghahekerane.”

50Mbe, abheegha abhaaye bhonswe igho bhakangʼosa.#14:49-50 Maaha mo-ketabho ikya Maariko 14:27; Zakaria 13:7. 51Yaare-ho umumura uwöndë ono yaasoorananga Yëësu, eno ambaayë ishuuka iya eketani#14:51 Eketani kyaakorwanga singibho kya hano amabhuri agha amangʼöndi ghaakorwanga singibho. iyeene igho, uyö wonswe bhaatunanga igha bhamoghoote, 52kasi we akabhaterroka, akabhateghera ishuuka iyaaye, akakenya kengʼaabhi.

Yëësu araimërribhwa mo-bharasa

(Mataayo 26:57-68; Ruuka 22:54-55, 22:63-71; Yohana 18:13-14, 18:19-24)

53Mbe, abhantö bhayö bhakahira Yëësu ko-monene uwa abhasëngëri#14:53 Abhasëngëri. Maaha mo-faharaasa. abha Waryobha. Abhasëngëri abhanene bhonswe igho abha Waryobha, abhaghaaka abha Ikiyahudi na abhëëghya abha amaraghërryö agha Mosa, bhakaikomania. 54Peetero yaarwanga nyuma Yëësu kwa hare. Akaghya igho akasoha mu-righari irya omonene uwa abhasëngëri. Akaikara kö-bhööri hamwë na abharëndi abha omonene uwa abhasëngëri, akabha aroota omorro.

55Abhanene abha abhasëngëri abha Waryobha na ribharasa#14:55 Ribharasa. Maaha mo-faharaasa. ryonswe igho, bhakasimya ukutuna ubhwimërërri ubhwa ukushongera Yëësu, okore bhanyoore enshera iya okomobhotorra ikiina ikya ukumwita. Kasi, kekahana. 56Obhoheene abhantö abhaaru, mbaaruusiri ubhwimërërri ubhwa obhorongo, kasi ubhwimërërri ubhwabho bhuyö, tebhwarengerranianga hë. 57Mbe, abhandë bhakaruusya ubhwimërërri ubhwa obhorongo igha, 58“Twaaighuurë ömöntö ono araghamba igha, ‘Ndatora okotemora inyumba iya Waryobha eno yaahaghaashwa na abhantö, mmare nhaghaashe iyëndë ku-sinsikö isatö igho, eno etakohaghaashwa na abhantö.’ ” 59Kasi, kora ko engʼana iyö, ubhwimërërri ubhwabho tebhwarengerranianga hë.

60Mbe, omonene uwa abhasëngëri akemerra mo-bharasa muyö, akabhöörya Yëësu igha, “Kana tokohonshora engʼana yoyonswe eera, ko ghano bhano bhakukushongera?” 61Kasi, Yëësu tiyaamumurri hë. Omonene uwa abhasëngëri akaghëndërrya ökömöbhöörya igha, “Kasi, nu-uwe Kiristo, Omoona uwa Waryobha Ömötöönibhwa?”

62Yëësu akamohonshora igha, “Nö-öni. Moreemmaaha öni Omoona uwa Ömöntö nikaayë bhoryo ubhwa Waryobha uwa obhotoro,#14:62a Maaha mo-ketabho ikya Zabhuri 110:1; Okohonyora 1:7. ndaasha ndëngë ko-masaarö.”#14:62b Maaha mo-ketabho ikya Daniëri 7:13.

63Mbe, omonene uwa abhasëngëri akatandora singibho isyaye, akaghamba igha, “M-bwimërërri öbhöndë kë ghwiki tukutuna? 64Mwighuurë bhëënyu abheene kya bhono atökirë Waryobha, bhoono bhëënyu bho iyakë mokoghamba?” Bhonswe igho bhakahonshora igha, ni-igha aitwe.

65Mbe, abhandë bhakasimya ukumutwera amate, bhakamobhoha na eketambaara ko-maiso, bhakamotema sinkundi eno bharamöbhöörya igha, “Uwe Kiristo, rëngërrya, nawë akötëmirë?” Abharëndi bhano bhaarë hayö, bhonswe bhakamotema.

Peetero araikaana Yëësu

(Mataayo 26:69-75; Ruuka 22:56-62; Yohana 18:15-18, 18:25-27)

66Enkaagha iyö yonswe igho, Peetero n-hansë kö-bhööri yaarë. Akaasha-ho omokari uwöndë, ukurwa mo-bhaköri abha emeremo abha omonene uwa abhasëngëri. 67Hano yaarööshë Peetero aroota omorro, akamomaaherra, akamara akamötëëbhya igha, “Uwe wonswe hamwë waarë kobhanga na Yëësu uwa Nazarëëti oora.”

68Kasi Peetero akaanga igha, “Ghayö okoghamba, öni tengamanyirë kora hake hë!” Akaghya mu-kihiita ikya righari. Enkaagha iyöiyö, sekaraghora.

69Omokari ömököri uwa emeremo uyö, akamaaha Peetero aimërëëyë, akaghamba ghaaraghaara ko-bhantö bhano bhaaimërëëyë hayö igha, “Ömöntö ono murikyabho.” 70Kasi Peetero ghwiki akaanga.

Hake igho, abhantö bhano bhaaimërëëyë hayö, bhonswe bhakatëëbhya Peetero igha, “M-maheene igha murikyabho örë, ko bhoora, uwe wonswe m-Moghariraaya örë.”

71Kasi, Peetero akaihiimirrya na ukutyana igha, “M-maheene ömöntö uyö temomanyirë hë!” 72Këmwë sekaraghora urwa kabhërë. Peetero akahiita engʼana eera Yëësu yaamötëëbhëri igha, “Noraashe unyikaane katatö setaraaraghora kabhërë.” Hano Peetero yaahiitirë engʼana iyö, akakuura bhököngʼu, amaisöri ghakarwa.

Markert nå:

Maariko 14: ssc

Marker

Del

Kopier