Mataayo 21
21
Yëësu araturungʼanwa Yërusarëëmu kya omokama
(Maariko 11:1-11; Ruuka 19:28-40; Yohana 12:12-19)
1Mbe, Yëësu yaaghëëyë na abheegha abhaaye akahika haangʼë na Yërusarëëmu. Hano yaahikirë ku-nguku iya Ëmëzëituuni iya mu-mughi ughwa Bhetifaghe, akatoma abheegha abhaaye bhabhërë. Akabhatëëbhya igha, 2“Moghende mu-kishishi kiyö kërëngë mbere hayö. Hano moraasohe-mo, moraamaahe itikërë ëbhöhirwë hayö eena ëkëmööri. Moghetashore, mondeetere. 3Hano ömöntö wowonswe igho araabhabhööri igha, ‘Hai mukuhira sitikërë siyö?’ Bhëënyu momohonshore igha, ‘Omonene we akusituna.’ Hano moraamohonshore igho, naraaikërri muushe nasyo.”
4Amangʼana ghayö ghaabhaayë igho, okore ghahekerane ghaara Waryobha yaaghambirë okohetera kö ömörööti uwaaye igha,
5“Tëëbhya abhantö bhano bhamënyirë Sayuuni hayö igha,
‘Tamaaha, omokama uwëënyu araasha, m-mohaabhu,
nkuusha arë arëngë ku-tikërë
na ëkëmööri ikyako.’”#21:5 Maaha mo-ketabho ikya Zakaria 9:9.
6Mbe, abheegha abhaaye bhakaghya bhakakora kya bhono yaabhatëëbhëri. 7Hano bhaarëëtëëyë Yëësu itikërë eera na ëkëmööri ikyako, bhakatandeka-ko singibho isyabho. Yëësu akariina, akaikarra singibho siyö. 8Rikomo rinene irya abhantö rekatandeka singibho isyabho ko-nshera, na abhantö abhandë bhakagheesha amasagharya agha ëmëtë, bharaghatoora ko-nshera ukwörökya igha, mbamösöökirë. 9Rikomo irya abhantö reno ryaarë mbere iya Yëësu, na reno ryaamurwanga nyuma, ghonswe igho ghakakonga bhököngʼu igha,
“Ukumibhwi, uwe umwebhorwa Daudi!
Waryobha akongʼoore ono ukuusha ko okohetera iriina irya Omonene Waryobha,#21:9 Maaha mo-ketabho ikya Zabhuri 118:25-26.
Waryobha ono arëngë ighörö iyö, akumibhwi.”
10Hano Yëësu yaasöhirë Yërusarëëmu, umughi ghwonswe igho ghokaroghoora. Abhantö bhakabhoorania igha, “Kana uyö nawë?”
11Rikomo reera rekabhahonshora igha, “Ono nö-mörööti Yëësu, uwa Nazarëëti iya mo-mokowa ughwa Ghariraaya.”
Yëësu ararughya abhaköri abha ibhyasharamo-bhogho ubhwa risengerro
(Maariko 11:15-19; Ruuka 19:45-48; Yohana 2:13-22)
12Mbe, Yëësu akasoha mo-bhogho ubhwa risengerro irya Waryobha. Hano yaasöhirë-mo, akasimya ökökënyia abhantö bhano bhaaghöryanga, na bhano bhaaghoranga muyö ëbhëntö. Akahenora semeeza isya bhano bhaaswënianga seehera. Akahenora na ibhitumbë ibhya bhano bhaaghöryanga ibhighuuti. 13Yëësu akabhatëëbhya igha, “Yandëkirwë mo-Maandeko Amahörëëru igha, ‘Risengerro iryane nderaabhe ahasë aha amasabhi.’#21:13a Maaha mo-ketabho ikya Isaaya 56:7. Kasi bhoono bhëënyu mörëkörrë kya ‘risana irya abhasaki!’#21:13b Maaha mo-ketabho ikya Yeremia 7:11.”
14Enkaagha eno waanyöörrë Yëësu akërëngë mu-risengerro irya Waryobha hayö, abhahukuru na amatengʼo, bhakaghya ku-Yëësu, akabhahwënia. 15Abhanene abha abhasëngëri, na abhëëghya abha amaraghërryö agha Mosa, mbaarööshë amakono ghano Yëësu yaakoranga. Kora bhakaighwa abhaana mo-bhogho ubhwa risengerro irya Waryobha hayö bharaghamba igha, “Akumibhwi umwebhorwa Daudi.” Ku bhuyö bhakarerra bhököngʼu. 16Bhakabhöörya Yëësu igha, “Oraighwa kiyö abhaana bhayö bhakoghamba?”
Yëësu akabhahonshora igha, “Nkwighwa ndë. Kanaa, temwakasömirë amangʼana ghano gharëngë mo-Maandeko Amahörëëru igha,
‘Wisëëmëëyi ukukumibhwa ukwaho
okohetera mu-minywa ighya abhaana abhake, na ebhengʼerre’#21:16 Maaha mo-ketabho ikya Zabhuri 8:2.?”
17Yëësu akabhatigha hayö, akarwa mu-mughi ughwa Yërusarëëmu, akaghya okoraara Bhetania.
Yëësu araihiima umutiini ghono ghotakwama
(Maariko 11:12-14, 11:20-24)
18Nyinkyo iyaako hano Yëësu yaakyoranga Yërusarëëmu, akaighwa asëngëëyë. 19Akamaaha ömötë ghono ghokobherekerwa igha umutiini, ghörëngë haangʼë na enshera. Akaghusuntarra, kasi ehagho tiyaare-ko hë, na-matö agheene igho yaarööshë-ko. Akaihiima ömötë ghuyö igha, “Turyama röndë sehagho hë.” Kamwë igho, ömötë ghuyö ghokooma.
20Hano abheegha abha Yëësu bhaarööshë ghayö, bhakaroghoora. Bhakabhöörya igha, “N-kwakë umutiini ghono ghwömirë kamwë igho?”
21Yëësu akabhahonshora igha, “No-bhoheene nkobhatëëbhya igha, hano moraabhe na umukumo ghono ghotaana entarëki, te-ghayö agheene igho moraakore hë. Kasi moratora ökötëëbhya inguku eno igha, ‘Iheka wirekere mu-nyansha,’ na ni-igho eraabhe. 22Hano moraabhe na umukumo, kyokyonswe keera moraasabhenga ku-Waryobha, moraanyoorenga.”
Yëësu arabhööribhwa hano yaaruusya ubhwera ubhwaye
(Maariko 11:27-33; Ruuka 20:1-8)
23Yëësu akasoha ghwiki mo-bhogho ubhwa risengerro irya Waryobha. Hano yëëghyanga-mo, abhanene abha abhasëngëri na abhaghaaka abha Ikiyahudi bhakaghya ku-Yëësu, bhakamöbhöörya igha, “M-bwera kë bhokoghera orakora amangʼana ghayö? N-nawë yaakohaana ubhwera bhuyö?”
24Yëësu akabhahonshora igha, “Tigha öni wonswe mbabhööri-ko engʼana. Hano moraahonshore engʼana iyö, öni wonswe nendaabhatëëbhi hano naaruusya ubhwera bhono. 25Ubhwera ubhwa Yohana ubhwa okobhatiisya abhantö, hai yaabhuruusiri? Nku-Waryobha, kasi nko-bhantö?”
Mbe, bhakashamerrana igha, “Hano toraaghambe igha nku-Waryobha bhwaaruurë, naraatöbhööri igha, ‘Ndarra mbe temwamukumiri hë?’ 26Na hano toraaghambe igha nko-bhantö bhwaaruurë, toroobhoha abhantö, ko bhoora mbaana obhoheene igha, Yohana Omobhatiisya m-mörööti yaarë.” 27Mbe, bhakamohonshora igha, “Tetomanyirë hano bhwaarwërëëyë hë.”
Yëësu wonswe akabhatëëbhya igha, “Kora öni wonswe tembatëëbhi hano naaruusya ubhwera ubhwa okokora amangʼana ghano.”
Ëkërëngyö ikya omoona umwighwa na omoona omomangarru
28Mbe, Yëësu ghwiki akabhatëëbhya igha, “Bhoono bhëënyu iyakë mukwitegherra ëkërëngyö keno igha, yaare-ho ömöntö uwöndë ono yaarë na abhamura bhabhërë. Akaghya ku-mumura uwaaye uwa mbere, akamötëëbhya igha, ‘Moona uwaane, kaghi reero onkorre emeremo kö-möghöndö ughwane ughwa emezabhibhu.’
29“Mura uwaaye uyö akamohonshora igha, ‘Tinkughya iyö hë.’ Kasi hano yaaighambëëyë, akaghya okokora emeremo kö-möghöndö ughwa suwaabho.
30“Ho ömöntö uyö ghwiki yaaghëëyë ku-mumura uwaaye uwa kabhërë, akamötëëbhya kya bhono yaatëëbhëri uwa mbere oora. Mura uwaaye uyö akamohonshora igha, ‘Nendaaghi taata.’ Kasi tiyaghëëyë hë. 31Bhoono ko bhonswe igho bhabhërë bhayö, nawë yaakörrë bhono suwaabho yaatunanga?”
Bhakamohonshora igha, “Uwa mbere oora.”
Ho Yëësu yaamarrë akabhatëëbhya igha, “No-bhoheene nkobhatëëbhya igha, abhaghööti abha righööti na abhasooraare, nkobhatangatera bharë okosoha mo-Bhokama ubhwa Waryobha. 32Yohana yaaishirë kö-bhëënyu, okore abhöörökërri enshera iya heene, bhëënyu temwamukumiri hë. Kasi abhaghööti abha righööti, na abhasooraare, bho bhakamukumya. Nokaanyoora mwaarööshë ghonswe ghayö, kasi emetwe ighyënyu, teghyaisyörya, kora temwamukumiri hë.”
Abhatangati abha Ikiyahudi n-kya abharëmi abhaghogho
(Maariko 12:1-12; Ruuka 20:9-19)
33Mbe, Yëësu akaghëndërrya okobharëngërya ëkërëngyö ikyëndë, akabhatëëbhya igha, “Mwitegherre ëkërëngyö ikyëndë keno. Yaare-ho ömöntö uwöndë, ono yaarë na ömöghöndö ughwaye ghono yëëmëri-mo emezabhibhu. Akaghoghetera righöri, akatuka-mo ubhwina ubhwa okometera-mo sezabhibhu. Akahaghaasha-mo obhotaro ubhwa abharëndi. Hano yaamarrë akakodishirya abhantö, umwene akeemoka, akaghya ikyaro ikyëndë ikya hare.
34“Hano enkaagha iya okoghesa yaahikirë, akatoma abhaghorwa abhaaye bhaghende ko-bhantö bhaara, okore abhantö bhayö, bhabhahaane keno bhaarenga bhaikererraini na mwene möghöndö uyö. 35Kasi abhantö bhayö bhaakodishiribhwa ömöghöndö, bhakaghoota abhaghorwa bhaara bhaatömirwë, ömwë bhakamotema, uwöndë bhakaita, na uwöndë bhakamotema na amaghena. 36Mwene möghöndö oora, akatoma abhaghorwa abhandë abhaaru, okokera abha mbere bhaara. Abhantö bhayö, bhakabhakorra bhoghogho kya bhono bhaakörëëyë abha mbere bhaara. 37Mbe, akamaaha igha, tigha atome omoona uwaaye. Akaighambera mo-motwe ughwaye igha, ‘Ono no-moona uwaane, ku bhuyö mbaraamosooke.’ 38Kasi bhuyö bhaarööshë umumura uyö, bhakakora ikiina, bhakaghamba igha, ‘Ono we arerya umwandö ughwa suwaabho. Ku bhuyö ni-igha tumwite, umwandö ghobhe ughwëtö.’ 39Mbe, bhakamoghoota, bhakamuhira kebhara iya righöri irya ömöghöndö ghuyö, bhakamwita.”
40Mbe, Yëësu akabhabhöörya igha, “Bhoono hano mwene ömöghöndö ghoora araashe, iyakë araakore abhantö bhayö?”
41Bhakamohonshora igha, “Naraasiki abhantö abhaghogho bhayö, kora ömöghöndö, na-bhantö abhandë araakodishiri, okore bhamohaanenga keera bharaaighwerrane.”
42Ho Yëësu yaamarrë akabhatëëbhya igha, “Temwakasömirë kya bhono Amaandeko Amahörëëru ghandëkirwë hë? Ghandëkirwë igha,
‘Reghena reno abhahaghaashi bhaangirë,
ndyo rebhaayë reghena rinene irya ko-koona iya umusingi ughwa inyumba.
Omonene Waryobha we akörrë engʼana iyö,
engʼana iyö, nkötöröghöörya ërë.’#21:42 Maaha mo-ketabho ikya Zabhuri 118:22-23.”
43Yëësu akëngërya-ko igha, “Ku bhuyö ndabhatëëbhya igha, Waryobha naraabharuusi Obhokama ubhwaye, ahaane abhantö bhano bharaamwighwere. 44Mbe, ömöntö wowonswe ono araaghwere reghena riyö, uyö naraabhonekebhoneke. Na ömöntö ono reghena riyö reraaghwere, nderaamoghoshe anyike.”
45Hano Abhafarisaayo na abhanene abha abhasëngëri bhaaighuurë ëbhërëngyö ibhya Yëësu, bhakamanya bhuuya igha mbo akushumaashera. 46Ku bhuyö bhakatuna enshera iya okomoghoota, kasi bhakoobhoha rikomo irya abhantö, ko bhoora rikomo riyö ndyaamanyirë igha, Yëësu m-mörööti yaarë.
Markert nå:
Mataayo 21: ssc
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2021, Wycliffe Bible Translators, Inc. All rights reserved.
