ลูกา 23
23
อัห พอง เยซู ตัก ปีลาด
มัดทิว 27:1-2, 27:11-14, มาระโก 15:1-5, ยอน 18:28-38
1ทาเน อัห ก็ ร็อห เริล มด เป็น ปึง อัห รูบ ซับรวง เยซู เริล และ พูวา ปีลาด 2อัห ก็ พอง เยซู ตัก ปีลาด ฮุนเน “อิห เม็จ เอา เน ซุย พซาซน แอ ระ อัห แอง ไอ มี เลาะ ดาย เอา เน นำ มบราง อิห ต็อห พาซี อน ตัก พะเจายูฮัว ซีซา นำ ก็ เค็ย ออ เป็น เมซียา วัล” อัห อัง 3ปีลาด ก็ ซ็วน เยซู “มัห เป็น พะเจายูฮัว ครำ ยิว ซีเละ อัน” นำ อัง เยซู ก็ ซวัล นำ “แมน ฮุน มัห เค็ย นะ ดาย” นำ อัง
4ปีลาด ก็ ลด ไล ปึง มอ เอาซาง แกะ เคิบ ปึง พซาซน นัน นำ เค็ย ไอ มี เม็จ เยซู แอง พิด ซีวะ 5แต อัห ก็ เฮง ไล ปีลาด ติกๆ “เอา เน นำ ซุย พซาซน นำ แอง ระ พซาซน เลอะ ญุง จ็อง มด นำ กวา โละ ซุย พซาซน ทัว จังวัด ยูเดีย ทัว จังวัด กาลิลี จำปอ โตะ ตัก เมือง เยรูซาเล็ม เน วัล” อัห อัง 6ปีลาด เม็จ อัห จ็อก ฮุนนะ นำ ก็ ซ็วน อัห “เอา เน เป็น ครำ กาลิลี แมน อัน” นำ อัง “เออะ นำ เป็น ครำ กาลิลี” ปึง อาจาน อัง
ปีลาด ซับ เยซู ตัก พะเจายูฮัว เฮโรด
7ปีลาด เม็จจึด เค็ย เยซู เป็น ครำ จังวัด กาลิลี นำ ก็ ลด ไล อัห ซับ เยซู เริล และ พะเจายูฮัว เฮโรด ระ เฮโรด ตัดซิน นำ ฮัก เพาะวา พะเจายูฮัว เฮโรด ปกคอง อุ ตัก จังวัด กาลิลี นัน ญาม นัน พอดี เฮโรด โตะ พัก อุ ตัก เมือง เยรูซาเล็ม ปีลาด ก็ ไล อัห ซับ เยซู อน ตัก เฮโรด
8เฮโรด เม็จ อัห ซับ เยซู ตัก ออ นำ ก็ เลาะใจ ซีเละ เพาะวา นำ ซีรอก เม็จ มัด เยซู อิง แลว นำ เม็จ คาว เยซู อิง แลว นำ ก็ ซีรอก เม็จ เยซู แอง ซะ แปลก อน ออ ดอม แด 9นำ ซ็วน เยซู ดก มบลึ แต เยซู ไอ มี ซวัล นำ ซัก มี แญง
10ทาเน ปึง มอ เอาซาง แกะ เคิบ ปึง อาจาน ไล กด โมเซด ตัก ญ็อง เพา อุ นัน อัห ก็ เฮง พอง เยซู ติกๆ แร็ง ดุ อัห พอง นำ ซีเละ 11เฮโรด เคิบ ทฮาน คอง นำ อัห ก็ โป ดูทูก ดูแควน เยซู อัห ปิล มัด ปิล มุห เยซู ติกๆ อัห ก็ เอิด โกบ พะเจายูฮัว จึห อน ตัก เยซู อัห ก็ ลบ ซับ เยซู ตัก ปีลาด มี ลบ วัล 12งิ นัน เฮโรด เคิบ ปีลาด ก็ ลด เป็น เปือน นอย วาล นัน ปาม ไอ มี จับ อัง นอย เตาะ
ปีลาด ญอม อน เยซู ตัก อัห
มัดทิว 27:15-26, มาระโก 15:6-15, ยอน 18:39—19:16
13ทาเน ปีลาด ก็ ไล ปึง มอ เอาซาง แกะ เคิบ ปึง ฮัวนา ซะพา เคิบ ปึง พซาซน โตะ พซุม นอย มด 14ปีลาด ก็ ตัดซิน เค็ย เยซู ไอ มี ลุห นำ ก็ เค็ย “แป ซับ เอา เน อน ตัก เอิญ ตัดซิน แลว นอ แป เค็ย นำ ซุย พซาซน แอง ไอ มี เลาะ เลือง เน เอิญ ก็ ซ็วน นำ เคิบ มัด แป มด แลว เอิญ ก็ ไอ มี เม็จ นำ แอง พิด ซีวะ ซัก มี ยาง 15เอิญ ซับ นำ ตัก เฮโรด แลว เฮโรด ก็ ไอ มี เม็จ นำ แอง พิด ซีวะ เฮโรด ก็ ลบ วัล ซง นำ ตัก เอิญ เน วัล เยซู เน ไอ มี แอง พิด ซีวะ ตี ซมควน เปิล เอิญ ไอ งกิ ตัดซิน มเบิล นำ เตาะ 16เอิญ ไล อัห มบัด นำ พระ นำ เริล ก็ ปอ” ปีลาด อัง
17ทาเน จูวางๆ กัน เล็ห งิ เทซกาน ตี อัห ซะลอง เอาซาง เว็น เจิง อัห นัน ปีลาด ก็ พระ นักโทด มี ล็อง อน ตัก พซาซน 18ลบ เน ปีลาด ซีรอก พระ เยซู แต ปึง พซาซน เน อัห ไอ มี ซีรอก ระ ปีลาด พระ เยซู อัห ซีรอก ระ นำ พระ บาราบัด ฮัก อัห ก็ นซาก งกรอ เลิมๆ “มเบิล แอ็ม เยซู เน พระ อน บาราบัด ตัก อิห” อัห อัง 19บาราบัด เน เป็น ครำ ตี อัห เญ็บ เติล ลุก กำนา นำ เกย มเบิล ครำ นำ เกย ซับรวง พซาซน ตอ ซู เคิบ รัดทะบาน โรม ตัก เมือง เยรูซาเล็ม นัน
20ทาเน ปีลาด ซีรอก พระ แอ็ม เยซู ซีเละ นำ ก็ จ็อก เคิบ พซาซน มี ลบ วัล 21แต อัห ไอ มี ปัง นำ เตาะ อัห นซาก ไล นำ มพำ เยซู ตัก งกรัง ซีโรด ติก 22ปีลาด ไล อัห แพะ ลบ ตึง เน แลว ปีลาด เค็ย “มเบิล นำ อังวะ นำ แอง ลุห ซีวะ บ็อห เอิญ ไอ มี เม็จ นำ แอง ลุห ซีวะ ตี ซมควน เปิล ดาย กัน จังนะ เอิญ ระ อัห มบัด นำ ก็ ปอ นอ แลว ก็ พระ นำ เริล” นำ อัง
23แต อัห ก็ เฮง นซาก ไล ปีลาด ติกๆ อัห ไล นำ มพำ แอ็ม เยซู ตัก งกรัง ซีโรด แร็ง ดก ครำ นซาก นำ ก็ กาน อัง แญง อัห 24ปีลาด ก็ ลด ตัดซิน ลงโทด เยซู ฮุน อัห ไล นัน 25บาราบัด ตี เกย ซับรวง พซาซน ตอ ซู เคิบ รัดทะบาน โรม นัน ตี เกย มเบิล ครำ นัน นำ ก็ พระ แอ็ม แต เยซู ตี ไอ มี แอง ลุห ซีวะ นำ วัล มอบ อน ตัก อัห ระ อัห มเบิล ตาม ใจ ออ ฮัก
26แลว ปีลาด มอบ เยซู อน อัห แลว อัห ก็ ซับ เยซู ทอก เริล แอ็ม เจ็น เมือง ทาเน ก็ มี อัหคล็อง มี ล็อง นะ นำ โตะ เจ็น งวัล ซะร็อห นำ กำลัง โตะ ตัก เมือง นัน ซือ นำ ตัก ซีโมน ครำ เมือง ไซรีน ทาเน ปึง ทฮาน ก็ คนาบ นำ ตอล งกรัง ซีโรด นัน เคริบ ลอล เยซู เริล 27เจ็นนัน ก็ มี ครำ ดก ล็อง เคริบ เยซู เริล ปึง อัหเม ดก ล็อง อัห ก็ ตึ อัง เยซู ซีเละ อัห เญ็ม เคริบ ลอล นำ เริล
28แต เยซู มบิด มัด ดอม ปึง อัหเม นัน นำ ก็ ไล อัห คือเน “ปึง อัหเม เมือง เยรูซาเล็ม เฮย อำ แป เญ็ม ตึ อัง เอิญ เตาะ ดาย แป เญ็ม ตึ อัง นัง ออ ตึ อัง ควัน ออ ฮัก ซัง เลาะ บัดนะ แป เคิบ ควัน ก็ ลำบาก กวา เน วัล 29ปัง เอิด ดาย กัน เล็ห เวลา ลำบาก จ็อง นัน บัดนะ แป ก็ ลำบาก ซีเละ แป ต็อง จ็อก ฮุนเน ‘อัหเม ตี ไอ มี เกย มพุ ควัน ไอ มี เกย เกิด ควัน ไอ มี เกย อน โปะ ควัน ตอล นัน อัหเม ปึง นัน แควน มี ติด’ แป ต็อง จ็อก ฮุนเน บัดนะ 30เล็ห งิ นัน บัดนะ พซาซน ก็ ไล ญวัง เกลิน ทม แอ็ม นัง ออ อัห ก็ ครอ ระ เจ็ง ญวัง เทิ๊บ แอ็ม ออ วัล” เยซู อัง 31เยซู ก็ ไล อัห เลือง เมือง เยรูซาเล็ม คือเน “กัน อัห แอง ซิห ครำ เลาะ มอก เน แลว บัดนะ ครำ ไอ มี เลาะ ก็ ต็อง ลำบาก กวา เน วัล”#ค 31 พาซา ไท เค็ย จังเน “เพราะว่าถ้าเขาทำอย่างนี้เมื่อไม้ยังสดอยู่ อะไรจะเกิดขึ้นเมื่อไม้แห้งแล้ว” เยซู อัง
อัห มพำ เยซู ตัก งกรัง ซีโรด
32ทาเน ก็ มี ครำ ไอ มี เลาะ เปียะ ล็อง วัล ปาม เป็น นักโทด ทฮาน ก็ ซับ ปาม มเบิล เลิม เคิบ เยซู นัน 33อัห ก็ โตะ ตัก ตี อัห เค็ย ซีเยิง กึ นัน อัห ก็ มพำ ซิห เยซู ตัก งกรัง เคิง นัน อัห ก็ มพำ ครำ ไอ มี เลาะ เปียะ ล็อง นัน เลิม เคิบ เยซู เพียห เลาะ มี ล็อง เพียห วิ มี ล็อง
34เยซู ก็ จ็อก ฮุนเน “เอา เฮย ครอ เคิบ มัห อำ ทือ โทด อัห เตาะ ดาย ตี อัห แอง ซิห เอิญ เน อัห ก็ ไอ มี เม็จจึด ซีวะ อำ จบ ตอบติก ซิห อัห ดาย เอา” นำ อัง ทาเน ปึง ทฮาน ก็ เญ็บ ซะลาก แบง เอิด คัว เยซู
35ทาเน ก็ มี ครำ ดก ล็อง ญ็อง ดอม นำ อุ นัน ปึง ซะ แกะ ตัก อุ นัน เลิม อัห ก็ เค็ย เยซู ฮุนเน “นำ จวย อัหซอ กุญ แต ซีวะ นำ จวย นัง ออ ไอ มี กุญ กัน นำ กิว เป็น เมซียา คอง เอาซาง นังเลาะ ก็ ระ นำ จวย นัง ออ ระ ปน แอ็ม กา” อัห อัง
36-38ทาเน ก็ มี ปาย ติด อุ ตัก งกรัง คอม กึ นำ ลัห ทึห ตัก ปาย นัน อัห เคียน คือเน “ล็อง เน เป็น พะเจายูฮัว ครำ ยิว” ปาย นัน อัง ปึง ทฮาน ก็ ปิล มัด ปิล มุห นำ อัห เอิด ปุจ องุน แซ็ดๆ อน นำ ออก อัห ก็ โป นำ คือเน “กัน มัห กิว เป็น พะเจายูฮัว ครำ ยิว ซีเละ มัห ก็ จวย นัง ออ นเซอะ ปน แอ็ม เจ็น งกรัง เน กา” อัห อัง
39ทาเน ครำ ไอ มี เลาะ เปียะ ล็อง นัน ตี อัห มพำ ระ นดิ เยซู นัน ปาม จ็อก มี ยาง มี ล็อง มี ล็อง นัน นำ ก็ โป ดูทูก เยซู คือเน “กัน มัห กิว เป็น เมซียา นังเลาะ มัห ก็ จวย นัง ออ วาล แลว ก็ จวย เยอะ วัล” นำ อัง 40แต มี ล็อง นัน วัล นำ ก็ โป ล็อง นัน “ฮีเอิห นัก ฮาน มัห โป จังนะ เต็ห ซีวะ มัห ไอ มี นเจิก อัง เอาซาง แอ แพะ ล็อง เน กุญ โทด จำ เปิล เมือนนอย 41อา เน กุญ โทด ญอน อา แอง ลุห อา ซมควน เปิล แลว แต นำ เน ไอ มี แอง ลุห ซีวะ” ล็อง นะ อัง 42เจ็นนัน ล็อง นะ ก็ จ็อก เคิบ เยซู นำ ซ็วน เยซู คือเน “บัดนะ ญาม มัห โตะ เป็น พะเจายูฮัว ปกคอง อิห เน ครอ ระ มัห ลุห นโทล อัง เอิญ ดาย” นำ อัง 43เยซู ก็ ไล นำ “เอิญ ไล มัห นังเลาะ นะ งิ นะ เน งวะ มัห กุญ อุ ตี เลาะ ตี แลม เลิม เคิบ เอิญ” เยซู อัง
เยซู เปิล
มัดทิว 27:45-56, มาระโก 15:33-41, ยอน 19:28-30
44ทาเน ก็ เตียง พอดี ก็ ลิบ ม็อญ ซะ มด ทัว แพนซิก ม็อญ ซะ เจ็น เตียง จำปอ ซาม โมง 45งิ ก็ ไอ มี ทาง เตาะ ทาเน พามาน ตัก กัน ฮ็อง ซักซิด ทีซุด ตัก วิฮาน เอาซาง นัน ก็ ท็อด กิด กาง ล็อง เป็น เปียะ เพียห 46เยซู ก็ จ็อก เคิบ เอา ออ แร็งๆ ฮุนเน “เอา เฮย เอิญ ครอ มอบ อน ซีมาล ออ ตัก มัห ดาย” นำ อัง แลว นำ จ็อก จังนะ แลว นำ ก็ ลด เปิล แอ็ม
47ทาเน ก็ มี นายรอย มี ล็อง อุ นัน นำ ก็ เม็จ จู มบลึ นัน นำ ก็ ลือ เอาซาง ฮุนเน “เออ เอา ล็อง เน นำ แอง เลาะ แอง ซือ ซีเละ นำ ไอ มี กุญ แอง ลุห ซีวะ” นำ อัง 48มี ปึง อัหซอ ดก ล็อง ตี รูบ โตะ ดอม อัห มเบิล เยซู นัน อัห เม็จ ฮุนนัน แลว อัห ก็ เซียใจ อัห ก็ คัล งก็อห ออ วัล เจิง 49แต เปือน เยซู เคิบ ปึง อัหเม ตัก เคริบ เยซู โตะ เจ็น จังวัด กาลิลี นัน อัห ไอ มี งเคาะ วัล เตาะ อัห ควะ ญ็อง ดอม เยซู อุ เยอะ ซะ แดๆ
โยเซบ เอิด ซบ เยซู ระ ตัก อุโมง
มัดทิว 27:57-61, มาระโก 15:42-47, ยอน 19:38-42
50ทาเน ก็ มี อัหคล็อง มี ล็อง ซือ ตัก โยเซบ โยเซบ เน นำ เป็น ครำ งวัล อารีมาเทีย งวัล อารีมาเทีย นัน ก็ อุ ตัก จังวัด ยูเดีย โยเซบ เน นำ เป็น ซะมาซิก ซะพา จ็อง นัน โยเซบ ล็อง เน นำ เป็น ครำ เลาะ ครำ ซือ นำ ไอ มี กึด เมือน อัห เตาะ 51นำ เจือ แญง ซันญา คอง เอาซาง ฮัก เอาซาง ซันญา อง โตะ ปกคอง โลก นำ ก็ เจือ แญง นัน นังเลาะ แลว นำ เป็น ซะมาซิก ซะพา จ็อง แต นำ ไอ มี กึด มอก อัห เตาะ ตี อัห ตัดซิน มเบิล เยซู นำ ก็ ไอ มี กึด มอก อัห เตาะ 52โยเซบ เน นำ ก็ เริล ครอ ซบ เยซู ตัก ปีลาด 53นำ ก็ เอิด ซบ มพลิห เจ็น งกรัง นำ ก็ เอิด พา ลินนิน มบัล ปอก ซบ เยซู แลว นำ ปอก ซบ แลว นำ ก็ ซับ ซบ นัน ระ ตัก อุโมง ออ ตี อัห เจาะ ระ อน ตัก เกียง แลว เป็น อุโมง แมะ ไอ มี ตัน อัห ระ ซบ ซีเอ เตาะ
54งิ ตี เยซู เปิล นัน ก็ เป็น งิ ตี อัห เตียม ระ ซะ ซำรับ งิ มโบละ บัก และ เล็ห งิ มโบละ อัห ตัก วัน เซา นัน 55ทาเน ก็ มี ปึง อัหเม ตี โตะ เลิม เคิบ เยซู เจ็น จังวัด กาลิลี นัน อัห ก็ เต็ก ปึง นัน ตี เทิ๊บ เยซู นัน อัห เริล เล็ห เคิด อุโมง ตี อัห ระ ซบ เยซู นัน อัห ก็ ดอม อุโมง นัน ปึง นัน ระ ซบ เยซู จังนัก อัห ก็ เม็จ มด 56เจ็นนัน อัห ก็ วัล เจิง เตียม ยา ซียุม เคิบ นำมัน ซียุม ระ อน ปัห ซะ ฮุน งิ กรัก เป็น งิ ที เจ็ด เป็น งิ มโบละ อัห ตัก วัน เซา นัน อัห ก็ มโบละ ฮุน กด เอาซาง ไล อน นัน
Markert nå:
ลูกา 23: Prai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Global Partners
