ลูกา 22
22
เลือง อัห กึด มเบิล เยซู
มัดทิว 26:1-5, 26:14-16, มาระโก 14:1-2, 14:10-11, ยอน 11:45-53
1ทาเน ก็ บัก เล็ห งิ อัห ป็อง คนมปัง ตัก ไอ มี ซิห เจือ ยีด นัน อัห ซะลอง งิ ตี เอาซาง เว็น เจิง อัห ตัก อิง นัน ดก โตะ ครำ ซะลอง งิ นัน 2ทาเน ปึง มอ เอาซาง แกะ เคิบ ปึง อาจาน ตี ไล กด โมเซด นัน อัห วาง และ รวง มเบิล เยซู แต อัห นเจิก อัง ปึง พซาซน เพาะวา ญาม นัน แร็ง ดก โตะ ครำ ซะลอง งิ ตี เอาซาง เว็น เจิง อัห นัน ดก ครำ ซีเละ พซาซน ไล ดก อัห มัก เยซู แต ปึง ซะ แกะ นัน อัห ก็ ซีรอก ลอด มเบิล เยซู ระ พซาซน ไอ มี เม็จ
3ทาเน ปรอง ซาตาน ก็ กุด ยูดาด ยูดาด ล็อง นะ อัห แทก นำ ตัก อิซคารีโอด#ค 3 “อิซคารีโอด” ซีแล็ม เค็ย “ครำ งวัล คารีโอด” นำ เป็น ลูกนอง เยซู มี ล็อง ใน ปึง ซิบซอง ล็อง นัน ปรอง กุด นำ เย็ห จำใจ นำ 4นำ ก็ เริล และ ปึง มอ เอาซาง แกะ เคิบ ปึง ทฮาน เพา ญาม วิฮาน เอาซาง อัห ก็ อู นอย เคิบ ยูดาด อัห อู นอย เลือง และ วิที ระ ยูดาด มอบ เยซู อน ตัก อัห นัน 5อัห เม็จจึด เค็ย ยูดาด ซีรอก มอบ เยซู อน ตัก ออ อัห ก็ เลาะใจ ซีเละ อัห ก็ ตกลง นอย อง อน เงิน ตัก นำ “กัน มัห มอบ เยซู อน ตัก อิห อิห ก็ อน เงิน ตัก มัห ดาย” อัห อัง 6ยูดาด ก็ ตกลง เคิบ ปึง มอ เอาซาง แกะ เคิบ ปึง อาจาน นัน เจ็นนัน นำ ก็ และ รวง มอบ เยซู อน ตัก อัห แต นำ ซีรอก มอบ เยซู อน ตัก อัห ญาม ไอ มี ดก ครำ เม็จ นัน
เยซู เคิบ ลูกนอง ป็อง ซะลอง งิ ตี เอาซาง เว็น เจิง อัห
มัดทิว 26:17-25, มาระโก 14:12-21, ยอน 13:21-30
7ทาเน ก็ เล็ห งิ ตี อัห ป็อง คนมปัง ตี ไอ มี ซิห เจือ ยีด นัน งิ แรก นัน อัห ต็อง มเบิล ควัน แกะ ซีเติน อัห ซะลอง งิ ตี เอาซาง เว็น เจิง อัห ตัก ปะเทด อียิบ ตัก อิง นัน 8เล็ห งิ นัน แลว เยซู ก็ ไล เปโตร เคิบ ยอน เพีย เริล แอง ซะ ป็อง ซำรับ อัห ป็อง ซะลอง งิ ตี เอาซาง เว็น เจิง อัห นัน
9ปาม ก็ ซ็วน เยซู “อาจาน มัห ระ เยอะ แอง ซะ ป็อง ตัก เจิง อีเอ เลาะ บ็อห” ปาม อัง
10เยซู ก็ ซวัล ปาม ฮุนเน “ปา ต็อง กุด เริล เมือง เยรูซาเล็ม ดาย งวะ กัน ปา กุด เริล ใน เมือง แลว ปา ก็ เม็จ อัหคล็อง มี ล็อง นะ ตอล ปม ออก เริล ปา ก็ ต็อง เคริบ ล็อง นัน เริล ดาย กัน นำ กุด เจิง ลัง นเดย ปา ก็ กุด เจิง ลัง นัน 11ปา ต็อง ไล งกี เจิง นัน ฮุนเน อาจาน ไล เยอะ โตะ ซ็วน มัห ดาย บึด แจ็ล นำ อง ป็อง ซะลอง งิ ตี เอาซาง เว็น เจิง แอ นำ ป็อง เลิม เคิบ ลูกนอง ออ ตัก เจิง มัห เน มัห ระ อิห แอง ตัก ฮ็อง นเดย เลาะ บ็อห ปา ต็อง ไล นำ จังนะ ดาย 12แลว ปา ซ็วน งกี เจิง แลว นำ ก็ ไล อน ฮ็อง ตัก ปา ฮัก นำ ก็ ซับรวง ปา ดอม ฮ็อง ควางๆ ตัก อุ จัน ลัห ทึห นัน เป็น เคือง ไจ เป็น โตะ เป็น วะ ก็ มี อุ ตัก ฮ็อง นัน ครบ มด ปา เพีย เริล แอง ซะ ป็อง ระ อน เคิง นัน ก็ เลาะ” เยซู อัง
13เจ็นนัน ปาม ก็ เริล ปาม ก็ เม็จ ฮุน เยซู ไล อน นัน ซีเละ ปาม ก็ แอง ระ ซะ ป็อง ซำรับ อัห ซะลอง งิ เปซา นัน (แจ็ล นัน เยซู เคิบ ลูกนอง ก็ โตะ ป็อง จะ เลิม ตัก ฮ็อง นัน)
เลือง อัห ป็อง เลิม ออก เลิม
มัดทิว 26:26-30, มาระโก 14:22-26, 1 โคริน 11:23-25
14ทาเน เล็ห เวลา อัห ป็อง ซะลอง นอย แลว อัห ก็ โตะ ป็อง เลิม ตัก เจิง ตี ปา เปโตร เคิบ ยอน เตียม ระ อน แลว นัน เยซู เคิบ ปึง ตัวแทน ก็ คุด อุ เลิม ตัก โตะ นัน 15ทาเน เยซู ก็ ไล ลูกนอง ออ ฮุนเน “เอิญ โซะ ป็อง ซะลอง งิ เปซา เลิม เคิบ แป เน เจ็น อิง ดาย เอิญ โซะ ป็อง เคิบ แป ซีเละ เอิญ โซะ ป็อง เลิม เคิบ แป วาล ไอ ตัน เอิญ โซะ วาล ไอ ตัน เอิญ เปิล เน 16เอิญ ไล แป นังเลาะ นะ เจ็นเน นโดน เอิญ ไอ มี กุญ ป็อง ซะลอง มอก เน เลิม เคิบ แป วัล เตาะ เอิญ ไอ มี ป็อง ซะลอง มอก เน จำปอ เล็ห ซะไม แมะ ตี เอาซาง โตะ ปกคอง โลก เน บัดนะ เล็ห ซะไม แมะ นัน บัดนะ จู มบลึ ก็ กิว เกิด เล็ห มอก ความมาย พิที เน เล็ห ซะไม นัน ซัง เอิญ กุญ ป็อง เลิม เคิบ แป วัล ดาย” เยซู อัง 17เยซู ก็ ญ็อก จอก ปุจ องุน คอบคุน เอาซาง “เอิด จอก ปุจ องุน เน แบง นอย ออก ดาย” นำ อัง 18“เอิญ ไล แป นังเลาะ นะ เจ็นเน นโดน เอิญ ก็ ไอ มี ออก ปุจ องุน เน วัล เตาะ เอิญ ไอ มี ออก จำปอ เล็ห งิ เอาซาง โตะ ปกคอง โลก เน วัล” นำ อัง
19เยซู ก็ เอิด คนมปัง มี แพ็น นำ คอบคุน เอาซาง แลว นำ ก็ เพก คนมปัง นัน แบง อน ตัก อัห ป็อง “เน เป็น นัง คอง เอิญ ตี เอิญ อน ตัก แป ฮัก ดาย แป เพก ป็อง คนมปัง เน ญาม นเดย ก็ ครอ ระ แป กึด เลือง นัง เอิญ เน ตี เอาซาง ทวาย อน ตัก แป ดาย” นำ อัง
20แลว อัห ป็อง คนมปัง แลว เยซู ก็ เอิด จอก ปุจ องุน มี จอก วัล อน ตัก อัห ออก นำ ก็ ไล อน ความมาย ตัก อัห เมือนนอย นำ ไล อัห ฮุนเน “ครอ ระ แป ออก ตัก จอก ตี เอิญ อน แป เน ดาย ปุจ องุน เน ก็ ซีแล็ม เค็ย เมียม คอง เอิญ ตี แจล เพือ แป เอาซาง ก็ เอิด เมียม เอิญ เน รับรอง แญง ซันญา แมะ คอง นำ ตี นำ ซันญา แมะๆ เคิบ แป เน
21แต ดอม ดาย แป เฮย เอา นัน ตี บัก และ ฮักลัง เอิญ นำ ก็ คุด อุ เลิม เคิบ แอ เน 22เอิญ เป็น ล็อง นัน ตี เอาซาง ระ เกิด เป็น ครำ เอิญ ก็ ต็อง เปิล ตี เอิญ ต็อง เปิล ก็ เพาะวา เป็น กำกึด เอาซาง เจ็น ตัก อิง แลว แต ฮีเอิห ตึ อัง เอา นัน ตี ฮักลัง เอิญ ตึ อัง นำ ซีเละ นำ ต็อง กุญ โทด ดก ซีเละ” เยซู อัง 23อัห เม็จ เยซู จ็อก ฮุนนะ อัห ก็ ลด ซ็วน นอย “บัห ซัง ซีเอ แอง จังนะ บ็อห ไอ มี อีเอ ก้า” อัห อัง
ปึง ลูกนอง เทียง นอย เลือง อีเอ แกะ ทีซุด
24ทาเน ปึง ลูกนอง เยซู ก็ เทียง นอย อัห เทียง นอย เลือง ซีเอ แกะ ทีซุด นัน 25เยซู ก็ ลด ไล อัห คือเน “พะเจายูฮัว กรอก ซอ อัห ก็ ซอบ แอง นัง ออ แกะ กวา อัหซอ มด ซำรับ ปึง เจานาย ตัก มี อำนาด อัห ก็ ซอบ ระ พซาซน อวด ออ เค็ย อัห เป็น เจานาย เลาะ 26แต แป อำ แอง มอก อัห เตาะ เอา นเดย ตัก ซีรอก เป็น ซะ แกะ ทีซุด ก็ ต็อง ญอม ท็อม นัง ออ มอก เป็น ครำ ทำมาดา ซีเอ ซีรอก เป็น พูนำ ก็ ต็อง ญอม ฮับไจ อัห มด 27ล็อง ตี คุด อุ ตัก โตะ เคิบ ล็อง ตี พระ เพียน จะ ตัก โตะ ซีเอ แกะ กวา นอย บ็อห ก็ ครำ ตี คุด อุ ตัก โตะ นัน แกะ ทีซุด แมน อัน แต เอิญ อุ เลิม เคิบ แป เน เอิญ ก็ แอง มอก ครำ ฮับไจ แป มด” เยซู อัง
28ทาเน เยซู ก็ ซันญา เคิบ ลูกนอง ออ จังเน “จู ลบ ตี อัห คมเฮง เอิญ นัน แป ก็ อุ เลิม เคิบ เอิญ เลาะ ซีเละ ดาย แป ไอ มี พระ เอิญ เตาะ 29เจ็นนัน เอา เอิญ ระ เอิญ มี ซิด ปกคอง เลิม เคิบ ออ มอก นเดย บัดนะ เอิญ ก็ ระ แป มี ซิด ปกคอง เลิม เคิบ เอิญ มอก นัน 30เอิญ ก็ ระ แป โตะ ป็อง เลิม ออก เลิม เคิบ เอิญ บัดนะ เอิญ ก็ ระ แป คุด ตัก ตี คุด ครึๆ คอง เอิญ เอิญ ก็ ระ แป ตัดซิน ครำ อิซราเอล ซิบซอง กรอก นัน เลิม เคิบ เอิญ บัดนะ วัล” เยซู อัง
เยซู เค็ย เปโตร มแบล ออ
มัดทิว 26:31-35, มาระโก 14:27-31, ยอน 13:36-38
31ทาเน เยซู ก็ ไล ซีโมน คือเน “ซีโมน เฮย ปรอง ซาตาน ซีรอก ระ เอาซาง มอบ แป อน ตัก เย็ห ซัง เย็ห กุญ ลอง ใจ แป เย็ห ซีรอก แยก ครำ เลาะ เจ็น ครำ ไอ มี เลาะ ฮุน อัห กุม ซา นัน 32ซีโมน เฮย เอิญ ครอ เคิบ เอาซาง เพือ มัห แลว ระ มัห แก็นใจ เจือ เอาซาง ระ มัห ไอ มี กาน อัง เย็ห ดาย ญาม มัห ลบ เอิด ใจ แมะ วัล ญาม มัห ลบ แก็นใจ เจือ เอิญ วัล ก็ ครอ ระ มัห จวย อน กำลัง ใจ ตัก ปึง ควน นไจ ออ ตอ วัล ระ อัห แก็นใจ อุ วัล ดาย” เยซู ไล เปโตร จังเน
33เปโตร ก็ ซวัล เยซู คือเน “งกีจ็อง เฮย เอิญ พอม เริล เลิม เคิบ มัห ดาย มัห เติล ลุก ก็ ตึก มัห เปิล ก็ ตึก เอิญ ก็ พอม เปิล เลิม เคิบ มัห มด” นำ อัง 34เยซู ก็ ไล เปโตร คือเน “เปโตร เฮย เอิญ ไล มัห ซีเละ นะ แจ็ล บึด วาล ไอ มี ตัน ตอด ไก มัห ก็ มแบล เอิญ แพะ ลบ มัห เค็ย ไอ มี เม็จจึด เอิญ เตาะ” เยซู อัง
เยซู ไล อัห เอิด ใจ จ็อง
35เยซู ก็ ไล อัห คือเน วัล “กำนา ญาม เอิญ ไล แป ทอก เริล เป็น กู เป็น กู นัน เอิญ ไอ มี ระ แป เอิด เงิน เอิด ทง เอิด แค็บ เริล เลิม เตาะ ญาม นัน แป คาด ซีวะ บ็อห” อัห ก็ ซวัล นำ “ไอ มี คาด ซีวะ เตาะ” อัห อัง 36นำ ก็ ลด ไล อัห คือเน “แต มานะ เน ไอ มี เมือน ญาม นัน ซัง อันตะราย ดาย ลบ เน กัน ซีเอ มี เงิน มี ทง ก็ เอิด เริล เลิม ดาย กัน ซีเอ ไอ มี ดาบ แป ก็ ต็อง เท็จ โกบ ทน ดาบ ดาย 37เอิญ ไล แป นังเลาะ นะ อัห ต็อง มเบิล เอิญ มอก แญง ลาม เอาซาง เพีย ไล อน เจ็น ตัก อิง แลว ลาม นัน เค็ย ‘อัห จบ แอง ซิห ตัก เอิญ มอก อัห แอง ซิห ตัก ครำ ลุห นัน’ ลาม อัง ซะ จู มบลึ ตี ลาม เคียน ไล อน เลือง เอิญ เน ก็ บัก และ เกิด เล็ห แลว แป ต็อง เพีย ปัง นึง ปัง นาง อุ เลาะๆ ดาย” เยซู อัง อิซยา 53:12
38อัห ก็ ไล เยซู “งกีจ็อง อิห มี ดาบ เปียะ ราง เน แลว” อัห อัง “ปอ เต็ห” เยซู อัง
เยซู ครอ วอน เอาซาง ตัก ญวัง แพะ ค็อก
มัดทิว 26:36-46, มาระโก 14:32-42
39ทาเน เยซู ก็ ทอก เริล เจ็น เมือง นำ เริล ตัก ญวัง แพะ ค็อก ฮุน จู ลบ นัน ปึง ลูกนอง นำ ก็ เริล เลิม เคิบ นำ 40เล็ห เคิง ญวัง แพะ ค็อก นัน แลว นำ ก็ ไล ลูกนอง คือเน “แป ต็อง ครอ เคิบ เอาซาง ระ เอาซาง อน แร็ง ตัก แป จับ มี ซีวะ ลอง ใจ แป แป ก็ ไอ มี กาน แอ็ม เตาะ” นำ อัง
41ทาเน เยซู ก็ ระ ลูกนอง เพา ออ อุ นัน เจ็นนัน นำ ก็ เริล ออ มี ล็อง ฮัก นำ เริล เยอะ ซะ ปะมาน อัห กวาง เกียง จัก เน นำ ก็ คุกโคล ครอ วอน เอาซาง ตัก นัน 42นำ ครอ คือเน “เอา เฮย กัน มัห ปอใจ ก็ ครอ ระ มัห จวย เอิญ ปน แอ็ม เจ็น ทอระมาน เน ดาย แต ครอ ระ มัห แอง ตาม ใจ ออ ฮัก อำ แอง ตาม ใจ เอิญ เตาะ” นำ อัง 43แลว นำ ครอ วอน เอาซาง แลว ก็ พด โตะ เทวาดา เจ็น วาง ทึห อน กำลัง ใจ ตัก นำ
44ทาเน เยซู ก็ แร็ง เซียใจ ซีเละ นำ ก็ เฮง ครอ วอน เอาซาง ติกๆ นำ ก็ ญ็อก เล็ห เฮือ เล็ห ฮอน ฮุน เมียม แจล คลิห ตัก ซิก 45แลว นำ ครอ วอน เอาซาง แลว นำ ก็ ร็อห โตะ และ ปึง ลูกนอง คอง ออ วัล นำ ก็ เม็จ อัห อวย นไท แอ็ม เพาะวา อัห แร็ง งควาจ แร็ง ตุกใจ เซียใจ ซีเละ
46เยซู ก็ ไล อัห ฮุนเน “แป วาง อวย อุ อังวะ เต็ห ร็อห เนอ ครอ วอน เอาซาง ระ นำ อน แร็ง ตัก แป ดาย ญาม มี ซะ โตะ ลอง ใจ แป แป ก็ ไอ มี กาน แอ็ม เตาะ” นำ อัง
อัห เญ็บ เยซู
มัดทิว 26:47-56, มาระโก 14:43-50, ยอน 18:3-11
47ทาเน เยซู ไล ลูกนอง ออ ก็ ไอ มี ตัน จบ ก็ รูบ โตะ อัห เป็น ปึง ยูดาด ตัก เป็น ลูกนอง คอง เยซู ใน ปึง ซิบซอง ล็อง นัน นำ ซับรวง ปึง อัห นัน โตะ นำ ก็ ติ โตะ ตัก เยซู นำ บัก และ จูบ คาง เยซู 48แต เยซู ก็ ไล นำ คือเน “ยูดาด มัห และ จูบ เอิญ อังวะ เอิญ ตี เอาซาง ระ เกิด เป็น ครำ เน มัห มอบ เอิญ อน ตัก อัห ซีเละ ก้า” นำ อัง 49ปึง ลูกนอง เยซู เม็จจึด เค็ย อัห บัก และ เญ็บ เยซู อัห ก็ ซ็วน เยซู “งกีจ็อง แอ เอิด ดาบ ป็อก อัห เลาะ บ็อห” อัห อัง
50ลูกนอง นำ มี ล็อง นัน ก็ โรจ เอิด ดาบ ทาก ป็อก นโทล เพียห เลาะ คอง ลูกนอง มอ เอาซาง จ็อง มี ล็อง นะ ท็อด กิด 51แต เยซู ก็ ไล อัห คือเน “ปอ เตาะ อำ ทุ อัห เตาะ” นำ อัง นำ ลด คอบ นโทล เอา นัน ลบ เลาะ เล็ห เมือน เครม วัล
52ปึง อัห ตี โตะ เญ็บ เยซู นัน ก็ มี ปึง มอ เอาซาง แกะ เคิบ ปึง ทฮาน ตี รักซา วิฮาน เอาซาง เคิบ ปึง ฮัวนา ครำ ยิว ปึง เนๆ อัห โตะ เญ็บ เยซู เยซู ก็ ไล อัห ฮุนเน “แป วาง ก็อง ดาบ ก็อง งคัล โตะ เญ็บ เอิญ อังวะ แป ก็อง งคัล ก็อง ดาบ โตะ เญ็บ เอิญ มอก เอิญ เป็น โจน 53เอิญ ไอ แมน โจน ดาย จูงิๆ เอิญ อุ เลิม เคิบ แป ตัก เด็นเตะ วิฮาน เอาซาง แป ก็ ไอ มี เญ็บ เอิญ แต งิ นะ เน เป็น เวลา ตี เอาซาง ปลอย ระ แป มี อำนาด เญ็บ เอิญ แลว แป โตะ เญ็บ เอิญ ตัก แจ็ล ก็ จับ แลว เพาะวา เป็น อำนาด ม็อญ ซะ ควบคุม แป ฮัก” เยซู ไล อัห คือนะ
เลือง เปโตร มแบล เยซู
มัดทิว 26:57-58, 26:69-75, มาระโก 14:53-54, 14:66-72
54เจ็นนัน อัห ก็ เญ็บ เอิด เยซู เริล อัห ก็ ซับ นำ ตัก เจิง มอ เอาซาง จ็อง เปโตร ก็ เคริบ นำ เริล เยอะ ซะ แดๆ 55เล็ห ตัก เจิง มอ เอาซาง จ็อง แลว ก็ มี ครำ งคุม โอด ตัก เด็นเตะ นำ นัน อัห คุด จืล โอด อุ เปโตร ก็ โตะ คุด จืล โอด อุ เลิม เคิบ อัห นัน
56ทาเน ก็ มี อัหเม มี ล็อง เป็น ลูกนอง อัห นำ เม็จ เปโตร คุด จืล โอด อุ นัน นำ ก็ ที ดอม เปโตร นำ ก็ ไล อัห เค็ย “เอ ล็อง เนๆ นำ อุ เลิม เคิบ เยซู ไอ แมน เออะ” นำ อัง 57เปโตร ก็ มแบล ออ “เอิญ ไอ มี เม็จจึด นำ ดาย ควน” เปโตร อัง
58อุ ซม มี ญาม วัล ก็ มี มี ล็อง วัล เม็จ เปโตร นำ ก็ จ็อก ฮุนเน “มัห ก็ เป็น ครำ อุ เลิม เคิบ เยซู นัน ดาย” นำ อัง เปโตร ก็ มแบล วัล เค็ย “เก็ย จบ แมน” เปโตร อัง 59อุ ซม มี ซัวโมง วัล ก็ มี อัหคล็อง มี ล็อง วัล เค็ย “เอิญ เค็ย เอา เน เป็น ครำ มี ปึง เดียว เลิม เคิบ เยซู ซีเละ ดาย นำ เป็น ครำ กาลิลี มอก เยซู ดุห” นำ อัง 60เปโตร ก็ ซวัล นำ “มัห เค็ย ซีวะ นะ เอิญ ไอ มี เคาใจ” เปโตร อัง นำ จ็อก ไอ มี ตัน จบ ก็ พวม ตอด ไก พอดี 61ตอด ไก แลว เยซู ก็ งแก็ล ดอม เปโตร เปโตร ก็ พุล ลุห นโทล อัง แญง ตี เยซู ไล นำ เคิน นัน “วาล ไอ ตัน ไก ตอด มัห ก็ มแบล เค็ย ไอ มี เม็จจึด เอิญ แพะ ลบ” เยซู อัง 62เปโตร ก็ ทอก เริล ซะร็อห นำ ก็ เญ็ม จ็อง นำ แร็ง เซียใจ ซีเละ
ปึง ทฮาน ดูทูก เยซู
มัดทิว 26:67-68, มาระโก 14:65
63-64ทาเน ครำ ตี เพา เยซู อุ นัน อัห ก็ ปิล มัด ปิล มุห นำ อัห ก็ เอิด พา ปอก มัด นำ อัห คัล นำ อัห ก็ ลด ซ็วน นำ “กัน มัห กิว เป็น ลาม เอาซาง ซีเละ ซีเอ คัล มัห เน ก็ มัห ไล อ็อญ กา” อัห อัง 65เจ็นนัน อัห ก็ ลด โป ดูทูก ดูแควน นำ ดก มบลึ วัล
ปึง ซะ แกะ ซอบซวน เยซู
มัดทิว 26:59-66, มาระโก 14:55-64, ยอน 18:19-24
66ปัห ซะ ตัก งกร็อห ปึง ซะพา ครำ ยิว ปึง มอ เอาซาง แกะ เคิบ ปึง อาจาน ซอน กด เอาซาง อัห ก็ โตะ พซุม นอย มด อัห ก็ ซับ เยซู ตัก ตี พซุม นัน 67อัห ก็ ซ็วน เยซู คือเน “กัน มัห กิว เป็น เมซียา ซีเละ มัห ก็ ไล อิห กา” อัห อัง เยซู ก็ ซวัล อัห ฮุนเน “กัน เอิญ ไล แป แป ก็ ไอ มี เจือ เอิญ ซัง 68กัน เอิญ ซ็วน แป แป ก็ ไอ มี ซวัล เอิญ 69แต เจ็นเน นโดน แป ก็ เม็จจึด เค็ย เอิญ เป็น ซีเอ นังเลาะ เอิญ ตี เอาซาง ระ เกิด เป็น ครำ เน เจ็นเน เอิญ ก็ คุด อุ เพียห เลาะ คอง เอาซาง เอิญ คุด อุ เพียห เลาะ คอง เอาซาง ตัก มี แร็ง มี อำนาด ดก ทีซุด นัน เอิญ ก็ ปกคอง อุ เลิม เคิบ นำ” เยซู อัง
70อัห ก็ รูบ ซ็วน นำ วัล “มัห กิว เป็น ควัน เอาซาง นังเลาะ อัน” อัห อัง นำ ก็ ซวัล อัห เค็ย “แป เค็ย นะ ก็ แคระ แลว” นำ อัง 71อัห ก็ ไล นอย ฮุนเน วัล “แอ ไอ มี จำเป็น และ พญาน วัล เตาะ แอ เม็จ นำ จ็อก เคิบ มัด เคิบ มุห ออ แลว นำ โป ดูทูก เอาซาง ซีเละ” อัห อัง
Markert nå:
ลูกา 22: Prai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Global Partners
