LITANGA 6
6
Uvuchamu vwu Mundu
1Lwa avandu vameedeka ku lirova, viivula kandi avana vakana. 2Vilala ku virombe viu mwigulu vialola ndi avakaana yavo vaali valahi viligondo lilahi ligali, kunangwa vaavugura yavo avavayaanzaa. 3Maku Yahova yavoola, “Inzi si ndavugilira avandu komenya mihiga ni mihiga mba kigira vaveeye vandu vakuza. Kutura kalunu si valahindira kuvita mihiga 120 mba.” 4Mu madiku yago, kandi kali lwa ha inyima, ku, mindu minene jaali ku lirova jaali visukululwi via avandu vakali kandi vilombe viu mwigulu. Jaali mindu minene ligali kandi jamanyikana mu madiku ga kale.
5Lwa Yahova yalora kuli vuli umundu yaali muchamu ku lirova kandi kuli zing'anagani ziavo ziali zindamanu vuli ing'inga, 6yaali novovereri ligali kulilomba mundu nukumuviika ku lirova. Yidula ligali 7ma navoora ndi, “Inzi ndadiviza avandu yava avandamala kolomba, kandi nizinyama namanyonyi, kigira mbeeye novovereri ndi ndaavilomba.” 8Navuzwa Nuhu yaayanziza Yahova.
Nuhu
9Yaga namakura ga Nuhu. Nuhu yaali umundu mulungi, vugira imbara hagati ha avandu mu ing'inga yeeye, kandi yatia Nyasaye. 10Yaali navayayi vavaga, Shemu, Hamu, na Jafeza. 11Vuli umundu yaali mudamanu imbiri wa Nyasaye kandi kirage chaali havundu hoosi. 12Nyasaye yahenza ku lirova nalora ndi liali lidamanu, kigira avandu vosi vamenya mu likora vudamanu.
13Nyasaye yavolera Nuhu, “Inzi mali kotovola kudiviza avandu vosi. Ndavadiviza ligali, kigira lirova lizuuyi vikolwa viavo vikirage. 14Wiyumbakiri liato mwene kutura ku misaala milahi. Olombe mu ving'oze kandi uvake iramu mugati ni ichova. 15Ulilombe zimita 133 vutambi, zimita 22 vuvambalaru, kandi zimita 13 vudiguluku. 16Olombe igulu vwi liato kandi oleke vwiyangu zisendimita 44 hagati hi igulu vwi liato nu muzimbega. Uliumbake mu vika vivaga kandi uviiki kiliango halovega. 17Inzi nziza kutuma imbura yi migelera ku lirova kudiviza kindu choosi kemenyi kulio. Vuli kindu ku lirova vilakakuzi, 18navuzwa inzi ndakalombe lilagana na ivi. Kandi ulakazie muliato nu mukali woovo, navayayi vovo kandi navakari vaavo. 19Oleete muliato vilombe viviri viosi ku vuli kilombe kiveeye mwoyo, kisaza nikikali, viduuki kuva mwoyo harara na ivi. 20Kuvuli manyonyi kolondekana nu lugano lwago, kandi zinyama kolondekana nulugano lwazio. Kandi vuli vindu viosi vimolaa kumalova, viviri kuvuli viosi vilaza ku ivi viduuki kuva mwoyo 21Uvuguli viukulia vie zing'ano ziosi, ivivio kandi viazo.” 22Nuhu yakola vuli kindu choosi cha Nyasaye yamulaga.
Markert nå:
LITANGA 6: LOGOOLI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
©Bible Society of Kenya, 2019
