MATIUS 6
6
Farkarkor ḇekur farsarser
6:1-4
1 #
Mat. 23:5
“Mkoswarepen, mkofrur awer fandun agama mkoḇena ro ḇarpon snonkaku insa smam na, snar rofyor mkofrur rarirya, nari mkosma ḇaḇyak ḇa ro Kma mkoḇedi ro Boiyaswa. 2Inja rofyor buk farsarser, mkonuk maon ḇeḇaryas awer na, raris kawasa ḇeḇarḇor sya sifrur ro rum-rum nadi ma ro rumbins swaf, insa sisma sanandik ro snonkaku. Yakofen faro mko: Kaku ḇeri ḇaḇyak sedi sisma ikwar. 3Mḇoi woḇo buk farsarser ido, ḇramsi ḇar rasar ya ipok ifawi awer rosai ḇramsi ḇar raku ya ifrur ya. 4Iḇye farsarser ḇena buk na kuker yakyokef, insa Kmami ḇemam roi ḇeyokef na nari myunsu na faro au.”
Farkarkor ḇekur nadi
6:5-15
(Luk. 11:2-4)
5 #
Luk. 18:10-14
“Ma rofyor mkoḇenadi, mkoḇenadi awer imnis snonkaku ḇemarares sya. Simarisen soresḇo sḇenadi ro rum nadi sena donna ma sampak farsam, insa kawasa smam si. Yakofen faro mko: Kaku ḇeri sisma ḇaḇyak sedi kwar. 6Ḇape rofyor waḇe ḇenadi, swun randum ro sim bedi, ma kwen kedwai ya ma ḇenadi faro Kmami ro moḇ ḇeyokef. Ma Kma bedi bemam roi ḇeyokef na nari myunsu na faro au. 7Oso wer rofyor mkoḇenadi mko kaḇkaḇer awer imnis raris snonkaku ḇefawi Allahḇa sya. Skara ḇo soḇo nadi ḇekwan na, nari naser kankarem. 8Inja mkomnis awer si, snar Kma mkoḇedi Ifawi roi ḇeḇor mkoḇe fandun na, ro fafisu mkor na ḇaim faro I. 9Inja mkoḇenadi radine:
Kma nkobedi ro boiyaswa,
Nkofasren Snomḇri kada,
10Ḇaḇesasoser Bedi ryama kada,
Marisen bedi ryarirya kada
Ro supswan ine imnis ro boiyaswa.
11Buk maro nko ro ras ine
roḇean namnis maro nko
12ma Wapyos nyaki sasar nkoḇena,
imnis nkakpyos nyaki sasar
snonkaku ḇeḇesasar maro nko sya;
13ma Wun nkoḇe fafrowes na awer,
mḇoi faspar nko bur Ibirisya.
[Snar Au ḇena Ḇaḇesasoser ya ma papaik ya ma payamyum ya isof fyoro-fyoro. Amin.]
14 #
Mrk. 11:25
Snar rofyor mkopyos snonkaku sasar sena, Kma mkoḇedi ro boiyaswa Dakpyos sasar mkoḇena kako. 15Ḇape rofyor mkopyos sasar snonkaku ḇa, Kma mkoḇedi kako Ipok dakpyos sasar mkoḇena ḇa.”
Mnuk farfor
6:16-18
16“Ma rofyor mkofarfor, mkomam saneso awer imnis snonkaku ḇeḇarḇor. Smam saneso, insa snonkaku smam si skara sisya ro ḇaḇefarfor. Yakofen faro mko: Kaku ḇeri sisma ḇaḇyak sedi kwar. 17Ḇape rofyor waḇe befarfor, rwem ḇrumbri ma bansren mkamsi, 18insa snonkaku sya smam awer ausya ro ḇaḇefarfor, mḇoi derer Kma bedi ro moḇ beyokef. Mḇoi Kma ḇedi ḇemam roi ḇeyokef nari myunsu na faro au.”
Mnuk sasewar nana
6:19-24
19 #
Yak. 5:2-3
#Luk. 12:33-34 “Mkosewar awer papus ro supswan ine; snar ro supswan ine nari snus ma praf nari nenafanamkok ma ḇekarau-rau sya simkok ma skarauna. 20Ḇape mkosewar faro mko papus ḇero boiyaswa; snar ro boiyaswa snus ma praf nenafanamkokḇa ma ḇekarau-rau sya sipok skakok na ma skarauna ḇa. 21Snar ro moḇ papus ḇena naisya roya, ro dia snembri isya kako.
22 #
Luk. 11:34-36
Mkamor ḇyepadamara faro ḇaken ya. Rofyor mkamsu suḇye, ḇaken ḇedi ḇesiper isnai; 23rofyor mkamsu suḇarḇor, beken ḇedi ḇesiper pyampan. Inja rofyor isnai ḇero au pyampan, nari pampan ya pyampan bos beri.
24 #
Luk. 16:13
Snonkaku oser ipok duf farmyan tuan risuruḇa. Snar rofyor rarirya, nari dayin oso ma iswar suminya, roḇa ido ḇyeuser faro oso ḇoi suminya ḇyefandun i ḇa. Mkopok mkoḇe manfyan faro Allah ma faro papus ba.”
Mnuk makakakwarek
6:25-34
(Luk. 12:22-31)
25“Yakofen faro mko: Mkomkakwarek awer kankenem mkoḇena, nari rosai mkan roḇa mkinem, ma mkomkakwarek awer ḇaken mkoḇena kako, rosai nari mkofmar na. Mkofawiḇake kankenem ya isyadi ro roḇean ma ḇaken ya isyadi ro famamar? 26Mkomam faro man sya ro farsyos, ḇeyakḇuḇer morḇa ma ḇeyakufḇa ma ḇeyakryur roḇean ro sayarḇa, ḇesyaḇo Kma mkoḇedi ro boiyaswa ḇyuk roḇean ḇemnis faro si. Inja mkofawiḇake mko kada mkosyadi bur ro man sya? 27Mansei ro fandu mko snar imkakwarek kankenem ḇyedi inja pyam rof oser monda ro nyan kankenem ḇyedi?
28Ma snaro mkomkakwarek roi ḇefmar? Mkomamepen mampyoper pampen ro maper, ḇesur ḇoi ḇefararur ḇa ma ḇefawi ḇeroren ḇa, 29#1Raj. 10:4-7; 2Taw. 9:3-6 ḇape Yakofen faro mko: Salomo kuker payamyum ḇyena kako, ḇape daksansuni kuker sansun ḇepyum inis pampen sya osoḇa. 30Inja raris Allah fyamankor aḇris ro maper, ḇeḇesya ro ras ine ma meser sisawen si ro for, inja Allah ipokḇake fa fyamankor mko syadi wer, ne, mko snonkaku ḇekyar mnis ḇa? 31Inja mkomkakwarek awer ma mkoḇo: Rosaiso nari nkan ya? Rosaiso nari nkinem ya? Rosaiso nari nkofmar ya? 32Roi nanefa kam er-er ḇeyakfawi Allah ḇa sya siso ḇesewar na. Ḇape Kma mkoḇedi ro boiyaswa Ifawi, mḇoi mkoḇe fandun nakam. 33Inja mkosewar bepon Ḇaḇesasoser Allah ma napnapes ḇyedi, nari nakaem neḇeḇuk fnoḇek faro mko. 34Inja mkomkakwarek awer meserdi, snar meserdi nya ananjar ḇardi. Ananjar ro ras-ras imnis faro ras ani.”
Markert nå:
MATIUS 6: LAIBHW
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
