MATIUS 8
8
Yesus, jipit taka ajaoromtaere atakam
(Mrk. 1:40-45; Luk. 5:12-16)
1Emesare. Yesus fami oup andaen. Owe tananerawa, Armat ipit fe asep ajukusiromdaesen. 2Owe ombare bamarem damo pitini potanak ipit takaam ajinaomen. Are Armat Ipit bipu jindi andaepuapen. “Dot! Wore fiaknak. Wore akot aportem, Wore damo akot dera atetaman.” Emes atakam aesimen. 3Yesus arawa, ban ajiraome, wanam era ipit damo ten ataetiien. “Dere emes akot. Wore damo akot aememey.” Emes atakam aesimen. Yesus emes atakam akorerawa, era owe ombare bamarem damo pitini potanak ametepakapiosen. Are damo akot aememen. 4Yesus arawa, “Wore ara pak atakam wan owe boesimtam bas. Wore ere, Allah Tame pak baem ipit akan ajakosey. Armat ipit wora baoorportan. Wore, Musa atakam asakamtame pak, Allah atetamey. Era pak wore damo akot aememarem, emes baporomtam are.” Emes atakam aesimen.
Yesus tentara karai baetam ipit ajaoromtaere atakam
(Luk. 7:1-10)
5Yesus kota Kapernaum ambaremen. Ambaremerawa, tentara komandan ipit Armat Ipit awotomen. Are atakam fiak ajanimen. 6“Dot! Dekarai baetam ipit tame asinta. Are kam. Are ajamsejirismara.” Emes atakam aesimen. 7Yesus arawa, “Emesare, Dere era ipit baoromtam aesostemin,” emes atakam aesimen. 8Me tentara komandan ipit ere, “Dere Wore awar apok. Erarawa Wore detame baemejii asan apok. Wore ere, atakam bambi pakorey. Me dekarai baetam ipit ere, ajaoremtem. 9Denom owe basakamtam atakam ji aeemin, wanam dere detentara owe atakam asakamtamemin. Dere wan tentara ipit, ‘Baesosey,’ emes atakam aesimtey, armat ipit aesosem. Dere wan ipit, ‘Bajinaoey,’ emes atakam aesimtey, armat ipitam ajinaom. Denom dekarai baetam ipit, ‘Emes pak paemey,’ emes atakam atakam aesimtey, ere armat ipit emes pak aemum.” Emes atakam aesimen. 10Yesus armat ipit atakam jane ajie ere, Are jinim aeen. Are atakam asep fe asarames owe akoromen. “Atakamnak, ara aemema ipit Allah eemnak bamesemkorom ipit. Dere Israel owe damon, ara aemema ipit awar owe bi bapor apoknak. 11Tare ere, baporay! Owe tanane, tapirmiin tapirmiin aejinaotemas. Are Abrahamam, Ishakam, Yakubam, Allah Ai Tapirmi amos takan ajamdetemas. 12Era asan bajiiap jii, ere Yahudi owe. Me, Allah, Yahudi owe tanane, era jiitinak asan akoromosomtem. Era asan ere, owe bate daytinak ambatetemas. Are damo jende atawuomtemas.” Yesus emes atakam aesimen. 13Ararawa, atakam era komandan ipit aokoromen. “Wore te! Dere era jiirey aeemas jipu aemmin.” Emes atakam aesimen. Emesare, era karai baetam ipit ametejaoromemen.
Yesus damo pota owe tanane ajaoromtaae atakam
(Mrk. 1:29-34; Luk. 4:38-41)
14Emesare. Yesus, Petrus tame ajiiemen. Ajiiemerawa, Are Petrus anapot damo aemanse aporen. 15Are era taot ban akurumen. Era taot arawa, ajufamapen. Era taotam awasite, wanam banda pak Armat Ipit atetamen.
16Pororawa, owe, bii ajak bomon owe tanane Armat Ipitpu atoomdaesen. Armat Ipit atakamiin era bii asakamtama ajaien. Erarawa Are era bii era owe jak bomon ambirimjisima ajaien. Era biirawa, aesosa ajaiesen. Armat Ipitam damo pota owe takes ajaoromtaera ajaien. 17Bonaknak ere, Allah atakam bakoretam ipit juas Yesaya, atakam akoren. “Me Armat Ipit dadamo kumiti pak aesomastem. Are dadamo pak aemosomtem.” Emes atakam aesimen. Me Yesus aeme pak, Yesaya atakam jipu.
Wan owe Yesus bajamkai atakam
(Luk. 9:57-62)
18Emesare. Yesus owe tanane afojompes aporen. Ararawa, abajamkai owe poman bajir atakam asakamtamen. 19Musa Basakamtam Atakam baememtam ipit takaam, Armat Ipit ambaromen. Are atakam Yesus akoromen. “Guru! Era samaniin samaniin aesostem, denom Wora ajamkaiemaartemin.” Emes atakam aesimen. 20Yesus arawa, atakam era ipit akoromen. “Me wasen juuri, to aptam. Sakaoam to aptam. Me Asamot Anakot Ajaoreme Ipit ere, baemames tame apok.” Emes atakam aesimen. 21Me wan bajamkai ipitam atakam Armat Ipit akoromen. “Tuhan! Dere deritipit se ato batakamwuapom.” Emes atakam aesimen. 22Yesus ere, atakam era ipit akoromen. “Dera jamkaian! Dambir owe, era wan dambir owe se amba bawuapomtas.” Emes atakam aesimen.
Kuur anama bwi Yesus atakam ji aees atakam
(Mrk. 4:35-41; Luk. 8:22-25)
23Yesusam ti asojuuen. Me abajamkai oweam era ti takan ajamsojuuesen. 24Itimbup aemeses, jende daytinak ajumjinaoen. Wo daytinakam ti bomon ajojuumen. Armat Ipit ere, ise emansen. 25Me abajamkai owerawa, Armat Ipit ambaromes, wanam ajitinesen. “Tuhan! Ajortaeraro! Dare bwi dambir aemtemarom apeno.” Emes atakam aesimesen. 26Armat Ipit arawa, atakam era owe akoromen. “Tare ere, apa ombareem? Tare Dera bamesem apok owe.” Emes atakam aesimen. Armat Ipit arawa, awasiten. Are atakam era kuur anama bwi asakamtamen. Emesare, era bwiam wuri apok aoemesemen. 27Era owerawa, jinim aeesen. “Are ta ipitim? Kuur anama bwi aatakam ji aeemas.” Emes atakam aesimesen.
Yesus, bii tanane ambirimjisime atakam
(Mrk. 5:1-20; Luk. 8:26-39)
28Emesare, Yesus poman ajiren. Are Gadara owe tapirmi ajiriten. Jipit amnukam dambir owe asan aejinaoemis, wanam Armat Ipit bimnuk aemamtaeremisen. Bii tanane, era ipit amnuk jak bomon aemapaarisin. Erarawa era ipit amnuk jokomannaken. Oweam era bokotpu baemeokorefe asan apoken. 29Era ipit amnukam atakam daytu akoreemisen. “Wore Allah Andep. Me, Wore wama pak emtaroam? Allah dara bajurusum bare, atakam etesakamtiie. Wore ere, dare bonak bajurusum ape?” Emes atakam aesimemisen. 30Era asanam setep apok, wo taso tanane bare ambaresen. 31Era ipitam atakam fiak Yesus ajanimen. “Wore dare ara ipit amnuk jak bomon aebirimjisimtaroam, dare era wo damo bomon bajarejiiteter, atakam asakamtamaro.” Emes atakam aesimen. 32Armat Ipit arawa, atakam era bii akoromen. “Emesare, baesosay!” Emes atakam aesimen. Era biirawa, era ipit amnuk jak bomon awarimjises, wanam era wo damo bomon ajarejiiteteresen. Era wo tanane takes arawa, imtuu fami fop akukusendaesen. Are bwi akan ajakapua ajaiesen. Are bwi dambir atesen. 33Era wo taso banamek batai owerawa, ombare aesosesen. Are kota aesosesen. Are era asan era apores pak takes, atakam aesimtamesen. Are jak bomon bii owe aemes pakam atakam aesimtamesen. 34Era kota owe takesam, Yesus bimnuk baemamtaer ajisesen. Are Yesus bi apores arawa, Armat Ipit atapirmi beken bajios, atakam fiak ajanimesen.
Markert nå:
MATIUS 8: LAIASC
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
@LAI 1994
