Hechos 10
10
Pedro Cornelio ejunö ja̧nö yöawina wene
1Bakwo̧ romano jojo, Cesareanö jo̧ma Cornelio mikwo̧ ji̧jetö. Jo̧bama ciennö guardia jojodö, italianos mikwadö tjuluwo̧bijetö. 2Ja̧danö, Cornelioma Diosnö ösödö ji̧abijetö. Jo̧babi jo̧ba ömöledöbi Diosnö otiwanö yebabinö omukwatö ji̧abijadötö. Jo̧bama judío jojodötjö tju̧kwa jwibadönö pjabatiabijetö. Ja̧danö, Cornelioma kabatökönö Diosnö abebö ji̧abijetö.
3Ju'wi möle, ja̧wo̧ wöatena, ángelma öwaitjöda öwawachijetö Cornelionö, i̧'wi̧di̧danö. Ja̧danö, ángelma Cornelio eju okwa tebachö jwöbijetö:
—Cornelio—jwöbijetö. 4Ja̧danö, Cornelioma jo̧banö edö jwiinö yebaibijetö. Atadijetö:
—¿Tajida Chuluwo̧?— jejenö atadökwe ángelma jö̧ba̧lijetö:
—Cornelio, Diosma ökwö akebi̧ma a̧ja̧kwö omukwato̧, ja̧danö usula jojodönö pjakati̧bi edö omukwato̧. 5Babema kwömöayedönö webi Jopebe tji̧'yo, bakwo̧ Simón mikwo̧nö öbibö tjichejebo, baikwö icho. Jo̧bama ju'wi imi Pedro mikwo̧. 6Jo̧bama jelo̧ Simón mikwo̧kwö, chi̧wo̧dö tji̧sȩdi̧ju jawa otido̧kwö ö̧jobe, nöödö ojwe ö'öbösejunö— jö̧ba̧lijetö ángelma. 7Ikenama tjo̧wi̧ ángelma ȩwa̧jabe okobe Cornelioma ömöayedö du̧ju̧tajanö jwöbijetö tjichobö. Jelo̧, iteda ömöayedötjö guardia luwo̧nöbi, Diosnö ösödo̧nö ichobö jwöbijetö. 8Ja̧danö, jobadö ichajadönö Cornelioma yöbawijetö okobe jwiinö ángel yöawaja̧ma. Yöawaja̧ ikenama webijetö jobadönöma Jopebe tji̧'yobö Pedronö öbibö.
9Ja̧danö, ju'wi dewachö, jweinö ö̧jena, jobadö 'ya̧jadöma Jopetjöma yöneawachibobe 'yi̧jadötö. Yöneawachibobe tjichena Pedroma Diosnö abebö mö nöchijetö o̧do wame. Jobadö tjichakwa̧ma wajwibijetö Pedroma. 10Ja̧danö, o̧do wame ö̧jemi a̧wi̧chi̧lö̧jachibijetö Pedronöma. Ukwo jö̧a̧lijayonö ina tobö kabatijöködötö. Ina kwakwawa tjotidonö o̧do wame te'ada̧lö Pedroma i̧'wi̧di̧danö edijetö. 11Ja̧danö, jo̧bama mölejȩ po̧ekwachibobe edijetö, i̧'wi̧di̧danö. Ja̧danö, jobe mölejȩ po̧ekwachibobetjö edijetö sawana'wodanö jala'wo, ö'wejemu jawa 'do̧'do̧kwetenia do̧lachibö böjȩkwö jwiachibobe. 12Jwiacha'wonöma tebo luwa okobe deinö tjö̧ja'wo edijetö Pedroma. Nijinö kwebachadöbi, nijinö töbawadöbi, mö köba̧ladöbi ja'wonö tjö̧jobe edijetö. 13Ikenama Pedroma iwene a̧ja̧kwijetö, baikwö yöawi̧:
—Pedro, a̧laibö kwabi kwukwo— jö̧ba̧lö. 14Ja̧danö, Pedroma, ja̧ iwene a̧ja̧kwö jö̧ba̧lijetö:
—Chuluwo̧, kwabö chukwökena, la'akatjöda kwiachijökötö jobadöjayedönöma, judío jojodönö tjukwoko wetjinawö̧nöma. Jobadönöma, sulabedö, jö̧ba̧lö, yötja̧lawö̧nö la'akatjöda tjukwajichököwö̧ ökwödöma, judío jojodöma. 15Ikenama yemidanö Pedroma a̧ja̧kwijetö iwenema:
— Pedro babema bidöma otiwadö jö̧ta̧la. Sulabedö jö̧ka̧la Pedro, Dios bidöma otiwadö, jö̧ba̧lö, kwukwobö weawö̧nöma— jö̧ba̧lö. 16Ja̧danö, Pedroma ja̧jaye wenema wa̧pötakwanö a̧ja̧kwijetö. Ikenama sawana'woma yemidanö do̧lachibö kaekwajijetö mölejȩbe. 17Ja̧danö, Pedroma ina ja̧ edaja̧ma, ¿Tajijö? jö̧ba̧lö, omukwatö ö̧jonö Cornelio weajawö̧ma tjöekwemi apjudenö ichibijadötö. Jobadöma, abönö ju'wedönö Simón eju jemi abebö a̧ja̧kwajadö Simón ejunö ichibijadötö. 18Ja̧danö, ichibajadö abebö a̧ja̧kwijadötö, Simón, ju'wi imi Pedro mikwo̧, jejunö ö̧jojobö.
19Ja̧danö, jobadö tjichibonö Pedro ina edaja̧ omukwatö ji̧jetö. Ja̧danö, jobe ja̧nö omukwatonö Dios O̧'wo̧ Luwo̧ma jö̧ba̧lijetö jo̧banöma:
—A̧ja̧kwitjö. Wa̧medukwa ömadöma ichajadö tjisakwa ökwönö. 20Jobadönö kwedo yutubaji. Ja̧danö, öpöjödabökönö jobadökwö kwi̧'yo, ötjö jobadönö wetajobetjö̧— jö̧ba̧lijetö Dios O̧'wo̧ Luwo̧ma Pedronöma. 21Jejenö jö̧a̧liökwe Pedroma jobadö tjö̧jobekwö yutubajö jö̧ba̧lijetö:
—Ötjödasa edö kwichaja̧duwökwema. ¿Tajawedö kwichaja̧duwada?— abebö a̧ja̧kwijetö. 22Jejenö abebö a̧ja̧kwiawö̧ atadijadötö:
—Duluwo̧ Cornelioma, ciennö guardia jojodö tjuluwo̧ma weatö ökwödönöma ökwönö öbibö di̧'yobö. Jo̧ba Duluwo̧ma otiwanö omukwatö jo̧. Diosnö otiwanö yebabinö omukwato̧. Okobe deinö judío jojodöma tjösödökwe Duluwo̧nöma. Dios weajökwe ángelma öwawachajo̧ webijetö Duluwo̧nöma ökwönö weobö, iteda ejube kwi̧'yobö, ökwö yökawi̧ a̧ja̧kwobö— yöbawijadötö. 23Jejenö yötjawiökwe Pedroma jobadönö tebatijetö eju okwa, jejunö tjabobö ja̧ yö̧tema. Ja̧danö, ju'wi dewachö Pedroma wilubö 'yi̧jetö jobadökwö. Ju'wedöbi ichijadötö Jopenö ju̧kwadö, Jesúsnö ösödadöma.
Cornelio jö̧a̧lina wene Pedronö, Cornelio eju okwa tebachajo̧nö
24Jemi ikena dewachö mölema Cesareanö ichibijadötö. Ja̧danö, Cornelioma te'ada̧lijetö jobadönöma, ömöledökwö, ejukwö tjichobö jwöajawö̧kwö. 25Ikenama Pedro, Cornelio ejunö teachakwo̧ ichenama Cornelioma u̧yu̧ju̧ko̧nö jamatö bȩko̧ko̧nö bȩbachibijetö, Pedronö ösödö. 26Jo̧kwaijayonö Pedroma jo̧banö a̧lapedijetö, A̧laibi, ötjöma jojosa, jö̧ba̧lö. 27Ikenama Cornelioma, Pedrokwö yöba̧lakwawiabö eju okwa tebachijetö. Eju okwama jojodö ba̧jekwadö ju̧kwijadötö. 28Tebachajo̧ Pedroma jobadönö yöbawijetö:
—Ökwödöma kwöwaisaduwa ökwödö judío jojodöma judío jojodöböködökwöma tebachöbi dö̧jokobe. Ökwödö duju̧kwobö weawa weokobe ökwödönöma judío jojodöböködökwö dö̧joböma. Jo̧kwaijayonö Diosma ja̧ chomukwati̧ omukwatökönö chöbalewachinö ja̧inobe. Bakwo̧nöbi, Sulabo̧, dö̧jobö lȩebökwe, jö̧ba̧lö, chomukwatokobö ja̧inobe Diosma. 29Jejenö chomukwati̧ chöbalewachinö ja̧inobetjö̧, öpöjödabökönö chichatö baima. Jo̧kwaobetjö̧, yöbawitjö, ¿Tajawedö chichobö kwa̧debinada?— jö̧ba̧lijetö 30Jejenö jö̧a̧liökwe Cornelioma yöbawijetö:
—Belö ö'wejemu möle baledibajabe, babedajayena, bejutjö Diosnö atebijatö. Jejenö atebonö omönanö jelo̧ öwawachijatö ötjö chöba a'o, kamijido̧ dewado̧ salöado̧ 'dubawo̧. 31Jo̧bama öwawachö jö̧a̧lijatö, baikwö: Cornelio, Diosma ökwö akebi̧ma a̧ja̧kwö omukwato̧, ja̧danö usula jojodönö pjakati̧bi edö omukwato̧. 32Babema kwömöayedönö webi Jopebe tji̧'yo, bakwo̧ Simón mikwo̧nö, ju'wi imi Pedro mikwo̧nö öbibö tji̧'yo baikwö icho. Jo̧bama jelo̧ Simón mikwo̧kwö, chi̧wo̧dö tji̧sȩdi̧ju jawa otido̧kwö ö̧jobe, nöödö ojwe ö'öbösejunö. Jejenö weijatö Diosma ötjönöma. 33Jejenö weitjö̧ chömöayedönö wetijatö ökwönö öbibö tji̧'yobö baikwö kwichobö. Ökwöma otiwanö kwichajabe. Babema ökwödöma okobe deinö, Dios öba a'o bena dö̧ja da̧ja̧kwobö okobe jwiinö Duluwo̧ weina ökwönöma—jö̧ba̧lijetö Cornelioma.
Pedro Cornelio eju okwatjö yöawina wene
34Ikenama Pedroma yöbawijetö jobadönö:
—Babema tjo̧wi̧ chöwaisachiba. Diosma okobe deinö, jelobe ju̧kwadönöbi jelobe ju̧kwadönöbi bakwaibedödanö bakwainö edo̧. Diosma Israel jojodönöbi ju'wedönöbi bakwainö ösödo̧. 35Bakwo̧, jelobe jo̧bi jelobe jo̧bi, Diosnö yebabinö omukwato̧nö Diosma otiwanö edobe—yöbawijetö—. 36Kwöwaisaduwa, Diosma yöbawijetö iteda otiwa jawa wene ökwödönöda, Israel jojodönöda. Ja̧ wenema, okobe jwiinö Duluwo̧ Jesucristo ö̧jina wene. Jesucristo, ökwödö Dioskwö otiwanö dichibanö pjaatina wene, ja̧ wenema. 37Ja̧ wenema abönö yötjawinobe judío jojodö tjitebotjö Galilea nijitjö, Juan Ojwenö Bu̧dato̧ yöawaja̧ ikena. Ikenama okobe jwiinö Judea nijitjö yötjawinobe— yöbawijetö Pedroma—.
38Ja̧danö, kwöwaisaduwa Diosma webijetö iteda O̧'wo̧ Luwo̧nö Jesús, Nazaretnö da̧peachinakwö ö̧jobö. Ujulubi iyijetö Diosma Jesúsnöma. Ja̧danö, Diosma Jesúskwö ö̧jobetjö̧, Jesúsma okobe jwiinö i̧'yobema otiwanö pjabatö 'yi̧jetö. Otiwanö otidiabijetö okobe deinö Awetja sulabenö ja̧inawö̧nöma, Diosma jo̧bakwö ö̧jobetjö̧. 39Ja̧danö, ökwödöma dedijatö Jesús otidobe, Jerusaléntjöbi, jelobe judíos tjuju̧kwobetjöbi. Ju'wibi yötawa: Jojodöma jo̧banöma ö'wöchinö ja̧bö towisa'onö bȩbö tjujunijatö. 40Jo̧kwaijayonö Diosma Jesús tjeachajinö ja̧bijetö, ö'wöchajobetjöma wa̧pötakwa möle o̧penö. Öwawachinö ja̧bijetö Diosma Jesúsnöma. 41Öwawachinö ja̧ijayonö okobe deinö tjedobö ja̧bijökötö. Ökwödönöda, Jesús ö̧jina yödawobö Dios 'da̧batö ujuninawö̧nöda öwawachijatö Jesúsma. Jesús tjeachaja̧ ikenama du̧kwabi jo̧bakwö dukwijatö, ja̧danö, owöbi dowijatö jo̧bakwö. 42Ja̧danö, jo̧bama weijatö ökwödönöma jojodönö yödawobö Dios jawa otiwa wenema. Ja̧danö, ju'wibi yödawobö weijatö Jesúsma ökwödönöma. Diosma Jesúsnöda webijetö, ju'wi möle jojodö wobajadöbi, ina 'yaba̧ladöbi tjö̧ji̧ma otiwojobö, sulojobö, jö̧ba̧lö, yöawobö. Ja̧ wenebi yödawobö weijatö Jesúsma ökwödönöma. 43Okobe deinö Dios yöawi̧ yöba̧ladöma damötjö yöbawijadötö, Jesúsnö ösödadöma suli̧ jwibadö batjibakwedö, jö̧ba̧lö. Ja̧danö, yöbawijadötö, Jesúsnö ösödadö tjusuli̧ma, Jesús ujulunö söbebö loobetjö̧ suli̧ jwibadö batjibakwedö, jö̧ba̧lö— yöbawijetö Pedroma Cornelio eju okwa ja̧dönöma.
Cornelionö, Cornelio ömöledönö, Israel jojodöböködötjijayonö Dios O̧'wo̧ Luwo̧ jobadö tjo̧'wo̧ luwo̧nö tebachibö öjamatina wene
44Ikenama Pedro ina yöawonö Dios O̧'wo̧ Luwo̧ma ichö tebachibö jamatijetö okobe deinö Pedro yöawobe a̧ja̧kwadönöma. 45Ja̧danö, Pedrokwö ichajadö, Jesúsnö ösödadöma judío jojodöma eda̧lö, ¡Ayö! Bidöma judío jojodöböködötjijayonö Dios O̧'wo̧ Luwo̧ tebachibö öjamatobö weajabe Diosma, jö̧ba̧lö, omukwatijadötö. 46Jobadöma Cornelionöbi, Cornelio ömöledönöbi, Diosnö tjösödobe ju'wedö tjiwenenö, jobadö wajwitji̧ tjiwenenö tja̧ja̧kwajobetjö̧ jejenö omukwatijadötö, Dios O̧'wo̧ Luwo̧ma tebachibö öjamatajabe jobadönöma, jö̧ba̧lö. Ikenama Pedroma jö̧ba̧lijetö:
47—Bidönöma, Israel jojodöböködönöma, Dios O̧'wo̧ Luwo̧ tebachibö öjamatajabe, ökwödönö Israel jojodönö tebachibö öjamatinadanö. Jo̧kwaobetjö̧ ojwenö dubu̧datodönö. Bakwo̧bi deobe, jobadönö ojwenö bu̧datökönuwi yöba̧lo̧ma, Dios O̧'wo̧ Luwo̧ öjamatajobetjö̧— jö̧ba̧lijetö Pedroma. 48Ikenama webijetö jobadönö ojwenö tjubu̧datobö, Jesucristonö tjösödi̧ tji̧sebobö. Ikenama ojwenö bu̧datijadötö, Pedro weaja̧danö. Ikenama, jobe ju̧kwadöma ösödö abebijadötö Pedronöma:
—Juluwanöma ȩwa̧jökönuwi, ökwödökwö ja̧wi ja'yubeda lekwe, jö̧ba̧lö— abebijadötö.
Markert nå:
Hechos 10: WPC
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
©2021, All Rights Reserved
